“နိုင်ငံအုပ်ချုပ်ရေးကို ဆက်လက်ထိန်းသိမ်းနိုင်ဖို့၊ အစိုးရလုပ်ငန်းတွေကို မထိခိုက်ဖို့၊ ပြည်သူတွေရဲ့ ဘေးကင်းလုံခြုံရေးကို ထိန်းသိမ်းနိုင်ဖို့၊ နိုင်ငံရဲ့ အချုပ်အချာ အာဏာကို ထိန်းသိမ်းနိုင်ဖို့ ဘန်ကောက်ခရိုင်၊ နွန်ထရ ဘူရီခရိုင် အပါအ၀င် စမွတ်ပရာကန် ခရိုင် နဲ့ ပသုံဌာနီ ခရိုင်တွေ က နေရာတချိူ့ မှာ အမျိုးသားလုံခြုံရေးဥပဒေကို တိုးချဲု့ပြဋ္ဌာန်းလုိုက်တာ ဖြစ်ပါတယ်။ တနင်္လာနေ့က အစိုးရကို ဆန္ဒပြသူတွေဟာ ထိုင်းနိုင်ငံအခွန်ဝန်ကြီးဌာနနဲ့ နိုင်ငံခြားရေးဝန်ကြီးဌာနတွေထဲကို ၀င်ရောက်ခဲ့ကြပါတယ်။ အခုလို အစိုးရအဆောက်အဦးတွေထဲအထိ ၀င်ရောက်စီးနင်းတာဟာ လွန်ခဲ့တဲ့ ၃ နှစ်က လူတွေသေကြေခဲ့ရတဲ့ ဆန္ဒပြမှုတွေနောက်ပိုင်း နိုင်ငံရဲ့အဆိုးဆုံးအခြေအနေပဲဖြစ်ပါတယ်။ ဆန္ဒပြသူတွေက လက်ရှိဝန်ကြီးချုပ်ဟာ အရင်ဝန်ကြီးချုပ်ဟောင်းရဲ့ ရုပ်သေးဝန်ကြီးချုပ်ဖြစ်တယ်လို့ စွပ်စွဲထားပါတယ်။ ၀န်ကြီးချုပ်က ထိုင်းနိုင်ငံရဲ့ အဓိကလေဆိပ်ရှိတဲ့ စမွတ်ပရာကန် ခရိုင်ကို ပြည်တွင်းလုံခြုံရေးဥပဒေထဲမှာ ထည့်သွင်း ပြဋ္ဌာန်းခဲ့ပြီး အစိုးရရုံးဌာနတွေထဲအထိ အတင်းဝင်ရောက်ခဲ့တဲ့ ဆန္ဒပြသူတွေကိုတော့ အကြမ်းဖက်အင်အားသုံးပြီး နှိမ်နင်းမှာမဟုတ်ဘူးလို့ဆိုပါတယ်။
ပြည်တွင်းလုံခြုံရေးဥပဒေဟာ စစ်တပ်ကို ညမထွက်ရအမိန့်၊ လုံခြုံရေး၊ စစ်ဆေးရေးဂိတ်တွေချခွင့်၊ ဆန္ဒပြသူတွေရဲ့ လှုပ်ရှားသွားလာမှုတွေကို ကန့်သတ်မှုတွေလုပ်နိုင်အောင် ခွင့်ပေးထားပါတယ်။ အစိုးရက ယခင်ဝန်ကြီးချုပ်ဟောင်း သက်ဆင်ကို ၂၀၀၈ အဂတိလိုက်စားမှုတွေကြောင့် ကျခံထားရတဲ့ ထောင်ဒဏ်ကို ကင်းလွတ်ခွင့်ရမယ့် လွတ်ငြိမ်းချမ်းသာခွင့်ဥပဒေကြမ်းကို ဒီလထဲမှာပဲ ထိုင်းလွှတ်တော်ကို တင်ခဲ့တာကနေ ဆန္ဒပြပွဲတွေ ပြန်ဖြစ်လာခဲ့တာပါ။
ဝန်ကြီးချုပ်က ဒီဆန္ဒပြပွဲတွေကြောင့် နိုင်ငံရဲ့ခရီးသွားလုပ်ငန်း နဲ့ ရင်းနှီးမြှပ်နှံမှုကို ထိခိုက်နိုင်တယ်ဆိုပေမယ့် ပါလီမန်ကိုတော့ ဖျက်သိမ်းမှာမဟုတ်ဘူးလို့ ဆိုပါတယ်။
ဘန်ကောက်မြို့တွင် အရေးပေါ် အခြေအနေ ကြေညာထား
ထိုင်း ဘဏ္ဍာရေး ၀န်ကြီးဌာန ရုံးဝန်းတွင် တွေ့ရသော အစိုးရ ဆန့်ကျင်ရေး ဆန္ဒပြသမားများ (ဓာတ်ပုံ – Reuters)
ယမန်နေ့ ညနေက ဒီမိုကရက်တစ်ပါတီ ဒု ဥက္ကဋ္ဌဟောင်း ဆူထေ့ပ် သပ်ဆူဗန် ဦးဆောင်တဲ့ အစိုးရ ဖြုတ်ချရေး ဆန္ဒပြသူတွေက ဘဏ္ဍာရေး ၀န်ကြီးဌာနရုံးကို ၀င်ရောက်သိမ်းပိုက်ပြီးတဲ့နောက်မှာ အခုလို ၀န်ကြီးချုပ် မစ္စ ယင့်လပ် ရှင်နာဝပ်က အရေးပေါ် အခြေ အနေ ကြေညာလိုက်ခြင်းဖြစ်ပါတယ်။
“အစိုးရအနေနဲ့ ပြည်သူတွေရဲ့ လွတ်လပ်တဲ့ အခွင့်အရေးကို လေးစားပါတယ်၊ ဒါပေမယ့် တိုင်းပြည် တည်ငြိမ်အေးချမ်းဖို့နဲ့ နိုင်ငံ သားများ လုံခြုံမှု အတွက်လည်း တာဝန်ရှိပါတယ်”လို့ ၀န်ကြီးချုပ် ယင့်လပ်က ပြောဆိုပါတယ်။
အရေးပေါ်အခြေအနေရ ဆိုရင် အာဏာပိုင်တွေအနေနဲ့ ညမထွက်ရအမိန့်ထုတ်ပြန်ခွင့်၊ လမ်းတွေကို ပိတ်ဆို့ ရှာဖွေတာတွေ ပြုလုပ် နိုင်ပြီဖြစ်ပါတယ်။ ဒါပေမယ့် အခုထုတ်ပြန်လိုက်တဲ့ ကြေညာချက် အရဆိုရင် လူစုလူဝေးနဲ့ ဆန္ဒပြခွင့်မရှိပေမယ့် ဖြိုခွင်းတာမျိုးမတွေ့ရသေးပါဘူး။
ဝန်ကြီးချုပ် ယင့်လပ် ရှင်နာဝပ်ကတော့ ဆန္ဒပြသူတွေအနေနဲ့ သူတို့ဘာသာ သူတို့လူစုခွဲပြီး နိုင်ငံရေးအရ အဖြေရှာဖို့ ပြောဆို နေပေမယ့် ဆန္ဒပြသမားတွေကတော့ ယင့်လပ် အစိုးရဟာ အစ်ကိုဖြစ်သူ ပြည်ပြေး ၀န်ကြီးချုပ်ဟောင်း သက်ဆင်ရဲ့ထိန်းချုပ်မှု အောက်မှာ ရှိတဲ့အတွက် ဖြုတ်ချရမယ်လို့ ဆိုပါတယ်။
ဒါပေမယ့် ဆန္ဒပြ ခေါင်းဆောင် ဆူထေ့ပ် သပ်ဆူဗန် ကို ဖမ်းဆီးဖို့ ဖမ်းဝရမ်းကို ထိုင်းနိုင်ငံ ရာဇ၀တ်မှု ဆိုင်ရာ ခုံရုံးက အတည်ပြု ပေး လိုက်ပြီလို့ ဘန်ကောက်ပို့စ် သတင်းမှာ ဒီနေ့ ပါရှိပါတယ်။
မနေ့ကတော့ ဆန္ဒပြသမားတွေဟာ နိုင်ငံခြားရေး ၀န်ကြီးဌာနနဲ့ ဘဏ္ဍာရေး ၀န်ကြီးဌာနထဲကို ရောက်လာပြီးတော့ အစိုးရလုပ်ငန်း တွေ ကို ရပ်တန့်အောင် ပြုလုပ်ခဲ့ပါတယ်။
၂၀၀၈ ခုနှစ်က ၀န်ကြီးချုပ်ဟောင်း သက်ဆင် ဆန့်ကျင်ရေး ဆန္ဒပြပွဲတုန်းကလည်း ရှပ်ဝါ ဆန္ဒပြသူတွဟာ ဘန်ကောက်မြို့က နိုင်ငံတကာ လေဆိပ်နှစ်ခုကို တပတ်ကြာ စီးနင်းထားတဲ့အတွက် လေဆိပ်ပိတ်လိုက်ရတဲ့ အပြင် ၀န်ကြီးချုပ်ရုံးကိုလည်း သုံးလခန့် ထိန်းချုပ်ထားခဲ့ ပါသေးတယ်။
ဒီတကြိ်မ်မှာတော့ အစိုးရအနေနဲ့ အဓိက လေဆိပ်ရှိရာ နယ်မြေတွေကို ဆန္ဒပြသူတွေ သိမ်းပိုက်လို့မရအောင် လုံခြုံရေးတင်းကျပ် ထားပါတယ်။
အစိုးရ ဆန့်ကျင်ရေး ဆန္ဒပြသူတွေ အစိုးရရုံးတွေနဲ့ ရုပ်မြင်သံကြား ဌာနတွေ အပါအ၀င် နေရာ ၁၃နေရာကို မနေ့က စတင်ပြီး ချီတက် စီးနင်းခဲ့တာဖြစ်ပါတယ်။
“ဘာတခုမှတော့ မဖျက်ဆီးနဲ့၊ အထပ်တိုင်းကို တက်မယ်၊ အခန်းတိုင်းကို ၀င်မယ်၊ ဒါလူထုရဲ့အာဏာဆိုတာ သူတို့ကို ပြရမယ်”လို့ ဘဏ္ဍာရေး ၀န်ကြီးဌာနကို မသိမ်းခင် ဆန္ဒပြခေါင်းဆောင် ဆူထေ့ပ်သပ်ဆူဗန်က ဆန္ဒပြသူတွေကို မိန့်ခွန်းပြောပါတယ်။
ဆန္ဒပြသူတွေကလည်း သီချင်းတွေ သီဆိုကခုန်ပြီး ၀ီစီကို တရွီရွီမှုတ်ကာ အစိုးရဆန့်ကျင်ရေး “၀ီစီ လှုပ်ရှား”မှုကို လုပ်ကြပါတယ်။
အဲဒီနေ့ ညနေမှာပဲ ဆန္ဒပြတဲ့ အဖွဲ့တဖွဲ့ဟာ မူလပစ်မှတ်ထဲမှာမပါတဲ့ နိုင်ငံခြားရေး ၀န်ကြီးဌာန ပရ၀ုဏ်ထဲကို ရောက်ရှိသွားခဲ့ ပါတယ်။
နိုင်ငံခြားရေး ၀န်ကြီးဌာန ပြောခွင့်ရ ပုဂ္ဂိုလ် Sek Wannamethee က “လူဘယ်နှစ်ယောက်လဲတော့ မသိဘူး၊ သူတို့ ၀န်းထဲကို ရောက်ခဲ့ပေမယ့်၊ အဆောက်အအုံထဲကို မ၀င်ဘူးလို့ ကတိပေးပါတယ်၊ နောက်နေ့ သူတို့ ရုံးထဲကနေ အိမ်ပြန်ဖို့ နည်းလမ်းရှာနေ ပါတယ်”လို့ ပြောပါတယ်။
အစိုးရ ကတော့ အင်အားမသုံးဘဲ ရုံးတွေကို သိမ်းပိုက်ထားတဲ့ ဆန္ဒပြသူတွေနဲ့ ညှိနှိုင်းဖို့ နည်းလမ်း ရှာနေတယ်လို့ ရဲတပ်ဖွဲ့ ပြော ရေး ဆိုခွင့်ရှိသူ Piya Uthayoက ဆိုပါတယ်။
ဆန္ဒပြတဲ့ လမ်းကြောင်းပေါ်ရှိနေတဲ့ စာသင်ကျောင်း ၂၀ကျော်ကို ပိတ်ထားရပါတယ်။ စစ်ရုံးချုပ်နဲ့ ရဲဌာနချုပ် အပါအ၀င် ရုပ်မြင်သံကြား ဌာန ၅ ခုကိုတော့ အစိုးရက ထိန်းချုပ်ထားပြီး အနီးတ၀ိုက်မှာလည်း လုံခြုံရေး တင်းကျပ်ထားတယ်လို့ သိရပါတယ်။
လက်ရှိ ထိုင်းအစိုးရကို ထောက်ခံတဲ့ ရှပ်နီဝတ်တွေကလည်း အင်အား ၄သောင်းလောက်နဲ့ တန်ပြန် ဆန္ဒပြပွဲတွေကို ရာဇမင်္ဂလာ ဘောလုံးကွင်းကြီးထဲမှာ ကျင်းပနေပြီး အစိုးရ ဆန့်ကျင်သူနဲ့ ထောက်ခံသူ အုပ်စု နှစ်စုအကြား ထိပ်တိုက်တွေ့ပြီး အကြမ်းဖက်မှု တွေဖြစ်လာမှာကို ပြည်သူများက စိုးရိမ်နေကြပါတယ်။
အမေရိကန်အစိုးရကတော့ အစိုးရ ထောက်ခံသူရော ဆန့်ကျင်သူ နှစ်ဘက်စလုံးကို အေးချမ်းစွာနဲ့ အဖြေရှာဖို့ တိုက်တွန်း ပါတယ်။
“နိုင်ငံရေး အမြင်ကွဲပြားမှုကို အေးချမ်းစွာ အဖြေရှာဖို့လိုပါတယ်၊ အကြမ်းဖက်တာ တိုက်ခိုက်ဖျက်ဆီးတာတွေကို လက်မခံဘူး”လို့အမေရိကန် နိုင်ငံခြားရေး ၀န်ကြီးဌာန ပြောခွင့်ရ Jen Psaki က ပြောဆိုထားပါတယ်။
No comments:
Post a Comment