ဗိုလ်ချုပ် မိန့်ခွန်းပြောနေပုံ“ကျွန်တော်တို့ စစ်ဝတ်စုံတွေညံ့တာနဲ့ ဝေဖန်မိပါတယ် ဗိုလ်ချုပ်” ဗိုလ်ချုပ်ကို ဗိုလ်အဆင့်ရှိသူ တစ်ဦးက အရဲစွန့်ပြီး ဖြေကြားလိုက်သည်။ “ဘာကွ၊ စစ်ဝတ်စုံတွေ ညံ့တယ်၊ ကြမ်းတယ်၊ လက်တောင်မသုတ်ချင်ဘူး ဟုတ်လား၊ မင်းတို့ ဝေဖန်နေတာတွေ ငါအကုန်ကြားတယ်”
ဗိုလ်ချုပ်သည် ကျယ်လောင်စွာ ပြောလိုက်ပြီး ကုလားထိုင်မှ ဗြုန်းကနဲ ထလိုက်ပြီး တန်းစီထားသူများရှေ့သို့ တက်လာရင် …….“မင်းတို့ ငါအုပ်ချုပ်နေတဲ့ တပ်က အခုထွက်၊ အလကားကောင်တွေ မင်းတို့ကို ငါနဲနဲမှ အထင်မကြီးတော့ဘူး၊ နွားတွေ၊ တို့ ရဲ့ဘော်တွေ ယိုဒယားက ဒီအထိရန်သူတွေကို ရင်ဆိုင်တိုက်ခိုက်လာရတာ မှတ်မှတ်ရရဘယ်စစ်ဝတ်စုံတွေ ဝတ်ပြီး တိုက်ပွဲဝင်ခဲ့ကြသလဲ ဟင် ပြောစမ်း” စိတ်ပါလက်ပါ လက်သီးလက်မောင်းတန်းပြီး မေးလိုက်သည်။
“မင်းတို့က အခုမှ ယူနီဖောင်းလေးဘာလေး စစ်ဝတ်စုံလေးနဲ့ ကြီးကြီးကျယ်ကျယ် လုပ်လို့ကွာ။ ဟေ့ တိုင်းပြည်နဲ့ လူထုအတွက်ဆိုရင် စစ်ဝတ်စုံမရှိလို့ ခါးတောင်းကျိုက်ပြီးပဲ တိုက်ရတာ့ရော ဘာဖြစ်လဲ။ စစ်တိုက်နိုင်ဖို့သာ အဓိကကွ။ အခုတော့ မင်းတို့က ကြီးကြီးကျယ်ကျယ် စကားတွေပြောလို့” ဗိုလ်ချုပ်က ခဏရပ်ပြီး ဆက်ပြောပြန်သည်။
“အခုတော့ တိုက်ပွဲမှာ ကျဆုံးခဲ့တဲ့ ရဲဘော်ရဲဘက် အချင်းချင်းတောင် မင်းတို့ပြောနေကြပုံ သဘောထားတွေက သစ္စာဖောက်နေတဲ့ အကောင်တွေ၊ မင်းတို့ကို ငါ့တပ်ထဲက ထုတ်ပစ်မယ်။ ထုတ်ရမယ်” ကြိမ်းဝါးလိုက်ပြန်သည်။
အကြိမ်းခံရသူ ဗိုလ်၊ အကြပ်တပ်သားများမှာ မျက်ရည်ကျသူကျ၊ ဒူချင်းရိုက်ခက်သူခတ်၊ အတော်စိတ်ထိခိုက် နေကြသည်။ ခေါက်တုံ့ခေါက်ပြန် လမ်းလျှောက်ရင်း တစ်ချက်တစ်ချက် ပါးစပ်သရမ်းသူတွေကို ခေါင်းငဲ့ကာ စိတ်ဆိုးမာန်ဆိုးနှင့် ကြည့်လိုက်လုပ်နေကာ ဗိုလ်ချုပ်သည် “ဘာလဲကွ မင်းတို့က ဂျပန်တွေ ကားစီးပြီး အဝတ်ကောင်းတွေ ဝတ်နေတာကို အားကျလို့လား။ အေး…..မင်းတို့မှတ်ထား ငါတို့ တပ်မတော်ဟာ ပြည်သူလူထုရဲ့ သားသမီးတွေဆိုတာ။ ကြည့်လိုက်စမ်း။ တို့ပြည်သူလူထုတွေဟာ စစ်ဘေးဒဏ်သင့်ပြီး တစ်ဖက်က ငပုတွေက တွေ့ကရာဆွဲယူ အနိုင်ကျင့်ချင်တိုင်း ကျင့်ခံနေရတဲ့ ဘဝမှာ မင်းတို့လိုအကောင်တွေက ဇိမ်ခံချင်ကြတယ်။ ကားသစ်ကြီးတွေ စီးချင်ကြတယ်။ ဒုက္ခရောက်နေတဲ့ ပြည်သူလူထုထက် အခွင့်အရေး ပိုလိုချင်ကြတယ်။ လူထုက ဝတ်စရာ အင်္ကျီ၊ ပုဆိုးမရှိတဲ့ အချိန်မှာ မင်းတို့လို အလိုက်ကန်းဆိုးမသိတဲ့ အကောင်မိုက်တွေက စစ်ဝတ်စုံအကောင်းတွေ ဝတ်ဆင်ကြတယ်။ မှတ်ထား အခုလို စိတ်ဓာတ်မျိုး၊ အမြင်မျိုးတွေ ရှိနေသမျှ ငါမျှော်မှန်းထားတဲ့ ပြည်သူ့တပ်မတော်နဲ့တော့ ဝေးပါသေးတယ်ကွာ။ သိပ်ရှက်စရာကောင်းတယ်။ မင်းတို့ ပြည်သူလူထုအတွက် စစ်တိုက်နေတယ်ဆိုတာ အလလားပဲ။ လုံးဝ အဓိပ္ပာယ်မရှိတော့ဘူး” ပြောလိုက် ဟောက်လိုက် ကြိမ်းလိုက်ပြန်သည်။
“မင်းတို့ နားလည်လား၊ စဉ်းစားမိလား၊ မင်းတိုိ့ကို မင်းတို့ ဗိုလ်တွေ၊ စစ်သားတွေ၊ ရဲဘော်တွေဆိုပြီး တကယ်စစ်တိုက်ရတဲ့အခါမှာ စစ်ပညာ ကောင်းကောင်းတက်နေပြီးလား။ ဘာတစ်ခုမှ မတတ်သေးဘူး။ ကိုယ့်ကိုယ်ကို အထင်ကြီးပြီး ဘဝင်မြင့်နေတဲ့ကောင်စားတွေ။ မင်းတို့ ဒီလိုပြည်သူလူထုနဲ့ ကြပ်ကြပ်သွေးခွဲတဲ့ စိတ်တွေထားကြ။ ငပုတွေက မင်းတို့ကို ဆော်ဖို့ အသင့်ရှိနေတယ် ဆိုတာကို မင်းတို့မြင်ရဲ့လား။ ခွေးကောင်တွေ ဘာမှအသုံးမကျတဲ့ မင်းတို့ကို ငါ့တပ်ထဲက ထုတ်ရမယ်”။
ဆက်လက်ပြီး ဒေါနဲ့ မောနဲ့ ကြိမ်းလိုက်ပြန်သည်။ “မှားပါပြီး ဗိုလ်ချုပ်၊ နောင်တရပါပြီ ဗိုလ်ချုပ်” အရာရှိနှစ်ယောက်က ကတုန်ကယင်ဖြစ်ကာ ငိုယိုသံများဖြင့် တောင်းပန် တိုးလျှိုလိုက်ကြသည်။ “ငါ ဘယ်လိုဝတ်ထားလဲ ကြည့်ကြစမ်း။ မင်းတို့နဲ့ ဘာခြားလို့လဲ။ မင်းတို့က ကြီးကြီးကျယ်ကျယ် လုပ်လို့ကွာ”။ ဗိုလ်ချုပ်သည် သူ၏ဟောင်းနွမ်းနေသော ဝတ်စုံကို လက်ဖြင့်ပုတ်ပြီး ပြလိုက်သည်။
“ကျွန်တော်တို့ မှားပါပြီး ဗိုလ်ချုပ်။ တောင်းပန်ပါတယ်။ ကျွန်တော်တို့ အမှားကို ဝန်ချတောင်းပန်ပါရစေ” မျက်ရည်ဖြိုင်ဖြိုင်ကျလျှက် အသနားခံလိုက်ကြပြန်သည်။ ဗိုလ်ချုပ်သည် သိမ်းကြုံပြီး ဒေါသထွက်နေသော မျက်လုံးအစုံဖြင့် တောင်းပန်နေသူများကို ဝင့်ကြည့်လိုက်သည်။ “မှတ်ထား ငါ့တပ်ထဲမှာ အခွင့်အရေးယူချင်တဲ့အကောင် တစ်ကောင်မှ မရှိရဘူး၊ မပါစေရဘူး။ လူထုငတ်ရင် အားလုံးငတ်မယ်။ လူထုဆင်းရဲရင် တို့ရဲဘော် အားလုံးဆင်းရဲမယ်။ ငါလည်း ဆင်းရဲရမယ်။ ငါတို့တွေ တည်ထောင်ခဲ့တဲ့ တပ်မတော်ကြီးဟာ ဒီဝါဒနဲ့ ချီတက်ဖို့ အရေးကြီးတယ်။ အခုတော့ မင်းတို့ကောင်တွေကွာ ငါလိုက်ပြီး ကန်လိုက်ရရင်ကွာ” ကြိမ်းဝါးလိုက်ပြန်သည်။
သူ့ရှေ့တွင်ရပ်နေ ကြသူများမှာ သူပြုသမျှ၊ သူပေးသမျှ အပြစ်ဒဏ်ကို ခံယူကြမည့် ရဲဘော်များ ဖြစ်နေကြသည်။ အခိုက်အတန့်အတွင်း အပြောမှားအဆိုမှားခဲ့ရာ ယခုအခါဗိုလ်ချုပ်၏ ဆုံးမသြဝါဒများကြောင့် အမြင်မှန် ရခဲ့သည်။ “သွားကြစမ်း၊ မြန်မြန်ထွက်သွား။ အကောင်ရှုပ်တွေ ကြာကြာနေရင် မင်းတို့ကို ငါဆော်ထည့်မိလိမ့်မယ်”။
ဗိုလ်ချုပ်ကာကြိမ်းဝါးက ရုံးခန်းအတွင်းမှ နှင်ထုတ်ပစ်လိုက်သည်။ ပါးစပ်သရမ်းမိသူများလည်း အရေးတကြီး ဗိုလ်ချုပ်ကို အလေးပြုကာ သုတ်သီးသုတ်ပြာ နှင့် ကြောက်ကြောက်ရွံ့ရွံ့ မျက်နှာငယ်လေးများဖြင့် ထွက်သွားကြလေတော့သည်။
No comments:
Post a Comment