လားရှိုး အကြမ်းဖက်မှုတွင် မသင်္ကာသူ ၃၅ ဦး ရဲက ဖမ်းဆီးထား

ကြာသပတေးနေ့၊ မေလ 30 ရက် 2013 ခုနှစ် မဇ္ဈိမ သတင်း - မဇ္ဈိမသတင်းဌာန

မေလ ၂၈ ရက်နေ့က စတင်ဖြစ်ပွားခဲ့သော လားရှိုး အကြမ်းဖက်မှုများနှင့် ပတ်သက်၍ မင်္သကာသူ ၃၅ ဦးကို မြို့နယ် ရဲစခန်းများတွင် ဖမ်းဆီးထိန်းသိမ်းထားကြောင်း ရှမ်းပြည်နယ် မြောက်ပိုင်း ခရိုင် ရဲစခန်းမှ အတည်ပြု ပြောကြားသည်။
ထိုဖမ်းဆီး ထားသူများမှာ ပဋိပက္ခတွင် ပါဝင်သူများဟု ယူဆရပြီး အခင်း စတင် ဖြစ်ပွားသည့် နေ့တွင်ပင် ဖမ်းဆီးထိန်းသိမ်းမှုများ လုပ်နိုင်ခဲ့ကြောင်း အဆိုပါ ခရိုင်ရဲ စခန်းမှ တာဝန်မှူးက ပြောသည်။
“တနေ့က၊ စဖြစ်တဲ့နေ့က ၂၀ ဖမ်းထားပါတယ်။ နောက်နေ့မှာတော့ ၁၅ ယောက် ဖမ်းဆီးထာပါတယ်” ဟု တာဝန်မှူးက မဇ္ဈိမကို ပြောသည်။
ယနေ့ အကြမ်းဖက်မှုများ ငြိမ်သက်နေပြီ ဖြစ်သော်လည်း မြို့အစွန်ရှိ ရပ်ကွက်များ၌ လူစုရုံးနေသည် ဆိုသည့်ကောလာဟလ များ ထွက်ပေါ်နေကြောင်းလည်း ခရိုင်ရဲစခန်း တာဝန်မှူးက ဆိုသည်။
သို့သော် ပြန်ကြားရေး ဒု-ဝန်ကြီး ဦးရဲထွဋ်ကမူ ထို နှစ်ရက်တာအတွင်း လားရှိုးမြို့ပေါ် ဆူပူ ဖျက်ဆီးမှုများတွင် ဦးဆောင်ပါဝင်သူဟု ယူဆရသူ ၂၅ ဦးအား လုံခြုံရေးတပ်ဖွဲ့များက ဖမ်းဆီး စစ်ဆေးလျက်ရှိကြောင်း ၎င်း၏ ဖေ့စ်ဘွတ် စာမျက်နှာတွင် ရေးသားထားသည်။
“ဖမ်းဆီးထားသူ အားလုံးဟာ လားရှိုး မြို့ပေါ်ရပ်ကွက်များမှ ဖြစ်ပါတယ်။ အခြားဒေသများမှ လားရှိုးမြို့ကို လာရောက်ပြီး ဆူပူအကြမ်းဖက်မှုများ မပြုလုပ်နိုင်စေရန်အတွက် မနေ့က စပြီး မြို့ဝင် ဂိတ်များမှာလည်း ရှာဖွေစစ်ဆေးမှုများ ပြုလုပ်လျက်ရှိကြောင်း” ဟု ဦးရဲထွဋ် က ရေးသားထားသည်။
ရှမ်းပြည်နယ် လားရှိုးမြို့တွင် မေလ ၂၈ ရက်ကဖြစ်ပွားခဲ့သော ပဋိပက္ခများမှ မီးလောင်ပြီး ပျက်စီးဆုံးရှုံးခဲ့မှု တန်ဖိုး သိန်း ၆ဝဝ နီးပါးရှိပြီး လုံခြုံရေးအတွက် အဖွဲ့ငါးဖွဲ့ ဖွဲ့စည်းလိုက်သည်ဟု လားရှိုးမြို့ ပြန်ကြားရေးနှင့် ပြည်သူ့ဆက်ဆံရေး ရုံးမှလက်ထောက်ညွှန်ကြားရေး မှူး ဦးဝေလင်းက မဇ္ဈိမကို ပြောသည်။
ပဋိပက္ခကြောင့် ပိတ်ထားသော မြို့မဈေးနှင့် ဆိုင်ခန်းအချို့လည်း ပြန်ဖွင့်ပြီဖြစ်ကြောင်း လာရှိုးမြို့နေ ဒေသခံများ ထံမှ သိရသည်။
“ဒီနေ့ မြို့ ပေါ်မှာတော့ ဘာသံမှ မကြားဘူး။ မြို့မဈေးလည်း ပြန်ဖွင့်ပြီ။ လူစုလူဝေးတွေတော့ ရှိသေးတယ်။ ဒါပေမယ့် ဘာမှ မဖြစ်ကြဘူး” ဟု လားရှိုးမြို့နေ ကိုနေဖြိုး က ပြောသည်။
ပဋိပက္ခကြောင့် နေအိမ် ဆုံးရှုံးခံရသူများအတွက် အမှတ် ၇ နှင့် အမှတ် ၈ ရပ်ကွက်တို့တွင် ဒုက္ခသည် စခန်း နှစ်ခု ဖွင့်လှစ်ထားပြီး ဖြစ်ကြောင်း ကိုနေဖြိုးက ပြောပြသည်။
ပုဒ်မ ၁၄၄ အား ဆက်လက်ထုတ်ပြန်ထားဆဲ ဖြစ်သည်။
“နောက်ကွယ်မှာ နိုင်ငံရေး အမြတ်ထုတ်သူတွေ၊ ဘာသာရေး ခုတုံးလုပ်သူတွေ ရှိကောင်း ရှိနိုင်ပါတယ်။ ရဲတွေ စစ်တပ်တွေကလည်း သူတို့အလုပ် သူတို့ တာဝန်ကြေအောင် လုပ်နေကြပါတယ်” ဟု ရှမ်းတိုင်းရင်းသားများ ဒီမိုကရက်တစ်ပါတီမှ မူဆယ်မြို့နယ် ဥက္ကဋ္ဌ ဦးစိုင်းဖိုးအောင် က ပြောသည်။
အကြမ်းဖက်မှုများကြောင့် ဆိုင်ခန်း ၃၂ ခန်း၊ မော်တော်ယာဉ် ၂ စီး၊ ရုပ်ရှင်ရုံ ၁ ရုံ၊ ဘာသာရေး အဆောက်အအုံ ၃ လုံး၊ မော်တော်ဆိုင်ကယ် ၁၁ စီး ပျက်စီးဆုံးရှုံးခဲ့ပြီး လူ ၁ ဦး သေဆုံးကာ ၅ ဦး ဒဏ်ရာရရှိခဲ့ကြောင်း ဒု-ဝန်ကြီး ဦးရဲထွဋ်၏ ဖေ့ဘွတ် စာမျက်နှာတွင် ဖော်ပြထားသည်။

လားရှိုးပဋိပက္ခ ဝင်မပါရန် သျှမ်းတိုင်းရင်းသားများအားလုံးအား SNLD သတိပေး ကြေငြာချက်ထုတ်ပြန်

ကြာသပတေးနေ့၊ မေလ 30 ရက် 2013 ခုနှစ် သျှမ်းသံတော်ဆင့် သတင်း - သျှမ်းသံတော်ဆင့်သတင်း

သျှမ်းပြည်မြောက်ပိုင်း လားရှိုးမြို့နယ် တွင်ဖြစ်ပွါးနေသော ဘာသာရေးပဋိပက္ခနှင့်ပတ်သက်၍ သျှမ်း တိုင်းရင်းသား များအားလုံး ဤပဋိပက္ခတွင်ပါဝင်ခြင်းမပြုရန် သျှမ်းတိုင်းရင်းသားများ ဒီမိုကရေစီ အဖွဲ့ချုပ် လားရှိုးမြို့က ကြေငြာ ချက်ထုတ်ပြန်လိုက်ပါသည်။
မေလ ၃၀ ရက် ၂၀၁၃ ရက်စွဲဖြင့် ကြေငြာချက်ထုတ်ပြန်လိုက်ခြင်းဖြစ်ပြီး ကြေငြာချက်တွင် အချက် ၃ ချက်ပါဝင်ပါသည်။
၎င်းနှင့်ပတ်သက်၍ လားရှိုးမြို့ SNLD ပါတီ၏ ပြောရေးဆိုခွင့်ရှိသူ စိုင်းလူက“ ပဋိပက္ခဖြစ်နေတာ ကြည့်ရင် မြို့ခံမဟုတ်တဲ့ မျက်နှာစိမ်းတွေများတယ်။ အပြင်လူများတာတွေ့ရတယ်။ ဆိုတော့ အနောက် ကနေ ကြိုးကိုင် ပြီးတိုက်ပေးတဲ့အဖွဲ့လဲ များလိမ့်မယ်လို့ ယူဆရတယ်။ ကျနော်တို့အနေနဲ့ တော့ အဲဒီပဋိပက္ခမှာ လုံးဝ ပါဝင်ပတ်သက်ခြင်း မရှိရပါဘူး။ ဒါကြောင့် ဒေသခံ သျှမ်းလူထုအားလုံးကိုလဲ မျက်လုံးကျယ်ကျယ် ဖွင့်ကြည့်ပါ။ အဘက်ဘက်ကို နားစွင့်ကြည့်ပါ။ ပြီးမှ ဖြစ်နိုင်ချေရှိတာ ကိုဆုံးဖြတ်ပါ။ ပဋိပက္ခထဲလုံးဝ မဝင်ပါမိပါစေနဲ့ လို့ သတိပေးထားတဲ့ ကြေငြာချက် ထုတ်ပြန်လိုက်တာဖြစ်ပါတယ်” ဟု သျှမ်းသံတော်ဆင့်အား ပြောဆိုပါသည်။
လားရှိုးမြို့၌ ယနေ့အခြေအနေမှာ တမြို့လုံး ဈေးကြီး ၊ ဈေးဆိုင်များ အိမ်များ တံခါးပိတ်ထားပြီး ဗမာဘုန်းကြီးကျောင်း များတွင်မူ လုံခြုံရေး အထူအထပ်ချထားကာ အထူးစောင့်ကြပ်နေကြကြောင်း လားရှိုးမြို့ခံ လူငယ်တဦးကလည်း ပြောသည်။
“ ဗမာဘုန်းကြီးကျောင်းမှာတော့ လုံခြုံရေးအထူးချထားတယ်။ သျှမ်းဘုန်းကြီးကျောင်းတွေမှာတော့ လုံခြုံရေး မတွေ့ရဘူး။ ဒါပေမယ့် ပေါ့လျော့မှုတော့ မရှိပါဘူး။ ကျောင်းတံခါးပိတ်ပြီး ကျောင်းထဲမှာ အေးအေးဆေးဆေးနေနေကြတာ တွေ့ရပါတယ်။ ကျောင်းပြင်ထွက်တာ မတွေ့ရပါဘူး” ဟု အဆိုပါလူငယ်က သျှမ်းသံတော်ဆင့်အားပြောပြသည်။
မေလ ၂၈ ရက်က စတင်ခဲ့သော အမျိုးသမီးတဦးအား မူစလင်ဘာသာဝင်တဦးက ဓါတ်ဆီလောင်းမီးရှို့မှု ကြောင့် လားရှိုးမြို့တွင် ဘာသာရေးအဓိရုဏ်း ဖြစ်ပွားရာ နေအိမ်များ ဗလီများ မူစလင်ဘာသာဝင်များ၏ စီးပွါးရေးလုပ်ငန်းများ မီးရှို့ဖျက်ဆီးခံရပြီး ရိုက်နှက်မှုကြောင့် လူ ၄ ဦး ဒဏ်ရာရကာ ၁ ဦးသေဆုံးကြောင်း လားရှိုးမြို့ခံများက ပြောပြသည်။