သံဃာတော်တွေထဲမှာ အစိုးရသူလျှိုတွေ ရှိနိုင်လား

သင်္ကန်းခြုံထားတဲ့ပုဂ္ဂိုလ်တွေထဲမှာ အစိုးရသူလျှိုတွေ ရှိနိုင်လားလို့ မေးရင် သေချာပေါက် ရှိတယ်လို့ပဲ ဖြေရပါလိမ့်မယ်။ အစိုးရရဲ့ ထောက်လှမ်းရေး အဖွဲ့အစည်းတွေအနေနဲ့ နအဖအစိုးရလက်ထက်ကနေ အခုချိန်ထိ လူတန်းစား (၇) ရပ်နဲ့ပတ်သတ်တဲ့ လှုပ်ရှားမှုတွေ၊ သတင်းတွေကို စောင့်ကြည့်လေ့လာ၊ စိစစ်သုံးသပ်မှုတွေ လုပ်နေရသလို အခြေအနေအရ လိုအပ်သလို အသွင်ယူ သတင်းစုဆောင်းတဲ့နည်းတွေကိုလည်း သုံးရပါတယ်။ လူတန်းစား (၇) ရပ်ဆိုတာကတော့ တောင်သူလယ်သမား၊ အလုပ်သမား၊ ကျောင်းသား၊ ရဟန်းသံဃာ၊ ပညာတတ်၊ ပညာမဲ့ နဲ့ ၀န်ထမ်း တို့ကို သတ်မှတ်ထားတာပါ။ တက္ကသိုလ်၊ ကောလိပ်တွေမှာ ကျောင်းသားတွေရဲ့ သတင်းတွေကို ရယူဖို့အတွက် ကျောင်းသားတွေထဲက သတင်းပေးတွေ မွေးမြူသလို လိုအပ်ရင် ကျောင်းသားအသွင်ယူပြီး ထိုးဖောက် သတင်းရယူ ပါတယ်။ အဝေးသင်တက်ဆဲဖြစ်တဲ့ ရဲတပ်ဖွဲ့ဝင်တွေ အဝေးသင်ကာလ ရောက်လို့ ကျောင်းသွားတက်ပြီဆိုတာနဲ့ သတင်းရယူဖို့ပါ တာဝန်ပေးအပ် လိုက်တဲ့စနစ်လည်းရှိပါတယ်။ ဒီလိုပါပဲ ရဟန်း၊ သံဃာတော်တွေထဲမှာလည်း သတင်းပေးတွေရှိသလို အသွင်ယူ ထိုးဖောက်ထားသူတွေရှိပါတယ်။

သံဃာတော်တွေထဲမှာ မြှုပ်နှံထားတဲ့ သူလျှိုတစ်ယောက်ကြောင့် DVB သတင်းထောက်တွေကို ဖမ်းဆီးနိုင်ခဲ့တဲ့ ဖြစ်စဉ်တစ်ခုကို ဥပမာပြောပြပါမယ်။ ၂၀၀၉ ခုနှစ်၊ စက်တင်ဘာလတုန်းက DVB က သတင်းထောက် မလှလှဝင်းကို ဖမ်းဆီးနိုင်တဲ့ဖြစ်စဉ်ပါ။ အဲ့ဒီတုန်းက မလှလှဝင်းနဲ့ သူ့အဖော်တစ်ယောက်က ရွှေဝါရောင် နှစ်ပတ်လည်အတွက် ပခုက္ကူမြို့က ဘုန်းကြီးကျောင်းတစ်ခုမှာ သံဃာတော်အချို့နဲ့အင်တာဗျူးလာလုပ်ပါတယ်။ ဒါပေမဲ့ အဲ့ဒီ ဘုန်းကြီးကျောင်းမှာ အစိုးရသတင်းပေး သင်္ကန်းဝတ်ပုဂ္ဂိုလ်တစ်ပါး ရှိနေတယ် ဆိုတာ သူတို့မသိကြပါဘူး။ အဲ့ဒီလို အင်တာဗျူးလာလုပ်တာကို အဲ့ဒီပုဂ္ဂိုလ်က မြို့နယ်မှူးကို ဖုန်းဆက် အကြောင်းကြားလိုက်ပါတယ်။ ဖြစ်ချင်တော့ အဲဒီနေ့က ရဲချုပ်ဗိုလ်မှူးချုပ်ခင်ရီကလည်း ရဲစခန်းတွေကို စစ်ဆေးရင်း ညအိပ်ရပ်နားဖို့ ရောက်ရှိနေပါတယ်။ ရွှေဝါရောင် နှစ်ပတ်လည်အချိန်မို့ ပခုက္ကူမြို့မှာ တစ်ခုခုဖြစ်ခဲ့ရင် အနီးကပ်ကိုင်တွယ်နိုင်ဖို့ ရည်ရွယ်ရောက်ရှိ နေတာလို့လည်း ပြောလို့ရပါတယ်။ အဲဒီလို DVB သတင်းထောက်တွေ ရောက်ရှိ အင်တာဗျူးတဲ့သတင်းဟာ ရဲချုပ်ဆီရောက်ရှိသွားတဲ့ အခါမှာ ဦးခင်ရီတစ်ယောက် “ငါလို ရဲချုပ်တစ်ယောက်လုံးရှိနေတာတောင် သင်းတို့က လာရဲသလား” ဆိုပြီး ဒေါသထွက်သွားပါတယ်။ အဲ့သလိုနဲ့ ဒီကောင်တွေကို မလွတ်စေနဲ့၊ မမိ မိအောင်ဖမ်းကွာ ဆိုပြီး ရဲချုပ်ကိုယ်တိုင် စက်ပေါ်က ကွပ်ကဲပိတ်ဆို့ပြီး ဆင်းဖမ်းတဲ့တာမို့ ခမျာတို့နှစ်ယောက် ပြေးမရရှာပဲ ဖမ်းမိသွားပါတယ်။ အဲ့ဒီ မလှလှဝင်းနဲ့ ကိုမြင့်နိုင်ကို ထောင် (၇) နှစ်စီ အပြစ်ပေးလိုက်တယ်လို့ ကြားလိုက်ပါတယ်။ ခုဆိုရင်တော့ လွတ်လာပြီ ထင်ပါရဲ့။

ပြောချင်တာကတော့ နေရာတိုင်းမှာ အရေခြုံတွေရှိနိုင်တယ်ဆိုတာပါပဲ။ သတိမူနိုင်ကြပါစေ။

မိုးဇေညိမ်း

(ဤ Post ကြောင့် သာသနာ့ဝန်ကို ထမ်းဆောင်နေသည့် ရဟန်းတော်စစ်စစ်များအပေါ် ယုံကြည်မှုသဒ္ဓါ မပျက်ပြားကြရန် မေတ္တာရပ်ခံပါသည်)