|
 ရခိုင်ပြည်နယ်
ဖွံ့ဖြိုးတိုးတက်ရေးအား အလေးပေးကာ ဆောင်ရွက်ကြမည့် မျိုးချစ်စိတ်ဓါတ်
အပြည့်အ၀ရှိသော ရခိုင်လူငယ်ခေါင်းဆောင်များအတွက် တွေ့ဆုံ ဆွေးနွေးပွဲ
တစ်ခုကို ရခိုင်လူငယ်များဖိုရမ် (ရန်ကုန်)မှ ဦးဆောင်ကာ ရန်ကုန်မြို့၊
သမိုင်းမြို့မကျောင်းတွင် နိုဝင်ဘာ ၂၄ မှ ၂၅ ရက်ထိ နှစ်ရက်တိုင်တိုင်
ကျင်းပပြုလုပ်ခဲ့သည်။ဆွေးနွေးပွဲသို့ တက်ရောက်လာသည့် လူငယ်များမှ လူငယ်နှင့်ပညာရေး၊ လူငယ်နှင့်မူးယစ်ဆေးဝါး၊ လူငယ်နှင့်နိုင်ငံရေး၊ လူငယ်နှင့် သတင်းနည်းပညာ ကဏ္ဍများကို ခေါင်းစဉ်တစ်ခုချင်းစီအပေါ်တွင် အုပ်စုလိုက်ဖွဲ့၍ ဆွေးနွေးခဲ့ကြပြီး ဖိတ်ကြားထားသည့် ပညာရှင်များမှ သက်ဆိုင်ရာခေါင်းစဉ်များတွင် လိုအပ်သည့် အချက်အလက်များကို ဟောပြောသည်။ ရခိုင်လူငယ်များမှ မီဒီယာအား အကျိုးရှိရှိ အသုံးမချနိုင်ကြသေးကြောင်းကို "ရခိုင်လူငယ်တွေဟာ မီဒီယာရဲ့ အခန်းကဏ္ဍကို ထိထိရောက်ရောက် အသုံးမချနိုင်ကြသေးဘူး၊ ရခိုင်လူငယ်တွေနဲ့ ရခိုင်ပြည်နယ်က မီဒီယာကို အကျိုးရှိရှိ အသုံးချနိုင်အောင်လုပ်ဆောင်ဖို့ လိုအပ်ပါတယ်၊" ဟု မတင်ထက်မြတ်က ပြောသည်။ "လူငယ်တွေရဲ့ နိုင်ငံရေးဦးဆောင်မှု ပါဝင်ခွင့်တွေလည်း နည်းပါးနေပါတယ်၊ မြန်မာတစ်နိုင်ငံလုံး အတိုင်းအတာအနေနဲ့လည်း လူငယ်တွေ နိုင်ငံရေးမှာပါဝင်ခွင့် နည်းပါးသလို ရခိုင်လူငယ်တွေအတွက်ဆိုရင် ပိုပြီးအားနည်းပါတယ်၊ ရခိုင်လူငယ်ဖိုရမ် ဖွဲ့စည်းဖို့အတွက် ရခိုင်အသင်းတွေကို ဖုန်းနဲ့ဆက်သွယ်တဲ့အခါ သူတို့အဖွဲ့မှာ အသက် ၃၅ နှစ်အောက် လူငယ်တွေမရှိလို့ပြောပါတယ်၊ ဒါက သာရေးနာရေးအသင်း လောက်သာဖြစ်တာ၊ နိုင်ငံရေးအဖွဲ့အစည်းတွေမှာဆိုရင် လူငယ်တွေပါဝင်မှု အလွန်းနည်းပါးတယ်၊ လူငယ်ခေါင်းဆောင်တွေ ပါဝင်ခွင့်ကို အားမပေးတဲ့ကဏ္ဍတွေ တွေ့ရတယ်၊ လူငယ်တွေလုပ်ချင်စိတ်ရှိပေမယ့် လုပ်ခွင့်မရ၊ ဒါကြောင့် လူငယ်တွေရဲ့ အသံကို ဖော်ထုတ်ဖို့လိုလာပါတယ်၊" ဟု မတင်ထက်မြတ်က ဆက်ပြောသည်။ ရခိုင်လူငယ်ဖိုရမ်(ရန်ကုန်)မှ နှစ်ရက်တာ ပြုလုပ်ကျင်းပသော တွေ့ဆုံဆွေးနွေးပွဲမှ ရရှိလာသော ရလဒ်များကို ဦးစွာပထမ ကြေငြာချက် တစ်စောင်ထုတ်ပြန်သွားမည်ဖြစ်ပြီး ရလဒ်များကို စာတမ်းတစ်စောင် ဖြစ်လာသည်အထိ ပြုစုသွားကာ သက်ဆိုင်ရာ ပြည်ထောင်စုအစိုးရနှင့် ပြည်နယ်အစိုးရ တာဝန်ရှိသူများထံသို့ ဆက်လက်ပို့ဆောင်သွားမည်ဖြစ်ရာ လူငယ်ရေးရာမူဝါဒ ချမှတ်ရာတွင် လူငယ်ထုအတွက် အထောက်အကူဖြစ်မည့် လက်တွေ့ လုပ်ငန်းစဉ်များ ချမှတ်လုပ်ကိုင်သွားရန်အထိ တိုက်တွန်း လုပ်ဆောင်သွားမည် ဖြစ်ကြောင်းသိရသည်။ နှစ်ရက်ဆက်တိုက် ပြုလုပ်ခဲ့သော ရခိုင်လူငယ်များ သမိုင်းမြို့မကျောင်းတွေ့ဆုံဆွေးနွေးပွဲမှ မြန်မာနိုင်ငံတွင် ရခိုင်ပြည်နယ်ပညာရေးသည် အနိမ့်ကျဆုံးပြည်နယ် ဖြစ်လေရာ ရခိုင်ပြည်ပညာရေးတိုးတက်ရန်အတွက် အခြေခံမူလတန်းပညာကို နိုင်ငံတော် အစိုးရမှ အခမဲ့သင်ကြားနိုင်ရန်၊ ပညာထူးချွန်သော်လည်း ချို့တဲ့သောကျောင်းသားများကို Scholarship ပေးရေး၊ ရခိုင်ပြည်နယ်အတွင်း ရခိုင်ပြည်နယ် ရေမြေဒေသ၊ လူမှုစီးပွါးတိုးတက်စေမည့် ဘာသာရပ်များကို သင်ကြားပေးသော အသက်မွေးဝမ်းကျောင်းတက္ကသိုလ်များ ပေါ်ပေါက်လာစေရန်နှင့် နိုင်ငံတကာ အဆင့်မီသော ပညာရေးစနစ်ပေါ်ထွက်လာစေရန် စသည့်အချက်များ လူငယ်နှင့် ပညာရေးကဏ္ဍ ထုတ်ပြန်ချက်တွင် ပါဝင်သည်။ ရခိုင်ပြည်နယ်တွင် ကွမ်း၊ အရက်သေစာ၊ ဆေးလိပ်၊ စိတ်ကြွဆေးလုံး၊ ဆေးခြောက်၊ ဖန်စီဒိုင်းအပါအ၀င် ထိုးဆေးများ၊ ရာမနှင့် ဘိန်းစသည့် မူးယစ်ဆေးဝါးများကို လူငယ်များ ကျယ်ကျယ်ပြန့်ပြန့်သုံးစွဲနေကြခြင်းဖြစ်ရာ ဆေးလိပ်၊ ကွမ်းနှင့် အရက်သေစာများကို အသက်(၁၈)နှစ်အောက် လူငယ်များအား ရောင်းချခြင်းများကို ဥပဒေအရကြပ်ကြပ်မတ်မတ်တားမြစ်အရေးယူပေးရန်၊ လူငယ်များ၏ သုံးစွဲချင်စိတ်ကို ဖြစ်ပေါ်စေသဖြင့် ကြော်ငြာစာများသည် တားဆီးပိတ်ပင် အရေးယူပေးရန်၊ ရပ်ရွာများတွင် အရက်သေစာ တရားမဝင် ရောင်းချခြင်းကို အဂတိလိုက်စားမှုကင်းရှင်းစွာဖြင့် တားမြစ်ပိတ်ပင်ကာ ချိုးဖောက်သူများအား ထိရောက်စွာ အရေးယူပေးရန်၊ အများပြည်သူနှင့် သက်ဆိုင်သည့်နေရာများတွင် ဆေးလိပ်၊ ကွမ်း၊ အရက်နှင့် မူးယစ်ဆေးဝါး လုံးဝ ကင်းစင်သည့် နယ်မြေများအဖြစ် သတ်မှတ်ပြီး ကန့်သတ်နယ်မြေများအဖြစ် သတ်မှတ်ကာ ဆေးလိပ်သောက်ရန် နေရာများ သီးခြားသတ်မှတ်၍ ကြပ်ကြပ်မတ်မတ် ဆောင်ရွက်ရန် စသည့် လူငယ်နှင့် မူးယစ်ဆေးဝါးကဏ္ဍ ဆွေးချက်ရလဒ်များကို ဗဟိုအစိုးရနှင့် ပြည်နယ်အစိုးရတို့အား တိုက်တွန်းသည့်အချက်များ ထုတ်ပြန်ချက်တွင် ပါရှိသည်။ မြန်မာနိုင်ငံရှိ ပြည်နယ်နှင့်တိုင်းဒေသကြီးများအနက် ရခိုင်ပြည်နယ်၏ မီဒီယာ အခန်းကဏ္ဍသည် ဖွံ့ဖြိုးတိုးတက်မှု အနှေးကွေးဆုံး ဒုတိယနေရာ၌ရှိနေခြင်း၊ မီဒီယာလွတ်လပ်ခွင့်မှာ အဓိကဖြစ်သည်ဟု ရခိုင်လူငယ်ဖိုရမ်မှ ယုံကြည်ကြောင်း လူငယ်များ၏ မီဒီယာ စိတ်ဝင်စားမှုကို မြှင့်တင်ပေးရန်နှင့် ရခိုင်လူငယ်များ၏ ကြိုးပမ်းအားထုတ်မှုဖြင့် ကိုယ်ပိုင်မီဒီယာ အုပ်စုများ ဖန်တီးကာ ထိုမှတဆင့် မီဒီယာအသင်းအဖွဲ့တစ်ရပ် ပေါ်ပေါက်လာပြီး ရခိုင်ပြည်နယ်အနှံ့ အချိန်နဲ့ တပြေးညီ ဖြန့်ဝေပေးနိုင်သော ကိုယ်ပိုင် သတင်းမီဒီယာများ ပေါ်ပေါက်လာစေရန် လိုအပ်ပြီး ကမ္ဘာ့သတင်းနည်းပညာကို ရခိုင်ပြည်သူများထိတွေ့ခွင်ရရန် လိုအပ်သော IT နည်းပညာကို တွင်ကျယ်စွာအသုံးချလာနိုင်ရေးအတွက် သက်သာသည့်နှုန်းထားဖြင့် လျှပ်စစ်ဓါတ်အားရရှိနိုင်ရေး အစိုးရမှ အမြန်ဆုံး အကောင်အထည်ဖော်ဆောင်ရွက်ပေးရန် တောင်းဆိုလိုက်သည်။ လူငယ်များ နိုင်ငံရေးဦးဆောင်မှုတွင်ပါဝင်လာရန် နိုင်ငံရေးဆွေးနွေးပွဲများ၊ လူမှု့အဖွဲ့အစည်းများ၊ ကျောင်းသားသမဂ္ဂများကို ပိုမိုလွတ်လပ်စွာ ဖွဲ့စည်း တည်ထောင်ခွင့် ပြုရမည်ဖြစ်ပြီး နိုင်ငံရေးသိပ္ပံဘာသာရပ်ကို အစိုးရကျောင်းများတွင် သင်ရိုးညွန်းတန်းအနေဖြင့် ထည့်သွင်းသင်ကြားပေးရမည့် အပြင် နိုင်ငံရေးကို ကျွမ်းကျင်သော လူကြီးများကလည်း မျိုးဆက်သစ်လူငယ်များကို အတူတကွ လက်တွဲ ခေါ်ဆောင်ရန် လိုအပ်ပြီး လူငယ်များ၏ ဆန္ဒ၊သဘောထား ထုတ်ပြန်ချက်များကို လွှတ်တော်များတွင် တင်ပြ ဆွေးနွေးနိုင်ရန် နိုင်ငံတော် အစိုးရမှ အခွင့်အရေး ပေးခြင်းများ ပြုလုပ်ပေးရမည်ဖြစ်ကြောင်း စုစည်းသော လူငယ့်အသံမှ တိုက်တွန်းနိုးဆော်သည်။ ရခိုင်လူငယ်ဖိုရမ်(ရန်ကုန်)ဖြစ်ပေါ်လာရခြင်းမှာ မြန်မာလူငယ်ဖိုရမ်အား အကြောင်းပြုကာ ပေါ်ပေါက်လာခဲ့ပြီး ရည်ရွယ်ချက်မှာ တိုင်းနှင့် ပြည်နယ်မှ လူငယ်များ၏အသံအား စုစည်းကာ မြန်မာနိုင်ငံလုံးဆိုင်ရာ လူများငယ်များ၏ အသံအဖြစ် ပေါ်ထုတ်ရန်ရည်ရွယ်ရှိပြီး တိုင်းနှင့် ပြည်နယ်မှ အသံများထွက်ပေါ်လာ ရန်အတွက် ဖိုရမ်များတည်ဆောက်နေကြကြောင်း သိရသည်။ မြန်မာနိုင်ငံလုံးဆိုင်ရာ လူငယ်ဖိုရမ်တွင် ရခိုင်လူငယ်များ၏ အသံ၊ သဘောထားများ ထင်ဟတ်နိုင်ရေး၊ ရခိုင်လူငယ်အဖွဲ့အစည်းအချင်းချင်းအကြားတွင် အချိတ်အဆက်မိကာ စည်းလုံးပြီး ရခိုင်လူငယ် ကွန်ယက်ကြီးတစ်ခု ပေါ်ပေါက်လာရန် ရည်ရွယ်ချက်ဖြင့် ရခိုင်လူငယ်ဖိုရမ်အားဖွဲ့စည်းကာ ဖိုရမ်၏ နောက်ဆုံးပန်းတိုင်မှာ လူငယ့်ရေးရာမူဝါဒ တစ်ခုဖြစ်ပြီး ၎င်းမူဝါဒများအား မြန်မာဖိုရမ်နှင့် ပေါင်းကာ ပြည်ထောင်စုလွှတ်တော်နှင့် အမျိုးသားလွှတ်တော်သို့ တင်သွင်းသွားမည်ဖြစ်ပြီး ရခိုင်ပြည်နယ်ဖိုရမ်မှ ထွက်ပေါ်လာသော အသံများကို ပြည်နယ်လွှတ်တော်တွင် တင်သွင်းသွားမည်၊ လက်ရှိတွင် ရှိနေသော အင်အားကို ထန်းသိမ်းကာ ဒေသအဖွဲ့အစည်းများ၏ အကူအညီအားရယူ၍ ဖိုရမ်အားကောင်းလာရန် တည်ဆောက်သွားမည်ဖြစ်သည်။ |
| Last Updated ( Monday, 26 November 2012 10:09 ) |
No comments:
Post a Comment