မိုးနှောင်းမိုးမှာ မိုးသီးတွေရွာရင် မိုးကြိုးကြီးပစ်တတ်တယ်

by Zay Yar Min on Monday, September 3, 2012 at 4:33pm

ကျွန်တော်တို့ကလေးဘ၀တုန်းကပေါ့။

အခုလိုစက်တင်ဘာလောက်မှာများမိုးတွေတအားရွာရင်၊မိုးသီးမိုးတွေရွာရင် အညာဒေသနေတောင်သူလယ်သမားအခြေခံလူတန်းစားတို့
စိတ်သိပ်ညစ်ကြရတာ။မကြာခင်ဖော်ရတော့မည့်မြေပဲခင်းတွေအထိနားလွန်းလို့လေ။

ကျွန်တော်တို့ကလေးအရွယ်ဆိုတော့အဲတာတွေနားမလည်ပါဘူး။ခံရဖူးသူတွေကတော့သိတာပေါ့။

မိုးတွေရွာလာပြီဆိုတာနဲ့ဘောလုံးလေမပြည့်တပြည့်လေးကုတင်အောက်က ဆွဲထုတ်လာပြီးမိုးရေထဲမှာဆော့ကြတာပဲ။

သိပ်ပျော်စရာကောင်းတာကိုး။ကျွန်တော်တို့မိုးရေထဲမှာဘောလုံး
ကန်တာကိုအိမ်ပြတင်းတံခါးဝမှာ
ဆေးပေါ့လိပ်ကြီးခဲပြီးငူငူကြီးထိုင်ကြည့်နေတတ်သူက အဖွား။
ကလေးတွေပျော်နေတာကိုလည်းသူ ကျေနပ်ပုံရတယ်။ဒါပေမယ့်တခုခုကိုတွေးနေသလိုလို၊စိုးရိမ်နေသလိုလိုပဲ။

တစ်ခါတစ်လေကျတော့ မိုးသီးမိုးတွေရွာတတ်တယ်။အဲလိုရွာတဲ့အခါအဖွားက ကျွန်တော်တို့ ကလေးတွေ ကိုပေးမဆော့ဘူး။

ပြီးတော့လည်းပြောသေးတယ်...

'မိုးသီးမိုးတွေရွာရင် အပြင်ထွက်ပြီးအော်ဟစ်
ဆူညံ့မနေနဲ့ တဲ့။ ကိုယ့်အိမ်ထဲမှာပဲအေးဆေးအိပ်နေ၊

မိုးသီးတွေရဲ့နောက်မှာ မိုးကြိုးကြီးတွေပါတယ်၊မိုးကြိုးပစ်တာခံရရင် တစ်ကိုယ်လုံးမဲမဲကြီးဖြစ် သွားပြီးအားလုံးသေကုန်မယ်ငါ့မြေး' တဲ့။
ကျွန်တော်ရဲ့အဖွား အ သုံးလုံးကျောင်းဆင်းကြီး က အဲလိုဆုံးမဖူးတယ်။

ကျွန်တော်လည်းတွေးမိတယ်။ မိုးသီးတွေရွာတုန်းထွက်ဆော့ရင် အနည်းဆုံးတော့ မိုးသီးရဲ့ဒဏ်ချက် စာမိမယ်။နာမယ်။

အခုတော့ကိုယ့်အလုပ်ကိုယ့်ဝမ်းရေးအတွက်တနယ်အဝေးဆီရောက်နေတော့ ကျွန်တော့် ရွာကလေး ကိုလွမ်းမိတယ်။

ဒီအချိန်ဆို မြေပဲတွေဖော်ဖို့ ပြင်ဆင်နေလောက်ပြီ။

မိုးသီးမိုးတွေကောရွာနေသလား၊ကျွန်တော့်ညီလေးညီမလေးတွေ မိုးရေထဲထွက်ဆော့နေကြလေ မလား။

မိုးသီးမိုးတွေရွာတုန်းများမစဉ်းစားမဆင်ခြင်ပဲအပြင်ထွက်ဆော့အော်ဟစ်နေရင် မိုးသီးဒဏ်ကြောင့်နာနေလေမလား။

အခုတလော ကျွန်တော့ရွာလေးကိုသတိရလိုက်တာဗျာ။

ချစ်ခြင်းမေတ္တာအားဖြင့်

ဇေယျာချော

၃/၀၉ /၂၀၁၂ ။