တွေ့မြင်ကြားသိနေရပါတယ်။ သည်ကနေ့ ၃ရက်အလို နိုဝင်ဘာလ ၁၅ရက်နေ့ အထိ သိရတဲ့သတင်းတွေထဲမှာကတော့… ဒီမိုကရေစီအဖွဲ့ချုပ် အဖွဲ့ဝင် ဒေါ်အုံးလှနဲ့ အဖွဲ့ချုပ်ရဲ့အရွေးချယ်ခံလွှတ်တ်ာကိုယ်စားလှယ်၂ဦးအပါအ၀င် အဖွဲ့ချုပ်ဝင်ပေါင်း ၃၂ယောက်က ပါတီ မှတ်ပုံမတင်ဖို့နဲ့ ရွေးကောက်ပွဲမ၀င်ဖို့…လက်မှတ်ရေးထိုးကန့်ကွက် ထားပါတယ်။ အလားတူ ရှမ်းတိုင်းရင်းသားများဒီမိုကရေစီအဖွဲ့ချုပ်ကလဲ… မှတ်ပုံမတင်၊ ရွေးကောက်ပွဲမ၀င်ဖို့ ဆုံးဖြတ်ကြောင်း ထုတ်ပြန်ကျေညာလိုက်ပါပြီ။ နောက်ထပ် ဘယ်ပါတီအဖွဲ့အစည်းတွေနဲ့ ဘယ်တသီးပုဂ္ဂလ အဖွဲ့ဝင်တွေက ဘယ်လိုကျေညာကြအုံးမယ်တော့ မပြောတတ်ပါဘူး။ နောက်တခုက…နိုင်ငံရေးပါတီတွေ မှတ်ပုံတင်ခွင့် နောက်ဆုံးပိတ်ရက်နဲ့  ရွေးကောက်ပွဲ ကျင်းပမယ့်ရက်ကိုလဲ… အစိုးရက မကျေညာသေးပါဘူး။
အမှန်တော့ သည်ရွေးကောက်ပွဲကကြားဖြတ်ရွေးကောက်ပွဲပါ။ အမတ်၄၈ယောက်အတွက် လစ်လပ်နေတဲ့ ၄၈နေရာတည်းပါ။ သည်၄၈နေရာအားလုံးကို ဘယ်ပါတီအဖွဲ့အစည်းကဖြစ်ဖြစ် သိမ်းကျုံးပြီး အနိုင်ရ သွား သွား။လွှတ်တော်ထဲမှာ ဘာမှ ပြောင်းလဲသွားစရာ မရှိပါဘူး။ ဒီမိုကရေစီအင်အား လူနည်းစုက လူနည်းစုပါပဲ။ ပြောရရင် သည်၄၈နေရာ ဆိုတာတွေထဲမှာမှ… လုံးဝ လုံခြုံမှုမရှိတဲ့နေရာတွေ၊ တိုင်းရင်းသားလက်နက်ကိုင်အင်အားစုတွေနဲ့ တိုက်ပွဲဖြစ်ပွါးနေတဲ့နေရာတွေနဲ့… အစိုးရနေပြည်တော်ရဲ့ ရပ်ကွက်မဲဆန္ဒနယ်တွေကလဲ ပါနေပါသေးတယ်။ ဆိုတော့ နေရာပိုနည်းသွားတာပေါ့။ လူပြိန်းတွက်ပဲ တွက်ကြည့်လိုက်နိုင်ပါတယ်။ အရည်မရ အဖတ်မရ၊ ဘာမှထူးခြားပြောင်းလဲလာမှာ မဟုတ်ရင်ဖြင့်… မိမိရဲ့ မူလဆုံးဖြတ်ချက်ဟောင်းကို ပြင်၊ သိက္ခာ အကျခံပြီး… ဘာလုပ်ဖို့ ဝင်အရွေးခံနေကြတော့မလဲ။ ပြီးလွှတ်တော်ထဲရောက်ရလို့လဲ… ရောက်နှင့်နေကြတဲ့ ကိုယ့်လူရောင်းရင်းဟောင်းတွေကိုပဲ လှမ်းကြည့်လိုက်လေ…။ ခေါင်းပေါင်းစ တလူလူနဲ့ လူရုပ်ဆင်ထားရတာက လွဲလို့… ပါးစပ်ခြင်ခြောက်နေရတာ မဟုတ်လား။
ဒါပေမယ့် အစိုးရကတော့ ဒီမိုကရေစီဘက်သား အတိုက်အခံပါတီဝင်တွေကို ၀င်လာအရွေးခံစေချင်ပုံရပါတယ်။ အဓိက ကတော့ ဒေါ်အောင်ဆန်းစုကြည်ပေါ့နော်။လွှတ်တော်ဥက္ကဌ
ကိုယ်တိုင်က ကြိုဆိုပါတယ် ဖိတ်ခေါ်ထားတာပဲ။ ကျုပ်အထင် (ထင်မြင်ချက်ပေါ့နော်) ကိုပြောရရင်တော့၊ ဒေါ်အောင်ဆန်းစုကြည်သာ ၀င်အရွေးခံမယ်ဆိုရင်… အစိုးရဖက်က ယှဉ်ပြိုင်အရွေးခံမယ့်ပုဂ္ဂိုလ်တောင် ရှိချင်မှရှိပါလိမ့်မယ်။ ရှိရင်လဲ စာရင်းပိတ်ခါနီးမှာ
နုတ်ထွက်ပေးလိုက်မှာပါပဲ။ ဒေါ်အောင်ဆန်းစုကြည် ပြိုင်ဘက်မရှိ အနိုင်ရဘွယ် ရှိပါတယ်။
အဲ ဒေါ်အောင်ဆန်းစုကြည်လွှတ်တော်ကိုယ်စားလှယ် ဖြစ်လာပြီဆိုရင်တော့… မူလထားရှိတဲ့ ရည်ရွယ်ချက်အတိုင်း ထိုက်သင့်တဲ့ရာထူးတနေရာတော့ ချီးမြှင့်ရပါလိမ့်မယ်။ တချို့နိုင်ငံရေးပုဂ္ဂိုလ်အကဲခတ်တွေနဲ့ တချို့ သတင်း media တွေကတော့ဒုတိယသမ္မတတို့၊၀န်ကြီးချုပ်တို့၊ အနိမ့်ဆုံး ပြည်ထောင်စုဝန်ကြီးတနေရာတို့… စသဖြင့် တနေရာရာ ပေးလိမ့်မယ်လို့ …
ထင်ကြေးနဲ့ကာလဟာဠသတင်းထုတ်လွှင့်နေကြလေရဲ့။
ဒါပေမယ့် သည်ကနေ့ သက်ရှိထင်ရှားရှိနေတဲ့… ‘နိုင်ငံဖွဲ့စည်းအုပ်ချုပ်ပုံအခြေခံဥပဒေ’ အရကတော့ အဲသည်ဒုတိယသမတရာထူးကို ဘယ်သူကမှ ပေးပိုင်ခွင့်မရှိပါဘူး။ သည် ‘ဖွဲ့စည်းအုပ်ချုပ်ပုံအခြေခံဥပဒေ’ အရပဲ… ပြည်သူ့လွှတ်တော်နဲ့ အမျိုးသားလွှတ်တော်က၀န်ကြီးချုပ်တွေဆိုတာကလဲ… (၁၉၄၇ခုနှစ် ဖွဲ့စည်းအုပ်ချုပ်ပုံအခြေခံဥပဒေဟာင်းထဲက၀န်ကြီးချုပ်ဦးနုတို့လို အာဏာရှိတဲ့ဝန်ကြီးချုပ်မျိုး မဟုတ်တဲ့အတွက်) ပေးလိမ့်မယ် မထင်ပါဘူး။
အဲ… ပြည်ထောင်စုဝန်ကြီးဆိုတဲ့ဝန်ကြီးတနေရာကတော့ ပေးမယ်ဆိုရင် ပေးနိုင်ပါရဲ့။ ဒါပေမယ့် ပြည်ထောင်စုဝန်ကြီးတယောက်အနေနဲ့ ရှိရမယ့် လိုက်နာရမယ့် အရည်အချင်း စည်းကမ်းစည်းမျဉ်းတွေကလဲ ဥပဒေမှာ ရေးဆွဲပြဌာန်းထားပြီး ဖြစ်ပါတယ်။ဝန်ကြီးတယောက်အနေနဲ့ အစိုးရအဖွဲ့ဝင် ဖြစ်သွားပြီးဖြစ်တဲ့အလျောက်… မိမိလာခဲ့ရာ မိခင်ပါတီရဲ့ လုပ်ငန်းတာဝန်များကို ဆက်လက်လုပ်ပ်ိုင်ဆောင်ရွက်ခြင်း မပြုရ…မိခင်ပါတီရဲ့အစည်းအဝေးများ အခမ်းအနားများကိုလဲ ပါဝင်တက်ရောက်ခြင်းမရှိစေရ… လို့ သတ်မှတ်ထားပါတယ်။ အကယ်၍ ပြည်ထောင်စုဝန်ကြီး အဖြစ်သာ ခန့် အပ်ခံရလျှင်… ဒေါ်အောင်ဆန်းစုကြည်အနေနဲ့ အစိုးရဖြစ်သွားပြီဖြစ်တဲ့အတွက်… အခုလက်ရှိ လူထုခေါင်းဆောင် အမျိုးသားခေါင်းဆောင်ဘ၀ကိုမလွှဲမသွေ စွန့်းလွှတ်လိုက်ရတော့မှာ ဖြစ်ပါတယ်။
သိတယ်နော်… ဒီမိုကရေစီရေး အမျိုးသားခေါင်းဆောင် ဒေါ်အောင်ဆန်းစုကြည်ရဲ့နောက်မှာ ဒီမိုကရေစီ ဗဟိုဦးစီး အဖွဲ့ဝင်တွေ တရာကျော် ရှိပါတယ်။ ဒီမိုကရေစီကို အသက် သွေးချွေးတွေနဲ့ ရင်းပြီးလိုလားတောင့်တနေကြတဲ့ ပြည်သူလူထုကြီးလဲ ရှိပါတယ်။ ဒါပေမယ့် ဒေါ်အောင်ဆန်းစုကြည် လမ်းပြောင်းခဲ့သည်ရှိသော်… ဒေါ်အောင်ဆန်းစုကြည်နဲ့အတူတကွ လက်တွဲရက်ပဲ ရှိနေကြမလားဆိုတာတော့ မပြောနိုင်ပါဘူး။
မောင်သာရ
ကိုကားစာရင်း…။
နိုင်ငံဖွဲ့စည်းအုပ်ချုပ်ပုံ အခြေခံဥပဒေ စာအုပ်မှ…
နိုင်ငံရေးပါတီများ မှတ်ပုံတင်ခြင်းဥပဒေ… ပုဒ်မ၆(ဂ)… ပုဒ်မ ၁၀(င)… ပုဒ်မ ၁၂(က) ၁…
အခန်း၃။ နိုင်င်ငံတော်သမတ နှင့်ဒုသမ္မတများ… ပုဒ်မ ၅၉(စ)
ပြည်ထောင်စုဝန်ကြီးများနှင့်ဒုဝန်ကြီးများ ခန့် အပ်တာဝန်ပေးခြင်း… ပုဒ်မ ၂၃၂(က မှ ဋ အထိ)
No comments:
Post a Comment