RFA သတင်းများ

မြန်မာ့တရားရေး ပိုပြီးပျက်စီးလာနေ

2012-03-26

မြန်မာပြည်ရဲ့အပြောင်းအလဲကာလ တရားစီရင်မှု တစ်ချို့မှာ ဥပဒေ ပြဋ္ဌာန်းချက်တွေကို လှည့်ဖျားခဲ့တာတွေ ရှိနေတယ်လို့ အာရှလူ့အခွင့်အရေး ကော်မရှင် AHRC က မနေ့က ထုတ်ပြန် ကြေညာလိုက်ပါတယ်။

(Photo: AFP)

ရန်ကုန်မြို့လယ်ရှိ ဗဟိုတရားရုံး အဆောက်အအုံ ဖြစ်ပါသည်။ (Photo: AFP)

ကရင်အမျိုးသား အစည်းအရုံး ကေအင်ယူ ဗဟိုကော်မတီဝင် ဖဒိုမန်းငြိမ်းမောင်ရဲ့အမှုမှာ တရားရုံးနဲ့ သမ္မတရဲ့ ဆောင်ရွက်ချက်တွေဟာ ဥပဒေကြောင်းအရ မှားယွင်းတာ ရှိနေတယ်လို့ AHRC ပြောခွင့်ရ ပုဂ္ဂိုလ် ရှေ့နေ ဦးမင်းလွင်ဦးက ပြောပါတယ်။
အလားတူပဲ ရန်ကုန်မှာ နာမည်ကြီး လူသတ်မှုတစ်ခု ဖြစ်တဲ့ ဆေးရုံကားမောင်းသူ ကိုတင်မောင်ဆွေကို အများပြည်သူရှေ့မှောက် လူတစ်စုက မသေမချင်း၊ ရိုက်နှက်သတ်ဖြတ်တဲ့အမှုနဲ့ပတ်သက်ပြီးတော့လည်း ဦးမင်းလွင်ဦး က- "ဒီအမှုဟာ အများပြည်သူရှေ့မှောက် ကျူးလွန်တဲ့ လူသတ်မှု ဖြစ်တဲ့အပြင် ဘေးပတ်ဝန်းကျင်ကို ထိတ်လန့်အောင် လုပ်ခဲ့တာကြောင့် အမြင့်ဆုံး အပြစ်ဒဏ်ချမှတ်ရမယ့်အစား တရားခံတွေကို ထောင်ဒဏ် ၅ နှစ်နဲ့ ၇ နှစ်လောက်စီပဲ စီရင်ချက်ချတာကို ကြည့်မယ်ဆိုရင် ငွေများတရားနိုင် ဖြစ်နေတယ်" လို့ ဦးမင်းလွင်ဦးက ဆိုပါတယ်။
ပြီးခဲ့တဲ့ သီတင်းပတ်တွေက ကျင်းပခဲ့တဲ့ ကုလသမဂ္ဂ လူ့အခွင့်အရေးကောင်စီ ညီလာခံမှာ မြန်မာကိုယ်စားလှယ် တင်ပြခဲ့တဲ့ အစိုးရရဲ့ လူ့အခွင့်အရေး ကာကွယ်ရေး ဆောင်ရွက်ချက် အဆင့် ၉ ဆင့်မှာ တရားဥပဒေ စိုးမိုးရေးအဆင့်ကို နောက်ဆုံးအဖြစ် သတ်မှတ်ထားတာကြောင့် လူ့အခွင့်အရေးအဖွဲ့တွေက ဝေဖန်ခဲ့ကြပါတယ်။

မြန်မာဒုက္ခသည် ဂျပန် တိုးမြှင့်ခေါ်ယူမည်

2012-03-26

ဂျပန်နိုင်ငံရဲ့ လက်ရှိ မြန်မာဒုက္ခသည် ခေါ်ယူနေရာ ချထားရေး အစီအစဉ် သက်တမ်း ကုန်ဆုံးတော့မှာ ဖြစ်ပေမယ့် ဒုက္ခသည်တွေ ဆက်လက် လက်ခံသွားမယ်လို့ ဂျပန်အစိုးရက ပြောပါတယ်။

(Photo: Courtesy of Free Burma Rangers)

စစ်တပ်၏ ရက်စက် ကြမ်းကြုတ်မှုများကြောင့် တောင်ငူနှင့် ညောင်လေးပင်ခရိုင်မှ ခြေလျင်ပြေးလာသော ကရင်ဒုက္ခသည် အမျိုးသမီးနှင့် ကလေးများကို တောတွင်းတနေရာ မိုးရေထဲတွင် တွေ့ရပုံ ဖြစ်ပါသည်။ (Photo: Courtesy of Free Burma Rangers)

ထိုင်းနိုင်ငံ မယ်လ ဒုက္ခသည်စခန်းက မြန်မာဒုက္ခသည်တွေကို ဂျပန်နိုင်ငံက လက်ခံခေါ်ယူခဲ့ရာမှာ သတ်မှတ်ထားတဲ့ အရေအတွက် မပြည့်မီခဲ့တာကြောင့် နောက်ထပ် ဒုက္ခသည် စခန်းနှစ်ခုကပါ တိုးချဲ့ခေါ်ယူမှာဖြစ်ပါတယ်။
၂၀၁၀ ခုနှစ်က စတင်ခဲ့တဲ့ ဂျပန်အစိုးရရဲ့ မြန်မာဒုက္ခသည် လက်ခံ နေရာချထားရေး အစီအစဉ်ဟာ နောက်နှစ် မတ်လ ၃၁ ရက်မှာ သက်တမ်းကုန်မှာ ဖြစ်ပါတယ်။ အဲဒီအချိန် ၃ နှစ်အတွင်း တစ်နှစ်ကို လူ ၃၀ နှုန်းနဲ့ မြန်မာဒုက္ခသည် ဦးရေ ၉၀ လက်ခံဖို့ သတ်မှတ်ထားတာပါ။
အခုထိ မယ်လစခန်းက ဒုက္ခသည် မိသားစု ၉ စု၊ လူဦးရေ စုစုပေါင်း ၄၅ ယောက်ကို ဂျပန်နိုင်ငံမှာ နေရာချထားခဲ့ပါတယ်။ ဒါပေမယ့် ၂၀၁၂ ခုနှစ်အတွက် လျှောက်ထားသူက မိသားစု နှစ်စုသာ ရှိနေသေးပြီး၊ စုစုပေါင်း လူ ၁၀ယောက် ဖြစ်ပါတယ်။
အဲဒါကြောင့် အုန်းဖျန်နဲ့ နို့ဘိုး ဒုက္ခသည် စခန်းတွေကပါ ခေါ်ယူဖို့ ဂျပန်အစိုးရက စီစဉ်နေကြောင်း သိရပါတယ်။

ဒီမိုကရေစီ ပြည်ထောင်စုကြီး ထူထောင်နိုင်ရေး ပြည်သူသာအဓိကလို့ ဒေါ်အောင်ဆန်းစုကြည်ပြော

2012-03-27

မြန်မာနိုင်ငံ အေးချမ်းသာယာရေးနဲ့ ပြည်သူအများ လိုလားနေတဲ့ ဒီမိုကရေစီပြည်ထောင်စုကြီး ထူထောင်နိုင်ရေးအတွက် အဓိက ဆောင်ရွက်ပေးနိုင်မယ့် အင်အားစုတွေဟာ ပြည်သူတွေသာ ဖြစ်တယ်လို့ မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်က ပြောကြားလိုက်ပါတယ်။

RFA

၂၀၁၂ ခုနှစ် မတ်လ ၂၇ ရက်က အမျိုးသားဒီမိုကရေစီ အဖွဲ့ချုပ်ရုံးတွင် ကျင်းပသော ၆၇ နှစ်မြောက် ဖက်ဆစ်တော်လှန်ရေးနေ့ အခမ်းအနားတွင် သူရဦးတင်ဦး စကားပြောကြားနေစဉ်။

အမျိုးသားဒီမိုကရေစီ အဖွဲ့ချုပ်ရုံးမှာ ဒီကနေ့ကျင်းပတဲ့ ၆၇ နှစ်မြောက် ဖက်ဆစ်တော်လှန်ရေးနေ့ အထိမ်းအမှတ် အခမ်းအနားကို ဒေါ်အောင်ဆန်းစုကြည်က သ၀ဏ်လွှာပေးပို့ ပြောကြားလိုက်တာပါ။
NLD ပါတီအနေနဲ့ ကြားဖြတ်ရွေးကောက်ပွဲအတွက် ရုန်းကန်လှုပ်ရှားချိန်ကစပြီး မသမာမှုအမျိုးမျိုး၊ အထူးသဖြင့် ပြည်သူကို ခြိမ်းခြောက်မှုအမျိုးမျိုး ကြုံတွေခဲ့ရကြောင်း၊ ဒီအခက်အခဲတွေကို ပြည်သူတွေနဲ့အတူ ဒီမိုကရေစီ အမှန်တကယ်လိုလားတဲ့ အဖွဲ့အစည်းအားလုံး ပူးပေါင်းပြီး ရင်ဆိုင်ကျော်လွှားရမှာ ဖြစ်ကြောင်းလည်း ဒေါ်အောင်ဆန်းစုကြည်က ပြောဆိုပါတယ်။
လွန်ခဲ့တဲ့ ၆၇ နှစ်ကာလ တပ်မတော်နဲ့ ပြည်သူလက်တွဲပြီး ဖက်ဆစ်တွေကို တော်လှန်ခဲ့တဲ့နည်းတူ လက်ရှိမြန်မာနိုင်ငံ တည်ငြိမ်အေးချမ်းရေးအတွက်လည်း တိုင်းရင်းသား ပြည်သူတွေနဲ့အတူ တပ်မတော်သားအားလုံး ဆက်လက်ကြိုးပမ်းကြဖို့ NLD သဘာပတိ သူရဦးတင်ဦးကလည်း ဒီအခမ်းအနားမှာ တိုက်တွန်း ပြောကြားသွားပါတယ်။
အလားတူ ဝါရင့် နိုင်ငံရေးသမားကြီး သခင်သိန်းဖေ နေအိမ်မှာလည်း ဖက်ဆစ်တော်လှန်ရေးနေ့ အထိမ်းအမှတ် မိတ်ဆုံစားပွဲ ကျင်းပပါတယ်။ ဒီမိတ်ဆုံစားပွဲကို သခင်သိန်းဖေ၊ သခင်ချန်ထွန်း၊ ဦးနိုင်ငွေသိမ်း၊ ဦးသာဘန်း၊ ဦးအေးသာအောင်၊ ဦးအုန်းမောင်၊ ရှေ့နေ ဦးသန်းတင်၊ ဦးသန်းစိန်၊ ဦးသန်းထွန်း စတဲ့ ဝါရင့် နိုင်ငံရေးသမားကြီးတွေ၊ ၈၈ မျိုးဆက် ကျောင်းသားခေါင်းဆောင်တွေ၊ အမျိုးသား ဒီမိုကရေစီအဖွဲ့ချုပ် အဖွဲ့ဝင်တွေ တက်ရောက်ခဲ့ကြပါတယ်။

ဖွဲ့စည်းပုံ အခြေခံဥပဒေကို စစ်တပ်ကကာကွယ်မည်

2012-03-27

မြန်မာ့နိုင်ငံရေးမှာ စစ်တပ်ရဲ့ အခန်းကဏ္ဍဟာ တိုင်းပြည် တည်ငြိမ်ရေးအတွက် အရေးကြီးကြောင်းနဲ့ မိမိအနေနဲ့ ဖွဲ့စည်းပုံ အခြေခံဥပဒေကို ကာကွယ်သွားမှာဖြစ်ကြောင်း ကာကွယ်ရေး ဦးစီးချုပ် ဗိုလ်ချုပ်ကြီး မင်းအောင်လှိုင်က ၆၇ နှစ်မြောက် တပ်မတော်နေ့ အခမ်းအနားမှာ ပြောလိုက်ပါတယ်။

AFP

၂၀၁၂ ခုနှစ် မတ်လ ၂၇ ရက်က နေပြည်တော်တွင် ၆၇ နှစ်မြောက် တပ်မတော်နေ့ အခမ်းအနားကျင်းပနေစဉ်

နေပြည်တော်မှာ ဒီကနေ့ ကျင်းပတဲ့ ၆၇ နှစ်မြောက် တပ်မတော်နေ့ အခမ်းအနားမှာ စစ်သည်အင်အား (၁) သောင်းလောက် ချီတက်တဲ့ပွဲမှာ ပြောကြားလိုက်တာဖြစ်ပြီး ဒါဟာ ကာကွယ်ရေးဦးစီးချုပ် တာဝန်ရယူအပြီး တစ်နှစ်အတွင်း အများပြည်သူကို ပထမဆုံး တိုက်ရိုက်ပြောကြားတဲ့ မိန့်ခွန်း ဖြစ်ပါတယ်။
လက်ရှိဖွဲ့စည်းပုံ အခြေခံဥပဒေအရ လွှတ်တော်ထဲမှာ တပ်မတော်သားတွေက အမတ်နေရာ ၂၅ ရာခိုင်နှုန်း ယူထားတာဟာ မြန်မာနိုင်ငံရဲ့ အမျိုးသား နိုင်ငံရေးတာဝန်ကို ထမ်းဆောင်နေတာ ဖြစ်တယ်လို့ ဗိုလ်ချုပ်ကြီး မင်းအောင်လှိုင်က ပြောကြောင်း အေပီသတင်းဌာနက ဖော်ပြပါတယ်။
ပြည်တွင်း ငြိမ်းချမ်းရေးနဲ့ ပတ်သက်လို့ တိုင်းရင်းသား လက်နက်ကိုင် အဖွဲ့အစည်းတွေနဲ့ အပြန်အလှန် ယုံကြည်မှုရှိဖို့ အရေးကြီးကြောင်း၊ ထာဝရ ငြိမ်းချမ်းရေး ရဖို့အတွက် အဆင့် ၃ ဆင့် ရှိမှာဖြစ်ကြောင်း၊ ပထမအဆင့် အပစ်အခတ်ရပ်စဲရေး၊ ဒုတိယအဆင့် နိုင်ငံရေးအရ ဆွေးနွေးရေးနဲ့ တတိယအဆင့် လွှတ်တော်ထဲမှာ ထာဝရ ငြိမ်းချမ်းရေးအတွက် လက်မှတ်ရေးထိုးရေး ဖြစ်တယ်လို့ ဗိုလ်ချုပ်ကြီး မင်းအောင်လှိုင်က ပြောသွားကြောင်း ဆင်ဟွာ သတင်းဌာနက ရေးသားပါတယ်။

ဒေါ်အောင်ဆန်းစုကြည်အတွက် ဒလိုင်းလားမား ဆုတောင်းမေတ္တာပို့

2012-03-27

ဒေါ်အောင်ဆန်းစုကြည်ရဲ့ ကျန်းမာရေး အမြန်ဆုံး ကောင်းမွန်စေဖို့ ငြိမ်းချမ်းရေး နိုဘယ်လ်ဆုရှင် တိဗက်ဘုန်းတော်ကြီး ဒလိုင်းလားမားက မနေ့က ဆုတောင်းမေတ္တာပို့တဲ့စာ ပေးပို့လိုက်ပါတယ်။

ဒေါ်အောင်ဆန်းစုကြည်ဟာ ပြီးခဲ့တဲ့ ရက်ပိုင်းအတွင်းက မြိတ်ခရီးစဉ်အတွင်း ပင်ပန်းလွန်းတာကြောင့် ခရီးစဉ်တွေ ဖျက်သိမ်းရတယ်လို့ ကြားသိရတဲ့အတွက် အိန္ဒိယနိုင်ငံ ‘ဒါရမ်ဆာလာ’ ဒေသမှာ သီတင်းသုံးနေတဲ့ တိဗက်ဘုန်းတော်ကြီးက ဆုတောင်းမေတ္တာ ပေးပို့ခဲ့တာပါ။
ဘုန်းတော်ကြီး ဒလိုင်းလားမားရဲ့ စာမှာ ဒေါ်အောင်ဆန်းစုကြည် ကျန်းမာရေး ကောင်းမွန်ဖို့ဟာ မြန်မာပြည်သူ ပြည်သားတွေအတွက်သာမက လွတ်လပ်မှုကို မြတ်နိုးတဲ့ တစ်ကမ္ဘာလုံးက ပြည်သူတွေအတွက် အထူးအရေးကြီးကြောင်း ဖော်ပြထားပါတယ်။
တိဗက်ဘုန်းတော်ကြီး ဒလိုင်းလားမားဟာ ၁၉၈၉ ခုနှစ်အတွက် ငြိမ်းချမ်းရေး နိုဘယ်လ်ဆုရှင်ဖြစ်ပြီး ဒေါ်အောင်ဆန်းစုကြည်က ၁၉၉၁ ခုနှစ်မှာ ငြိမ်းချမ်းရေး နိုဘယ်လ်ဆု ရရှိခဲ့တာ ဖြစ်ပါတယ်။

ကော့မှူးမှာ ၀န်ကြီးဟောင်းတွေကိုယ်တိုင် မဲဆွယ်

2012-03-27

အမျိုးသားဒီမိုကရေစီ အဖွဲ့ချုပ် ဥက္ကဋ္ဌ ဒေါ်အောင်ဆန်းစုကြည် ဝင်ရောက်ယှဉ်ပြိုင်မယ့် ကော့မှူးမြို့နယ် မဲဆန္ဒနယ်မှာ ကြံ့ခိုင်ဖွံ့ဖြိုးရေးပါတီက ငွေကြေးပစ္စည်းတွေနဲ့မဲဆွယ်နေသလို၊ ဒေါ်အောင်ဆန်းစုကြည်ကို ပုဂ္ဂိုလ်ရေးအရ တိုက်ခိုက်ထားတဲ့ စာရွက်စာတမ်း ဖြန့်တဲ့လုပ်ရပ်တွေ ရှိနေပြီး၊ စစ်အစိုးရလက်ထက်က ဝန်ကြီးဟောင်းတချို့က ကြံ့ခိုင်ဖွံ့ဖြိုးရေးပါတီဘက်ကနေ ပါဝင်မဲဆွယ်နေတယ်လို့ စုံစမ်းသိရှိရပါတယ်။

RFA

၂၀၁၂ ခုနှစ် ဇန်န၀ါရီ ၂၁ ရက်က ဒေါ်အောင်ဆန်းစုကြည် ကော့မှူးမြို့နယ် ဒေသခံပြည်သူလူထုကို မိန့်ခွန်းပြောနေစဉ်။

ဒီကိစ္စနဲ့ပတ်သက်လို့ ကော့မှူးမဲဆန္ဒနယ် ရွေးကောက်ပွဲအောင်နိုင်ရေး ဒေသဆိုင်ရာတာဝန်ခံ ဦးအေးသိန်းကို RFA သတင်းထောက် တွေ့ဆုံမေးမြန်းတဲ့အခါသူက-အရင်စစ်အစိုးရလက်ထက် ဝန်ကြီးတွေဖြစ်တဲ့ ဦးသောင်း၊ ဦးစိုးသာအပါအဝင် ဗိုလ်ချုပ်မြင့်ဆွေ၊ ဦးလွန်းတင်တို့ ဒီရက်ပိုင်းတွေမှာ မကြာခဏ ရောက်လာပြီး ကြံ့ခိုင်ဖွံဖြိုးရေးပါတီအတွက် မဲဆွယ်စည်းရုံးနေကြတယ်လို့ပြောပါတယ်။
ဒါ့အပြင် မကွေးတိုင်း၊ မြိုင်မြို့နယ်၊ တောင်ပို့ရွာမှာလည်း ရွာသားတစ်ဦးက ဒေါ်အောင်ဆန်းစုကြည်ရဲ့ စည်းရုံးရေးခရီး မှတ်တမ်းဗီဒီယိုခွေနဲ့ ရုပ်ရှင်သရုပ်ဆောင်တွေ ရိုက်ကူးထုတ်လုပ်ထားတဲ့ အမျိုးသားဒီမိုကရေစီအဖွဲ့ချုပ် မဲဆွယ်ဗီဒီယိုခွေကို မနေ့က ပြသပါတယ်။ အဲဒီအခါမှာ အရင်က ကြံ့ခိုင်ဖွံ့ဖြိုးရေးပါတီ စည်းရုံးရေးမှူးကနေ အခု ကျေးရွာအုပ်ချုပ်ရေးမှူး ဖြစ်နေသူက ဆင်ဆာဘုတ်အဖွဲ့ရဲ့ ခွင့်ပြုချက်မပါတဲ့ ရုပ်ရှင်ကားတွေ ပြခွင့်မရှိဘူးလို့ ခေါ်ယူသတိပေး တားမြစ်တဲ့အကြောင်း မြိုင်မြို့နယ် အမျိုးသားဒီမိုကရေစီ အဖွဲ့ချုပ် ဥက္ကဋ္ဌ ဦးအောင်ခင်ဝင်းက ပြောပါတယ်။
အမျိုးသားဒီမိုကရေစီ အဖွဲ့ချုပ် ကော့မှူးမဲဆန္ဒနယ် ရွေးကောက်ပွဲအောင်နိုင်ရေး ဗဟိုကိုယ်စားလှယ် ဒေါ်ကြည်ကြည်ဝင်းနဲ့ ဆက်သွယ်မေးမြန်းခန်းကို နားဆင်နိုင်ပါတယ်။

	ဆက်သွယ်မေးမြန်းခန်း။
	အသံဖိုင်ယူရန်။

ပဲခူးတိုင်း အနောက်ခြမ်းက လယ်သမားများ ဆန္ဒပြ

2012-03-27

ပဲခူးတိုင်း အနောက်ခြမ်း၊ ပန်းတောင်းမြို့နယ်၊ ကျီးပင်ကျေးရွာအုပ်စုက လယ်သမား တစ်ရာလောက်ဟာ သူတို့ အခက်အခဲတွေကို ဖြေရှင်းပေးဖို့ မြို့နယ်အုပ်ချုပ်ရေးရုံးကို ဒီကနေ့ ဆန္ဒပြချီတက်ကြတယ်လို့ လယ်သမားတွေက ပြောပါတယ်။

RFA

ဧရာဝတီတိုင်း အတွင်းက စပါးခင်း တခုတွင် စိုက်ပျိုးနေသော လယ်သူမများကို ၂၀၁၁ ခုနှစ် အောက်တိုဘာ လကုန်ပိုင်းတွင် တွေ့ရပုံ။

စစ်အစိုးရလက်ထက် ပြည်ထဲရေးဝန်ကြီး ဦးတင်လှိုင်လက်ထက်က လယ်သမားတွေကို လုပ်ပိုင်ခွင့်ချထားပေးခဲ့တဲ့ မြေတွေမှာ ပုဂ္ဂလိကပိုင်ကုမ္ပဏီက ကျွန်းပင်တွေလာစိုက်ပျိုးတဲ့အတွက် လယ်ယာမြေနဲ့ စားကျက်မြေ ဆုံးရှုံးရတဲ့ကိစ္စနဲ့ ပတ်သက်ပြီး ငြိမ်းချမ်းတဲ့နည်းနဲ့ ဆန္ဒဖော်ထုတ်တာလို့ ကြာအင်းရွာဟောင်းက လယ်သမားကြီး ဦးစပယ်က ပြောပါတယ်။
"အမျိုးသားသယံဇာတ ကုမ္ပဏီလိမိတက်က ဆက်လက်လုပ်ကိုင်နေတာကို တားပေးဖို့ရယ်၊ ညှိနှိုင်းစကားပြောဖို့ ကျွန်တော်တို့ ချီတက်လာခဲ့တယ်။ ရိုးရိုးသားသားပဲ ဆန္ဒပြတဲ့ သဘောမျိုးပဲလာခဲ့တယ်။ အဲတာကို သူတို့ကဘာမှ မပြောဘူး။ ဖြေရှင်းပေးပါ့မယ်။ နောက်မဖြစ်ရပါဘူးလို့ သူတို့ တစ်ခွန်းမှ စကားကမထွက်ဘူး။ နားထောင်နေတာပဲ ရှိတယ်။ ဒီနှမ်းခင်းတွေ၊ ယာခင်းတွေ မရမချင်း ကျွန်တော်တို့က တောင်းဆိုသွားမယ်၊ ဆန္ဒပြသွားမယ်"
ကြာအင်း၊ သပြေကုန်း၊ သဲကုန်းရွာက လယ်သမားတွေ ၂ မိုင်လောက် ချီတက်သွားကြတာပါ။ ဒီရွာတွေက လယ်သမား ၈၀ လောက်ကလည်း သူတို့ အခက်အခဲတွေ ဖြေရှင်းပေးဖို့ နိုင်ငံတော်သမ္မတဆီ ဒီလ ၉ ရက်နေ့က စာတစ်စောင် ပေးပို့ထားတယ်လို့ ပြောပါတယ်။
လယ်ယာမြေ ဆုံးရှုံးရတဲ့အပြင် လယ်သမားတွေရဲ့ကျွဲနွားတွေ ကျွန်းစိုက်ခင်းထဲ ၀င်သွားရင် ဒဏ်ကြေးပေး ရွေးယူရ၊ လယ်သမားတွေကို ကျွန်းစိုက်ခင်းအတွက် အဓမ္မလုပ်အားပေးခိုင်းစေလို့ လုပ်ပေးရတဲ့ ဖြစ်ရပ်တွေလည်း ရှိတယ်လို့လည်း လယ်သမားတွေက ပြောပါတယ်။
ကျွန်းပင်ငယ်လေးတွေကို မတော်တဆ ထိမိခိုက်မိရင်လည်း ဒဏ်ငွေတစ်သိန်းအထိ တောင်းတာရှိပြီး ငွေ ၇ သောင်းနဲ့ ဈေးတည့်သွားတာမျိုးလည်း ရှိတယ်လို့ ပြောပါတယ်။ လယ်သမားတွေ ကြုံတွေ့နေရတဲ့ အခြေအနေကို ဒေါ်စမ်းစမ်းတင်က တင်ပြပါမယ်။

	တင်ပြချက်။
	အသံဖိုင်ယူရန်။

အမေရိကန် လွှတ်တော်အမတ် ဂျင်မ်ဝက်ဘ် မြန်မာပြည် လာဦးမည်

2012-03-27

အမေရိကန် ဒီမိုကရက် လွှတ်တော်အမတ် မစ္စတာ Jim Webb ဟာ မြန်မာနိုင်ငံကို ဧပြီလအတွင်း ဒုတိယအကြိမ် သွားရောက်မှာဖြစ်ကြောင်း အေပီ သတင်းက ဖော်ပြပါတယ်။

(Photo: AFP)

အမေရိကန် အထက်လွှတ်တော်အမတ် Jim Webb ဖြစ်ပါသည်။

ဧပြီလ ၁ ရက် ကြားဖြတ် ရွေးကောက်ပွဲအပြီး ရက်ပိုင်းအတွင်း သွားရောက်မှာ ဖြစ်ပါတယ်။
မစ္စတာ Jim Webb ဟာ ပြီးခဲ့တဲ့ ၂၀၀၉ ခုနှစ်က မြန်မာနိုင်ငံကို လာရောက်ခဲ့ပြီး၊ အဲဒီတုန်းက စစ်အစိုးရ ခေါင်းဆောင် ဗိုလ်ချုပ်မှူးကြီးသန်းရွှေနဲ့ တွေ့ခွင့်ရခဲ့တဲ့ တစ်ဦးတည်းသော အမေရိကန် လွှတ်တော်အမတ် ဖြစ်ပါတယ်။
အရှေ့အာရှ နဲ့ ပတ်သက်တဲ့ အမေရိကန်မူဝါဒ ကြီးကြပ်ရေးဆိုင်ရာ လွှတ်တော်ဆပ်ကော်မတီကို ဦးဆောင်သူဖြစ်တဲ့ မစ္စတာ Jim Webb ဟာ မြန်မာပြည်ကို မရောက်ခင် ဂျပန်နဲ့ ထိုင်းနိုင်ငံတွေကို ၀င်ရောက်မယ်လို့ သိရပါတယ်။

ဒေါ်အောင်ဆန်းစုကြည် ကျန်းမာစေဖို့ မကွေးမြို့ပြည်သူတွေ ဆုတောင်းမေတ္တာပို့

2012-03-27

ကျန်းမာရေး အခြေအနေကြောင့် မကွေးခရီးစဉ် ဖျက်သိမ်းလိုက်ရတဲ့ ဒေါ်အောင်ဆန်းစုကြည် အမြန်ဆုံး ပြန်လည် ကျန်းမာလာစေဖို့ သောင်းနဲ့ချီတဲ့ မကွေးမြို့ပြည်သူတွေ မနေ့တုန်းက မြို့ကိုလှည့်လည်ပြီး ဆုတောင်း မေတ္တာပို့ကြကြောင်း သိရပါတယ်။

RFA

မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည် ကျန်းမာစေရန်အတွက် ၂၀၁၂ ခုနှစ် မတ်လ ၂၇ ရက်တွင် မကွေးမြို့ ပြည်သူလူထုက မကွေး မြသလွန်ဘုရား အင်္ဂါထောင့်၌ ဝတ်ပြုဆုတောင်း မေတ္တာပို့နေကြစဉ်။

မနေ့ မနက်ပိုင်းက မကွေး မြသလွန်ဘုရား အင်္ဂါထောင့်မှာ ပြည်သူလူထုက ဝတ်ပြုဆုတောင်း မေတ္တာပို့ခဲ့ကြကြောင်း၊ နောက်ပိုင်းမှာ လူစုခွဲလိုက်ကြကြောင်းမြို့ခံတစ်ဦးက ပြောပြပါတယ်။
အစောပိုင်းတုန်းက ဒေါ်အောင်ဆန်းစုကြည်ဟာ မတ်လ ၂၇ ရက်၊ ၂၈ ရက်နေ့တွေမှာ မကွေးတိုင်းတွင်းက မြို့နယ် ၄ မြို့နယ်ကို သွားရောက်ဖို့ စီစဉ်ခဲ့ပြီး မြိတ်မြို့ခရီးစဉ်မှာ ကျန်းမာရေး ချို့ယွင်းလာတာကြောင့် မကွေးခရီးစဉ်ကို ဖျက်သိမ်းခဲ့ရတာပါ။
မကွေးမြို့နယ်မှာ NLD ပါတီရဲ့ ကိုယ်စားလှယ်လောင်းအဖြစ် ဦးမြင့်သိန်းက ဝင်ရောက် ယှဉ်ပြိုင်မှာဖြစ်ပါတယ်။