ငြိမ်းချမ်းရေးဆွေးပွဲလုပ်တိုင်း အကြမ်းဖက်မှုများတိုက်ဆိုင်စွာပေါ်ပေါက်

ငြိမ်းချမ်းရေးဆွေးပွဲလုပ်တိုင်း အကြမ်းဖက်မှုများတိုက်ဆိုင်စွာပေါ်ပေါက်
Wednesday, May 29, 2013
Posted by သျှမ်းသံတော်ဆင့်
ကေအိုင်အေကချင်လွတ်လပ်ရေးတပ်မတော်နှင့်အစိုးရတို့ငြိမ်းချမ်းရေးတည်ဆောက်ရန် ဆွေးနွေးနေချိန်နှင့်တိုက်ဆိုင်စွာ ဖြစ်ပေါ်သော သျှမ်းပြည်မြောက်ပိုင်း လားရှိုးမြို့ ပဋိပက္ခမှာ မလိုလားအပ်သောကိစ္စဖြစ်သဖြင့် ထိုကိစ္စ ဖြစ်အောင်လှုံ့ ဆော် သူများအား ရှုပ်ချကြောင်း SNLD သျှမ်းတိုင်းရင်းသာများ ဒီမိုကရေစီအဖွဲ့ချုပ်ကပြောပါသည်။

“ကေအိုင်အို နဲ့ ငြိမ်းချမ်းရေးရယူဖို့ ဆွေးနွေးညှိနှိုင်းတဲ့ အချိန်နဲ့ကိုက်ညီပြီးဒါကိုဖြစ်ပေါ် အောင် လှုံ့ဆော်သွားတယ်။ ဖြစ်သွား တဲ့ကိစ္စအပေါ်မှာ ကျနော်တို့စိတ်မကောင်း ဘူး။ ဖြစ်တဲ့အဖြစ် အပျက်အပေါ်လဲ ကျနော်တို့ ဘဝင်လဲမကျဘူး။ အကြမ်းဖက် ဆန်ဆန်ဖြစ်ရပ်ဟာ တိုက်ဆိုင် တာလား တမင်တကာသွေးထိုးလှုံ့ဆော်လို့ဖြစ်တာလားမသိပေမယ့် ဘာဘဲဖြစ် ဖြစ် မလိုလား အပ်တဲ့ပြဿနာ ဖြစ်တယ်။ ဒါကိုတော့ ကျနော်တို့ရှုတ်ချတယ်။ မဖြစ်တဲ့ကိစ္စလို့ဘဲ ကျနော် တို့မြင် ပါတယ်” ဟု ပြောခွင့်ရ ပုဂ္ဂိုလ်စိုင်းလိတ်ကပြောသည်။

ထိုကဲ့သို့ ငြိမ်းချမ်းရေးအတွက် လုပ်နေကြစဉ် ထိုအဖြစ်အပျက်မျိုး တစ်ခါမက ဖြစ်ခဲ့ဖူးကြောင်း စိုင်းလိတ်က သတိပေးပြောဆိုလိုက်သည်။

“ဒီလိုအလားတူဖြစ်ပျက်မျိုးအရင်ကကြုံဖူးတယ်။ ကျနော်တို့ တော်ဝင်နှင်းဆီခန်းမမှာ SNLD ကနေ ဦးဆောင်ပြီးတော့မှ ငြိမ်းချမ်းရေးအတွက် (သျှမ်း) ယုံကြည်မှုတည်ဆောက်ခြင်းဆိုတဲ့ အခမ်းအနားကို ကျင်းပအချိန်မှာဘဲ မုံရွာလက်ပန်းတောင်း တောင် အရေးအခင်းဖြစ်တယ်။ ကျနော်တို့ လားရှိုး မှာ သျှမ်း ကယား ငြိမ်းချမ်းရေးအတွက်ယုံကြည်မှုတည်ဆောက်ခြင်း လုပ်နေချိန်မှာလဲ မိတ္ထိလာ လို အရေးအခင်းဖြစ်ခဲ့တယ်။ အခုလဲ ကချင်နဲ့ငြိမ်းချမ်းရေး တည် ဆောက်နေချိန်မှာတဖန် လား ရှိုးမှာထပ်ပေါ်တယ်။ ဝန်ကြီးဦးအောင်မင်းက ခုနပြောတဲ့ ငြိမ်း ချမ်းရေးဖြစ်စဉ် ၃ ခုလုံး မှာပါဝင်တယ်လေ။ အဲတော့ ငြိမ်းချမ်း ရေးတည်ဆောက်နေ ချိန်မှာ တဖက်က နောက်ကြောင်း ပြန်လှည့်ဖို့များကြိုးစားနေသလားလို့ ယုံမှားသံသယဖြစ် စရာ ကောင်းတယ်။ တကယ်လို့အဲလို နောက်ကြောင်း ပြန်လှည့်ဖို့ လှုံ့ဆော်စည်းရုံးနေတာ ဘယ်သူဘဲဖြစ်ဖြစ်ကျနော်တို့ ရှုပ်ချရမှာဘဲ။ ဒါလုံးဝ ရှုပ်ချသင့်တယ်” ဟု ဆိုပါသည်။

၎င်းနှင့်ပတ်သက်၍ ပြင်ပပယောဂ ကြောင့်ဖြစ်နိုင်ကြောင်း ၂၀၁၂ ကြားဖြတ်ရွေးကောက်ပွဲဝင် NLD ကိုယ်စားလှယ်လောင်း စိုင်းမြင့်မောင် ကပြောသည်။

“ဒီလူတွေ ဒီလိုဖြစ်အောင်လုပ်ဖို့ချောင်းနေတာ ကြာလှပြီ။ ကျနော်တို့သတိထားမိတာ ၁ လ ၂ လ ရှိပြီဘဲ။ အခုတော့ အခွင့် သာတုန်း သူတို့လဲ ဝင်ချတော့တာ။ ကျနော်တို့ လားရှိုးမှာနေ လာတာသက်တမ်း ၆၀ ကျော်မှာ ဒါမျိုးတခါမှမရှိခဲ့ဘူးဘူး၊ သျှမ်း၊ ဗမာ၊တရုတ်၊ ကုလား အေးအေးဆေးဆေး နဲ့ အတူတူနေလာကြတာဘဲ။ ဒါ ပြင်ပ ပယောဂ ပါတယ်လို့ ဘဲမြင်တယ်” လားရှိုး NLD ဥက္ကဌ စိုင်းမြင့်မောင် က ပြောသည်။

အဆိုပါ အဓိကရုဏ်းထဲသို့ လူငယ်များမပါဝင်ရန်သာ အရေးကြီးကြောင်း လားရှိုးမြို့နေ လူငယ်တဦးကပြောသည်။

လားရှိုးမြို့ လက်ရှိအခြေအနေမှာ ယနေ့မနက်ပိုင်း ဘူတာကြီးတွင် ရပ်ကွက်တွင်းလူထုနှင့် မူစလင်ဘာသာဝင်များရိုက်နှက် မှုဖြစ်ပွါးခဲ့ပြီး လူနေအိမ်များ မီးရှို့မှုဖြစ်ပွါးခဲ့သေးသည်ဟု အဆိုပါလူငယ်ကပြောသည်။

တမြို့လုံး စစ်တပ်ဖြင့် လုံခြုံ ရေးတိုးမြင့်ချထားပြီး မီးလောင်ခဲ့ သည့်ဗလီအနီးဖြတ်သန်းသွား လာ ခွင့် မပေးကြောင်း မြို့နေလူထုတို့စိုးရိမ်ပူပန်မှုဖြင့် နေထိုင်နေ ရကြောင်း ပြောဆိုပါ သည်။

ယမန်နေ့ မေလ ၂၈ ရက်ညနေ ၄ နာရီက လားရှိုးမြို့ရပ်ကွက် ၈ ၌ ဓါတ်ဆီရောင်းသော နယ်မြေ ၁၅ အုပ်ချုပ်ရေးမှူး ၏သမီး မအေးအေးဝင်း (အသက် ၃၈ နှစ်) (ဖခင် ဦးမောင်မောင် ဝင်း) အားကျိုင်းတုံမှတ်ပုံတင်ကိုင်ဆောင်သည့် ကိုနေမင်းက ဓါတ်ဆီဖြင့် ပက်ဖြန်း၍ မီးရှို့ခဲ့ ရာမှ ဒေသတွင်းလူထုက မကျေမနပ်ဖြစ် ကာ ရပ်ကွက် ၂ ဗလီနှင့် မူဆလင်မိဘမဲ့ ခလေးများဂေ ဟာ၊ လူနေအခန်း ၈ ခန်း၊ တရုတ်အိမ် ၂ အိမ်၊ ကော်ရခါး အိမ်တအိမ် အား မီးရှို့ဖျက်ဆီးခဲ့ သည်။ ထို့အပြင် အထင်ကရ မူစလင်ဆိုင် နှင့် နေအိမ် ၁၀ ကျော်လည်း ရိုက်နှက်ဖေါက်ခွဲကာ ဖျက်ဆီးခဲ့သည်။ ထို့ အတွက်ကြောင့် အရေးပေါ် ဥပဒေ ပုဒ်မ ၁၄၄ (ည ၆ နာရီမှ မနက် ၆ နာရီအထိ အပြင်မထွက်ရ၊ လူ ၅ ယောက် အထက် အစုအဝေးမပြုရ ၊ ကျူးလွန်က အရေးယူခြင်းခံရ) အား အာဏာပိုင်များက ထုတ်ပြန်ထားသောကြောင့် ၊ မြို့တွင်းမှာခြောက်ကပ်လျက်ရှိပြီး လားရှိုးဈေး မန်ဆူဈေးတို့ ပိတ်ထားကြောင်း၊ ထို့အပြင် ရပ်ကွက်တွင်းရှိဈေးဆိုင် စားသောက်ဆိုင်များပါ မဖွင့်ရဲကြကြောင်းသိရသည်။