သူရဲကောင်းတယောက်ရဲ့ ဈာပန
ခွပ်ဒေါင်းအလံတလက်မှ လွှမ်းခြုံခွင့်မရ
လွမ်းသူ့ပန်းတခြင်းမျှဂုဏ်ပြုခွင့်မရ
လိုက်ပါပို့ဆောင်ခွင့်မရ
ထိခိုက်နာကျင်လွန်းလှပေါ့။
အဆောင်အယောင်အမည်နာမတွေနဲ့
ဖေါက်ပြန်ခွင့်ရနေသူတွေကို မြင်ရကြားရတော့
ခင်ဗျားတို့လို အညတရသူရဲကောင်းတွေအတွက်
ကျနော့်ရင်ထဲမှာ နာကျင်တယ်။
ပြည်ရွှေဆံတော်ဘုရားပေါ်ကနေ
ရခိုင်ရိုးမနဲ့ တန့်ကြည်တောင်ကို လှမ်းငေးရင်း
ကိုခင်ဝမ်းရဲ့ ဧရာဝတီသီချင်းကို ဆိုညည်းနေကြ
အဲဒီနေ့ရက်တွေ တသက်တာ ပြန်မရတော့ပေမဲ့
တဘဝစာ လွမ်းဖို့ချန်ရစ်ခဲ့သူ။
သူ့အသက်ခန္ဓာနဲ့
တော်လှန်ရေးနဲ့ လူထုအပေါ်သစ္စာတည်ခဲ့
ငါဘာမှမပြောနိုင်ဘူး ငါ့ကို သတ်လိုက်ကြ
တကိုယ်လုံး ဓါးနဲ့မွှန်းထားတဲ့ကြားက ဆိုစကား
စစ်ဘီလူးတွေ ရူးသွတ်သွားကြပေါ့။
ပြည်ကျောင်းသားသမဂ္ဂမှသည်
တော်လှန်သော ကျောင်းသားပါတီ
ကျောင်းသားတပ်မတော်တပ်ရင်း ခြောက်ရာ့တစ်
ရှစ်ဆယ့်ရှစ်သမိုင်းထဲက အညတရ သူရဲကောင်းတယောက်
မဖေါက်မပြန် မှန်ကန်သော ကျောင်းသားတော်လှန်ရေးသမား
သစ္စာတရားရဲ့ ပြယုဒ်အဖြစ်တည်နေမဲ့
သူ့အမည် ကိုကြည်ဆန်း
မခမ်းမနားကျဆုံးသွားတဲ့
အခမ်းနားဆုံးသူရဲကောင်း ကျောင်းသားဖြစ်တယ်။
ပဲခူးတိုင်းအနောက်ခြမ်း ကျောင်းသားလှုပ်ရှားမှု
ပြည်ခရိုင်ကျောင်းသားလှုပ်ရှားမှု
သာဓုကန်ကျောင်းသားညီလာခံ
၁၉၉၀ ခု မေလ ရွေးကောက်ပွဲအောင်နိုင်ရေး
အောင်ဟန်ရိုင်းစခန်း
အလယ်ပိုင်း အခြေခံဒေသတည်ဆောက်ရေး
ရှမ်းတောင်တန်းနဲ့ မဲနယ်တောင်တန်း
သူ့သမိုင်းဖြတ်သန်းမှုများ။
ခေါင်းဆောင်မှုမပေးနိုင်ကြလို့
ကွဲကြပြဲကြတဲ့အခါ
ကျနော် ပြည်မြို့သို့ခြေမချခင်
ခင်ဗျားက တော်လှန်သောကျောင်းသားဆိုလျှင်
ခင်ဗျားကို ကြိုဆိုပါတယ်ဆိုတဲ့ သူ့စကား
ကျနော့် နှလုံးသားမှာ တဘဝစာကိန်းအောင်းလျှက်။
သူရဲကောင်းဗိမာန်တည်ရာ
သာမိတိုက်ရွာ
သာစည်ရွာဆီ
စိတ်မှာရည်စူး
ဦးညွှတ်အလေးပြုပါ၏။
ကျနော်ယုံကြည်တယ်
မြန်မာပြည်
ဧရာဝတီနဲ့ ပြည်မြို့က
ကြည်စန်း ဆိုတဲ့ သူရဲကောင်းတယောက်ရဲ့ဂုဏ်ပုဒ်
ရဲရင့်တဲ့အထ္ထုပ္ပတ္တိကို ဖွဲ့ဆိုညွှန်းပြနေလိမ့်မယ်။
(ကျောင်းသားတပ်မတော်တပ်ရင်း (၆၀၁) မှ သူရဲကောင်းဆန်စွာ ကျဆုံးသွားသော တပ်မှူး ကြည်ဆန်း သို့)
နီလွင်သွေး (ဒဿနိက)
၉ ၊ ၂၅ ၊ ၂၀၁၂
အင်္ဂါနေ့
No comments:
Post a Comment