လောဘကြီး၍ ကပ်စေးနည်းသော သူဌေး

#ဘယ်အရာမှ မတည်မြဲခြင်းသာ အမှန်တရားဖြစ်သည်. . . .။
တောင်ကိုးရီးယား၏ သန်းကြွယ်သူဌေးမိသားစုသည် ဆွေစဉ်မျိုးဆက် ကုန်းကောက်စရာမရှိအောင် ဆင်းရဲသော ဘဝ သို့ ရောက်ရှိသွားတော့သည်။
******************
၁၉၈၇ခုနှစ်
ဝူးဆန်း (Woosung) ဆောက်လုပ်ရေးအဖွဲ့သည် ၄ ထပ်တိုက်တခုကို တာဝန်ယူ ဆောက်လုပ်နေခဲ့သည်။ အဆောက်အဦး ၃ ပုံ ၁ ပုံ ပြီးသလောက်ဖြစ်နေစဉ် ရီဂျွန်းဆိုသော ပုဂ္ဂိုလ်ရောက်လာပြီး အဆောက်အဦး အင်ဂျင်နီယာချုပ်ကို ဒီလိုပြောလိုက်သည်။
"၄ ထပ်တိုက်ကနေ ကုန်တိုက်ကြီး ပြောင်းဆောက်မယ်ဗျာ.."
အင်ဂျင်နီယာက ရှင်းပြသည်။
"မဖြစ်နိုုင်ပါဘူးခင်ဗျာ...။ကျွန်တော်တို့အနေနဲ့ လူနေအိမ်နဲ့ ကုန်တိုက်..ဒီနှစ်ခု အောက်ခြေတိုင် အုတ်မြစ်ချရတဲ့ သတ်မှတ် စံချိန် စံညွှန်း ဟာ အလွန်ကွာခြားလှပါတယ်။အစကနေပြန်ဆောက်ရပါမယ်ခင်ဗျာ..."
"ဪ... ဟုတ်လား ဒါဆိုခင်ဗျားတို့ အကုန်လုံး အလုပ်ဖြုတ်တယ်ဗျာ မနက်ဖြန်က စပြီးမလာနဲ့တော့"
သန်းကြွယ်သူဋ္ဌေး ရီဂျွန်းသည် ဆမ်းပွန်းဟူသောအမည်ဖြင့် ဆောက်လုပ်ရေးလုပ်ငန်း ကုမ္ပဏီကြီးတခုကို ကိုယ်ပိုင်ထူထောင်လိုက်လေသည်။
သူကိုယ်တိုင် ဥက္ကဋ္ဌ လုပ်ပြီး ကုန်တိုက်ကြီးကို ဆက်ပြီး ဆောက်လိုက်တော့သည်။ သူ့သားကို ကုန်တိုက်ပိုင်ရှင် အဖြစ်ခန့်အပ်သည်။
သူသည် အင်ဂျင်နီယာ ကိုအမိန့်ပေး၍ အဆောက်အဦး၏အသေးစိတ် အဆောက်အဦးပုံစံစာရွက် (blueprints)ကို သူ့စိတ်ကြိုက်ပြောင်းသည်။
" ၅ ထပ်ဆောက်ကွာ.."
အင်ဂျင်နီယာများအား ဘာမှပြောခွင့်မပေး။
လေးထပ်တိုက်ဆောက်ရန် အတွက်သာ အုတ်မြစ်ချထားသော အဆောက် အဦးကို ၅ ထပ်ကုန်တိုက်ကြီးသို့......,
စက်လှေကားများ ထည့်သွင်းမစဉ်းစားထားသော လေးထပ်တိုက်အဆောက်အဦးကို အလွန်လေးသော စက်လှေကားများစွာပါသည့် ကုန်တိုက်ကြီးသို့.....,
"၂ ထပ်ကို စာကြည့်တိုက်အကြီးကြီး လုပ်မယ်.."
အလွန်လေးသော စာအုပ်များအတွက် ခိုင်မာသောကြမ်းခင်းလိုအပ်သည်ကို ရီဂျွန်းဂရုမစိုက်ခဲ့......။
အစိုးရဘက်က စစ်ဆေးရေးဝင်လျှင် လာဘ်ထိုးလိုက်သည်...။ ငွေရှိသော ရီဂျွန်းသည် ပို၍ပို၍ ချမ်းသာချင်ကာ လောဘမသတ်နိုင်ဘဲ ထင်တိုင်းကြဲနေတော့သည်။
ထို့နောက် သူသည် သူ့ကုန်တိုက်ကြီး၏ နံဘေးတွင် သူ၏ ဆောက်လုပ်ရေးအဖွဲ့ ဆမ်းပွန်း အမည်ဖြင့် လူနေတိုက်ခန်းအဆောက်အဦး အမြင့်များ ထပ်ဆောက်လိုက်သည်။
ထိုစဉ်က တောင်ကိုးရီးယားနိုင်ငံ တိုးတက်ချမ်းသာကာစ အချိန်ဖြစ်သည်။ ပြည်သူတို့သည် ဈေးကြီးကြီး တိုက်ခန်းမြင့်မြင့်တွင် ကြွားကြွားဝါဝါ နေလိုကြသည်။ နိုင်ငံခြားမှ တိုက်ရိုက်လာသည့် ဈေးကြီး ပစ္စည်းတို့ဖြင့် ပြည့်နှက်နေသော ကုန်တိုက်ကြီးတွင် ဈေးတက် ဝယ်ချင်ကြသည်။ ဈေးမဝယ်နိုင်ပင် လျှင်တောင် လမ်းသလား၍ ပိုက်ဆံရှိချင်ယောင်ဆောင်ချင်ကြသည်။
ရီဂျွန်းသည် ထိုအချက်ကို ကောင်းစွာနားလည်၍ အသုံးချလိုက်သည်။ ချမ်းသာသောသူများဆီသို့ ခမ်းနားသော အိမ်တိုက်ခန်းများ နှင့် ဇိမ်ခံပစ္စည်းများရောင်းချခြင်းအားဖြင့် သူတို့၏ ငွေခြူချ ရမည်ဖြစ်သည်။
ရီဂျွန်းသည်ဒေါ်လာနှင့်ပြောမည်ဆိုလျှင် ဒေါ်လာသန်းကြွယ်သူဌေး ဖြစ်ပါသည်။ သို့သော် သူသည် ကပ်စီးနည်း၍ လောဘကြီးသော လူယုတ်မာသူဌေးဖြစ်သည်။ ထိုသူဌေးတို့၏ထုံးစံအတိုင်း ငွေတဖို့သာကြည့်ခဲ့သည်။
၎င်းကုန်တိုက်အဆောက်အဦး အန္တရာယ်ရှိသည် မရှိသည်ကို အလေးမထားပါ။ ကုန်တိုက် ၅ ထပ်ကို မြန်နိုင်သမျှမြန်မြန် နဲ့ ပေါပေါ ဆောက်မည်...။
အပေါ်ယံကိုမူ အလွန်ကြည့်ကောင်းသော ခမ်းနားသည့် အဆောင်အယောင်တို့ဖြင့် တန်ဆာဆင်မည်။
သူ့စီးပွားရေးဆိုင်တွေဖွင့်မည်။ ကျန်ဆိုင်များကိုငှားစားမည်။
*********************
ဆမ်းပွန်း ကုန်တိုက်ကြီးကို၁၉၈၉ ခုနှစ်တွင် အပြီးဆောက်လုပ်၍ ၎င်းကို ၁၉၉၀ ဂျူလိုင် ၇ရက်နေ့တွင်ဖွင့်လှစ်ခဲ့သည်။
*********************
ကုန်တိုက်၏ ငါးလွှာအပေါ် အမိုးတွင် ကုန်တိုက်တခုလုံးကို အအေးဓာတ်ပေးသော ကြီးမားလေးလံသော အဲယားကွန်းပန်ကာပုံးကြီး (ကွန်ပရက်စာ)၃ ခု ရှိသည်။
( ၎င်းတို့ကို air conditioner ၏ compressor ဟုလည်းခေါ်ကြသည်။)
ထိုစက်ကြီး ၃ခု သည် စုစုပေါင်း ၃၆ တန်လေးသည်။ ထိုစက်ကြီး ၃ခု လည်ပတ်လိုက်လျှင် ၈၇ တန်အထိ အလေးချိန်မြင့်တက်သည်။
ထိုအလေးချိန်သည် ၅ လွှာခေါင်မိုး က ထမ်းဆောင်နိုင်သည့် အလေးချိန်ထက် ၄ဆ ပို၍လေးနေပါသည်။
ကုန်တိုက် ငါးလွှာရှိ ထိုအဲယားကွန်းပုံးကြီးများသည် အသံကျယ်လောင်စွာမြည်၍ နံဘေးမှ ရီဂျွန်း ဆောက်လုပ်ထားသည့် အဆင့်မြင့်တိုက်ခန်းမှလူတို့သည် စိတ်ဒုက္ခရောက်ကြသောကြောင့် ပြဿနာတက်လေတော့သည်။
ဒီလိုပြဿနာတက်လျှင် သူ့တိုက်ခန်းတွေ အရောင်းထွက်မည်မဟုတ်...။
"အဲယားကွန်းစက်ကြီးတွေကိုအမိုးရဲ့ တဖက်ကိုရွှေ့" ရီဂျွန်းက ပြောလိုက်သည်။
"အလွန်လေးတဲ့အတွက် ကျွန်တော်တို့ ကရိန်းငှားရပါမယ်..ကရိန်းနဲ့မရွှေ့ရင် ကုန်တိုက်ကြီး ဒါဏ်ဖြစ်သွားပါလိမ့်မယ်"ဟုအင်ဂျင်နီယာအဖွဲ့ကပြောသည်။
ကပ်စေးနည်းသော သူဌေးသည်...
"ဘာလို့ ကရိန်းငှားရမှာလဲ မင်းတို့တွေ ခြေတွေလက်တွေရှိနေတာဘဲ.. ဒလိမ့်တုံးတွေနဲ့ခံပြီး လူအင်အားနဲ့ရွှေ့"
နဂိုထဲက မတောင့်တင်းသောခေါင်မိုးသည် အဲယားကွန်းစက်ကြီးများရွှေ့ပြီးသောအခါ အက်ကြောင်းများ စ တင်ပေါ်လာတော့သည်။
ဤအချက်သည် ကုန်တိုက်ကြီး တခုလုံးကို ၂၂ စက္ကန့်အတွင်း ပြိုကြစေကာ အမှိုက်ပုံအဖြစ်ပြောင်းလဲလိုက်သောအဓိက အချက်ဖြစ်လေသည်။
***********************
ကုန်တိုက်ကြီးမပြိုကျခင် လ အနည်းငယ်ကစပြီး ကုန်တိုက်ကြီးရဲ့ ၅လွှာသည် အောက်ကိုနိမ့်ဝင်လာခဲ့တယ် ဆိုတာကို ဥက္ကဋ္ဌကြီး ရီဂျွန်းသိနေခဲ့သည်။ ကုန်တိုက် အုပ်ချုပ်ရေးမှုးက မကြာခဏတင်ပြခဲ့သည်။
ရီဂျွန်းသည် ၅ လွှာခေါင်မိုးပေါ် မကြာခဏတက်ကြည့်ခဲ့သည်။
အောက်ကမော့ကြည့်လျှင် မသိသာပေမဲ့ ခေါင်မိုးပေါ်တက်ကြည့်လျှင်အမိုးကြီး၏ ဘေးပတ်လည်တိုင်များသည် အပေါ်ကိုထိုးထွက်နေသည်ကိုမြင်ရပြီး အမိုးကြီးက တဖြည်းဖြည်းနိမ့်ဝင်နေသည်ကိုထင်ရှားစွာတွေ့လိုက်ရသည်။
ပြင်သင့်ပြီ....။ ဒီ အမိုးလေးပဲပြင်လို့ ပြီးမည်မဟုတ် ..ဒီအဆောက်အဦးနှင့် ပတ်သက်ပြီး သူ ဘာတွေလုပ်ခဲ့သည်ကိုသူအသိဆုံး...။
အစ အဆုံးပြန်ဆောက်ရမည်။သုံးထားသည့် အပေါ်ယံ အဆောင်အယောင်ပစ္စည်းတွေကလဲ အလွန်ဈေးကြီးသည်။ဒါတွေ အကုန်ဆုံးရှုံးတော့မည်။
ကပ်စေးနည်းသော သူဌေးတုန်လှုပ်သွားသည်။
ချွေတာကာမှ နှစ်ဆကုန်တော့မည့်အဖြစ်...။
သူ့အား တားမြစ်ခဲ့သော အင်ဂျင်နီယာများ၏ စကားများကို ကြားယောင်မိသည်။
"အရှက်ကွဲပြီ..."
ဒီအတွေးကိုတွေးမိသည့် မာနကြီး၍ ကပ်စေးနည်းသော သူဌေးသည် ဒီကုန်တိုက်ကြီးကို အစ အဆုံးပြန်ဆောက်ရမည်ကို မေ့ပစ်လိုက်တော့သည်။
"၅ လွှာက လေးပင်တဲ့ပစ္စည်းတွေ အောက်ကအလွှာတွေကိုရွှေ့.."

၅ လွှာသည် စားသောက်ဆိုင်များရှိသော စားသောက်တန်းဖြစ်သည်။
********************
ကုန်တိုက်ကြီးမပြိုကျခင် တလအလို....။
ရီဂျွန်းသည် ၅ လွှာခါင်မိုးကို ထပ်၍ တက်ကြည့်ခဲ့သည်။ အက်ရာတွေ တော်တော်များနေလေပြီ။ ထိုအခါ ရီဂျွန်းသည် အင်ဂျင်နီယာများကိုခေါ်၍ ခေါင်မိုးတခုတည်းကိုသာ ပြင်ဆောက်ရန် ပြသခဲ့သည်။
"အန္တရာယ်အလွန်ကြီးပါတယ် သူဌေးမင်း..ခေါင်မိုးတခုတည်းပြင်လို့မရပါဘူး..။ဒီအဆောက်အဦး ပြိုကျနိုင်ပါတယ်..."
အန္တရာယ် ရှိတာတော့ သေချာပြီ...။
"အင်း ချက်ချင်းတော့ မပြိုကျသေးပါဘူး "
ပြိုကျတဲ့အထိ စောင့်ပြီး ရသမျှငွေရှာလိုက်ဦးမယ်...လူနည်းနည်းပါးပါးထိခိုက် သေဆုံးတော့လည်း ငွေနဲ့ဖြေရှင်းလိုက်မယ်။"
***************************
ကုန်တိုက်ကြီး မပြိုခင် တရက်အလို...။
"ခင်ဗျားတို့ ထမင်းသုပ်က သဲတွေနဲ့ပါလားဗျ... "
စားသောက်ဆိုင် တာဝန်ခံရောက်လာသည်။
"တောင်းပန်ပါတယ်ရှင် အသစ်ပြန်လုပ်ပေးပါ့မယ်...။ ကျသင့်ငွေလဲမယူပါဘူး"
စားသောက်ဆိုင် တာဝန်ခံ စဉ်းစားရကြပ်နေသည်။ ဒီနေ့ဒီလိုပြဿနာမျိုးကြုံတာ ဒါပါနဲ့ဆို ၃ ကြိမ်ရှိပြီ။
သူမ စိတ်ဆိုး မာန်ဆိုးနဲ့ နောက်ဖေးဆောင်ထဲသို့ ဝင်သွားသည်။ ဟင်းရွက်ဆေးနေသော အဒေါ်ကြီးက အမိုးကို လက်ညှိုးထိုးပြရင်း
"အပေါ်က သဲတွေ ဘိလပ်မြေမှုန့်တွေ ဆက်တိုက်ကျ နေတယ် ဟင်းသီးဟင်းရွက်တွေ ပြန်ဆေး အုပ်ထားလည်း ထပ်ကျနေတော့ ..ကျွန်မတို့ အခက်အခဲရှိပါတယ်"
စားသောက်ဆိုင်တာဝန်ခံက ကုန်တိုက်အုပ်ချုပ်ရေးမှုး ကိုတင်ပြလိုက်သည်။
"မင်း ဘယ်သူ့ကိုပြောလိုက်သေးလဲ...?"
"ဘယ်သူ့ကိုမှ မပြောပေမဲ့ အောက်ခြေဝန်ထမ်းတွေ အရင်သိနေပါတယ် အုပ်ချုပ်ရေးမှုကြီးရှင့်.."
"အေး..မင်းတို့ဆိုင်ကို ဒီနေ့ကစပြီးပိတ်လိုက်တော့...ဘာမှ မဟုတ်ပါဘူးကွာ ခေါင်မိုးပေါ်ကအဲယားကွန်းတွေဖွင့်ထားတော့ တုန်နေလို့ ဒီလိုဖြစ်တာ "
ထို့နေ့က ထမင်းစားနေသောသူများအပေါ်သို့ပင် သဲမှုန်များ ဟိုနည်းနည်း ဒီ နည်းနည်းကျလာတော့သည်။
သို့သော် ဘယ်သူမှမရိပ်မိခဲ့...။ အဲဒီအခြမ်းက ထမင်းသုပ်ဆိုင် ပိတ်လိုက်သည်။
****************
၁၉၉၅ ခုနှစ် ၆ လပိုင်း ၂၉ ရက်နေ့...။
ညနေ ၂ နာရီ...။
ကုန်တိုက်ကြီးပြိုကျသောနေ့ဖြစ်သည်။
ဥက္ကဋ္ဌကြီး ရီဂျွန်းသည် ကုန်တိုက်ကြီး၏ ရုံးခန်း တွင် သူ့သား ( ကုန်တိုက်ပိုင်ရှင်) နှင့်အတူရှိနေခဲ့သည်။
ကုန်တိုက် အုပ်ချုပ်ရေးမှုးကဥက္ကဋ္ဌ ရီဂျွန်းနှင့် သူ၏သား ကို မနေ့ကအကြောင်း တင်ပြသည်။
"ဒီနေ့ ပိုပြီးဆိုးလာတယ် အမိုးတွေအက်ပြီး သဲတွေကျလာပြီ သူဌေး။ အဲယားကွန်းကြီး ကျွံကျလာတော့မယ်"
"အရေးပေါ် အစည်းအဝေးလုပ်ကြမယ်..." ရီဂျွန်းက ပြောလိုက်သည်။
အထက်လူကြီး အနည်းငယ်သာ အစည်းအဝေးတက်ရောက်ခွင့်ရခဲ့သည်။
"အုပ်ချုပ်ရေးမှုး ....အခု အချိန်က စပြီး ကျုပ်ပြောတဲ့အတိုင်း ခင်ဗျားလုပ်... ခဏကြာရင် အဲယားကွန်းပိတ်လိုက်တော့..."
"ဗျာ...ဒီလို နွေရာသီကြီးမှာကုန်တိုက်ကြီးတခုလုံး အဲယားကွန်းပိတ်ရမယ်လို့ သူဌေးပြောလိုက်တာလားခင်ဗျာ...! အဲယားကွန်းပိတ်မယ့်အစား ကုန်တိုက်ကြီး ပိတ်လိုက်ရင် ကောင်းမလားလို့ပါ သူဌေးမင်း?"
လောဘကြီး၍ ကပ်စေးနည်းသော သူဌေး သည် ကုန်တိုက်ပုံမှန် ပိတ်ချိန်အထိ ငွေရှာချင်သည်။ ကျန်သော နာရီအနည်းငယ်အတွင်းရရှိမည့် ငွေကိုအဆုံးအရှုံးမခံနိုင်ခဲ့...။
" #%$ ပိတ်ဆိုပိတ် စကားမရှည်နဲ့ ..လူတွေ ၅ လွှာကို မတက်နိုင်အောင် လှေကား၊ ဓာတ်လှေကား၊ စက်လှေကားတွေမှာ စောင့်ပြီး အပေါ်မတက်နိုင်အောင်တားဆီးကြ...ဒီနေ့ ၅ လွှာက စားသောက်တန်း ပိတ်လိုက်ပြီလို့ အသံလွှင့်စက်က ကြေငြာ...'! "
အုပ်ချုပ်ရေးမှုးနှင့် အဖွဲ့သည် ၅လွှာတွင်ရှိနေသော သူများကို အောက်ဆင်းပေးရန် စတင်ရှင်းလင်းတော့သည်။
******************
ညနေ ၃ နာရီ ၃၀ မိနစ်...။
အက်သံကြီးတွေ ဟိုနေရာ ဒီနေရာမှ ၁၀ မိနစ်ခြားခန့်ထွက်နေသည်။
"သူဌေး ..သူဌေး ၅လွှာ ဟိုဘက်အခြမ်းက စပြိုနေပြီ...တကယ်ပြိုကျတော့မယ်ဗျ...။အက်ကြောင်းကြီးတွေ ၁၀ စင်တီမီတာအထိ ကွဲကုန်ကြပြီး ကျွန်တော်တို့အားလုံး သေတော့မယ် ...။ "
အုပ်ချုပ်ရေးမှုးကပြောလိုက်သည်။
"အုပ်ချုပ်ရေးမှုး ..အရေးကြီးတဲ့ ပစ္စည်းတွေယူ...၄လွှာက စိန်တွေရွှေတွေယူ..ငါတို့ အရင်ထွက်နှင့်မယ်"
"အရေးပေါ်ခေါင်းလောင်းဘယ်တော့ပေးရမလဲ သူဌေး...ကုန်တိုက်ထဲကလူတွေ ဘယ်လိုလုပ်ရမလဲ.."
" အခုကြေငြာလိုက်ရင် လူတွေရုတ်ရုတ်သည်းသည်းဖြစ်ကုန်မယ်... ငါတို့ အပြင်ထွက်လို့ရမှာမဟုတ်ဘူး။ ငါတို့ ပစ္စည်းတွေသိမ်းပြီး အပြင်ရောက်မှ အရေးပေါ်ခေါင်းလောင်းခေါက် "
ဥက္ကဋ္ဌ နှင့် သူ့သား ၊အုပ်ချုပ်ရေးမှုး၊ အစည်းအဝေးတက်ခဲ့သော လူတချို့သည် ရက်စက်ယုတ်မာစွာ ကုန်တိုက်ကြီးကို စွန့်ခွာသွားကြတော့သည်။
ရီဂျွန်းသည် ကုန်တိုက်ကြီးတွင် အလုပ်လုပ်နေသော သူ့သား၏ ဇနီး (ချွေးမ) ကိုပင် အကြောင်းမကြားခဲ့။ ယောက်ျားဖြစ်သူကလည်း သူ့အဖေ အမိန့်မရဘဲ ဘာတခုမှ မလုပ်ရဲခဲ့။ (သူမ သည် ကုန်တိုက်ပြိုကျပြီး ၃ ရက်မြောက်နေ့တွင် ထိခိုက်ဒါဏ်ရာများစွာဖြင့် လွတ်မြောက်လာခဲ့သည်။)
********************
ညနေ ၅ နာရီ ၄၅ မိနစ်...။
မိုးခြိမ်းသံလိုလို ကျယ်လောင်သော အသံကြီး ကုန်တိုက်ကြီးထဲမှ ပေါ်ထွက်လာ၍ သဲများ အမိုးပေါ်မှတဖွဲဖွဲကျလာသည်။
လူတွေရုတ်ရုတ်သဲသဲဖြစ်ကုန်သည်။
*******************
ညနေ ၅ နာရီ ၅၀ မိနစ်....။
အန္တရာယ်ရှိသည်ဟု အချက်ပေးသော အရေးပေါ် ခေါင်းလောင်းသံတို့ ကုန်တိုက်ကြီးတခုလုံး မြည်ဟီးသွားသည်။
"ပြေးကြဟေ့ ပြေးကြ..."
လူတွေ သူထက်ငါ လုပြီး အပြင်ပြေးထွက်ကြတော့သည်။
*******************
ညနေ ၅ နာရီ ၅၂ မိနစ်....။
အက်သံကြီး ဆက်တိုက်ပေါ်လာပြီး နောက်ဆုံးတွင်...
"ဝုန်း"
ရုတ်တရက် အလွန်ကျယ်လောင်သော အသံကြီး ထွက်လာပြီး ကုန်တိုက်ကြီးတခုလုံးပြိုကျသွားတော့သည်။
ကုန်တိုက်ထဲမှ လူတွေ ပြိုင်တူထိတ်လန့်စွာ အော်ဟစ်လိုက်သံကြီးက ကြောက်စရာကောင်းလှသည်။
အဆောက်အဦးထဲရှိ လူပေါင်း ထောင့်ငါးရာကျော် သည် တပြိုင်နက် အုတ်ခဲပုံကြီးအောက်သို့ စုန်းစုန်းမြုပ် သွားလေတော့သည်။
၂၂ စက္ကန့် အတွင်း ဘယ်နှစ်ယောက်လွတ်မြောက်နိုင်မည်နည်း...?
*******************
" ဒီအချိန်မှာ...ကျွန်တော်တို့ ၃ ဦး ကုန်တိုက် အပေါက်ဝနားမှာရှိနေလို့ အသက်ဘေးကနေ လွတ်မြောက်ခဲ့ပါတယ်"
....ဟု အမျိုးသားတဦးက ပြောပြခဲ့သည်။
ကုန်တိုက် အပေါက်ဝနားတွင်ဖြစ်သည်။
ရုတ်တရက် ဝုန်းဆိုသော အသံကြီးကို ကြားရသောကြောင့် အသက် ၂၀ ကျော်အမျိုးသားလေးသည် သူ့အမေလက်ကို ဆွဲ၍ ခုန်ထွက်လိုက်သည်။ ပါးစပ်မှလည်း သူတို့နှင့်အတူပါလာသော ညီတဝမ်းကွဲလေးကို " အမြန်ခုန်ထွက်....ညီလေး" ဟု သတိပေး အော်ဟစ်လိုက်သည်။
အမျိုးသားလေးသည် အမေကိုဖက်၍ လိမ့်ချလိုက်သည်။ ညီဝမ်းကွဲလေးက အနောက်က လိုက်ခုန်ထွက်လာသည်။ သို့သော် ညီဝမ်းကွဲ ခေါင်းတွင် သွေးများဖြာကနဲထွက်လာသည်။
ကုန်တိုက် ဝင်ဝင်ချင်းတွင် ခေါင်မိုးမှ တွဲလောင်းချထားသည့် ခမ်းနားလှသော ဧည့်ခန်း မီးဆွဲကြီးရှိသည်။
ထိုမီးဆွဲကြီးသည် လူသတ်လက်နက်ကြီး အဖြစ်ပြောင်းလဲသွားသည်။
အုတ်အပိုင်း အစများနှင့် ဖန်အပိုင်းအစများ ညီဝမ်းကွဲလေး၏ ဦးနှောက်အတွင်းထဲအထိ ဝင်ရောက်နေရာယူတော့သည်။
သူ့ ညီဝမ်းကွဲလေး သည် ခွဲစိတ်မှုများ အကြိမ်ကြိမ်အခါခါလုပ်ခဲ့ပြီး ဦးနှောက်အထဲမှအပိုင်းအစများကို ထုတ်ခဲ့သည်။ ယနေ့ထက်ထိလည်းခွဲစိတ်နေရဆဲဖြစ်သည်။ မျက်လုံးတဖက်ကတော့ လုံးဝကွယ်သွားပြီဖြစ်သည်။
အခု ညီဝမ်းကွဲလေး အသက် ၃၈နှစ်ရှိပါပြီ။
အသက်ရှုနေတာနှင့် ပြုံးပြနိုင်တာကလွဲပြီး ဘာမှမလုပ်နိုင်တော့ပါ။
သူ့ဆီ ဧည့်သည်တွေလာလည်ရင်တော့ သူပျော်သည်။ ပြုံးပြသည်။ သူလုပ်နိုင်တာ ဒါ အကုန်ပဲဖြစ်သည်။
********************
ကုန်တိုက်ကြီးတခုလုံးကို အအေးလွှတ်ပေးသော အလွန်ကြီးမားသော အဲယားကွန်းပန်ကာကြီး တခုပြီးတခု စတင်၍ "ဝုန်း" ဆိုသောအသံကြီးဖြင့် ၅ လွှာမြောက် ခေါင်မိုးမှ ပြုတ်ကျလာခဲ့ခြင်းဖြစ်သည်။
ထို့နောက် ၄ လွှာ၊ ၃လွှာ၊၂လွှာ ... မြေအောက် ၄လွှာအထိ အရှိန်ပြင်းစွာပြုတ်ကျသွားခဲ့သည်။
တပြိုင်နက်.... အဆောက်အဦးကြီးတခုလုံးသည် အဲယားကွန်း ပန်ကာကြီး ၃ ခု အနောက်မှလိုက်၍ပြိုကျသည်။
၂၂ စက္ကန့်အကြာတွင် ကုန်တိုက်ကြီးတခုလုံး ဒေါသကြီးစွာ ပြိုကျသွားကာ အဲယားကွန်းကြီး ၃ လုံးနှင့် လူပေါင်း ၁၅၀၀ ကို ဖုံးအုပ်လိုက်ခြင်းဖြစ်သည်။
အဆောက်အဦးတခုဆောက်ရာတွင် သတ်မှတ်ထားသော လုပ်နည်း လုပ်ထုံးအတိုင်း အလွှာတိုင်းတွင် ကြမ်းပြင်များအား ကွန်ကရစ်များ သံချည် သံကွေးများဖြင့်ယှက်၍ စံချိန် စံညွှန်းအတိုင်း ခိုင်ခိုင်မာမာဆောက်ခဲ့လျှင် အဲယားကွန်းပန်ကာစက်ကြီးတို့သည် ခေါင်မိုးမှ ပြုတ်ကျခဲ့ပါက ၅လွှာပေါ်တွင် တင်နေပေလိမ့်မည်...။
၅ လွှာမှ ပြုတ်ကျလျှင် ၄လွှာပေါ်တင်နေပေလိမ့်မည် ...။အခုတော့ ၅ လွှာခေါင်မိုးမှဟိုးအောက်ဆုံးအထိ စက္ကူအရွက်များကိုအပေါက်ဖောက်၍ ဖြတ်သွားသလို တိုးလျိုးပေါက်ကျသွားသည်မှာ အလွန်ရှက်ဖွယ်ကောင်းလှတော့သည်။
၎င်းကုန်တိုက်ကြီးသည် ဆောက်လုပ်ပြီး၆ နှစ်အကြာတွင်ပြိုကျခဲ့ခြင်းဖြစ်သည်။
*******************
ကိုရီးယား TV အင်တာဗျူးတခုဖြစ်ပါသည်။
ယောက်ျားဖြစ်သူက ကုန်တိုက်ကြီးမနီးမဝေးရှိ ဘဏ်တခုမှ အရာရှိတယောက်ဖြစ်သည်။
ထိုနေ့တွင် ယောက်ျားဖြစ်သူ အလုပ်ဆင်းချိန်နှင့်ကိုက်၍ မိန်းမဖြစ်သူသည် ၈ နှစ်အရွယ်သမီးလေး လက်ဆွဲကာ ၄လအရွယ်သားလေးအား ရင်ဝယ်ပိုက်ထားရင်း ကလေးတင်လက်တွန်းလှည်း ဝယ်ရန် ကုန်တိုက်ကြီးပေါ်သို့တက်လာခဲ့သည်။
ကလေးတွန်းလှည်းဝယ်ပြီး သူမသည် ကုန်တိုက်ကြီးအောက်ဆုံးထပ်ရှိ အများသုံးဖုန်းဖြင့် ယောက်ျား၏ရုံးသို့ ဖုန်းဆက်လိုက်သည်။ (ထိုစဉ်က လက်ကိုင်ဖုန်းများမပေါ်သေးပါ။)
"မောင်ရေ.. ကျမတို့ ကလေးတွန်းလှည်းဝယ်ပြီးပြီး ဘယ်မှာတွေ့မှာလဲ?"
"အလုပ်ကမပြီးသေးဘူး မိန်းမရေ...ကုန်တိုက်ထဲကမထွက်နဲ့ဦး..နာရီဝက်လောက်ကြာရင် မောင် ကားနဲ့လာခေါ်မယ် "
သူမတို့ သားအမိ ၃ ယောက်သည်လည်း ကုန်တိုက်အပေါက်ဝ နားတွင်ယောက်ျားဖြစ်သူကို စောင့်နေခဲ့သည်။
*************
၈ နှစ်သမီးလေးသည် ဟိုပြေး ဒီပြေးနှင့်ဆော့နေသည် အမေ့စကားကိုနားမထောင်။ ၄ လ အရွယ် သားလေးကငို၍ နို့ဗူးထုတ်တိုက်လိုက်သည်။
ထိုစဉ် နွေလည်ခေါင်မှ မိုးခြိမ်းသံကြီးလိုကြားလိုက်ရ၍ အမေသည် တုန်လှုပ်သွားသည်။
"သမီးလေး!!!!"
ရုတ်တရက် အမှောင်ကမ္ဘာကြီးထဲကို သူမရောက်သွားသည်။
ကံကောင်းထောက်မ စွာဖြင့် သားအမိနှစ်ယောက်အား ကုန်တိုက်အဝရှိ မီးဆွဲကြီးရှိ မီးစလောင်းဖုံးကြီးက အမိုးကြီးသဖွယ် ဖုံးအုပ်ထားလိုက်တော့သည်။
သားလေးကို ကျစ်ကျစ်ပါအောင်ဖက်ထားလိုက်သည်။ သားလေးကငိုသည်။ နို့ဗူးသည် ဖုန်အလိမ်းလိမ်းနှင့် ....။
အမေသည် နို့ဗူးထိပ်မှ ဘိလပ်မြေမှုန့်တို့ကို စုတ်ယူ မြိုချလိုက်သည်။ သန့်ရှင်းသွားသော နို့ဗူးထိပ်ကို သားလေးပါးစပ်ထဲထိုးထည့်လိုက်သည်။
ကလေး အငိုတိတ်သွားသည်။
"သမီးရေ ...သမီးလေး"
ခဏကြာတော့ သမီး အသံလေးထွက်လာသည်။သူမ ဝမ်းသာသွားသည်။
"အမေ!!!! ဘာမှမမြင်ရဘူး"
"အမေ့ ခြေထောက်ကို လိုက်စမ်းသမီး။ အမေ့ ခြေထောက် မဟုတ်ရင် အမေ မဖြေဘူးနော် နားလည်လား? "
သမီးလေးက သူမဆီ တွားသွား၍ လိုက်ရှာတော့သည်။
"ဒါအမေ့ ခြေထောက်လား?" သမီးလေးက လိုက်စမ်းနေသည်...။
နောက်ဆုံး အမေ့ခြေထောက်ကိုရှာတွေ့သွားတော့သည်။
အမေသည် ကလေးနို့ဗူးလေးဖြင့် ဟိုထိုးဒီထိုးလုပ်ရင်း ဖန်သားတခု ကွဲသွားကာ အလင်းတန်းလေးတခုတွေ့သွားသည်။ နို့ဗူးဖြင့် ဖန်သားဖြင့် ဆက်ခွဲသည်။ သူ့သမီးကို လက်ဆွဲခေါ်၍ ထိုးထွက်လိုက်သည်။
ထိုစဉ် အောက်မှ မီးဆိုင်းကြီးပိ၍ မထနိုင်သောသူတို့၏ လက်အစုံပေါင်းများစွာက သူမခြေထောက်ကို ဖက်ထားလေသည်။ လုံးဝမလွှတ်ပေးကြ။
"ကယ်ပါ ကယ်ပါ...ကျမ ခြေထောက်ပိနေလို့ ဆွဲထုတ်ပေးပါ"
သူမ အော်ငိုတော့သည်။
"ကျွန်မမှာ ကလေးနှစ်ယောက်ရှိပါတယ်။ သနားကြပါ။ လွှတ်ပေးကြပါရှင်..။ ကျမ ကယ်ဆယ်ရေးအဖွဲ့တွေလွှတ်ပေးပါ့မယ်"
ကလေးတွေကလဲငိုလှပြီ...။
နောက်ဆုံးတွင် အောက်မှလူများက သနား၍ လွှတ်ပေးလိုက်ကြသည်။
သူမသည် အပြင်ရောက်သောအခါ ဒုက္ခသည်တို့အား ပေးခဲ့သည့်ကတိအတိုင်း ကယ်ဆယ်ရေးအဖွဲ့များကို စေလွှတ်ပေးခဲ့သည်။
သို့သော် ထိုသူတို့၏ကိုယ်ခန္ဓာတို့ကို မီးစလောင်းဖုံးကြီးဘေးနှုတ်ခမ်းစောင်းများက ဒါးတလက်လို ပိုင်းဖြတ်ထားပြီးဖြစ်နေလေသည်။
ခေါင်းပြတ်နေသူများ၊ကိုယ်တပိုင်းပြတ်နေသူများ၊ ခြေပြတ်၊ လက်ပြတ်ဖြစ်သွားသူအတော်များသည်ဟုဆိုသည်။
သူမတို့ သားအမိ ၃ ယောက် မီးစလောင်းဖုံးကြီး အလယ်တွင်ရောက်နေခဲ့သည်မှာ အလွန်ကံကောင်းလှသည်။ ဒီတခါတော့ ၎င်းမီးဆွဲကြီးသည် သူမတို့ကို ကယ်ခဲ့လေပြီ။
သမီးလေးမှာ ခြေထောက်တွင်တွင်ကျိုးသွားသော်လည်း အသက်ရှင်လွတ်မြောက်ခဲ့လေသည်။
အဖေက ဝမ်းသာအားရ ငိုကြီးချက်မဖြင့် လမ်းမလျှောက်နိုင်သည့် သမီးလေးကိုကောက်ချီလိုက်သည်။ သမီးမျက်နှာက ဘိလပ်မြေမှုန့်များနှင့်ဖြူဖွေးနေသည်။ လက်ဖြင့် ပွတ်သော်လည်းဖယ်မရ...။ အဖေသည် ငိုယိုရင်း သမီးမျက်နှာကို ကြိုးစား၍ သုတ်ပေးနေတော့သည်။
******************
ရေခဲသေတ္တာ၊ အစားအသောက်တို့အနီးတွင် ပိတ်မိနေသောသူတို့သည် သူ့ထက်ငါ အစားအသောက်များကိုလုယူကြတော့သည်။
ဘယ်နှစ်ရက် ဒီကုန်တိုက်ကြီးတွင်ပိတ်မိနေမည်မသိ၍ ဖြစ်သည်။ ထိုသူတို့သည် စားသောက်ကြသည့်အခါ မစင်စွန့်ဖို့လိုအပ်လာသည်။ ပိတ်မိနေကြသဖြင့် ထိုနေရာ၌ပင် မစင်စွန့်ကြရလေသည်။ ၃ ရက်ခန့်ကြာသောအခါ အစားအစာများပုတ်သိုးကာ အနံ့ အသက်များမှ အဆိပ်ဖြစ်ကာ အားလုံးသေဆုံးကုန်ကြသည်။
အစားအစာအပုတ်များ လူသေကောင် အပုတ်များ အညစ်အကြေးအနံ့ အသက်တို့ကြောင့် ကုန်တိုက်ကြီးဘေးမှ အဆောက်အဦးတို့မှ လူများပင်မနေနိုင်ပဲ ထွက်ပြေးကြရပါသည်။
သို့သော် ကယ်ဆယ်ရေးအဖွဲ့ဝင်များက ဒုက္ခသည်များကို မစွန့်ခွာခဲ့ကြပေ ။ လုပ်အားပေးကြသည့် ကယ်ဆယ်ရေးအဖွဲ့ဝင်တို့၏ စေတနာသည် ကြီးမားလှပါပေသည်။
******************
အထက်တွင်ဖေါ်ပြခဲ့ သည့်အတိုင်း ကုန်တိုက်ကြီး၏ အဲယားကွန်းများကိုညနေပိုင်းတွင် ပိတ်ရန်အမိန့်ပေးခဲ့သည်။
ပူပြင်းလှသောနွေရာသီ အရှိန်အောက်ရှိ အဲယားကွန်းပိတ်ထားသော ကုန်တိုက်ကြီးထဲတွင် မနေနိုင်၍ လူတချို့ အပြင်ထွက်လာခဲ့ကြသည်။ ထိုလူ များသည်အသက်ချမ်းသာရာရလေသည်။
*******************
ဆမ်းပွန်း ကုန်တိုက်ကြီးပြိုကျသော အမှုကို ဦးဆောင်၍ ထောက်လှမ်း စစ်ဆေးသူမှာ ဒန့်ဂေါ့ တက္ကသိုလ်
(Dankook University) မှပါမောက္ခ အင်ဂျင်နီယာ လန်ချန်း (Lan Chung) ဖြစ်သည်။ ပါမောက္ခသည် ရီဂျွန်း၏ မတရား ယုတ်မာမှု အစိုးရဝန်ထမ်းတို့ လာဒ်စားမှုတို့ကို အစ အဆုံးဖော်ထုတ်ခဲ့သည်။
တရားခွင်တွင် ရီဂျွန်းအား မသေမချင်း အကျဉ်းထောင်ထဲတွင် ကျစေရန်အထိ ကြီးလေးသောအပြစ်ပေးဖို့ အသိသက်သေလိုသည်။
ထို အကြောင်းအရာအားလုံးကိုသိသော အသိသက်သေသည် ကုန်တိုက်အုပ်ချုပ်ရေးမှုး တယောက်သာရှိခဲ့သည်။
ကုန်တိုက်ပိတ်ရန် အကြံပေးခဲ့သော ထိုအုပ်ချုပ်ရေးမှုးသည် ရုတ်တရက် ထူးဆန်းစွာသေဆုံးသွားလေတော့သည်။
*************************
၁၉၉၆ သြဂုတ်လ ၂၃ ရက်
အသိသက်သေ မရှိသဖြင့် ပြစ်မှုများလျှော့ကုန်သည်။
•ရီဂျွန်း (ဥက္ကဋ္ဌ) - ထောင်ဒါဏ် ၇ နှစ် ၆ လ( ပေါ့ဆမှု )
•ရီဟန်ဆန်း (ရီဂျွန်း ၏သား)- ထောင်ဒါဏ် ၇ နှစ် (မတော်တဆဖြင့် လူသေစေမှု )
•အစိုးရဝန်ထမ်းနှစ်ယောက် - ထောင်ဒါဏ် ၁၀ လ နှင့် ငွေဒါဏ်သိန်း၃၀ စီ (လာဒ်စားမှု)
အပြစ်မရှိသော အင်ဂျင်နီယာကြီးများသာကြီးလေးသော အပြစ်ဒါဏ်ပေးခံရလေတော့သည်။
"လူတွေသေတာလဲသေတာပေါ့ဗျာ ကျုပ်တို့ပိုက်ဆံတွေ ဆုံးရှုံးရတာလဲ ပြောကြဦး"
ရီဂျွန်းသည် သူ့ကုမ္ပဏီမှ ပိုက်ဆံတွေဆုံးရှုံးသွားသည်ကိုသာ တရားရုံးတွင် နောက်ဆုံးအချိန်အထိ ပြောနေလေသည်။
************************
ကုန်တိုက်ပြိုကျမှုကြောင့် သေဆုံးသူ ဒါဏ်ရာရသူများကိုဒေါ်လာ သန်း ၃၀၀ ကျော် လျော်ကြေးပေးရသော ရီဂျွန်း ကုမ္ပဏီ မိသားစု သည်ဆွေစဉ်မျိုးဆက် ကုန်းကောက်စရာမရှိအောင် ဆင်းရဲသော ဘဝသို့ ရောက်ရှိသွားတော့သည်။
သေဆုံးသူ အလွန်များပြားသောကြောင့် သူတို့မိသားစု၌ရှိသော ငွေဖြင့် မလုံလောက်ပေ။ တောင်ကိုးရီးယား ဆိုးလ်မြို့မှ ပြည်သူတို့ ထံမှ ကောက်ခံထားသော အခွန်ငွေများနှင့်ဖြည့်ဆည်းခဲ့ကြရသည်။
လူပေါင်းများစွာ သေဆုံး ဒုက္ခိတဖြစ်ခဲ့ရသည့်အပြင် ပြည်သူတို့၏ငွေများအထိ ဆုံးရှုံးခဲ့ရသောကြောင့် ရီဂျွန်းမိသားစုသည် ပြည်သူ့ အရွံဆုံး၊ အမုန်းဆုံး အပယ်ခံ အဖြစ်သို့ရောက်ရှိခဲ့ရသည်။
************************
၂၀၀၃ ခုနှစ် အောက်တိုဘာ ၄
ရီဂျွန်းထောင်မှ ထွက်လာသည်။ ဆင်းရဲသည်ဆိုသည့် ဒုက္ခ သူ့အလှည့်ရောက်လာသောအခါ သူ မခံစားနိုင်တော့ပါ။
•ဆင်းရဲသားများကို အနိုင်ကျင့်ခဲ့သော ရီဂျွန်း...
•လူပေါင်း ၅၀၀ ကျော်ကိုသတ်ခဲ့သော ရီဂျွန်း
•လူပေါင်း ၉၀၀ ကျော်ကို ဒုက္ခိတဖြစ်စေခဲ့သော ရီဂျွန်း
•အသက်ရှင်၍ ကျန်ခဲ့သူတို့ကို ရူးသွတ်အောင် အိမ်မက်ဆိုးများပေးခဲ့သော ရီဂျွန်းသည် ...
ထောင်မှထွက်လာပြီး ရက်အနည်းငယ်တွင် နှလုံးသွေးရပ်၍ သေဆုံးခဲ့သည်။
*******************
ရီဂျွန်း၏ သားဖြစ်သူ ထောင်မှလွတ်လာသောအခါ တောင်ကိုးရီးယားနိုင်ငံတွင် ဆက်နေရန် သတ္တိမရှိတော့ပေ။ မွန်ဂိုလီးယားနိုင်ငံသို့ တိတ်တဆိတ် ထွက်ခွာသွားခဲ့လေသည်။
အလိုလောဘကြီးလွန်းသူတို့၏ ဘဝနိဂုံးသည် ရုပ်ဆိုးကျည်းတန်လှပါပေသည်။
***********************
၂၂ စက္ကန့်အလိုတွင် အသေဆိုးဖြင့် သေကြရမည်...ဒုက္ခိတဖြစ်တော့မည်...စသည်တို့ကို လူပေါင်း ၁၅၀၀ ကျော်သည် မသိခဲ့ကြ။
ထိုဖြစ်ရပ်ကိုကြည့်လျှင်လူ့ဘုံဘဝကြီးသည် ကာမဂုဏ် အာရုံတွင် ပျော်ရွှင်ကာ မေ့မေ့လျာ့လျော့နေ၍ မရသော ဌာနတခုဖြစ်ပါသည်။
ကုန်တိုက်ကြီးပြိုကျသည့် အဖြစ်အပျက်တွင် အသေဆိုးပုံ အမျိုးမျိုးကို တွေ့ရပါသည်။ ငရဲပြည်သည် ဟိုးမြေအောက် အဝေးကြီးတွင်သာ ရှိနေသည်မဟုတ်။ မိမိ၏ အနီးဆုံးတွင်လည်းရှိနေတတ်လေသည်။
ကျွန်မတို့သည် ကံကြမ္မာကို ခန့်မှန်း၍ဘယ်လိုမှ မရနိုင်ပါ....။ ယခု ပစ္စုပ္ပန်တွင် ဘယ်လောက်ပင်ပျော်ရွှင်နေပါစေ....ငွေကြေးအားဖြင့် ဘယ်လောက်ပင် ချမ်းသာနေပါစေ.... ကျန်းမာသန်စွမ်းနေပါစေ.... လာမည့် ၂၂ စက္ကန့်အတွင်း၌ပင် အရာအားလုံးသည် ဇောက်ထိုးမိုးမျှော် ပြောင်းပြန်ဖြစ်သွားနိုင်ပေသည်...။
ဘယ်အရာမှ မတည်မြဲခြင်းသည်သာ အမှန်တရားဖြစ်သည်.... ။
ထိုအမှန်တရားကိုသာ သိနေမည်ဆိုလျှင် ကျွန်မတို့ လူသားများသည် အချိန်ကုန်ခံပြီး လောဘ ဒေါသ မောဟ အတ္တ မာန တည်းဟူသော မကောင်းစိတ်များ တောက်လောင်ပြီး အဓိပ္ပါယ်မဲ့ ဘဝကို ဖြတ်သန်းစရာလိုတော့မည် မထင်ပါ... ။
********************
🌟ယခုအခါတွင် ကျွန်မတို့မြန်မာနိုင်ငံသည်လည်း ထိုစဉ်က တောင်ကိုရီးယားကဲ့သို့ ကုန်တိုက်ကြီးများ အဆောက်အဦးမြင့်များကို ဈေးသက်သက်သာသာဖြင့် စတင် ဆောက်လုပ်လိုသည့် ကာလဖြစ်သောကြောင့် ဆောက်လုပ်သူများ နှင့် မြန်မာ ပြည်သူပြည်သားများ သတိရှိစေရန် ဤဆောင်းပါးကို ရေးဖြစ်ခြင်းဖြစ်ပါသည်။🌟
************************
မှတ်ချက်
(ကျွန်မရေးသော ဆောင်းပါးတိုင်းမှ အကြောင်းအရာများသည် ဖြစ်ရပ်မှန်များ ဖြစ်ပါသည်။)
စာအကိုးအကား
(References-
Korea TV news ,
Wikipedia,
PD interviews,
1995 년 서울 삼풍 book
Pictures from 'Naver')
မရွှေမိုး (ကိုရီးယား)
ဂျူလိုင်လ ၃၁ ရက်နေ့ ၂၀၁၇