Thursday, January 17, 2013

ရပ်ကွက်ထဲက ပြဿနာ



ရပ်ကွက်ထဲမှာ မောင်ပုဆိုတဲ့ ကလေးလေးတယောက် ကားတိုက်ခံရပြီး၊ လဲကျသွားပါတယ်။ ကားက မရပ်ပဲ မောင်းပြေးသွားပါတယ်။ ဒါပေမယ့် အကြော်သည် ဒေါ်စိန်တုတ်က ဒီကားဟာ ဟိုဘက်ရပ်ကွက် တိုက်ကြီးက ကားမှန်း မှတ်မိသွားပါတယ်။ ဒီဖြစ်ရပ်မှာ မောင်ပုက ထိခိုက်ခံစားရတဲ့သားကောင် (victim) ဖြစ်ပါတယ်။ ဒေါ်စိန်တုတ်ကတော့ သက်သေ (witness) ဖြစ်ပါတယ်။

ဒေါ်စိန်တုတ်က မောင်ပုကို ဆိုက်ကားနဲ့ တင်ခေါ်ပြီး၊ အိမ်ကို ပို့ပေးပါတယ်။ အိမ်က မောင်ပုအဖေ ရုံးစာရေး ဦးဘသာက မောင်ပုကို ဆေးခန်းခေါ်သွားပါတယ်။ ဒီဖြစ်ရပ်မှာ ဒေါ်စိန်တုတ်က လူသားချင်းစာနာမှုနဲ့ ကူညီပေးသူ ဖြစ်ပါတယ်။ ဦးဘသာက ထိခိုက်မှုကို ကုသပေးနိုင်တဲ့ တတ်ကျွမ်းနားလည်သူတွေဆီ ခေါ်ဆောင်ပေးသူ ဖြစ်ပါတယ်။ ဆေးခန်းက အမှုထမ်းတွေကတော့ ကျန်းမာရေးကို ကုသစောင့်ရှောက်ပေးသူတွေ ဖြစ်ပါတယ်။

ဒေါ်စိန်တုတ်ပြောစကားကြောင့် ကားကတိုက်ပြီး မောင်းပြေးသွားတာကို မောင်ပုရဲ့ အစ်ကို ငတွတ်က သိသွားပါတယ်။ ဒါကြောင့် ငတွတ်က ရပ်ကွက်ထဲက လူငယ်တွေကိုစုပြီး၊ ဟိုဘက်ရပ်ကွက်က တိုက်ကြီးရှေ့မှာ အရေးသွားဆိုပါတယ်။ ဒီဖြစ်ရပ်မှာ ငတွတ်က ထိခိုက်ခံရမှုကို မတရားမှုလို့ ယူဆတဲ့ ထိခိုက်ခံရသူနဲ့ ဆက်နွယ်သူဖြစ်ပါတယ်။ ငတွတ်နဲ့ လိုက်ပါသွားသူတွေကတော့ ငတွတ်နဲ့ ရင်းနှီးသူတွေနဲ့ မတရားမှုကို လက်ပိုက်ကြည့်မနေပဲ ခံရသူဘက်က ဘက်လိုက်သူတွေ ဖြစ်ပါတယ်။

မောင်ပုကို ကားနဲ့တိုက်ပြီး ထွက်ပြေးသွားသူကတော့ သူဌေးဦးကျော်ခေါင်ရဲ့သား စည်သူ ဆိုသူ ဖြစ်ပါတယ်။ ငတွတ်တို့ကို တွေ့ဆုံညှိနှိုင်းဖို့ ဦးကျော်ခေါင်က သူ့လူယုံ မင်းဒင်ကို လွှတ်လိုက်ပါတယ်။ ဒီနေရာမှာ စည်သူက မတရားမှုကျူးလွန်ခဲ့သူဖြစ်ပြီး၊ ဒီမတရားမှုဘက်က ရပ်တည်ဖြေရှင်းပေးရန် ကြိုးပမ်းသူကတော့ ဦးကျော်ခေါင် ဖြစ်ပါတယ်။ မင်းဒင်ကတော့ ဦးကျော်ခေါင်ရဲ့ သစ္စာခံလူယုံဖြစ်ပြီး၊ မတရားမှုကျူးလွန်ခဲ့သူ ကိုယ်စား ညှိနှိုင်းဆွေးနွေးဖို့ အကျိုးဆောင်အဖြစ် ပေါ်ထွက်လာသူ ဖြစ်ပါတယ်။

မင်းဒင်ရဲ့ ပြောဆိုမှုကို ငတွတ်တို့က လက်မခံပါဘူး။ ဒီအချိန်မှာပဲ စည်သူက ခြံထဲက အလုပ်သမားတွေ ခေါ်ထုတ်လာပြီး၊ ငတွတ်တို့ကို ၀င်ရိုက်ပါတယ်။ ဒီဖြစ်ရပ်မှာ စည်သူက မတရားမှုကျူးလွန်ခဲ့သူဖြစ်ပြီး၊ ခြံထဲက အလုပ်သမားတွေကတော့ မလွန်ဆန်နိုင်သော အခြေအနေ တစုံတရာကြောင့် မတရားသူဘက်က ပါဝင်ရပ်တည်သူတွေ ဖြစ်ပါတယ်။

ရုတ်ရုတ်သဲသဲ ဖြစ်နေဆဲမှာပဲ အငြိမ်းစားယူထားတဲ့ ကျောင်းအုပ်ဆရာကြီး ဦးငြိမ်းမောင်က လမ်းလျှောက်ထွက်လာတာနဲ့ သွားဆုံပါတယ်။ ဆရာကြီးကိုတော့ အများက လေးစားကြပါတယ်။ ဒါကြောင့် ဦးငြိမ်းမောင်က ရန်ပွဲကို ၀င်တားပြီး၊ ဒီဖြစ်စဉ်မှာ ကြားဝင်စေ့စပ်ဖြန်ဖြေပေးသူ (Mediator) ဖြစ်လာခဲ့ပါတယ်။ သူဟာ ဦးကျော်ခေါင်ရဲ့ သစ္စာခံမဟုတ်သလို၊ ဦးဘသာရဲ့ မိတ်ဆွေလဲ မဟုတ်တာကြောင့် ပြဿနာတွေကို ဘက်မလိုက်ပဲ စေ့စပ်ဖြန်ဖြေပေးနိုင်သူ အဖြစ် လူအများက လက်ခံကြပါတယ်။

ဒီပြဿနာကြီး ပြေလည်သွားရေးအတွက် ပါဝင်ပတ်သက်သူအားလုံးမှာ တာဝန်ရှိပါတယ်။ ဒါပေမယ့် ပါဝင်ပတ်သက်သူတွေက ကိုယ်ဘာလဲဆိုတဲ့ ကိုယ့်ရဲ့ အခန်းကဏ္ဍ၊ အခြေအနေကို သိဖို့လိုအပ်ပါတယ်။ မင်းဒင်ဟာ ပြဿနာကို ညှိနှိုင်းဖြေရှင်းဖို့ ပေါ်ထွက်လာတယ်ဆိုပေမယ့် ဦးကျော်ခေါင်ရဲ့ သစ္စာရှိ လူယုံဖြစ်ပါတယ်။ ဒါကြောင့် မင်းဒင်ဆွေးနွေးတဲ့ ပြဿနာအဖြေတွေဟာ ဦးကျော်ခေါင်ဘက်က ဖြစ်နေမယ်ဆိုတာ မလွဲမသွေပါပဲ။ မင်းဒင်ရဲ့ အခန်းကဏ္ဍကို နှစ်ဘက်စလုံးက ဘက်မလိုက်ပဲ ကြားဝင်စေ့စပ်ဖြန်ဖြေပေးနိုင်တဲ့ ဦးငြိမ်းမောင်ရဲ့ အခန်းကဏ္ဍနဲ့ အတူတူပဲလို့ ရောထွေးသတ်မှတ်လို့ မရနိုင်ပါဘူး။

ကာယကံရှင်မဟုတ်တဲ့၊ ကာယကံရှင်နဲ့ ဆက်နွယ်မှုရှိပေမယ့် တာဝန်အရှိဆုံးလူမဟုတ်တဲ့ ငတွတ်ကလဲ ဒီအရေးမှာ ပါဝင်ပတ်သက်သူသာဖြစ်ပြီး၊ ဆုံးဖြတ်ချက်ချမှတ်ပေးနိုင်သူ မဟုတ်ပါဘူး။ မတရားတာ ဘက်က ရပ်တည်ပေးတဲ့ ခြံအလုပ်သမားများနဲ့ တရားတဲ့ဘက်က ရပ်တည်ပေးတဲ့ ငတွတ်ရဲ့ အပေါင်းအသင်းတွေကလဲ ဒီပြဿနာမှာ ဆင့်ပွားဆက်နွယ်သူတွေဆိုတာကို နားလည်နိုင်ဖို့ လိုအပ်ပါတယ်။ ဒီလိုနားမလည်ရင် ဘက်လိုက်ရင်းဖြစ်ကြတဲ့ ရန်ပွဲတွေ ဆက်လက် ဖြစ်ပွားလာ နိုင်ပါတယ်။ ဒီလိုမဟုတ်ပဲ ငတွတ်ရဲ့ အပေါင်းအသင်းတွေက ဦးငြိမ်းမောင် အခန်းကဏ္ဍကနေ ၀င်ပါမယ်ဆိုလို့လဲ နှစ်ဘက်စလုံးက ယုံကြည်မှုရှိမှာ မဟုတ်ပါဘူး။ ရန်ပွဲထဲလဲ ၀င်ပါလိုက်၊ ကြားဝင်ဖျန်ဖြေ၀င်ဆွဲလိုက်နဲ့ ဟိုပါဒီပါ လုပ်နေရင် ဘယ်ဘက်ကမှ လေးစားမှု မရှိတော့တာကို ကြုံလာရနိုင်ပါတယ်။

ပြဿနာကို ပြေလည်အောင် ညှိနှိုင်းပေးဖို့က ဘယ်ဘက်ကမှ မလိုက်ထားတဲ့ ဦးငြိမ်းမောင်ရဲ့ အလုပ်သာဖြစ်ပြီး၊ သူကလဲ ဆုံးဖြတ်ချက် ချမှတ်ရမယ့်သူ မဟုတ်ပါဘူး။ ဦးကျော်ခေါင်နဲ့ စည်သူတို့က သူတို့ဟာ ဦးဘသာတို့နဲ့ အဆင့်ချင်းမတူတဲ့အတွက် တိုက်ရိုက်မဆွေးနွေးနိုင်ပဲ၊ မင်းဒင်ကို ကိုယ်စားလှယ်လွှဲတယ်ဆိုရင် ဦးငြိမ်းမောင်ဟာ မင်းဒင်ကတဆင့် ဦးကျော်ခေါင်၊ စည်သူတို့ရဲ့ သဘောထားကို တီးခေါက်လိုက်၊ ဦးဘသာနဲ့ မောင်ပုတို့ရဲ့ သဘောထားကို တီးခေါက်လိုက်လုပ်ပြီး၊ ပြေလည်အောင် ညှိနှိုင်းပေးဖို့သာ လိုအပ်ပါတယ်။ ဒီနေရာမှာ မင်းဒင်ဟာ တဆင့်ခံသာဖြစ်ပြီး၊ မင်းဒင်ရဲ့ သဘောထားနဲ့ လုပ်ရပ်တွေက ပြဿနာအတွက် အရေးမပါလှပါဘူး။

ဘယ်လိုပဲဖြစ်ဖြစ်၊ စည်သူကို တရားစွဲမလား၊ ဒါမှမဟုတ် စည်သူ့အဖေ ဦးကျော်ခေါင်က ညှိနှိုင်းလာတဲ့ လျော်ကြေးငွေကို လက်ခံမလားဆိုတဲ့ ဆုံးဖြတ်ချက်ကတော့ မတရားပြုခံရသူ ကာယကံရှင်နဲ့ ကာယကံရှင်ဘက်က တာဝန်အရှိဆုံးလူ ဦးဘသာတို့ရဲ့ ဆုံးဖြတ်ချက်ပေါ်မှာပဲ မူတည်ပါတယ်။

ရပ်ကွက်ထဲက ပြဿနာတွေကို ကိုယ့်နေရာ၊ သူ့နေရာသိပြီး၊ လူမှန်နေရာမှန်နဲ့ ဖြေရှင်းနိုင်ကြပါစေ။

ခင်မမမျိုး (၁၇၊ ၁၊ ၂၀၁၃)

No comments: