Philadelphia စမ်းသပ်ချက် (ဘာသာပြန်ဝတ္ထု) (အပိုင်း -၆)

အခန်း (၆)

ဒေါက်တာ Jessup ဆိုတာ Philadelphia စမ်းသပ်ချက်နဲ့ ဘာမှ သက်ဆိုင်ခြင်း မရှိတဲ့ စိတ်ဝင်စားဖွယ်ရာ ပုဂ္ဂိုလ်တဦးပါ။ သင်္ချာပညာရှင်နဲ့ အာကာသပညာရှင်တယောက်ဖြစ်ပြီး နောက်ဆုံးမှာတော့ တောင်အမေရိက တောတွေကြားထဲမှာ လှည့်လည်သွားလာနေသူ တဦး ဖြစ်လာခဲ့ပါတယ်။

သူဒီလို လုပ်နေရင်းနဲ့ ရှေးဟောင်း Inca အဆောက်အဦးတွေကို စိတ်ဝင်တစား ဖြစ်လာခဲ့တယ်။ သူစဉ်းစားမိလာတာက ဒီလောက်ကြီးမားတဲ့ ကျောက်တုံးကြီးတွေကို လူသားတွေနဲ့ llamas တွေက ရွှေ့ပြောင်း သယ်ယူနိုင်စွမ်း မရှိနိုင်ဘူး ဆိုတာပါပဲ။ သူတို့တွေဆီမှာ anti-gravity device တမျိုးမျိုးရဲ့ အကူအညီ ရခဲ့လိမ့်မယ်လို့ သူသုံးသပ်မိသွားခဲ့ပါတယ်။

Anti-gravity device

ဒါဟာ Philadelphia စမ်းသပ်ချက်နဲ့ ပတ်သက်လာတဲ့ ကွင်းဆက်တခုဖြစ်ပေမယ့် ကွင်းဆက်က သိပ်မထင်ရှားသေးဘူး။ ပြီးတော့ သူနဲ့ ရေတပ်နဲ့ဆိုတာကလဲ အဆက်အစပ်က ရှိတာ မဟုတ်ဘူး။ ဒေါက်တာ Jessup ရဲ့ အိုင်ဒီယာကတော့ ရိုးရှင်းပါတယ်။ ဒီစက်ယန္တရားတွေကို ရှေးဟောင်းအာကာသ ပညာရှင်တွေက အာကာသယာဉ်တွေကနေတဆင့် ထိန်းချုပ်အသုံးပြုခဲ့သလား ဆိုတာပါပဲ။

ဒီဇာတ်လမ်းကို ဖတ်နေရင်း ကျွန်မရဲ့ စိတ်ထဲမှာတော့ နောက်ထပ်ကွင်းဆက်တခုကို ထပ်တွေ့သွားပြန်ပါတယ်။ အဖိုးက ပြောခဲ့ဖူးတဲ့ ပုံပြင်တပုဒ်ဖြစ်တဲ့ USS Eldridge ဟာ time-space အတားအဆီးတွေကို ကျော်လွှားသွားပြီး၊ ဂြိုလ်သားတွေနဲ့ပါ ဆုံခဲ့တယ် ဆိုတာကိုပါပဲ။

ဒီလိုနဲ့ပဲ ဒေါက်တာ Jessup ဟာ အာကာသယာဉ်တွေ ဆင်းသက်ရာမှာ ဖြစ်ပေါ်ခဲ့တယ်လို့ ယူဆရတဲ့ craters တွေအကြောင်း အပတ်တကုတ် လိုက်လံစုံစမ်းလေ့လာပါတော့တယ်။ အဲဒီမှာတင် သူ့ဆီမှာ သုံးစွဲစရာ ငွေကြေးမရှိတော့တာကြောင့် အမေရိကန်ပြည်ထောင်စုကို ပြန်လာခဲ့ပါတယ်။ သူ့ရဲ့ တောတွင်းလေ့လာရေး ခရီးစဉ်တွေက တခြားသူဝါသနာပါတဲ့ UFOs တွေအကြောင်းနဲ့ ဆက်စပ်သွားပါတယ်။ (၁၉၄၀)၊ (၁၉၅၀) ကာလတွေမှာ ဒါနဲ့ ပတ်သက်ပြီး လူတွေက တော်တော်လေးကို စိတ်ဝင်စားနေကြတဲ့ ကာလလဲဖြစ်ပါတယ်။ ဒါကြောင့် သူက The Case For the UFO ဆိုတဲ့ စာအုပ်ကို ရေးသားထုတ်ဝေပြီး ပိုက်ဆံရှာခဲ့ပါတယ်။ ဒါက best-seller စာရင်းမှာတော့ မပါခဲ့ဘူး။ ဒါပေမယ့် Ufologists တွေအကြားမှာတော့ အတော်ကို ခေတ်စားခဲ့ပါတယ်။ ဒေါက်တာ Jessup အတွက် သုံးစွဲစရာ ငွေကြေးအနည်းငယ် ရှိလာတာကြောင့် အမေရိကန်ပြည်ထောင်စုတခွင်ကို လှည့်လည်ပြီး သူတွေ့ရှိထားတဲ့ သီအိုရီတွေကို ဟောပြောခွင့် ရလာခဲ့ပါတယ်။

(၁၉၅၈) ခုနှစ်မှာတော့ သူသေဆုံးသွားပါတယ်။

ဒေါက်တာ Jessup နဲ့ ပတ်သက်ပြီး Naval Defence Research Committee က တစုံတရာ စိတ်ဝင်စားခဲ့ပုံ ပေါ်ပါတယ်။ ဘာလို့လဲဆိုတော့ သူ့လှုပ်ရှားမှုတွေကို နောက်ယောက်ခံပြီး မှတ်တမ်းတင်ထားမှုတွေ ရှိခဲ့လို့ပါပဲ။ သူသေဆုံးခဲ့တာနဲ့ ပတ်သက်ပြီး ရေတပ်က မှတ်တမ်းတင်ထားမှုတွေနဲ့ စတိတ်မင့်တွေကိုလဲ အဖိုးပေးတဲ့ ဖိုင်ထဲမှာ တွေ့ရှိရပါတယ်။

မှတ်တမ်းတွေအရတော့ ဒေါက်တာ Jessup ဟာ သေဆုံးချိန်မှာ စိတ်ဓာတ်အလွန်ကျနေခဲ့တယ်။ အိမ်ထောင်ရေးပြိုကွဲသွားပြီးနောက်ပိုင်း သူဟာ မတော်တဆမှုနဲ့ သေဆုံးခဲ့ပါတယ်။ ငြိမ်သက်တိတ်ဆိတ်နေတဲ့ လမ်းသွယ်လေးတခုထဲကို သူ့ကားက မောင်းဝင်သွားခဲ့တယ်။ ပြီးတော့သူက အိတ်ဇောပိုက်ထဲကို ပိုက်တခုသွင်းပြီး၊ အဲဒီပိုက်ကို သူ့ကားထဲကို သွင်းထားခဲ့တယ်။ ကာဗွန်မိုနော့ဆိုဒ်ဓာတ်ငွေ့ကို အသုံးပြုပြီး သူ့ဘာသာသူ သတ်သေသွားခဲ့တယ်လို့ မှတ်တမ်းထဲမှာ ဆိုထားပါတယ်။

ဒီမှတ်တမ်းကို ဖတ်ရချိန်မှာ ကျွန်မလည်ပင်းနောက်နားက ဆံပင်မွှေးလေးတွေ အနည်းငယ် ထောင်လာသလို ခံစားလိုက်ရပါတယ်။ တစုံတရာတော့ ဒီနေရာမှာ လွဲနေပါတယ်။ ဒေါက်တာ Jessup ရဲ့ စိတ်ကျရောဂါကို မှတ်တမ်းထဲမှာ ဘာလို့ အဓိကထားပြီး ဖော်ပြထားခဲ့သလဲ။ ကျွန်မ သံသယ၀င်လာမိပါတယ်။ စိတ်ကျရောဂါကို အဓိကထားပြီး ဖော်ပြခြင်းအားဖြင့် သူဟာ မိမိကိုယ်ကို သတ်သေခဲ့တယ်ဆိုတာကို လူအများ လက်ခံလာစေခဲ့တာလား။

ဒါဟာ မိမိကိုယ်ကို သတ်သေခဲ့တာ မဟုတ်ဘူးဆိုရင် (ပြီးတော့လဲ သူ့ကားထဲကို အိတ်ဇောပိုက်နဲ့ ဆက်ထားတဲ့ ပိုက်ကို မတော်တဆ ထိုးသွင်းခဲ့တာ မဟုတ်ဘူး ဆိုရင်) တခုပဲ ကျန်ပါတော့တယ်။ ဒါက လူသတ်မှုပါပဲ။ အဖိုးက ပြောခဲ့ဖူးတယ်။ သေဆုံးသူတွေဟာ ပုံပြင်တွေ မပြောနိုင်တော့ဘူး တဲ့။

" ဒီဖိုင်နဲ့ ပတ်သက်ပြီး ဘယ်လို သဘောရလဲ"

အဖိုးက ကျွန်မကို မေးပါတယ်။

အဖိုးကို ကျွန်မ လှမ်းကြည့်လိုက်မိတယ်။

"သူသေဆုံးမှုမှာ သံသယဖြစ်ဖွယ်တွေ မတွေ့ရဘူးလား"

"ဖြစ်နိုင်တာကတော့ Philadelphia စမ်းသပ်ချက်နဲ့ ပတ်သက်ဆက်နွယ်သူ အများအပြား သေဆုံးခဲ့ပုံပေါ်တယ်။ နည်းလမ်းနှစ်ခုနဲ့။ force field က မသတ်ရင် နောက်ပိုင်းမှာ နောက်ကွယ်တစုံတရာက သတ်လိုက်တာပဲ။ ကျွန်မက သိပ်ပြီး သံသယကြီးလွန်းတာလဲ ဖြစ်နိုင်ပါတယ်"

" ဒေါက်တာ Jessup နဲ့ Philadelphia စမ်းသပ်ချက် အကြားမှာတော့ ဆက်နွယ်မှုတွေ မတွေ့ရဘူး။ ဘယ်လိုပြောရမလဲ။ သူက anti-gravity ကို စိတ်ဝင်စားတယ်။ ဂြိုလ်သားကိစ္စတွေမှာ လျှို့ဝှက်ချက်တချို့ ရှိလိမ့်မယ်လို့ ယုံကြည်တယ်။ ဒါပေမယ့် (၁၉၄၃) ခုနှစ်မှာတော့ Philadelphia အနီးတ၀ိုက်မှာ သူရှိမနေခဲ့ဘူး"

"ဟုတ်တယ်"

အဖိုးက ကျွန်မပြောတာကို လက်ခံပါတယ်။ ပြီးတော့မှ

" ဒါပေမယ့် Carlos Allende ဆိုတဲ့ လူတယောက်ကတော့ ရှိနေခဲ့တယ်လေ။ ဒီလူက ဒေါက်တာ Jessup ရဲ့ စာအုပ်တွေကို ဖတ်ခဲ့တယ်။ ပြီးတော့ ဒေါက်တာ Jessupဟာ သူ့အတွေ့အကြုံတွေကို ပြောပြဖို့ အသင့်တော်ဆုံးလူပဲလို့ သူဆုံးဖြတ်ခဲ့တယ်"

"ဘယ်သူလဲ။ Carlos Allende ဆိုတာ"

အဖိုးက ဖိုင်တခုကို ခေါင်းညိတ်ညွှန်ပြလိုက်ပါတယ်။

"ဖတ်ပြီး ရှာကြည့်လေ"

ဒါနဲ့ပဲ ကျွန်မလဲ ဆက်ဖတ်ကြည့်ရပါတော့တယ်။ ကျွန်မဖတ်ကြည့်လိုက်ချိန်မှာ သိရတာတွေကတော့ ဒီလိုပါ။

(ဆက်လက်ဖော်ပြပါမည်)

ရေးသားသူ- Terry Deary

စာအုပ်အမည်- The Philadelphia Experiment

စာအုပ်ထုတ်ဝေသည့်နှစ်- (၁၉၉၆) ခုနှစ်

စာအုပ်အမျိုးအစား- လူငယ်စာပေ

ဘာသာပြန်သူ – ခင်မမမျိုး (၀၇၊ ၀၄၊ ၂၀၁၂)