ကျောင်းသားသူပုန်တို့ရဲ့ ခရီးရှည်အမှတ်တရ (အပိုင်း-၁၀)(အပိုင်း-၁၁)

ကျောင်းသားသူပုန်တို့ရဲ့ ခရီးရှည်အမှတ်တရ (အပိုင်း-၁၀)

by Myat Thu on Sunday, January 13, 2013 at 8:07am ·

မှားတဲ့အခါလည်း

KNU တပ်မဟာ (၃) မှာ အထူးဒေသအနေနဲ့ တပ်ရင်းတွေပေါင်းထားတဲ့ ကျောင်းသားအထူးစစ်ကြောင်း အင်အား ၈၀ လောက်နဲ့အတူ ရှေ့တန်းကိုဆင်းရပြန်တယ်။ အဲဒီအချိန်မှာ အဲဒီဒေသရှေ့တန်းတွေမှာ ABSDF က စစ်ကြောင်းတစ်ချို့ စလှုပ်ရှားနေကြပြီ။ အရင်က လွှတ်ထားတဲ့ စည်းရုံးရေးစစ်ကြောင်းတွေက များသော အားဖြင့် အသက်ကြီးကြီး သမားတွေဆိုတော့ ကျနော်တို့ ကျောင်းသားတပ်မတော်ရဲ့ နုပြိုတဲ့ရဲဘော်လေး တွေကို ဒေသခံလူထုကို ခေါ်ပြဖြစ်သွားတာပေါ့။ နို့မို့ တစ်ချို့ကရင်အဖွားကြီးတွေ ရှေ့တန်းမှာ ကျနော်တို့ အထဲက သက်ကြီးပိုင်းရဲဘော်ကြီးတွေကို လာကြည့်ပြီး မှတ်ချက်ပေးသလို အမြဲဖြစ်နေတော့မှာ။ အဲဒါက “တို့က ကျောင်းသားဆိုလို့လာကြည့် ပါတယ်။ နှုတ်ခမ်းမွှေးတောင် ဖြူနေပြီတဲ့”။ ဒါက ၈၈ အပြီး ဖွဲ့စည်း လိုက်တဲ့ကျောင်းသားတပ်မတော်ရဲ့ထူးခြားမှု။ မြန်မာနိုင်ငံလုံးဆိုင်ရာကျောင်းသားများဒီမိုကရက်တစ်တပ်ဦး (ကျောင်းသားတပ်မတော်) မှာ အသိပညာရှင်အတတ်ပညာရှင်ပေါင်းစုံ၊ အသက်အရွယ်ပေါင်းစုံ၊ လူတန်းစား ပေါင်းစုံနဲ့ လူမျိုးဘာသာပေါင်းစုံ ပါတယ်။ ကျောင်းသားနာမည်အောက်မှာ အားလုံးဟာ နုပျိုတက်ကြွနေကြ တယ်။  

ကျနော်နဲ့ပါလာတဲ့ အင်အားကို ကျောက်ကြိုးဒေသက ဒေသခံရွာသားတွေကို ပထမလျှို့ဝှက်ထားတဲ့ အနေ နဲ့ ရောက်ရောက်ခြင်း အနီးဝန်းကျင်က တောင်ကြောတစ်ခုပေါ်မှာ နေရာချပေးထားတယ်။ ကျနော်နဲ့သိတဲ့ အနီးဝန်းကျင်ကရွာသားတွေက ကျောက်ကြိုးကို ဆင်းလည်ဖို့ဖိတ်တော့ ကျနော် ရွာသားတွေနဲ့ လိုက်သွား ပြီး သူတို့နဲ့အတူထမင်းစားဖြစ်တယ်။ ကျနော့ကိုသိကြတဲ့ ရွာသားတွေ ရဲဘော်တွေက သတင်းမကြားဘာ မကြား ရောက်လာတဲ့ ကျနော့ကို ၀မ်းသာအားရနှုတ်ဆက်ကြတယ်။ အထူးစစ်ကြောင်းနဲ့အတူရှိနေတဲ့ တပ်ရင်း ၂၀၉ တပ်ရင်းမှူး ကိုသိန်းဆန်းနဲ့တွေ့တော့ သူ့အဖွဲ့အတွက် ယူခဲ့တဲ့ ၄၀ မမ လောင်ချာသေနတ်ကို သူ့ကိုလွှဲပေးလိုက်တယ်။ ကျနော်အဲဒီမှာရှိနေတုန်း လုံခြုံရေးအတွက်ကိုင်ထားဖို့ မောင်းခလုတ်တိုတိုနဲ့ ကျည်ငါးတောင့်သာ ထည့်ပစ်လို့ရတဲ့ ၃၈ မမ စပယ်ရှယ် အေးဂျင့် သေနတ်အတိုကိုလည်း ကိုသိန်းဆန်းက ကျနော့ကိုပေးထားတယ်။ နောက်တစ်နေ့မနက်ပိုင်း ရန်သူစစ်ကြောင်းတစ်ခု ၀င်လာတယ်ကြားရတယ်။ ဂျိန်းကနဲ မိုင်းကွဲသံလည်း ကြားလိုက်ရတယ်။ သူတို့က နွားအုပ်ကိုတွေ့တော့ ရှေ့ကမောင်းပြီးတက်လာတာ နွားတစ်ကောင်မိုင်းထိသွားတာ။ ကျနော်လည်း အဲဒီဒေသက ဗဟိုဦးဆောင်ကော်မတီဝင် ကိုစိုင်းမြင့်သူရဲ့ လုံခြုံရေး တာဝန်ယူရမယ့် အဖွဲ့ထဲပါတာဆိုတော့ အနောက်ဖက် လုံခြုံတဲ့နေရာကို ဆုတ်ကြရတယ်။ တစ်ပြိုင်တည်း အလုပ်လာလုပ်စားကြတဲ့ ရွာသားတွေကိုလည်း ဘေးကင်းရာ ပို့ပေးကြရတယ်။ နောက်ပြီး တပ်တွေအားလုံး ရန်သူလာနှိုင်လောက်တဲ့ လမ်းကြောင်းတွေမှာ နေရာခွဲပြီး နေရာယူထားကြတယ်။

ညနေ အတော်စောင်းသွားတဲ့အထိ သေနတ်သံလည်း မကြားဘာမကြားဆိုတော့ ကိုမြင့်သူက သူ့အနားက ၂၀၉ တပ်ရင်း ရဲဘော်နှစ်ယောက်ကို အခြေအနေသွားကြည့်ခိုင်းလိုက်တယ်။ အဲဒီနေရာက ကျောက်ခဲတုန်း ကျောက်ခဲတွေများတယ်။ အပင် ပင်စည်သေးသေးတွေလဲ ဟိုနားဒီနား ပေါက်နေတာရှိတယ်။ ၆ နာရီဝန်း ကျင်ဆိုတော့ မှောင်နေပြီ။ သူတို့ဖြည်းဖြည်းချင်းကပ်သွားကြရင်း အပင်စုရဲ့အောက်မှာ မီးဖိုပြီး စကားပြော နေကြတဲ့အသံကို ကြားရတယ်။ အသေအချာနားစွင့်ကြည့်တော့ ဗမာလိုပြောနေကြတာ။ ရွာသားတွေကို ပြေးခိုင်းထားတာ ဒီနေရာမှာ ရွာသားတွေရှိတာ မဖြစ်နှိုင်ဘူး၊ ရန်သူဘဲဖြစ်ရမယ်ဆိုပြီး ကျနော်တို့ရဲဘော်ထဲ က တစ်ယောက်က လက်ထဲက ၄၀ မမ လောင်ချာသေနတ်နဲ့ ထုထဲ့လိုက်တယ်။ လူပြေးသံအော်သံ တွေလည်း ကြားတယ်။ သူတို့လည်းပစ်ပြီးတာနဲ့ ရန်သူဝရုန်းသုန်းကားဖြစ်နေပြီဆိုပြီး အသာလေး ပြန်ဆုတ် လာကြတယ်။ အဲဒီတစ်ညလုံးအေးအေးဆေးဆေးပါဘဲ။

မနက်ကျတော့ ရန်သူက ရွာကိုလှမ်းကြည့်တော့ အရမ်းတိတ်ဆိတ်နေတော့ မသင်္ကာဖြစ်ပြီး ပြန်ဆုတ်သွား တယ်လို့ သတင်းရတယ်။ အဲဒါကပြဿနာမဟုတ်ဖူး နေ့လည်ကျတော့ ရွာသားတစ်ချို့က ကျနော်ရွာထဲ ဆင်းတဲ့အချိန် လာပြီးပြောတယ်။ ရွှေကျင်ဖက်က လေဖြတ်နေတဲ့လူတစ်ယောက်ကို ထမ်းရွှေ့ဖို့ မလွယ်လို့ ရွာသား ၂ ယောက်လောက် အဲဒီညနေက သစ်ပင်မှာပုခက်ဆွဲပြီး မီးဖိုပေးနေတုန်း စစ်တပ်က ၀င်ပြီး လက် နက်ကြီးနဲ့ထုတာ လေဖြတ်နေတဲ့လူပါထပြေးသွားတာ ရွာကိုပြန်အရောက်ပဲတဲ့။ အဲဒီ လေဖြတ်တဲ့လူပါ အလန့်တကြားထပြေးရင်း ပြန်ကောင်းသွားတယ်ဆိုဘဲ။ ကျနော်လည်း အဲဒါကျနော်တို့ ရဲဘော်တွေလုပ်တာ လို့ လျှောက်ပြောပြီး ကျေးဇူးတင်ခံဖို့မလုပ်ကောင်းတာနဲ့ ဟုတ်လားဆိုပြီး ဆပ်ဆိတ်ဆိတ်နေရတယ်။ နောက်တော့ ကိုမြင့်သူက အရမ်းလုပ်လာတဲ့ သူ့ရဲ့ရဲဘော်တွေကို တိတ်တိတ်ကျိတ်ဆူပါလေရော။ ကျနော် တို့ကြားထဲမှာ အလွဲတွေလုပ်မိတိုင်း ခေတ်စားတဲ့စကားတစ်ခုရှိတယ်။ အဲဒါက “မှားတဲ့အခါလည်း များပေ မပေါ့” တဲ့။ သိတယ်မဟုတ်လား ကာတွန်းအောင်ရှိန်ရဲ့ ဇတ်လိုက်ကျော်ကြီး ဦးရှံစားရဲ့ လက်သုံးစကားကို ပြန်လည်ဆန်းသစ်ထားတာလေ။


လွမ်းစိတ်တွေဝေ

ကျနော် အိမ်ကိုလည်းလွမ်းတယ်။ အထူးသဖြင့် ကျနော် ငှက်ဖျားတက်ပြီး အားအင်ကုန်နေတဲ့အချိန်တွေမှာ အိမ်ကို သတိရတယ်။ သီးသန့်လွမ်းဖို့ အချိန်ကတော့ မရှိသလောက်ပါဘဲ။ ကျနော်တို့က များသောအားဖြင့် လှုပ်ရှားသွားလာနေကြရတာလေ။ အထူးသဖြင့် အမေကိုလွမ်းတယ်။ ကျနော့အမေနဲ့ အဖေ၊ ညီညီမတွေ ကျနော့ကို သတိရနေကြမှာဘဲ။ ကျနော်လည်း သူတို့ကို လွမ်းလာတယ်။ တစ်ရက် ကျနော်တို့ တောင်ကုန်း တစ်ခုပေါ်ကို ရောက်ပြီး စခန်းချကြတော့ ညပိုင်း ကျနော် သစ်ပင်နှစ်ခုကို ဆွဲပြီးချည်ထားတဲ့ ပုခက်တစ်ခု ပေါ်မှာ လှဲနေတုန်း အောက်ဖက် ရန်သူထိမ်းချုပ်ထားတဲ့ ရွာတစ်ရွာက သီချင်းသံတစ်ခု လေနဲ့အတူပါလာ တယ်။ ကျနော် သိပ်ကြိုက်တဲ့အဆိုတော်မာမာအေးရဲ့ သီချင်းတစ်ပုဒ်ပဲ။ မာမာအေးရဲ့ သီချင်းတွေကို တစ်ခြားအဆိုရှင်တွေ ပြန်ဆိုထားကြတာရှိပေမယ့် ကျနော့ စိတ်ထဲမှာ သူ့ရဲ့ အရှိုက်အငိုက်ကို မီတယ်မထင် ဘူး။ သူဟာ ပါရမီရှင်ပါ။ သီချင်းသံလေးက လေနဲ့အတူ ကျနော့ဆီရောက်လာလိုက်၊ ပြန်ဝေးသွားပြီး ပျောက်သွားလိုက်နဲ့ ဖြစ်နေတယ်။ ကျနော် အဲဒီသီချင်းကို တစ်ပိုင်းတစ်စ စိတ်ထဲက လိုက်ဆိုနေမိတယ်။

“ရွက်ရွာကြွေ.. နွေအကူး… လေရူးပွေစ.. ညနေဆည်းဆာ…” တစ်ချိန်ထည်းမှာဘဲ ကျနော် အိမ်ကို သတိရလာတယ်။ ကိုယ့်ကိုယ်ကိုယ် မျက်ရေ၀ိုင်းနေပြီဆိုတာ သတိထားမိတယ်။ ကျနော့အနားမှာ စစ် ကျောပိုးအိတ်လေးတစ်လုံးရယ်၊ ကျနော်ကိုင်တဲ့ သေနတ်တစ်လက်ရယ်။ ဒါတွေ ဘယ်တော့မှပြီးမှာပါလိမ့်။ ကျနော် ပုခက်ပေါ်မှာ ထထိုင်၊ ဆေးပေါ့လိပ်မီးညှိပြီး အဲဒီသီချင်းသံလေး လေနဲ့အတူပြန်ရောက်လာမှာကို မျှော်နေမိတယ်။ ချက်ချင်းသာသွားခွင့်ရရင် အားလုံးကို သွားတွေ့လိုက်ချင်တော့တာပါဘဲ။ ဒါပေမယ့် လက်ရှိအနေအထားမှာ လုံးလုံးမဖြစ်နှိုင်ဘူး။ ကျနော်တို့မျှော်လင့်နေတဲ့ အနေအထားတစ်ခုကို မရောက်မ ချင်း ဒီအိပ်မက်က အကောင်အထည်ပေါ်ဦးမှာ မဟုတ်ဘူးလေ။


ဗဟိုတာဝန်

နောက်တန်းတာဝန်တွေနဲ့ လုံးထွေးနေခဲ့တဲ့အချိန်တွေမှာ ကျနော် ရတဲ့အချိန်တွေမှာ အင်္ဂလိပ်စာ သတင်း စာဟောင်းလေးတွေကို ဖတ်ပြီး လေ့လာရေးလုပ်ဖြစ်တယ်။ ဗဟိုကို ရောက်လာတဲ့ နိုင်ငံခြားသားတွေထဲက တစ်ချို့က သူတို့ရောက်နေတဲ့အချိန်မှာ အင်္ဂလိပ်စာသင်တန်းလေးတွေ လုပ်တဲ့အခါတိုင်းလိုလို ကျနော် သွားပြီးတက်တယ်။ ဒီဘာသာစကားက ကျနော့အတွက် အရေးကြီးလာပြီ။ ကျနော့ကို အရင်က နိုင်ငံခြား သားတွေက လာမေးတဲ့အခါတိုင်း ကျနော် ပြန်မပြောတတ်ဘူးဆိုတော့ ဒီထက် ပိုပြီးကောင်းတဲ့ အင်္ဂလိပ် စကားပြော ဆက်ဆံရေးကို ကျနော်လုပ်နှိုင်ချင်လို့ ကြိုးစားတယ်။ နောက်ပိုင်း နဲနဲနဲနဲနဲ့ စကား စပြောလို့ရ လာတယ်။ အဲဒီတော့ ဗဟိုက ၁၉၉၄ ခုနှစ်မှာ ကျနော့ကို အင်္ဂလိပ်စာ သင်တန်းတစ်ခုကို သွားတက်ပြီး ထပ်ပြီးတိုးတက်အောင်လုပ်နှိုင်မယ့် အခွင့်အရေးကိုပေးတယ်။ အဲဒီသင်တန်းကာလက တစ်နှစ်တောင်ရှိ တယ်။ ကျနော် သင်တန်းကို ၆ လ တက်ဖြစ်ခဲ့တယ်။ အဲဒီကြားထဲ သင်တန်းမှာရောက်နေတဲ့အချိန် စစ်ဦးစီး ချုပ်ကိုထွန်းဦး လှေမှောက်ပြီး ဆုံးပြီဆိုတာကို သတင်းကြားတယ်။ ကိုခင်ထွန်းကြည်တစ်ယောက် ပါလာတဲ့ စက်လှေကို သံလွင်မြစ်ထဲမှာ ရန်သူက ၀ိုင်းအပစ်ခံရပြီး ကိုခင်ထွန်းကြည်ကျသွားတယ် လို့လည်း သတင်း ကြားတယ်။ ဘယ်လိုပဲပြောပြော ကျနော်တို့အတွက် တန်ဖိုးမဖြတ်နှိုင်တဲ့ ဆုံးရှုံးမှုတွေပါ။ ကျနော် အတော် စိတ်ထိခိုက်ခဲ့တယ်။ ကျနော် သင်တန်းကို နောက်ထပ် ၆ လ ထပ်တက်ရဦးမှာဖြစ်ပေမယ့် ဗဟိုရဲ့လိုအပ် ချက်အရ ကျနော် ထိုင်းနိုင်ငံဖက်မှာ လျှို့ဝှက်အခြေစိုက်တဲ့ နိုင်ငံခြားရေးဌာနရုံးကို တာဝန်ထမ်းဆောင်ဖို့ သွားခဲ့ရတယ်။


အနိဟာ့ဘတ်

ထိုင်းနိုင်ငံကို ကျနော် အရင်ကတည်းက နယ်စပ်မှာ ၀င်ထွက်ဖူးပါတယ်။ ထိုင်းစကားက ကျနော့အတွက် အရမ်းခက်တယ်။ အသံကနွဲ့တော့ နှာခေါင်းသံလေးနဲ့ပြောမှ အသံပီတယ်။ ကျနော်လိုက်ပြောရ ခက်သလို၊ ကိုယ့်အသံကိုကိုယ်ပြန်ကြားရတာကလည်း အခြောက်သံလိုထွက်နေတော့ ရှက်တာနဲ့ နှစ်အတော်ကြာကြာ ထိုင်းနိုင်ငံမှာ နေဖြစ်တာတောင် ထိုင်းစကားက အခုအထိ တောင်တလုံးမြောက်တလုံးအဆင့်ဘဲရှိသေး တယ်။ အဲဒီကြားထဲ အသံအနိမ့်အမြင့်က များတော့ ဆင်တူစကားလုံးတွေကို ပီသအောင်မပြောနှိုင်ရင် သူတို့နားမလည်တော့ဘူး။

တစ်ခါက ကျနော်တို့ ရဲဘော် အကိုကြီးတစ်ယောက်က ထိုင်းနိုင်ငံဖက်ခြမ်း နယ်စပ်မြို့လေးမှာ တာဝန်ကျ တော့ သူက ညနေညနေဆိုရင် သူ့မှာ မရှိမဲ့ရှိမဲ့ ဟိုလူဒီလူဆီက တောင်းထားတဲ့ ထိုင်းဘတ်ငွေလေးနဲ့ အရက်သွားဝယ်သောက်လေ့ရှိတယ်။ ရုံးကလည်း သူက အသက်အကြီးဆုံးဆိုတော့ နဲနဲပါးပါး စားချင်တာ လေးတွေစားပါစေဆိုပြီး ဆယ်ဘတ်၊ ဘတ်နှစ်ဆယ်လောက် ထုတ်ပေးတာပေါ့။ သူလည်း အနိ (ဒီဟာ) ဆိုပြီး လက်ညှိုးထိုးဝယ်တာပေါ့။ ထိုင်းနိုင်ငံမှာ ဆေးစိမ်တောအရက်က အတော်ကောင်းတယ်။ အဲဒါလေး ကို ညနေစောင်းတိုင်း ထိုင်းအဖွားကြီးတစ်ယောက်ရောင်းတဲ့ ဈေးဆိုင်မှာ စားပွဲပေါ်တင်ထားတဲ့ ပုလင်းကို လက်ညှိုးထိုးပြီး အနိ.ဟာ့ဘတ် (ဒီဟာငါးဘတ်ဖိုး) လို့ပြောရင် ဆိုင်ရှင်ကလည်း သဘောပေါက်နေပြီ။ ပက်ချင်ခွက်သေးသေးလေးနဲ့ ထည့်ထည့်ပေးလေ့ရှိတာပေါ့။ ကျန်တဲ့ ထိုင်းစကားပိုတတ်တဲ့ ရဲဘော်တွေက ညနေစောင်းရင် သူထွက်သွားပြီး ပြန်လာရင် အနံ့သင်းသင်းလေးရရနေတော့ သူဘယ်လိုဝယ်လို့ရနေလဲလို့ မသိမသာ စုံစမ်းကြတော့ သူက အနိဟာ့ဘတ်တစ်လုံးထဲနဲ့ အလုပ်ဖြစ်နေတာကိုသိကြရတယ်။ သူ့ကို နောက်ပိုင်း အတော်များများက နောက်ကွယ်မှာ အနိဟာ့ဘတ်လို့ခေါ်ကြတယ်။ သူသိသွားတော့ ဒီထက်နဲနဲ ပိုတတ် အောင် စကားလုံးတစ်လုံးနှစ်လုံး မေးစမ်းပြီးသင်ထားတာပေါ့။ ဆ၀ါဒီခဗ် (မင်္ဂလာပါ)၊ ဆဘိုင်ဒီမိုင် (နေ ကောင်းလား) စသည်ဖြင့်ပေါ့။

တစ်ရက် ညနေစောင်း သူဟိုဆိုင်ရောက်တော့ အဖွားကြီးကိုတွေ့တွေ့ခြင်း လက်အုပ်ချီပြီး ဆ၀ါဒီခဗ်လို့ပြော တော့ အဖွားကြီးက ဆ၀ါဒီလို့ လက်အုပ်ချီရင်း ပြန်နှုတ်ဆက်တယ်။ ဟုတ်ပြီပေါ့…. သူဆက်ပြောတယ်… “ဆဘိုင်မီမိုင်” ဆိုတော့ အဖွားကြီးက ‘မီခါ့’ ဆိုပြီး ဆိုင်ထဲက စပရိုက်အချိုရည်တစ်လုံးကို ခွပ်ကနဲ အဖုံးဖွင့်ပြီး ပလတ်စတစ်အိတ်ထဲထည့်ပေးလိုက်တယ်။ ‘မီမိုင်’ ဆိုတာက ရှိလားလို့မေးတဲ့စကားလေ။ အဖွားကြီးက သူ စပရိုက်သောက်ချင်တယ်ထင်လို့။ သူက အဲဒါမဟုတ်ဘူးလို့ လက်ဟန်ခြေဟန်နဲ့ ကြိုးစား ပေမယ့် ကိုယ်တိုင်လည်း ဆက်မပြောတတ်တော့ အဖွားကြီးပေးတဲ့ စပရိုက် အချိုရည်ကိုယူပြီး အဲဒီညနေ အရက်သောက်ဖို့ ထည့်သွားတဲ့ ပိုက်ဆံတစ်ဆယ်ကို အဖွားကြီးကိုပေးပြီး မကြေမနပ်ပြန်လာခဲ့တယ်။ သင်ပေးလိုက်တဲ့ ရဲဘော်တွေက သူမကြေမနပ် အထုတ်ဆွဲပြီး ရောက်လာတော့ ဘာဖြစ်တာလဲမေးကြည့် တော့မှ သူစကားအသံမှားတဲ့အပေါ် အဖွားကြီးက ထည့်ပေးလိုက်တာဆိုတော့ အားလုံးတဟားဟားဖြစ် ကုန်တာပေါ့။ သူကတော့ သူရတဲ့ရာရှင်လေးက အဲဒီညနေ အရက်အစား စပရိုက်တစ်ထုတ်နဲ့ပဲ ကြေနပ်ရ တော့တာပေါ့။


ထိုင်း

၁၉၉၅ မှာ ထိုင်းနိုင်ငံထဲမှာ တာဝန်ထမ်းဆောင်ရတယ်။ ထိုင်းနိုင်ငံဆိုတာက ကျနော်တို့ရဲ့ အိမ်နီးချင်းနိုင်ငံ တစ်ခုပါ။ ထိုင်းနိုင်ငံထဲမှာ အဲဒီအချိန်က နယ်စပ်မှာ သွားလာနေခဲ့တဲ့အချိန် သောင်ရင်းမြစ်၊ သံလွင်မြစ်တွင်း က လှေပေါ်ကလှမ်းကြည့်ရင် ကျနော်တို့ မြန်မာနိုင်ငံဖက်ကမ်းက သစ်တောတွေက စိမ်းစိုနေပြီး ထိုင်းဖက် က သစ်တောတွေက ၀ါခြောက်ခြောက်လိုလို မြင်ရတယ်။ နယ်စပ်မြို့လေး မဲဆောက်ကို တောခိုခါစအချိန် က ရောက်ဖူးတဲ့အချိန်မှာ မဲဆောက်က မြန်မာနိုင်ငံထက်သာသလိုရှိတယ်လို့ ထင်ရတယ်။ ဇင်းမယ် (ချင်းမိုင်)၊ ဘန်ကောက်တို့ဖက်ကို ရောက်မှ လူနေမှုစနစ်အရမ်းကိုကွာခြားသွားပါလားလို့ သဘော ပေါက်ရတော့တယ်။ ၂၄ နာရီ ရေမီးအပြည့်အစုံရှိတယ်။ အားအားယားယား လူတွေကို အနှောက်အယှက် ဖြစ်အောင် ဧည့်စာရင်းတွေ လိုက်မစစ်ဘူး။ အခြေခံပြည်သူတွေက ကျနော်တို့ မြန်မာလူမျိုးတွေလိုပဲ ဖော်ရွေ သဘောကောင်းကြတယ်။ ဘာသာရေး၊ လူမျိုးရေး ခွဲခြားမှုတွေလည်း မရှိဘူး။ ဒါကြောင့် ဒီနိုင်ငံမှာ ကျနော်တို့ သွားလာနေထိုင်လို့ ရနေတော့ ထိုင်းနိုင်ငံရဲ့ကျေးဇူးတွေ ကျနော်တို့အပေါ်မှာ ရှိလာတာပေါ့။

ရာမ (၉) ဘုရင် ဖူမစ်ဖွန်း (ဘူမိဘော) က လက်ရှိထိုင်းနိုင်ငံရဲ့ ဘုရင်ဖြစ်ပြီး စည်းမျဉ်းခံဘုရင်စနစ်ကျင့်သုံး တဲ့ ဒီမိုကရေစီနိုင်ငံဖြစ်တယ်။ ထိုင်းလူမျိုးအများစုက သူတို့ ဘုရင်ကို သိပ်ချစ်ကြတယ်။ ဒီဘုရင်ကလည်း အခုလို အိုမင်းလာတာတောင် တိုင်းပြည်နဲ့ ပြည်သူပြည်သားတွေအတွက် အမြဲတမ်းအလေးထားတဲ့ ပုဂ္ဂိုလ် အဖြစ် ကြည်ညိုစရာ တွေ့ရတယ်။  သမိုင်းအရ မြန်မာတွေက ထိုင်းနိုင်ငံကို သိမ်းပိုက်ခဲ့ဖူးတဲ့အတွက် လူနည်းစုတစ်ချို့ကတော့ ခွဲခြားဆက်ဆံတာမျိုးရှိတယ်။ ဒါပေမယ့် ထိုင်းလူမျိုးတွေအားလုံးမှာ တူညီတဲ့ အချက်ကတော့ သူတို့ဟာ ထိုင်းနိုင်ငံသားဖြစ်တဲ့အတွက် အတော်လေး ဂုဏ်ယူကြတယ်။ သူတို့နိုင်ငံမှာက လူတွေရပ်တည်လုပ်ကိုင်စားသောက်နှိုင်လောက်တဲ့ အခွင့်အလမ်းတွေကို ဖွင့်ပေးထားတယ်။ သူတစ်ပါးကို မထိခိုက်နှိုင်တဲ့ လွတ်လပ်မှုကို လူတိုင်းအတွက် ဖွင့်ပေးထားတယ်။ အစိုးရကလည်း မတရားလုပ်တာ မရှိ သလို၊ လူထုကလည်း မတရားလုပ်တယ်ထင်ရင် ချက်ခြင်း တရားစွဲပိုင်ခွင့်တွေရှိနေတာတွေ့ရတယ်။ ကျနော်တို့နဲ့ မတူကွဲပြားတဲ့ တိုးတက်လွတ်လပ်တဲ့ လူ့အဖွဲ့အစည်းတစ်ခုပါဘဲ။ ခိုးတာ၊ လိမ်တာ၊ ၀ှက်တာ တွေကို သူတို့လူမျိုးအချင်းချင်းတောင် ခွင့်မလွှတ်ဘူး။ ရာဇ၀င်ထဲက ရန်သူတွေဖြစ်တဲ့ ကျနော်တို့ မြန်မာ လူမျိုးတွေကိုတောင် ကျနော်တို့က သူတို့ကို ရိုးရိုးသားသားနဲ့ မှန်မှန်ကန်ကန်ဆက်ဆံရင် သူတို့ကလည်း လေးလေးစားစားဆက်ဆံကြတာရှိတယ်။ ပညာနည်းတဲ့ သူတစ်ချို့ကတော့ မြန်မာဆိုရင် မျက်နှာထားက အစပြောင်းသွားပြီး ခပ်ရိုင်းရိုင်း နှိမ်ပြီး ဆက်ဆံတာမျိုးတော့ရှိနှိုင်တယ်။ ဒါပေမယ့် အဲဒါဟာ တစ်နိုင်ငံလုံးရဲ့ သဘောထားလို့ သတ်မှတ်လို့မရဘူး။ ဘယ်နေရာမဆို လူဆိုး၊ လူကောင်းရှိတာပါဘဲ။

ကျနော်တို့နိုင်ငံက လူတွေက သူတို့ကို ‘ယိုးဒယား’လို့ခေါ်ကြတာကို သူတို့ထဲမှာ သမိုင်းနားလည်တဲ့ သူတွေ က မကြိုက်ဘူး။ မကြိုက်ရတဲ့ အကြောင်းရင်းရှိတယ်။ ရှေးက သူတို့ရဲ့ဘုရင်နန်းစိုက်တဲ့ နေရာကို အယုထိယ (အယုဒ္ဓယ) လို့အမည်ပေးထားတယ်။ အဓိပ္ပါယ်က ဘယ်သူမှ တိုက်ခိုက်သိမ်းပိုက်လို့ မရတဲ့ မြို့တော်ပေါ့။ အဲဒါကို ကျနော်တို့ ဗမာဘုရင်တွေကို သိမ်းပိုက်ပြီး ရှေ့က ‘အ’ကို နမ်နှိမ်တဲ့အနေနဲ့ ဖြုတ်ပစ်ပြီး သူတို့ကို ယုထိယ (ယုဒ္ဓယ) လို့ တောက်လျှောက်နှိမ်ပြီးခေါ်လာကြတာ အားလုံးနှုတ်ကျိုးနေတဲ့အထိဘဲ။ အဲဒီကနေ အခေါ်အဝေါ်တွေပြောင်းလာပြီး ယိုးဒယားဖြစ်သွားတယ်။ အဓိပ္ပါယ်က သိမ်းပိုက်လို့ရတဲ့မြို့ (နိုင်ငံ) ဖြစ်သွားတာပေါ့။ ဒါကြောင့် ကျနော်က ထိုင်းနိုင်ငံ၊ ထိုင်းလူမျိုးလို့ပဲ သုံးနှုန်းပါတယ်။ အမှန်ကတော့ လူတစ်ဖက်သားမကြိုက်တဲ့ အခေါ်အဝေါ်အသုံးအနှုံးကို တစ်ခြားလူမျိုးတွေတင်မက ကိုယ့်လူမျိုးအချင်းချင်း အပေါ်မှာတောင် ကျနော်တို့အားလုံး မသုံးသင့်တော့ပါဘူး။ ဒါမှ တစ်ယောက်ကိုတစ်ယောက် အပြန်အလှန် ယုံကြည်လေးစားမှုတွေတည်ဆောက်ပြီး အတူသွားနှိုင်မှာမဟုတ်လား။ ကျနော်တို့မှာ အခြေအနေက ရန်သူ ရှိလာအောင်တွန်းပို့ပေးခဲ့ပေမယ့် မိတ်ဆွေကိုသာ လိုချင်ကြတာလေ။


အိမ်နဲ့အဆက်အသွယ်ရပြီ

၁၉၉၅ မှာ ကျနော့ညီမလေးတစ်ယောက် နယ်စပ်ကိုရောက်လာတယ်။ ဖြစ်ပုံက ကျနော် ပေါ့ပါးထဘက်မှာ အင်္ဂလိပ်စာသင်တန်းတက်နေတဲ့အချိန်က တွေ့ခဲ့တဲ့ ညီမလိုခင်ရတဲ့ တိုင်းရင်းသူတစ်ယောက်က သူ ပြည်တွင်းကို ပြန်တဲ့အချိန်မှာ အိမ်အထိသွားပြီး ကျနော်နဲ့ဆက်သွယ်ပေးခဲ့တာ။ သူ့ကိုကျေးဇူးတင်ရပြန် တယ်။ ကျနော်နယ်စပ်မြို့တစ်ခုမှာ ဆင်းပြီးတွေ့ရတယ်။ အဲဒီနေ့က ညီမလေးက ကျနော်ထမင်းစားနေတော့ ထိုင်ကြည့်ရင်း မျက်ရည်တွေကျလာတယ်။ ဘာဖြစ်တာလဲလို့မေးတော့ သူက “ကိုကြီး အိမ်မှာတုန်းက ငါးဟင်းမစားဘူးလေ။ ကိုကြီးက ငါးမှမကြိုက်ပဲ” တဲ့။ ဟုတ်တယ်.. ကျနော်က ဘုရားစူးမြစ်ဝကျွန်းပေါ်သား။ ငါးကို ဟင်းချက်ထားရင် မကြိုက်ဘူး။ ကျနော် ထမင်းစားပွဲပေါ်မှာ ငါးဟင်းတွေချည့်တွေ့ရင် ထမင်းမစားဘဲ ထွက်သွားတော့ ဟင်းချက်ထားတဲ့ အမေနဲ့ညီမလေးတွေ မျက်နှာမကောင်းဖြစ်ကျန်ခဲ့ကြတာ မှတ်မိသေး တယ်။ ကျနော်က ညီမလေးကို “ဟဲ့… ဒီမှာတော့ ရှိတာစားရတာပေါ့။ မစားရင် ငတ်မှာ” လို့ ပြန်ပြောဖြစ် တယ်။ ညီမလေးက ၉၂ မှာ အမေဆုံးပြီလို့ပြောတော့ ကျနော့စိတ်ထဲမှာ သိပ်မခံစားရဘူး။ လွန်ခဲ့တဲ့ သုံးနှစ်လောက်ကတည်းက အမေဆုံးခဲ့တာဖြစ်တာရော၊ ဒါတွေဖြစ်လာနှိုင်တယ်လို့ တွေးထားတာကြောင့် ရောပေါ့။ ဘယ်တတ်နှိုင်မလဲကွာ… သူဒီလောက်ပဲနေရမယ့် ကံပါလာကိုးလို့ပဲ ညီမလေးကိုပြန်ပြောမိခဲ့ တယ်လေ။

မေမေက ကျနော်အိမ်က ထွက်သွားပြီးကတည်းက ကျနော့ရဲ့ အင်္ကျီစုတ်၊ ဖိနပ်စုတ်ကအစ သူ့သားကြီးနဲ့ ပတ်သက်တဲ့ ပစ္စည်းတွေကို သံသေတ္တာတစ်ခုထဲမှာ ထည့်ပြီးသိမ်းထားတယ်တဲ့။ ကျနော့ကို သတိရတိုင်း ထုတ်ကြည့်ပြီးလွမ်းတတ်တယ်လို့လည်း ညီမလေးကပြောတယ်။ မေမေက နှလုံးရောဂါရှိတယ်လေ။ အမေ့ ရဲ့အမွေဆိုလို့ ကျနော်အိမ်ကထွက်သွားပြီးနောက်ပိုင်း သူမဆုံးခင်အထိ ရေးသွားခဲ့တဲ့ ဒိုင်ယာယီလေးတစ်ခု ပဲ ကျန်ခဲ့တယ်။ ရိုးရိုးဗလာစာအုပ်လေးထဲမှာ နေ့စွဲတွေတပ်ပြီး ကျနော့ကို စကားပြောခဲ့တာပါဘဲ။ ဒိုင်ယာယီ လေးရဲ့ မျက်နှာဖုံးမှာ ကျနော့နာမည်ကို တတ်ထားပြီး ကျနော့ကို သတိရတိုင်း စာထရေးလိုက်၊ ဘယ်သူမှ မမြင်အောင် ဖွက်ထားလိုက်နဲ့ အမေ့အလောင်းမြေကျမှ အမေ့အိပ်ယာရှင်းရင်းနဲ့ ဖျာအောက် မှာတွေ့ခဲ့ကြ တာလို့ ညီညီမတွေက ပြောတယ်။

ကျနော်အိမ်က ထွက်လာပြီးနောက်ပိုင်း အိမ်နဲ့အဆက်အသွယ် လုံးဝမလုပ်ဖို့ ကြိုးစားခဲ့ပါတယ်။ တကယ် တော့ မိသားစုကို ကျနော့ကြောင့် ဒုက္ခမရောက်စေချင်တာပါ။ ဒါပေမယ့် အစိုးရအာဏာပိုင်တွေကတော့ ကျနော့ အိမ်ကို ကျနော်နဲ့အဆက်အသွယ်ရှိမရှိ တစ်လကို အနဲဆုံး သုံးလေးခါ သွားရှာကြတယ်တဲ့။ ကျွန်တော် အိမ်ကထွက်လာပြီးနောက်ပိုင်း အဲဒီလိုအနှောက်အယှက် ပေးမှုတွေကြောင့် ညီညီမတွေလည်း အလုပ်တွေရလိုက် အလုပ်ပြန်ပြုတ်လိုက်ဖြစ်ကုန်ကြတယ်။ အမေဆုံးပြီးနောက်ပိုင်း တစ်မိသားစုလုံး တခြား မြို့ကိုပြောင်းနေကြတော့မှ ရှာဖွေရေးဒါဏ်ကင်းကင်း လုပ်ကိုင်စားနှိုင်တော့တယ်လို့ပြောကြတယ်။


အမွေ

ညီမလေးပြန်သွားပြီး လအနည်းငယ်အကြာမှာ အဲဒီအမေ့ရဲ့ဒိုင်ယာရီစာအုပ်လေးကို ကျနော့ဆီကို ပို့ပေး လိုက်ကြတယ်။ စာအုပ်မျက်နှာဖုံးမှာ ကျနော့ကို ကိုလိပ်မူထားတယ်။ တကယ်တော့ အဲဒီအရောင်လွင့်နေ ပြီဖြစ်တဲ့ ဗလာစာအုပ်လေးဟာ ကျနော်အများအတွက် စွန့်လွှတ်ပြီး လုပ်ခဲ့ရတဲ့ ရလဒ်အဖြစ် အမေ့ဆီက ရတဲ့ အမွေအနှစ်ပါဘဲ။ ဟိုခေတ်က ကိုးတန်းလောက်အထိ ပညာသင်ခဲ့ဖူးတဲ့ အမေလက်ရေးလေးတွေဟာ အရင်လိုရှင်းပြီး လှနေတာပါဘဲ။ စာမျက်နှာ နှစ်မျက်နှာလောက် ဖတ်ရင်း အမေ ကျနော့အပေါ်ထားတဲ့ မေတ္တာတရားကို တစိမ့်စိမ့်စဉ်းစားပြီး မျက်ရည်ကျရတယ်။ ကျနော် ဆက်မဖတ်ရက်တော့သလို ဆက် လည်း မဖတ်ရဲတော့ဘူး…။ နောက်မှ ကျနော် တဖြည်းဖြည်းချင်းဖတ်ယူရတယ်။ အမေ့လက်ရေးနဲ့ စာ ကြောင်းတိုင်းက အမေကျနော့အပေါ်မှာ ဘယ်လောက်အထိ ချစ်တယ်၊ တန်ဖိုးထားတယ်ဆိုတာကို ပြောပြနေတယ်။ ကျနော့ဘ၀အတွက် အစားထိုးမရတဲ့ ဆုံးရှုံးမှုဖြစ်လို့ ရင်ထဲကလှိုက်ပြီး ယူကျုံးမရ လည်းဖြစ်ရတယ်။

တစ်ရက် အိပ်မက်ထဲမှာ အမေက ကျနော့ အိပ်ယာဘေးမှာ စိုးရိမ်စိတ်နဲ့ငုံ့ကြည့်နေတာတွေ့ရပြီး လန့်နိုးလာ တော့ ကျနော့ကိုမျှော်နေခဲ့တဲ့ အမေ့အကြောင်းတွေးရင်း ကျနော် ရှိုက်ကြီးတငင် ငိုချပစ်လိုက်မိတယ်။ အိမ် ကထွက်သွားပြီး သေသလား ရှင်သ လားမသိရတဲ့သားတစ်ယောက်ရှိနေတဲ့ ကျနော့အမေ ဘယ်လိုခံစား နေခဲ့ရမလဲ။ ကျနော့လို အိမ်ကထွက်သွားတဲ့သားရှိတဲ့ အမေတွေ၊  ထောင်ကျတဲ့ သားသမီးရှိတဲ့ အမေတွေ ဒါမှမဟုတ် အခြားတစ်နည်းနည်းနဲ့ သားသမီးဆုံးရှုံးရတဲ့မိခင်တွေ ရဲ့ရင်ထဲမှာ ဘာတွေရှိမလဲ။ ကျနော် ပိုပြီး ကိုယ်ချင်းစာတတ်လာတယ်။ အမေဟာ ကျွန်တော်တို့ သားသမီးတွေရဲ့ လက်ဦးဆရာပါ။ အမေ့ရဲ့သွန်သင် လမ်းပြပေးခဲ့မှုတွေသာမပါရင် ကျနော်တို့ ဘ၀ကို ဒီလိုသတ္တိရှိရှိ ရင်ဆိုင်ဖြတ်သန်းဖို့ မလွယ်ကူနှိုင်ပါဘူး။ အမေ့ဒိုင်ယာယီလေးထဲမှာ အဖေ့ကိုတောင် ကျနော့ဘက်က မခံနှိုင်တဲ့ဒေါသနဲ့ ရေးထားတာတွေတောင် ရှိတယ်။ ဒီဒိုင်ယာယီလေးက ကျနော့အတွက် တန်ဖိုးမဖြတ်နှိုင်တဲ့ မိဘအမွေအနစ်ပါ။

မြန်မာနိုင်ငံရဲ့ အတ္တတွေ၊ မာနတွေလွှမ်းနေတဲ့ နိုင်ငံရေးပဋိပက္ခနဲ့ ပြည်တွင်းစစ်ကြီးက ကျွန်တော်တို့ နိုင်ငံနဲ့ လူမျိုးကို ဘာကောင်းကျိုးမှ မပေးပါဘူး။ မြန်မာနိုင်ငံသားတွေဟာ ကမ္ဘာ့အဆင့်မပြောနဲ့ ကိုယ့်ဒေသတွင်း မှာတောင် မျက်နှာငယ်ငယ်နဲ့ အနိမ့်ကျဆုံး အဆင့်ကိုရောက်နေရပြီ။ နှစ်ပေါင်းများစွာ မြန်မာပြည်သူတရပ် လုံးခံစားနေ ရတဲ့ တိုင်းရင်းသားအချင်းချင်းတိုက်နေ တဲ့ ပြည်တွင်းစစ်ပွဲတွေ၊ မတရားမှုတွေ၊ မိတကွဲဖတကွဲ ဖြစ်ကြတဲ့ အဖြစ်ဆိုးတွေ အခုလိုအချိန်မျိုးမှာ ချုပ်ငြိမ်းသင့်ပြီထင်ပါတယ်။ ကျနော်တို့ သားအမိထက်ဆိုးရွား တဲ့ အဖြစ်အပျက်တွေအများကြီး အရင်က ရှိခဲ့သလို အခုအထိ မြန်မာပြည်နေရာအနှံ့မှာ ပုံစံမျိုးစုံနဲ့ ဆက်ရှိ နေဆဲပါ။ အမေ့လိုအမေများနဲ့ ကျနော့လိုသားတွေကို ဖန်တည်းဖြစ်ပေါ်စေခဲ့တဲ့ အဖြစ်မျိုးတွေက မျိုးဆက် အားလုံး အမြန်ဆုံး ကင်းဝေးကြပါစေ၊ လွတ်လပ်ကြပါစေလို့ ဆုတောင်းရပါတယ်။


အမေ့ဒိုင်ယာယီ
ဒီဒိုင်ယာယီဟာ ကျနော်စိတ်အလှုပ်ရှားရဆုံးနဲ့၊ အခံစားရဆုံး စာတွေချည့်ပဲ။ အမေကိုယ်တိုင် ချရေးခဲ့တယ်။ အမေက သူ့ရင်ထဲက ပြောချင်တာတွေကို ကျနော့ကို အသိပေးသွားတယ်။ ဒိုင်ယာယီအပိုင်းအစလေးတွေ တစ်ချို့ကို သူ့ရဲ လက်ရေးမူရင်းအတိုင်း ဖော်ပြပေးလိုက်ပါတယ်။ ပြီးပြည့်စုံတဲ့မိခင်မေတ္တာနဲ့ သူသက်ရှိထင် ရှား ရှိနေခဲ့တဲ့အချိန်မှာ နှလုံးသားနဲ့ထုဆစ်ထားခဲ့တဲ့သက်မဲ့အရာဝတ္ထုဆိုပေမယ့် မိဘကျေးဇူးဘယ်လောက် ထိ ကြီးမားတယ်ဆိုတာရဲ့ မှတ်တိုင်တစ်ခုအဖြစ် စကားတွေအများကြီးပြောနေတဲ့ သက်ဝင် ဒိုင်ယာယီပါဘဲ။

ဒိုင်ယာယီအပိုင်းအစများ…..
















အမေကျနော့ကို တွေ့ချင်တဲ့ဆန္ဒတွေ ပြည့်ဝမသွားရှာဘူး။ သူက ကျနော့ကိုချစ်လွန်းလို့ ကျနော့ရဲ့ သူငယ် ချင်းရဲဘော်တွေကိုတောင် ကျနော်နဲ့အတူတူ အန္တရာယ်ကင်းဘေးရှင်းအောင် ထည့်ပြီးဆုတောင်းသွားခဲ့ တယ်။ အမေ့ရဲ့မေတ္တာတွေကြောင့် ကျနော် အန္တရာယ်အမျိုးမျိုးကြုံတွေ့ခဲ့ပေမယ့် ကံကောင်းထောက်မစွာ ဖြတ်သန်းနှိုင်ခဲ့ပါတယ်။ မိတ်ဆွေကောင်းတွေ အများကြီးရခဲ့တယ်။ အသိတရားတွေ၊ အတတ်ပညာတွေ ပိုပြီး လေ့လာခွင့်ရခဲ့တယ်။ ကျနော့ဘ၀ရဲ့ထက်ဝက်ကျော်ဟာ ကျနော်ချစ်တဲ့မိသားစုနဲ့ဝေးရာမှာ နေရတယ် ဆိုပေမယ့် ကျနော် အမေ့ရဲ့မေတ္တာတွေနဲ့ ရင်ဆိုင်နှိုင်နေဆဲပါ။ အမေ့ကျေးဇူးတရားတွေကို ဖော်ပြနှိုင် လောက်တဲ့ စကားလုံးမရှိလောက်အောင် ကြီးမားမြင့်မြတ်လှပါတယ်။ အမေ ကောင်းရာသုဂတိလားပါ စေလို့သာ။

                                                                                                      xxxxxxxxx
                                                                                                                                                                                                                  ဆက်ရေးပါမည်.....

ကျောင်းသားသူပုန်တို့ရဲ့ ခရီးရှည်အမှတ်တရ (အပိုင်း-၁၁)

by Myat Thu on Thursday, January 31, 2013 at 12:45am ·

ဒဏ်ရာများ

အမေထားခဲ့တဲ့ ကျနော့အတွက်ဒိုင်ယာယီလေးအကြောင်းပြီးသွားတော့ ကျနော် စိတ်ပန်းကျသွားသလိုဖြစ်ပြီး ဘာမှ ဆက်ရေးချင်စိတ်မရှိဖြစ်နေတယ်။ ကျနော်တို့လက်နက်ကိုင်တော်လှန်ရေးလုပ်ကြတဲ့ ကျောင်းသားတွေရဲ့ စိတ်ပိုင်းဆိုင်ရာ ခံစားမှုတွေအများကြီးရှိတယ်။ တကယ်တော့ ကျနော်တို့ အိပ်မက်ထဲမှာတောင် ထည့်ပြီးမမက်ခဲ့တဲ့ ဘ၀အတွေ့အကြုံဖြတ်သန်းမှုတွေက ဒဏ်ရာတွေပေးခဲ့တာ။ တစ်ချို့က တိုက်ပွဲ တွေထဲမှာ ကိုယ်လက်အင်္ဂါတွေဆုံးရှုံးခဲ့ကြတယ်။ တစ်ချို့က အသက်ပေးခဲ့ကြတယ်။ တောထဲမှာရခဲ့တဲ့ ငှက်ဖျားလို သေဘေးနီးတဲ့ရောဂါတွေကလည်း တစ်ချို့ရဲဘော်တွေဆိုရင် အခုအထိ စိတ်မူမမှန်တာမျိုးတွေ ခံစားနေရတုန်း။ ရုပ်ပိုင်း၊ စိတ်ပိုင်းခံစားမှုတွေဟာ တစ်ဦးချင်း နည်းမျိုးစုံနဲ့ရှိနေတာ အမှန်။

တစ်ချို့ဆိုရင် ကျန်းမာရေး၊ အိမ်ထောင်ရေး စသဖြင့် အကြောင်းကြောင်းကြောင့် အဖွဲ့အစည်းက ထွက်ခွာခဲ့ပြီး အိမ်နီးချင်းနိုင်ငံတွေက ဒုက္ခသည်စခန်းတွေမှာ ဒါမှမဟုတ် နယ်စပ်မြို့တွေမှာ ရရာအလုပ်လုပ်ပြီး ရပ်တည်နေကြရင်းက ဒီအနှစ် ၂၀ ကျော်အတွင်း မျှော်လင့်တဲ့အခြေအနေတွေထက် မမျှော်လင့်တာတွေကိုပဲ ကြားရမြင်နေကြရတော့ စိတ်ပျက်လက်ပျက်နဲ့ အရက်အလွန်အကြွံသောက်ရင်း အသက်ဆုံးကုန်ကြတာတွေအထိပါ ရှိလာတယ်။ ဒုက္ခသည်စခန်းရောက်ပြန်တော့လည်း အမေရိကန်က ၉-၁၁ (၂၀၀၁ ခုနှစ် စက်တင်ဘာ ၁၁ ရက်နေ့) မှာ ဘင်လာဒင်တို့ရဲ့ လေယာဉ်ပျံနဲ့ အဆောက်အဦတွေကို ၀င်တိုက်တဲ့ စစ်ဆင်ရေးအပြီး Patriot Act ဆိုတဲ့ ဥပဒေကိုထုတ်ပြန်ပြီး အကြမ်းဖက်အဖွဲ့အစည်းစာရင်းထဲမှာ ABSDF ကိုပါ ထည့်ထားတဲ့အတွက် ဒုက္ခသည်စခန်းကနေ တတိယပြည်ပနိုင်ငံတစ်ခုခုကို ဒုက္ခသည်အနေနဲ့ သွားကြမယ့် ကျောင်းသားရဲဘော်တွေဟာ အမေရိကန်နိုင်ငံသာမက တစ်ခြားအနောက်နိုင်ငံတွေကိုပါထွက်ခွာခွင့်တွေ ကြံ့ကြာခဲ့တယ်။ ဒုက္ခသည်စခန်းဆိုတာဟာလည်း ထားရာနေစေရာသွားလို အိမ်နီးခြင်းနိုင်ငံ အာဏာပိုင်တွေရဲ့ပေါ်လစီနဲ့ သဘောထားအတိုင်း နေကြရတာဆိုတော့ တစ်ခါတလေ အကျယ်ချုပ်ကျ နေသလိုခံစားရတဲ့ မွန်းကြပ်မှုတွေရှိနေတာပဲ။ ဆန်၊ ဆား၊ ငါးပိ၊ ငြုပ်သီးလို အခြေခံအစားအသောက် လောက်ပဲ ရာရှင်ရပြီး စခန်းအပြင်မှာလည်း အလုပ်လုပ်ခွင့်မပေးတော့ မြို့ပေါ်ကလာကြတဲ့ ကျောင်းသား သူပုန်တွေအတွက် အခက်အခဲ အတော်ဖြစ်ရတယ်လေ။ 

အနှစ် ၂၀ ကျော် ကြိုးစားဖြတ်သန်းခဲ့ပြီး ဒီမိုကရေစီရေးအတွက် ကိုယ်ယုံကြည်တဲ့လမ်းကြောင်းပေါ်မှာ ရင်ဆိုင်ဖြတ်သန်းလာကြတဲ့အခါ ဘယ်သူဘယ်ဝါကြောင့်ဘဲဖြစ်ဖြစ် လွတ်လပ်ပြီးတရားမျှတတဲ့စနစ် ပေါ်ထွန်းလာမယ် အဲဒါတွေလက်တွေ့ဖြစ်လာမယ်ဆိုရင် ကျနော်တို့အားလုံး ကြေနပ်နေပြီးသား။ ငါလုပ်မှ ဖြစ်မှာ ဆိုတဲ့ ‘ငါ’စွဲက အများအကြိုးအတွက်လုပ်တဲ့နေရာမှာ မကောင်းဘူး။ ထားလည်း မထားသင့်ဘူး။ အများအကြိုးအတွက်ဆိုရင် ‘ငါမှ’ ဆိုတာကြီးကို လွှင့်ပစ်ခဲ့။ တကယ့်  စေတနာမှန်နဲ့လုပ်တဲ့ အလုပ်ရဲ့ ရလဒ်ကောင်းကို တွေ့ရမယ်လို့ ယုံကြည်တယ်။

ကြည့်လေ… ကျနော်တို့တော်လှန်ရေးမလုပ်ခင်ကတည်းက ကျနော်တို့ထက် အပင်ပန်းခံခဲ့တဲ့သူ အမတော်၊ နောင်တော်တွေ ရှိနေပြီးသား။ စစ်အာဏာရှင်စနစ်အောက်က လွတ်မြောက်ဖို့တိုက်ပွဲဝင်ရင်း နည်းမျိုးစုံနဲ့ ကျနော်တို့ထက် စွန့်စားခဲ့သူတွေ၊  ကျနော်တို့ထက် ပေးဆပ်ခဲ့ရသူတွေ တပုံတပင်ရှိနေခဲ့သလို ရှစ်လေးလုံး အရေးတော်ပုံကနေ အခုအချိန်အထိ ရုပ်ပိုင်းဆိုင်ရာ၊ စိတ်ပိုင်းဆိုင်ရာ ထိခိုက်ခံစားနေရတဲ့သူ တွေဟာ တိုက်ပွဲဝင်ရဲဘော်တွေတွင်မဟုတ်ဘူး၊ သူတို့ရဲ့မိသားစုဝင်တွေအထိ ရိုက်ခတ်ခဲ့တာတွေ မြန်မာပြည်အနှံ့ နေရာတိုင်းမှာရှိနေတယ်။ ဒါဟာ လက်နက်ကိုင်တော်လှန်ရေးလုပ်တဲ့သူတွေချည့်မဟုတ်၊ လက်နက်မဲ့ အကြမ်းမဖက် ဆန့်ကျင်လှုပ်ရှားခဲ့တဲ့ရဲဘော်တွေနဲ့ မိသားစုဝင်တွေပါ အားလုံးပါတယ်။ ကျနော့ရဲ့ဖြတ်သန်း မှုဆိုတာ ကြမ်းတမ်းတဲ့ဖြတ်သန်းမှုထဲက အမှုန်အမွှားတစ်ခုပါပဲလေ။ ကိုယ်ဖြစ်ချင်တာကို ကိုယ်လုပ်ကြ တယ် ဆိုပေမယ့် ရိုက်ခတ်မှုမျိုးစုံကြောင့် မွန်းကြပ်မှုနဲ့ စိတ်ဒဏ်ရာတွေကတော့ ကျနော်တို့ကြားထဲမှာ အနည်းနဲ့အများ ခံစားကြရတာပါဘဲ။


တောသားမြို့ရောက်

တောထဲမှာ နှစ်တွေအများကြီးနေလာခဲ့ပြီးမှ အရေးပေါ်လိုအပ်ချက်အရ ရုံးလုပ်ငန်းတွေအတွက် ဘန်ကောက် နိုင်ငံခြားရေးဌာနက ဆင့်ခေါ်လို့ ဘန်ကောက်ကို မျက်စေ့သူငယ်နဲ့ သွားရတယ်။ နယ်စပ်မြို့ရုံး ခွဲက ရဲဘော်တစ်ယောက်က ကားပေါ်တင်ပေးလိုက်တော့ ခပ်တည်တည်နဲ့ စီးသွားပြီး ချင်းမိုင် (ဇင်းမယ်) ကိုရောက်တယ်။ အဲဒီမြို့မှာ တာဝန်ကျနေတဲ့ နောက်ထပ်ညီငယ်တစ်ယောက်က ကျနော့ကို ‘၀ီရ’ ဆိုတဲ့ ထိုင်းနာမည်တစ်လုံးကောက်ပေး၊ ကားလက်မှတ်ဝယ်ပြီး ကားပေါ်တင်ပေးလိုက်တယ်။ အဲဒီနေ့က ဘာသာရေးနေ့ဆိုလား၊ ထိုင်းဘုရင့်အခမ်းအနားနေု့ဆိုလား သူကပြောသေးတယ်။ အဲဒီလိုနေ့မျိုးတွေ လမ်းမှာ အစစ်အဆေးနဲတယ်ဆိုပဲ။ သူပြောတာမှန်တယ်။ လမ်းမှာ ကားရပ်ပေးရပြီး စစ်တာဆေးတာတွေ မရှိဘူး။

ပြဿနာက ကားပေါ်မှာ ထိုင်းစကားလုံးဝမတတ်တဲ့ ကျနော် ခုံမှာဝင်ထိုင်လိုက်ပြီး မကြာပါဘူး၊ ယူနီဖောင်း ၀တ်ထားတဲ့ ကားဝန်ထမ်း ကောင်မလေးချောချောတစ်ယောက်က ကျနော့ကို ဘာတွေမှန်းမသိလာမေးပါ လေရော။ ကျနော်ကနားမလည်တော့ အူကြောင်ကြောင်နဲ့ ရယ်ပြနေလိုက်၊ ဘာမှန်းမသိ တခဗ်ခဗ်နဲ့ (ဟုတ်ကဲ့) လိုက်လုပ်လိုက်ပေါ့။ နောက်တော့ သူက ကျနော်ထိုင်နေတဲ့ ခုံအောက်ကိုလက်ညှိုးထိုးပြီး တစ်ခုခုရှာ စေချင်တဲ့ပုံပေါက်တော့ ကျနော်ဆတ်ကနဲ ထိုင်ရာကထလိုက်တယ်။ အောက်မှာ အနီရောင် အ၀တ်ထုတ် ကွေးကွေးလေးတစ်ခုကိုကျနော် ဖင်ခုထိုင်ထားမိတာကိုး။ သူက အဲဒါကိုတွေ့ပြီဆိုတော့ တခစ်ခစ်နဲ့ သဘောကျနေတယ်။ ကျနော့လက်ထဲကို ပြန်ထည့်ပေးတယ်။ ကျနော့အတွက် ကားထိုင်ခုံ နောက်မှာ စောင်ပါးလေး တစ်ထည်လည်းရှိတယ်လို့ သူပြတယ်။ အိုကေပေါ့။ ကျနော် ဘေးပတ်ဝန်းကျင်ကို လိုက်ကြည့်တော့ ကားထွက်ခါနီး လူတွေတစ်ချို့က စောင်တွေကိုခြုံထားကြပြီ။ အထဲမှာ aircorn (လေအေး စက်) ဖွင့်ထား တော့အတော်လေးအေးတယ်။ ကျနော့လက်ထဲက အထုတ်နီလေးကို တခြားလူတွေကော ဘယ်နေရာမှာ သုံးပါလိမ့်လို့စူးစမ်းတော့ လားလား… သူတို့က လည်ပင်းနောက်မှာ ပတ်ထိုးပြီး ခေါင်းအုံး ထားကြတာတွေ့ရတော့မှ ကျနော်လည်း ကားပေါ်ကနောက်မှီရင်းခေါင်းအုံးလို့ရတဲ့ ခေါင်းအုံးမှန်းသိပြီး သူတို့လို ခေါင်းအုံးပြီး အိပ်လိုက်သွားတော့တယ်။ အေးဗျာ… တောကျပုံများ။ ခေါင်းအုံးကို ခေါင်းအုံးမှန်း မသိ။

ဘန်ကောက်ကို ကားဆိုက်တော့ ကားပေါ်က ထွက်ပြီး လာကြိုမယ့် သူကိုထွက်ရှာတယ်။ မတွေ့တာနဲ့ ကားဂိတ်အပြင်က အများသုံးတယ်လီဖုန်းရုံကနေ ရုံးကိုဖုန်းဆက်တယ်။ ရုံးကတစ်ယောက်က သွားကြိုတယ်လေ.. ဆိုတာနဲ့ ကျနော် ကားဂိတ်ထဲပြန်ရှာတယ်။ ဘယ်သူ့ကိုမှ မတွေ့ဘူး။ မတွေ့လိုက် ဖုန်းရုံကိုပြန်သွားလိုက်နဲ့ နောက်ဆုံးရုံးကလူက ခင်ဗျားအခုရောက်တဲ့နေရာမှာ နေနေ။ ကျနော် သွားကြိုတဲ့ ရဲဘော်ကိုစီးကို ပြောလိုက်မယ်တဲ့။ အဲဒီလို ခြေငြိမ်ငြိမ်နေလိုက်တော့မှ လာကြိုတဲ့ကိုစီးနဲ့ တွေ့ရတော့ တယ်။ သူကလည်း ကျနော့ကို လိုက်ရှာနေတာ ၁ နာရီလောက်ရှိပြီတဲ့။ တော်သေးတာပေါ့… ဆက်ပြီး ဟိုရွှေ့ဒီရွှေ့လုပ်နေရင် အဲဒီည ကားဂိတ်က တန်းလျှားတစ်ခုပေါ်မှာ ညအိပ်ရဖို့ရှိမလားပဲ။


ဆ၀ါဒီ

‘ဆ၀ါဒီ’ဆိုတာက ထိုင်းလို မင်္ဂလာပါလို့ပြောတာလေ။ ထိုင်းလူမျိုးတွေက ‘ဆ၀ါဒီ’လို့ပြောရင် လက်အုပ်ချီပြီး ပြောနှုတ်ဆက်ကြတယ်။ ဒါက တစ်နိုင်ငံလုံးမှာတွေ့ရတဲ့ ယဉ်ကျေးမှု။ လက်အနေအထားကလဲ အထက် အောက် ဆက်ဆံရေးဆိုတာမျိုးရှိတယ်။ လက်အုပ်ကို နှာခေါင်းနားအထိချီပြီး ဆ၀ါဒီလုပ်ရင် တစ်ဘက်ကို တစ်ဘက် လေးစားမှုကိုပြတာ။ စပြီး နှုတ်ဆက်တဲ့သူတိုင်း ဒီလိုဘဲ ဆ၀ါဒီလုပ် နှုတ်ဆက်ကြတယ်။ အဲ.. ကိုယ့်ထက်ငယ်တဲ့သူကို ပြန်ပြီးနှုတ်ဆက်တော့ ရင်ဘတ်လောက်မှာပဲ လက်အုပ်ထားပြီး ပြန်နှုတ်ဆက် ကြတယ်။ ရာထူးအကြီးအငယ်ဆိုရင်လည်း ဒီလိုပါဘဲ။ အငယ်တွေက စပြီး လက်အုပ်ချီနှုတ်ဆက် လေ့ရှိကြတယ်။ ဘုရားရှိခိုးတာမျိုးဆိုရင် နဖူးလောက်ရောက်တာရှိတယ်။ ဘုရားရှိခိုးတာဆိုတော့ ဆ၀ါဒီလို့ မပြောတော့ဘူးပေါ့။

အဲဒါကို အထာမသိလို့ အူကြောင်ကြောင်ဖြစ်ခဲ့ရတဲ့ အသိရဲဘော်တစ်ယောက်ရှိတယ်လို့ ကိုစီးက ပြော ခဲ့ဘူးတယ်။ အဲဒီကျောင်းသားက ဘန်ကောက်ကိုရောက်တော့ ဟိုသွားဒီသွားလေး လျှောက်သွားကြည့် တာပေါ့။ ဖြစ်ချင်တော့ သူကတစ်ရက် မြို့လည်ခေါင်က မဟာပိန္နဲနတ်ကွန်းရှေ့မှာ လမ်းကို မျက်နှာမူပြီး မတ်တတ်ရပ်နေတယ်။ ဟိုဖက်လမ်းက ကူးလာတဲ့ ထိုင်းလူမျိုးတွေက မဟာပိန္နဲနတ်ရုပ်ထုရှေ့ရောက်တော့ ခနရပ်လက်အုပ်ချီပြီးမှ သွားချင်တဲ့ဖက်ဆက်သွားကြတယ်။ အမှန်က မဟာပိန္နဲနတ်ကို ရှိခိုးကြတာ။ သူက လူတစ်အုပ်ဖြတ်လာလိုက် သူ့ကို ဆ၀ါဒီလာ လာလုပ်နေတော့၊ ထိုင်းလူမျိုးတွေ အတော်ယဉ်ကျေးကြ တာပဲလို့ ထင်သွားတယ်။ အဲဒါအပြင် သူက ငါက ဒီအတိုင်းရပ်နေရင်တော့ ရိုင်းသလိုဖြစ်နေမယ် ဆ၀ါဒီ ပြန်လုပ်ဦးမှလို့ အတွေးဝင်ပြီး နောက်ထပ် လူတစ်အုပ်ဖြတ်လာပြီး လက်အုပ်ချီနေကြတဲ့အချိန်မှာ သူက လက်အုပ်ချီပြီး ‘ဆ၀ါဒီခဗ်’ ပြန်လုပ်လိုက်တယ်။ ဟိုလူတွေက နတ်ကိုရှိခိုးနေတာကို ရှေ့တည့်တည့်က ရပ်နေပြီး ဆ၀ါဒီလာလုပ်နေတဲ့ သူ့ကို ဘယ်လိုအူကြောင်ကြောင်နဲ့ ငနာတစ်ကောင်က လာနောက်နေ ပါလိမ့်ဆိုတဲ့အကြည့်တွေနဲ့ ကြည့်သွားတာ ခံရပါလေရော။


ထိုင်းရဲ

ထိုင်းတွေက ယူနီဖောင်း ၀တ်ရတာကို အတော်လေးကြိုက်ကြပုံရတယ်။ သူတို့နိုင်ငံက ကျောင်းဆရာယူနီ ဖောင်း ၀တ်ထားတဲ့သူတွေကို မအူမလည်နဲ့ မြို့ရောက်လာတဲ့ တောသားကျောင်းသားတွေက ရဲမှတ်ပြီး လှည့်ပတ်ပြီး ပြေးနေကြတာ ခဏခဏပဲ။ ဟုတ်တယ်လေ။ ထိုင်းကျောင်းဆရာတွေရဲ့ ယူနီဖောင်းပုခုံးမှာ အပွင့်တွေအခက်တွေတောင် ပါတတ်သေးတယ်။ ယူနီဖောင်းကိုလည်း ဖစ်ဆိုဒ်ဝတ်ရတာ သဘောကျပုံ ရတယ်။ တစ်ချို့စစ်သားတို့ ရဲတို့ဆိုရင် ၀တ်ထားတာ ကောက်ညှင်းထုတ်ကြီးတွေ ထောင်ထားသလိုဘဲ။ အဲဒါက အရေးမကြီးဘူး ရဲအဖမ်းခံရပြီး ပြည်နှင်ဒဏ်ပေး၊ မြန်မာပြည်ပြန်အပို့ခံရလို့ကတော့ အရည်ခွံ အနွှာခံရမှာ။ ထိုင်းတွေကြားထဲမှာ ခပ်တည်တည်နဲ့ ထိုင်းလိုလိုဘာလိုလို အယောင်ဆောင်နေကြပေမယ့် အဖမ်းခံရရင်တော့ မနဲရှင်းရတယ်။ အထူးသဖြင့် ပိုက်ဆံကုန်တာပေါ့။

နယ်စပ်မှာတုန်းက မဲ့စရိယင်းရုံးကနေ မဲဆောက်ကို အသိရဲဘော်တစ်ယောက်ကို လွှတ်လိုက်တယ်တဲ့။ မသွားခင် ရုံးက အတွေ့အကြုံရှိတဲ့သူတွေက လမ်းမှာ ဘယ်သူဘဲ ဘာမေးမေး ‘ပိုင်မဲဆောက်’ လို့သာပြော လို့ သင်လိုက်ကြတယ်။ ‘ပိုင်’ ဆိုတာက သွားတယ်/သွားမယ် လို့အဓိပ္ပါယ်ရတယ်။ မဲဆောက်ကို သွားမယ်ပေါ့။ အဲဒီ ကံဆိုးတဲ့ရဲဘော်က သူစီးလာတဲ့အမိုးနဲ့ ပစ်ကပ်လိုင်းကားကို ရဲတားပါလေရော။ အဲဒီတော့ ရဲက မေးတယ်။ “ပိုင်နိုင်” (ဘယ်လဲ)၊ သူက “ပိုင်မဲဆောက်” (မဲဆောက်ကိုသွားမယ်)။ အဟုတ်သား။ နောက်ထပ်ရဲက ဆက်မေးတယ်။ “မားကျပ်နိုင်” (ဘယ်ကလာလဲ) သူကတော့ “ပိုင်မဲဆောက်”ပေါ့။ “ဘတ်မီမိုင်” (လက်မှတ်ရှိလား) – “ပိုင်မဲဆောက်”။ “ချု့အလိုင်” (နာမည် ဘယ်လိုခေါ်လဲ) လို့ရဲကမေးတော့လည်း သူက “ပိုင်မဲဆောက်”ချည့်ပြောနေတော့။ ရဲက သဘောပေါက်ပြီး ကားပေါ်ကဆွဲချပြီးဖမ်းထားလိုက်ပါလေရော။ ဟုတ်သားဘဲလေ။ သူသိတာက ပိုင်မဲဆောက် တစ်လုံးထဲပဲ ဟာ။ နောက်ကနေ မနဲလိုက်ပြီး ပိုက်ဆံနဲ့လိုက်ထုတ်လိုက်ရတယ်တဲ့။

ထိုင်းရဲတွေထဲမှာ တစ်ချို့က အကြံအဖန်လုပ်ကြတယ်။ သူ့နိုင်ငံထဲကို တရားမ၀င် ရောက်နေတဲ့သူကို တွေ့ရင် ငွေညှစ်တတ်ကြတယ်။ ဒီတစ်ယောက်ကတော့ ထိုင်းစကားနည်းနည်းပါးပါးတတ်တယ် သူ့ကို ရဲက ဘတ်စ်ကားဂိတ်မှာ ကားစောင့်နေတုန်း ဖမ်းတယ်။ တောင်းပန်လို့မရဘူး။ ရဲကလည်း ကားဂိတ်မှာ တခြားကားစောင့်နေကြတဲ့ ထိုင်းလူမျိုးတွေရှိနေတော့ အလုပ်ဖြစ်မှာမဟုတ်တဲ့အတွက် သူ့ဆိုင်ကယ်နောက်ကို အတင်းတက်ခိုင်းတယ်။ လမ်းမှာ ရဲက ဆိုင်ကယ်မောင်းရင်းက ဘတ်ငွေ ၂ သောင်း (ဗမာငွေနဲ့ ခြောက်သိန်းနီးပါး) ပေးရင်လွှတ်ပေးမယ်ပြောတယ်။ သူက ပိုက်ဆံမရှိဘူးလို့ ထိုင်းရဲကိုပြော တယ်။ အဲဒါကနေ တစ်သောင်း၊ တစ်သောင်းကနေ ငါးထောင် လျော့သွားလိုက်တာ နောက်ဆုံးစိတ်တို နေတဲ့ထိုင်းရဲက ဆိုင်ကယ်ရပ်ပြီး နှစ်ရာတော့ပေးကွာတဲ့။ အဲဒါကို သူက ဘောင်းဘီထဲလက်နှိုက်ပြီး လက်ထဲမှာ ထွက်လာတာက ၂၀ တန်တစ်ရွက်။ ဒါဘဲရှိတယ်တဲ့။ အဲဒါနဲ့ ထိုင်းရဲက ဆဲပြီး ဆိုင်ကယ်မောင်း ထွက်သွားဖို့လုပ်နေတုန်း အဖမ်းခံရတဲ့ငနဲက အကိုရယ် ကျနော့ကို အရင်က ကားဂိတ်နေရာကို ပြန်ပို့ပေးပါ ကျနော် အိမ်ပြန်ဖို့လမ်းစားရိတ်က အဲဒီကားဂိတ်ကနေ အိမ်အထိ ၂၀ ပဲကုန်မှာ ပိုက်ဆံအတိဖြစ်နေလို့။ အခုက အကိုခေါ်လာလို့ ကျနော် အဝေးကြီးရောက်နေပြီ။ အိမ်အထိပြန်စရာလမ်းစားရိတ်မရှိတော့ဘူးလို့ ရဲကိုအသနားခံတော့ ကိုရွှေရဲလည်း ထပ်ဆဲပြီး ပိုက်ဆံနှစ်ဆယ်ထုတ်ပေးခဲ့တယ်တဲ့။ ကျနော်သိသလောက် ကျနော်တို့အထဲက ထိုင်းရဲဆီက ပြန်ပြီးပိုက်ဆံရတာ အဲဒီပုဂ္ဂိုလ်ပဲရှိမယ်ထင်တယ်။

တောင်ပိုင်း ထားဝယ်စစ်ဒေသက ရဲဘော်တစ်ယောက်ကျတော့ ရုံးကို ဖြတ်သွားဖြတ်လာ ၀င်တည်းခိုရင်း လမ်းထိပ်ထွက်ပြီး ဟိုဝယ်ဒီဝယ်ဝယ်နေတုန်း အဖမ်းခံရတယ်။ အဲဒါ သူက ရဲကို သူတစ်ယောက်ထဲမဟုတ် ဘူးဆိုပြီး ရုံးကိုခေါ်လာခဲ့လို့ တရုံးလုံး ဒုက္ခရောက်ပါလေရော။ အဲဒါမှ ငွေ ၂ သောင်းလောက်ထွက်သွားတာ။ 


ခွန်ဖိလစ်ပင်းအတုများ

ထိုင်းနိုင်ငံထဲမှာ ဖိလစ်ပိုင်လူမျိုးတွေလဲရှိတယ်။ သူတိုက မြန်မာတွေနဲ့တူကြပြီး များသောအားဖြင့် တရားဝင် အလုပ်လာလုပ်ကြတယ်လို့ သိကြတော့ တစ်ချို့မြန်မာတွေက ဖိလစ်ပိုင်နိုင်ငံသားယောင်တွေ ဆောင်နေကြ တာရှိတယ်။ ထားဝယ်ဖက်က ရဲဘော်မျိုးသိန်းတစ်ယောက်လား၊ ဘိုးရဲလား ဘန်ကောက်ကိုရောက်တုန်း စာရွက်စာတမ်းတွေကို ကော်ပီကူးတဲ့ဆိုင်မှာသွားကူးရင်း ဆိုင်ကကော်ပီကူးပေးတဲ့ ကောင်မလေးကို အင်္ဂလိပ်လိုပြောပြီး စာရွက်ကူးလေရဲ့။ တစ်ခါနှစ်ခါဆိုတော့ ကောင်မလေးက အင်္ဂလိပ်လိုပြောတဲ့သူ့ကို ဘယ်နိုင်ငံကလဲလို့ မေးတယ်။ သူက ဖိလစ်ပိုင်နိုင်ငံသားလို့ အင်္ဂလိပ်လိုဖြေတော့ ကောင်မလေးက ၀မ်းသာအားရနဲ့ “I’m Philiphine too, I am very happy to meet you here.” (ကျမလဲ ဖိလစ်ပိုင်နိုင်ငံသူပဲလေ။ အကို့ကို ဒီမှာလာတွေ့ရတာ ၀မ်းသာလိုက်တာ) တဲ့။ သွားပါလေရော။ အဲဒီတော့မှ သူက မြန်မာနိုင်ငံသား ဖြစ်ကြောင်းပြောပြီး ညာမိတာတောင်းပန်ခဲ့ရတော့တယ်။

နောက်တစ်ယောက်က လူကြီးထဲက အသိတစ်ယောက်။ ကျနော်တို့ ဘတ်စ်ကားအတူစီးပြီး နယ်စပ်ကနေ ဘန်ကောက်ကို ပြန်တက်ဖြစ်ကြတုန်း ကျနော်နဲ့ ကိုစီးက နောက်ကနှစ်ခုံတွဲ ထိုင်ခုံတွေမှာထိုင်တယ်။ အဲဒီအကိုကြီးက အရှေ့က နှစ်ယောက်ခုံရဲ့ ပြူတင်းပေါက်နဲ့ကပ်ရက်ခုံရတယ်။ ဖြစ်ချင်တော့ အသံ အော်ကျယ်အော်ကျယ်နဲ့ အသက် ၅၀ ကျော် ထိုင်းအမျိုးသမီး၀၀ကြီးတစ်ယောက် တက်လာပါလေရော။ ခုံနံပါတ်လိုက်ရှာရင်း သူ့ဘေးကခုံမှာ ကျတယ်ဆိုတာသိသွားတယ်။ ခရီးသွားဖော်ရပြီဆိုပြီး တို့အကိုကြီးကို ပဋိသန္တာရ စကားစပါလေရော။ ကျနော်တို့လူကြီး အကိုကြီးလဲ ပထမတော့ ခဗ်၊ ခဗ် (ဟုတ်ကဲ့၊  ဟုတ်ကဲ့) ပေါ့။ နောက်တော့ အမျိုးသမီးကြီးက ထိုင်းလူမျိုးမဟုတ်ဘူးလားလို့ ထိုင်းလိုမေးတော့ သူက “I am Philiphine.” (ကျနော်ဖိလစ်ပိုင်လူမျိုးပါ) လို့ အင်္ဂလိပ်လိုပြောလိုက်တယ်။ အဖွားကြီးက အင်္ဂလိပ်လိုနဲနဲရ တယ်။ သူက ဘေးက ခရီးသွားထိုင်းတွေကိုပါ ဟယ်… ဒီမှာ ဖိလစ်ပိုင်နိုင်ငံသားတစ်ယောက်ပါလားလို့ ထိုင်းလိုလှည့်ပြောလိုက်သေးတယ်။ ဘေးက လူတွေလည်း အဖွားကြီးရဲ့ ဆူဆူညံညံအသံကြောင့် ၀ိုင်းပြီး ဂရုစိုက်လာတယ်။ အဲဒီမှာ အမျိုးသမီးကြီးက တစ်ခုနှစ်ခုဆက်မေးပြီး ထိုင်းသံနဲ့ “ယို.. စပိ.. အင်းဂစ်… ၀ဲလီးကု” You speak English. Very good. “အိုင်… စပိ.. အင်းဂစ်…. နော့.. ၀ဲလီးကု” I speak English. Not very good. ရှင်က အင်္ဂလိပ်စကားပြောတာကောင်းတယ်။ ကျမ အင်္ဂလိပ်လိုပြောတာ မကောင်းဘူးပေါ့လေ။ ကျနော်ပြုံးဖြစ်သွားတယ်။ အဲဒီအချိန်မှာဘဲ သူက ခုံမှာထိုင်ရင်း ခုံကိုနောက်ကို လှန်လို့မရလို့ ကူပြီးခလုတ်လေးဆွဲပေးပါဦးလို့ တို့ကိုကြီးကို အကူအညီတောင်းတော့ သဘောကောင်းတဲ့ တို့ကိုကြီးကလည်း ဟိုဘက်ကနေ အမျိုးသမီး၀၀ကြီးအပေါ်ကကျော်ပြီး ခလုတ်ဆွဲပေးလိုက်တာ ထိုင်ခုံက ၀ုန်းကနဲနောက်ကိုလန်ကျလာပြီး ကျနော်တို့ရဲ့ ဇတ်လိုက်ကျော် အကိုကြီးက ဟို၀၀အဖွားကြီးအပေါ် ထပ်ရက်ဖြစ်ကုန်ရော။ တစ်ကားလုံး ၀ိုင်းရီလိုက်ကြရတာ။ နောက်က ထိုင်နေတဲ့ ကျနော်တို့ မနဲကို တခွိခွိနဲ့ ရီနေတာကို အရှိန်သတ်ရတယ်။

နောက်တစ်ယောက်ကျတော့ နာမည်ပါတွင်တယ်။ သူလည်း လူကြီးထဲက အကိုကြီးတစ်ယောက်ပဲ။ သူကတော့ ရုံးကရဲဘော်တွေနဲ့ တစ်ညနေ လမ်းပေါ်က ထမင်းဆိုင်တစ်ခုမှာ စုပြီးထိုင်စားသောက်နေ ကြတယ်။ အဲဒီအချိန်မှာ ကလေးတစ်ယောက်က ဆ၀ါဒီခဗ်ဆိုပြီး လက်အုပ်လေးချီပြီးလိုက်တောင်း နေတယ်။ အဲဒီအထိ ပြဿနာမရှိသေးဘူး။ သူတို့ကလည်း အမှတ်တမဲ့ ဗမာလို စားရင်းသောက်ရင်း ပြောနေကြတယ်။ ကလေးက သူတို့စားပွဲနားရောက်လာပြီးတောင်းတော့ တစ်ယောက်က လက်ခါပြတယ်။ ကလေးကမသွားဘူး အဲဒီတော့ ကိုရှမ်းက ကလေးကိုသွားဖို့ ထိုင်းလိုပြောတော့ ကလေးက “ဦးတို့က ဗမာတွေလား” တဲ့။ အကိုကြီးလည်း ဆတ်ကနဲ ကလေးဖက်ကိုလှည့်ပြီး ဗမာလို “ငါတို့က ဗမာမဟုတ်ဘူး။ ခွန်ဖိလစ်ပင်းတွေကွ” တဲ့။ ကောင်းရော။ အဲဒါ နောက်ပိုင်းအဲဒီအကိုကြီးကို ခွန်ဖိလစ်ပင်းကြီး၊ ခွန်ဖိလစ်ပင်း ကြီးနဲ့ မကြားတကြား ရဲဘော်တွေက နောက်ပြီးခေါ်ကြတယ်။ သူကတော့ ကြိုက်ပုံမရဘူးပေါ့။



အိမ်ရှင်ကောင်းများ

နောက်ပိုင်း ကျနော် ဘန်ကောက်နဲ့ အသားကျလာတယ်။ သမိုင်းထဲမှာ ထိုင်းလူမျိုးတွေအတွက် အမျိုးသား ရေးစိတ်ဓာတ်မြှင့်တင်ဖို့ ပြောကြတဲ့အခါ လွန်ခဲ့တဲ့နှစ်ပေါင်းများစွာက သူတို့ကိုအနိုင်ယူလွှမ်းမိုးခဲ့တဲ့ မြန်မာ လူမျိုးတွေကို ပြန်ပြောကြပေမယ့် အများစုက ဧည့်သည်ကို ကူညီလိုတဲ့စိတ်ထားရှိကြတယ်။ သူတို့က အရမ်းကို အေးအေးဆေးဆေးနေကြတဲ့သူတွေပါဘဲ။ ကိုယ်က အိမ်နီးနားချင်းတွေကို ဆူပူနှောက်ယှက်တာ မျိုးမရှိဘူးဆိုရင် သူတို့ကလည်း ကိုယ့်ကို ဘာအနှောက်အယှက်မှ မပေးကြဘူး။ လူကောင်းတွေအဖြစ် လက်ခံပြီး ဆက်ဆံကြလေ့ရှိတယ်။

ကျနော်တို့ ဘန်ကောက်ရုံးဆိုတာက နှစ်ထပ်တိုက်ခန်းတွဲတွေမှာ ငှားပြီးရုံးဖွင့်ရတာ။ ကျနော်တို့ဘေးအိမ်က အစိုးရက လူကြီးတွေ၊ ဘုရင့်အသိုင်းအ၀ိုင်းတွေထွက်ရင် လိုက်ပြီးစောင့်လျှောက်ပေးရတဲ့ နောက်ဖက်မှာ ၀ိုင်ယာလက်စ် မီးလုံးဆင်ထားတဲ့ ဆိုင်ကယ်အဖြူရောင် အကြီးကြီးနဲ့ ယဉ်ထိမ်းရဲကြီးတပ်ကြပ်ကြီး တစ်ယောက် သူ့မိသားစုနဲ့အတူနေတယ်။ ပထမတော့ ကိုယ်က ထိုင်းစကားမတတ်တော့ ခပ်ရှောင်ရှောင် နေပေမယ့် လမ်းမှာတွေ့တိုင်း သူကစပြီးပြုံးပြနှုတ်ဆက်တော့ ပြန်နှုတ်ဆက်ရင်း ကျနော်နဲ့ ရင်းနှီးလာတယ်။ သူက ညနေပိုင်းမိတ်ဆွေတွေနဲ့ သူ့အိမ်ရှေ့မှာ ဘီယာသောက်တဲ့အခါ ကျနော့ကို ဘီယာတစ်ခွက်လာတိုက် လေ့ရှိတယ်။

နောက်ပိုင်းရင်းနှီးလာတော့။ ပတ်ဝန်းကျင်နဲ့ ခပ်ကင်းကင်းလိုဖြစ်နေကြတဲ့ ကျနော်တို့ကို သူ့ကိုမစိုးရိမ်ဖို့နဲ့ သူက ကျနော်တို့ ဘာတွေလဲဆိုတာတော့မသိဘူး၊ အိမ်ထဲမှာချိတ်ထားတဲ့ အန်တီစုပုံကိုတွေ့တော့ ကျနော် တို့က ဒေါ်အောင်ဆန်းစုကြည်ရဲ့လူတွေပဲလို့ သူနားလည်တယ်။ အေးအေးဆေးဆေးနေကြတော့ ကျနော်တို့ ကိုလူကောင်းတွေလို့ သူကသတ်မှတ်တယ်။ လိုတဲ့အကူအညီရှိရင် ပြောပါ၊ ကူညီပါ့မယ်တဲ့။ ကျနော်ရောက် ခဲ့တဲ့ အိမ်နီးချင်းနိုင်ငံတွေမှာ အရာရှိတွေ၊ အစိုးရ၀န်ထမ်းတွေကအစ အန်တီစုကို သိပ်ပြီး ချစ်ခင်လေးစား ကြတယ်။ ထိုင်းနိုင်ငံမှာ ရဲဝန်ထမ်းအားလုံး ယူနီဖောင်းတစ်ရောင်ထဲဝတ်ကြတယ်။ ဦးထုတ်အဖြူဆောင်း ထားရင် ယဉ်ထိမ်းရဲ၊ ဦးထုတ်ရွှေရောင်ဆောင်းထားရင် ရိုးရိုးရဲလို့သိကြတယ်။ ရွှေရောင်ဦးထုတ်ဆောင်းတဲ့ရဲ ကို ရွှေဂေါင်းပြောင်တွေလို့လည်း ကျနော်တို့ အလွယ်ခေါ်ကြတာရှိတယ်။

ကျနော်တို့လမ်းကြားလေးကနေ တစ်နေရာရာကိုသွားဖို့ လမ်းထိပ်ကို အမိုးပါတဲ့ ပစ်ကပ်လိုင်းကားတွေကို ငါးဘတ်ပေးပြီးစီးထွက်ကြရတယ်။ နောက်တော့ သူနဲ့ကြုံရင် ဘယ်သွားမလဲ လမ်းထိပ်ကိုလမ်းကြုံစီးဖို့ သူ အမြဲလိုခေါ်တယ်။ ကျနော်တွင်မဟုတ်ဖူး ကျနော်တို့ ရုံးက ဘယ်သူဖြစ်ဖြစ် သူ့ရဲ့ ဆိုင်ကယ်ကြီးနောက်က လိုက်စီးပြီး လမ်းကြုံလိုက်ဖို့ ခေါ်လေ့ရှိတယ်။ အပြင်က သူပြန်လာလို့ လမ်းထိပ်မှာ ကျနော်တို့ကိုတွေ့ရင် လည်း သူက သူ့အိမ်ဘေးမှာပဲနေကြတဲ့ ကျနော်တို့ကို သူ့ဆိုင်ကယ်နောက်က တင်ခေါ်ပြီးပြန်တယ်။ သိပ် သဘောကောင်းတဲ့လူပါ။ ရဲတွေ ဖမ်းတာဆီးတာများနေတဲ့အချိန် သူ့ဆိုင်ကယ်နောက်က ကျနော်တို့ကို ဘယ်သူမှ မစစ်ဆေးဘူး။ ပိုပြီးတော့လည်း လုံခြုံတာပေါ့။

တစ်ရက် ကျောင်းသားတပ်မတော် ၆၀၁ စခန်းက ဖိုးရဲက မြို့ထဲကပြန်လာပြီး မိုးပျံတံတားတစ်ဖက်ကနေ ဆင်းလာတာကို တာဝန်ပြီးလို့ အိမ်ပြန်ရင်း လမ်းထိပ်မှာ စားစရာဝယ်နေတဲ့ ရဲကြီးကတွေ့တော့ လက်ရပ် လှမ်းခေါ်တယ်။ သူဆိုင်ကယ် နဲ့လိုက်ခဲ့ဖို့ပေါ့။ အဲဒါကို ငနဲသားဖိုးရဲက သူ့ကိုဖမ်းဖို့စောင့်နေတဲ့ ရဲလို့ထင်ပြီး တံတားပေါ်ပြန်တက်ပြေးသွားလို့ ရဲကြီးက တဟားဟားနဲ့ လာပြောပြတာ မှတ်မိနေသေးတယ်။

ကျနော်နောက်ပိုင်း အပြင်တွေကို အဖွဲ့အစည်းရဲ့ အလုပ်ကိစ္စတွေနဲ့ စထွက်ဖြစ်လာတယ်။ ထိုင်းကျောင်းသား သမဂ္ဂတွေရဲ့အကူအညီနဲ့ မြန်မာကျောင်းသားတွေ၊ အတိုက်အခံတွေလုပ်တဲ့ အခမ်းအနားတွေ၊ အစည်း အဝေးတွေကို တက်ရတယ်။ ကိုယ့်အဖွဲ့အစည်းကထုတ်ဝေတဲ့ ဒေါင်းအိုးဝေနဲ့ အင်္ဂလိပ်ဘာသာနဲ့ထုတ်တဲ့ Dawn မဂ္ဂဇင်းတွေကို နိုင်ငံတကာဖြန့်ချိဖို့ စာတိုက်ကနေပို့ရတယ်။ တစ်ရက် ကျနော်စာတိုက်က ပြန်လာပြီး ဘတ်စ်ကားဂိတ်ကိုရောက်တော့ ဘောင်းဘီဘေးအိတ်ကို လက်နှိုက်ပြီး ငွေအကြွေစေ့တွေရှိမရှိစမ်းကြည့် တော့ မရှိတာနဲ့ ဘောင်းဘီနောက်အိတ်က သူငယ်ချင်း သိန်းထိုက်ဦးလက်ဆောင်ပေးထားတဲ့ သရေပိုက်ဆံအိတ်ကိုစမ်းကြည့်တော့ မရှိတော့ဘူး။ ဟာ… ဘယ်ရောက်သွားရတာလဲ။ ပိုက်ဆံအိတ်ထဲမှာ ရုံးကငွေတွေ ဘတ်နှစ်သောင်းဝန်းကျင်လောက် ထည့်ထားသေးတယ်။ ကျနော် စာအုပ်တွေပို့တော့ စာတိုက်ဝန်ထမ်းရှေ့က ကောင်တာမှာ ပိုက်ဆံအိတ်တင်ပြီးပေးခဲ့တာ သတိရတာနဲ့ ချက်ခြင်း စာတိုက်ကို ပြန်ပြေးရတယ်။ ဟိုရောက်တော့ ကျနော် ၀န်ထမ်းကို အင်္ဂလိပ်လို ပိုက်ဆံအိတ်တွေ့မိလားလို့ မေးတယ်။ သူက သိပ်ပြီး အင်္ဂလိပ်လိုနားမလည်ပေမယ့် နောက်ပိုင်းကျတော့ ကျနော်ဘာရှာနေလဲဆိုတာ သဘော ပေါက်ပြီး ကျနော့ပိုက်ဆံအိတ်ကို သိမ်းထားတဲ့သူ့အံဆွဲထဲကနေ ဒါလားဆိုပြီး ပြန်ထုတ်ပေးတယ်။ ကျနော် အရမ်းဝမ်းသာသွားတယ်။ အဖွဲ့အစည်းပိုင်ငွေလေ။ အချုပ်ကျတာကအရေးမကြီးဘူး၊ တစ်သက်လုံး နာမည် ပါပျက်ဦးတော့မလို့။ သူ့ကိုကျေးဇူးတင်တဲ့အကြောင်း အကြိမ်ကြိမ်ပြောပြီး စားစရာတစ်ခုခုလိုက်စားပါလို့ ခေါ်တော့ သူကအေးအေးဆေးဆေးပြန်ကြည့်ပြီး ကိစ္စမရှိပါဘူးတဲ့။ ကျနော် ပိုက်ဆံအိတ်ပျောက်လို့ ခေါင်းနားပန်းကြီး နေရတဲ့ကိစ္စက အဲဒီလူကောင်းကြောင့် သက်သာရာရတော့တာပေါ့။ ကျနော့ အတွက်လည်း ကိုယ့်ပေါ့ဆမှုအတွက်ကိုယ် သင်ခန်းစာရတယ်။


လူမျိုးနဲ့ သမိုင်း

မြန်မာတွေကို မုန်းကြတဲ့ ထိုင်းတစ်ချို့ ရှိပေမယ့် အများစုကတော့ ကောင်းကြပါတယ်။ ဒါကလည်း တစ်ဦး ချင်း သဘောထားနဲ့ အတွေးအပေါ်ဖြစ်လာတာ။ ပတ်ဝန်းကျင်နဲ့လည်း ဆိုင်တာပေါ့။ တစ်ချိန်က စစ်ဘုရင် တွေရဲ့ ဘုန်းလက်ရုံးတွေကို မှတ်ကျောက်အနေနဲ့ အာဏာဖြန့်ကြက်ဘို့ စစ်တိုက်ကြရင်း လူတွေရဲ့ကြားမှာ အမုန်းတွေကို ထားခဲ့တယ်။ အခုအချိန်အထိ မြန်မာပြည်မှာ တစ်ချို့က ဗြိတိသျှဆိုတဲ့ အင်္ဂလိပ်လူမျိုးတွေကို မုန်းနေသလိုပေါ့။

တကယ်တော့ ကျနော်တို့အခုမြန်မာတွေဟာ ဟိုးလွန်ခဲ့တဲ့ နှစ်လေးငါးရာလောက်က ထိုင်းနိုင်ငံရဲ့ မြိုတော် အယုဒ္ဓယကို သွားတိုက်ခဲ့တဲ့ မြန်မာတွေမဟုတ်ကြတော့သလို ဒီနေ့အင်္ဂလိပ်တွေကလည်း လွန်ခဲ့တဲ့ ၁၈၈၅ ခုနှစ်လောက်က နှစ်တရာလောက် ကိုလိုနီလုပ်ပြီး အုပ်ချုပ်သွားကြတဲ့ ဗြိတိသျှအင်္ဂလိပ်တွေ မဟုတ်ကြ တော့ပါဘူး။ ကျနော်နားလည်တာက သမိုင်းဆိုတာ ရှိရမယ်။ လေ့လည်း လေ့လာကြရမယ်။ အဲဒီသမိုင်းက ကျနော်တို့ သင်ခန်းစာယူရမယ်။ သက်ဦးဆံပိုင်ဘုရင်စံနစ်တွေက လုပ်ရပ်တွေကို ကိုယ့်ဦးနှောက်နဲ့ကိုယ် ကောင်းမကောင်းဆုံးဖြတ်ရမယ်။ ကောင်းတာတွေကို ယူကြမယ်။ မကောင်းတာတွေကိုလည်း ထားခဲ့ကြ ရမယ်။ အလုပ်တိုင်းမှာ အကျိုးဆက်ရှိတယ်။ အဲဒီအကျိုးဆက်တွေက ကိုယ့်နိုင်ငံနဲ့ အနာဂတ်မျိုးဆက် အတွက် ကောင်းမကောင်းစဉ်းစားပြီး လက်ရှိလူဖြစ်နေကြတဲ့ ကျနော်တို့ သမိုင်းရေးကြရမှာပဲ။ ကိုယ့်နိုင်ငံနဲ့ ကိုယ့်လူမျိုးကိုချစ်တဲ့ မျိုးချစ်ဖြစ်တာကောင်းပါတယ်။ ကိုယ့်လူမျိုးပဲကောင်းစားပြီး တခြားလူမျိုးတွေကို သွားပြီးထိခိုက်မယ့် မျက်ကန်းမျိုးချစ်တွေ မဖြစ်ကြဘို့လည်းလိုတယ်။

ကျနော့အဖေရဲ့ဖခင် ကျနော့ဘဘက ကျနော့ကို မှတ်လောက်သားလောက်ပြောသွားတဲ့စကားကို ကျနော် အမြဲနားထဲမှာ စွဲနေတာရှိတယ်။ “လူတိုင်းမှားတတ်တယ်။ လုပ်ရင်မှားမှာမကြောက်နဲ့။ နောက်တစ်ခါမမှား အောင် ဂရုစိုက်။ ဒါပေမယ့် အမှားတစ်ခုထဲကိုပဲ သုံးခါနဲ့ သုံးခါထက်ပိုပြီး အကြိမ်ကြိမ်ကြူးလွန်တယ်ဆိုရင် မင်းဟာ သောက်တုံး” တဲ့။

xxxxxxxxx
                                                                                                                             ဆက်ပါမည်...

ကျောင်းသားသူပုန်တို့ရဲ့ ခရီးရှည်အမှတ်တရ (အပိုင်း-၁၂)

by Myat Thu on Wednesday, February 13, 2013 at 8:58am ·

ဘန်ကောက်နေ့များ

ကျနော်တို့ရဲ့ ဒေါက်တာနိုင်အောင်ဦးဆောင်တဲ့အဖွဲ့နဲ့ ကိုမိုးသီးဇွန်ဦးဆောင်တဲ့အဖွဲ့ပြန်ပေါင်းထုတ်တဲ့ ၁၉၉၆ ခုနှစ် ပေါင်းစည်းရေးညီလာခံဖြစ်တော့ ကျနော်အတော်လေး ပျော်တယ်။ အလံတစ်လက်ထဲအောက်မှာ အဖွဲ့က နှစ်ဖွဲ့ဖြစ်နေတယ်ဆိုတော့ အပဲ့နဲ့သွားနေရတဲ့သဘောဖြစ်တော့ မကြိုက်တာအမှန်။ အဲဒါတွေက လည်း အကြိမ်ကြိမ်တွေ့ဆုံဆွေးနွေးမှုက ရလာတဲ့ရလဒ်။ နောက်ပြီး ကျောင်းသားတွေရဲ့ လက်နက်ကိုင် တော်လှန်ရေးမှာ အတွေးအခေါ်အယူအဆကြောင့်၊ ဒါမှမဟုတ် ပုဂ္ဂိုလ်စွဲ အုပ်စုစွဲကြောင့်ဖြစ်ဖြစ် နှစ်ချမ်းကွဲ တဲ့အချိန်မှာ အရင်တတိယအကြိမ်ညီလာခံရဲ့ ဖွဲ့စည်းပုံအခြေခံဥပဒေအတိုင်း စစ်ရေး၊ နိုင်ငံရေးဦးတည်ချက် တွေကို နှစ်ဘက်စလုံးက ဆက်ကိုင်စွဲထားပြီး အချင်းချင်းသွေးထွက်သံယိုမရှိ ပြန်ပြီးစုစည်းနှိုင်တာကတော့ ဂုဏ်ယူစရာတစ်ခုပါ။  

ဘန်ကောက်ရုံးကို အရင်ကိုမိုးသီးတို့အဖွဲ့က ရုံးတာဝန်ခံ ချင်းလူမျိုး ကိုထီးလာတွဲတယ်။ သူက ရိုးရိုး အေးအေးသမား။ အလုပ်ကိုလည်း ကြိုးစားတယ်။ အဖွဲ့ထဲမှာ အထက်ပိုင်းခေါင်းဆောင်တွေရဲ့ လုပ်ဟန် တစ်ချို့ ဇောက်ထိဇောက်ထိုးဖြစ်နေတာလေးတွေကို ကျနော်တို့ ဝေဖန်ရေးလုပ်နေကြတုန်း ကိုထီး တက်တက်ကြွကြွဆွေးနွေးဝေဖန်မှုတွေကို နဲနဲမျက်စေ့နောက်လာတဲ့ ရဲဘော်ကျော်သူရက “ဟေ့လူ။ ခင်ဗျားက ရဲဘော်တွေ၊ ရဲဘော်တွေလို့ ခနခနပြောရအောင် သစ္စာအဓိဌာန်တောင် ခင်ဗျားမှတ်မိလို့လား” လို့ထချဲတဲ့ပုံနဲ့ နောက်ပြီးမေးတယ်။ ကိုထီးက “ဘာဖြစ်လို့မမှတ်မိရမှာလဲ။ ကျနော်ဆိုပြမယ်။ ကျွန်ုပ်တို့ သည်…” တဲ့။ ကျနော်တို့အားလုံး ၀ါးကနဲသဘောကျသွားတယ်။ တကယ်က ကျနော်တို့ ကျောင်းသား တပ်မတော်ရဲ့ သစ္စာအဓိဌာန်က “ငါတို့သည်…” နဲ့စရမှာ။ ကိုထီးက မြို့ပေါ်တာဝန်တွေနဲ့ နှစ်ကြာနေတော့ မေ့နေတာလေ။ ကိုထီးလည်း အမေရိကန်နိုင်ငံမှာတဲ့။ တစ်ခါတော့ ဖုန်းအဆက်အသွယ် ရလိုက်သေးတယ်။

ကိုယ်ရောက်ကာစကမှတော်သေးတယ်။ ဘန်ကောက်မှာ နောက်ပိုင်းရောက်လာတဲ့ ရဲဘော်တစ်ယောက်ဆို ဘန်ကောက်ကိုရောက်နေပြီ။ သူ့ကိုလာကြိုပါဆိုတော့ ကျနော်တို့လည်း ခင်ဗျားအခုဘယ်နေရာရောက်နေ လဲလို့ သူ့ကိုပြန်မေးတယ်။ သူက ဘေးပတ်ဝန်းကျင်ကိုလှည့်ကြည့်ပြီး ဆဲဗင်းအလဲဗင်း 7-11 ရှေ့မှာတဲ့။ အဲဒီ ဆဲဗင်းအလဲဗင်းဆိုတာက အစားအသောက်နဲ့ ပေါ့ပါးတဲ့လူသုံးကုန်ပစ္စည်းလေးတွေရောင်းတဲ့ စတိုးဆိုင်လေးတွေ။ နေရာတိုင်းလိုလိုမှာရှိတယ်။ လမ်းတိုင်းလိုလို၊ ရပ်ကွက်တိုင်းလိုလိုမှာရှိနေတာ။ သူ့ကို ဘယ်လို လိုက်ရှာလို့ရတော့မလဲ။ နောက်မှ… အဲဒီအနားဝန်းကျင်က ဆဲဗင်းအလဲဗင်းကလွဲပြီး တစ်ခြား ထူးထူးခြားခြား အဆောက်အဦတို့ နေရာတို့ပြောခိုင်းပြီး ခက်ခက်ခဲခဲသွားကြိုပေးခိုင်းရတယ်။

တစ်ရက် ဘတ်စ်ကား စီးနေရင်း နောက်ကပါလာတဲ့ အမျိုးသမီးတစ်ယောက်မောင်းတဲ့ကားက ကိုယ်စီးလာ တဲ့ ဘတ်စ်ကားကိုနောက်က၀င်ဆောင့်တယ်။ ဒုံးကနဲ… ကျွီး.. ကနဲ အားလုံးက ဘာဖြစ်တာလဲလို့ နောက်လှည့်ကြည့်ကြတယ်။ ဘတ်စ်ကားလည်းရပ်သွားတယ်။ အောက်ဆင်းကြည့်ကြတော့ နောက်ကားက ခေါင်းချိုင့်နေပြီး မူးဝေနေတဲ့ အမျိုးသမီးက ဒယိန်းဒယိုင်ထွက်လာတယ်။ ပတ်ဝန်းကျင်က ၀ိုင်းကူတဲ့သူတွေ လည်းရှိတယ်။ ခနနေတော့ ကျနော်လည်း ဟိုလိုလိုဒီလိုလိုနဲ့ လမ်းလျှောက်ပြီး လစ်ထွက်ခဲ့တယ်။ တော်နေ ရဲတွေရောက်လာပြီး မေးနေစမ်းနေတာအရေးမကြီးဘူး။ မျက်မြင်သက်သေလိုက်လုပ်ရရင် ကိုယ်က ထိုင်း လိုလည်းမတတ် ဘာမတတ်နဲ့။ ပိုရှုပ်နေဦးမယ်ဆိုပြီးပေါ့။ ကိုယ့်ကားမှပဲ လာဖြစ်ရလားလို့လည်း စဉ်းစားမိ သေးတယ်။

၁၉၉၇ ခုနှစ်လောက်မှာ ကိုတိုးက ခင်ဗျား ရုံးထဲမှာချည့်အောင်းမနေနဲ့ အပြင်လေးဘာလေးလဲ ထွက်ဦး လို့ခေါ်လို့ ခပ်လန့်လန့်နဲ့အပြင်ထွက်ဖြစ်တယ်။ ရမ်ကမ်ဟမ်တက္ကသိုလ်ရှေ့မှာ ကားဆိုက်တော့ ကားပေါ်က ဆင်းကြတယ်။ အငယ်လေးက အဲဒီအချိန်က ဘန်ကောက်က အင်တာနေရှင်နယ်ကျောင်းတစ်ခုမှာ စီးပွားရေးဘာသာနဲ့ စာသင်နေတာဆိုတော့ သူကထိုင်းစကားလည်း အများကြီးရတယ်။ ထိုင်းကျောင်းသား သမဂ္ဂက ကျောင်းသားတွေကိုလည်းသူသိတယ်။ ကျောင်းရှေ့မှာ ထိုင်းကျောင်းသားကျောင်းသူတွေက စက္ကူ ပုံးလေးတွေကိုင်ပြီး လမ်းသွားလမ်းလာတွေကို အလှူခံနေကြတယ်။ အ၀တ်အစားဟောင်းတွေကို လည်း လူတစ်ချို့လာပြီးလှူနေကြတာတွေ့ရပြန်တယ်။ ကျနော်မေးကြည့်တော့ မြန်မာနိုင်ငံကရင်ပြည်နယ်ဖက်က စစ်ပြေးဒုက္ခသည်တွေကို သူတို့ကိုယ်တိုင်သွားလှူမလို့တဲ့။ လက်ကိုင်စပီကာလေးနဲ့ ထိုင်းကျောင်းသူ ကလေးက “ငါတို့အိမ်နီးချင်းနိုင်ငံမှာ စစ်အစိုးရကြောင့် စစ်ဒဏ်ခံရပြီး ထွက်ပြေးဒုက္ခရောက်ကြတဲ့ အိမ်နီး ချင်းနိုင်ငံသားတွေကို ကိုယ်တိုင်သွားပြီးကူညီကြမှာဖြစ်ပါတယ်။ ဒါက ကူညီခွင့်ကြုံတုန်း ကူရတာပါ။ သူတို့ အစိုးရမကောင်းလို့ ဒီလိုဖြစ်နေတုန်းအခွင့်ရတုန်းကူထားကြ။ ကိုယ့်နိုင်ငံမှာလည်း အဲဒီလိုမကြုံရဘူးလို့ မပြောနှိုင်ဘူး။ အခုဒို့ကူညီထားရင် နောင်.. ကိုယ့်အလှည့်ရောက်ရင်လည်း သူတို့ပြန်ကူညီချင်စိတ်ရှိလိမ့် မယ်။ လှူကြ ပါ။ လှူကြပါ။”  ဘာညာနဲ့ပေါ့။ ကျနော်သူတို့တတွေ ကိုယ့်လူမျိုးအရေးကို စာနာစိတ်နဲ့ လုပ်နေကြတဲ့သူတို့ကို လေးစားသွားတယ်။ ကျနော်တို့က သူများအကြောင်းထက် ပဋိပက္ခဖြစ်နေတဲ့ ကိုယ့် အသိုင်းအ၀ိုင်း အကြောင်းကိုပဲ တောက်လျှောက်ပြောဖြစ်နေကြတဲ့လူတွေမဟုတ်လား။   

မြန်မာနိုင်ငံလုံးဆိုင်ရာကျောင်းသားများဒီမိုကရက်တစ်တပ်ဦး All Burma Students’ Democratic Front (ABSDF) အဖွဲ့အစည်းရဲ့အောက်မှာ လိုအပ်ချက်အရ အဖွဲ့ငယ်တွေတိုးဖွဲ့ကြတော့ ကျောင်းသားအကူညီပေး ရေးအဖွဲ့ Student Relief Committee (SRC) ဆိုတာကိုလည်း ထောက်ပံ့ရေး၊ လူမှုဖူလုံရေးနဲ့ အကူအညီ ပေးရေးအတွက် တိုးချဲ့ဖွဲ့စည်းခဲ့တာရှိတယ်။ အဓိကတာဝန်က နိုင်ငံတကာအဖွဲ့အစည်းတွေ၊ အစိုးရမဟုတ် တဲ့အကူအညီပေးအဖွဲ့ NGO တွေနဲ့ တိုက်ရိုက်ဆက်ဆံပြီး ရဲဘော်တွေရဲ့ စားရေရိက္ခာနဲ့ စောင်၊ ခြင်ထောင်၊ အ၀တ်အစား၊ ဆေးဝါးတို့လို မရှိမဖြစ်လိုအပ်တဲ့အကူအညီတွေကို လက်ခံပြီး အဖွဲ့ကိုထောက်ပံ့ရတာ။ အဲဒီတုန်းက အဲဒီအဖွဲ့မှာတာဝန်ယူခဲ့တဲ့ ကိုကျော်မိုးရဲ့ SRC ဆောင်ပုဒ်ကလည်း မှတ်သားစရာ။ ‘Give. Good.’ ‘No give. No good.’ တဲ့။ “ပေးရင် ကောင်း၏… မပေးရင် မကောင်း” တဲ့ဗျား။

၁၉၉၈ သြဂုတ်လ (၈) ရက်နေ့မှာ ၈၈၈၈ ဆယ်နှစ်မြောက် နှစ်ပါတ်လည်အတွက် ဘန်ကောက်သံရုံးရှေ့ ဆန္ဒပြပွဲကိုလည်း ABSDF အနေနဲ့ စုစည်းလုပ်ဆောင်ခဲ့ကြသေးတယ်။ အဲဒါက ၁၉၈၈ အရေးတော်ပုံကို အဖြိုခွဲခံခဲ့ရအပြီး ဖွဲ့စည်းခဲ့တဲ့ နယ်စပ်အခြေစိုက် ကျောင်းသားလက်နက်ကိုင်တော်လှန်ရေးအဖွဲ့အစည်း အနေနဲ့ ပထမဆုံးအကြိမ် မြို့ပေါ်ဆန္ဒပြပွဲမှာပြန်ပါလာခဲ့တာလို့ပြောရရင် မမှားဘူး။ ဘန်ကောက်မှာ လှုပ်ရှား နေကြတဲ့ ကျောင်းသားနဲ့ တိုင်းရင်းသားအဖွဲ့အစည်းတွေ၊ ထိုင်းကျောင်းသားတွေ၊ ထိုင်းအင်န်ဂျီအို NGO တွေနဲ့ နီးနီးကပ်ကပ် ပိုပြီး ဆက်ဆံဖြစ်ခဲ့တယ်။ သံရုံးရှေ့က ရက်ရှည်ဆန္ဒပြပွဲတစ်ခုလည်း ဖြစ်ခဲ့တယ်။

ဘင်္ဂလားဒေ့ရှ်


အဲဒီနှစ်ထဲမှာပဲ ကျနော်အနောက်ဖက်ဒေသ ဘင်္ဂလားနိုင်ငံဒက္ကားမြို့တော်က ရုံးခွဲကို တာဝန်ကျတော့ ခရီး  ထွက်ရပြန်တယ်။

လေယဉ်ဘီးလှိမ့်ပြီးထွက်တော့ ဘန်ကောက်မြို့ကိုကြည့်ပြီး စိတ်ထဲမှာ လွမ်းသလိုလိုပါပဲ။ တကယ်တော့ ကျနော်တို့မြန်မာလူမျိုးတွေက အနေကြာလာရင်ခင်တွယ်တဲ့သဘောရှိကြတယ်လေ။ လူပဲဖြစ်ဖြစ်၊ တိရိစ္ဆာန် ပဲဖြစ်ဖြစ်၊ နေရာဒေသဖြစ်ဖြစ်ပေါ့။ တကယ်တမ်းကျတော့လည်း ကျနော်တို့အားလုံးက လူဆန်တဲ့လူသား တွေပါ။ ဒီကိစ္စနဲ့ပါတ်သက်ပြီး အမှတ်တရတစ်ခုရှိတယ်။ ကျနော်တို့ ထိုင်းနိုင်ငံဘန်ကောက်မြို့မှာရုံးအလုပ် တွေနဲ့ တာဝန်ယူရင်း တစ်ချို့အချိန်တွေမှာ ကျနော့အကိုကြီး၊ အမကြီးတွေ အရွယ်လောက် ထိုင်းနိုင်ငံက နိုင်ငံတကာကျောင်းတွေမှာ ကျောင်းဆရာဆရာမ လုပ်နေကြတဲ့သူတွေအပြင် တခြားပညာရပ်ဆိုင်ရာ အလုပ်လာလုပ်ကြတဲ့ မြန်မာလူမျိုးတစ်ချို့နဲ့လည်း ခင်မင်ခွင့်ရခဲ့ကြတယ်။ အဲဒီအထဲမှာ ဆရာမတစ်ယောက် ကမိတ်ဆက်ပေးရင်း ညီအကိုလိုခင်ခဲ့တဲ့အကိုကြီး ကိုသန့်ဆိုတာလည်းပါတယ်။ သူက ထိုင်းကုမ္ပဏီတစ်ခု မှာ အလုပ်လုပ်နေတဲ့ အင်္ဂျင်နီယာလေ။ မြန်မာမယ်ဒလင် တီးတာကိုဝါသနာပါတော့ ကျနော်နဲ့အဖွဲ့ကျသွား တယ်။ သူကမယ်ဒလင်သံလေးတွေစမ်းရင်း သီချင်းလေးတွေစလိုက်ရင် ကျနော်က၀င်ဆိုဖြစ်တယ်။ တစ်ခါ တစ်လေ အကိုနဲ့ညနေစာထွက်စားရင်း သူ့အခန်းမှာပဲ ညအိပ်ဖြစ်တယ်။ တစ်ရက် သူက ကျနော်အိပ်ရာ နိုးလာလာချင်း “ကျနော်ညက ခင်ဗျားအိပ်နေတာကိုကြည့်ပြီး စဉ်းစားခန်းဝင်နေမိတာဗျ။ ခင်ဗျားက လူပုံသွယ်ပေမယ့် အတွင်းစိတ်မာတဲ့ပုံပဲလို့။ ခင်ဗျားနှလုံးသားက အတော်ကြမ်းတမ်းမာကျော တာပဲ” လို့ ကျနော့ကိုပြောတယ်။ ကျနော်က အကိုရာ.. ကျနော်လည်း သူလိုကိုယ်လိုပါဘဲ။ အဲ.. ကျနော် က အကို ပြောသလို အမြဲစိတ်ကြမ်းလူကြမ်း နှလုံးသားကလည်းကြမ်းနေတဲ့လူမဟုတ်ပါဘူး။ ကျနော်တို့ တော်လှန် ရေးသမားတွေဖြစ်လာကြတယ်ဆိုတာ သူများတွေခံစားနေရတဲ့ ဒုက္ခတွေကို ကိုယ့်ဒုက္ခလို အလွယ် ခံစားနှိုင် လို့ သူတို့အတွက်၊ အများအတွက် စွန့်စားပြီး အလုပ်လုပ်ဖြစ်ကျတာလေ။ တကယ်တော့ ကျနော့ နှလုံးသား က ကြမ်းတာမဟုတ်ပါဘူးဗျာ… နူးညံ့လွန်းတာပါလို့ ပြန်ပြောဖြစ်တယ်။ ဟုတ်တယ်လေ ၈၈ အရေးတော်ပုံ ကာလတုန်းက ကျနော့မိသားစုဆွေမျိုးသားချင်းထဲက စစ်တပ်ပစ်သတ်လို့သေခဲ့ရတဲ့လူ တစ်ယောက်မှမရှိ ပါဘူးလို့ ထပ်ပြောဖြစ်တော့။ သူက “ဒါပေမယ့် ခင်ဗျားတို့ နှစ်နဲ့ချီပြီး မိသားစုနဲ့အဝေးမှာ ဒီလောက်အကြာ ကြီးနေနှိုင်တာကိုတော့ မလေးစားပဲ မနေနှိုင်ဘူး” လို့ စိတ်မကောင်းတဲ့မျက်နှာနဲ့ ပြောခဲ့တာမှတ်မိသေး တယ်။

ဒက္ကားလေယဉ်ကွင်းကို လေယဉ်ဆိုက်တော့ လေယဉ်ပေါ်ကဆင်းဆင်းခြင်း လူတွေတစ်ပြုံကြီးတိုးကြိတ်ပြီး စောင့်နေကြတာတွေ့ရတယ်။ လေယဉ်ပေါ်ကဆင်းပြီးလျှောက်တဲ့လမ်းကို အပြင်လူမ၀င်နှိုင်အောင် အထက် နဲ့ ဘေးပတ်လည် သံဇကာတွေကာထားတယ်။ လူကလည်း ရာနဲ့ချီပါ့လား။ မူဆလင်တွေဒီလောက် အများ ကြီးကို ပထမဆုံးတွေ့ဖူးတာ။ သူတို့ကိုကြည့်လိုက်တော့ သူတို့အပြင်ကနေ ၀ိုင်းအော်နေကြတယ်။ လက် လေးတွေလဲဖြန့်လို့။ သူတောင်းစားတွေပါလား။ ကျနော့ကိုလာကြိုတဲ့ ရခိုင်လွတ်မြောက်ရေးပါတီ Arakan Libration Party (ALP) က မိတ်ဆွေက ဟေ့လူ ခင်ဗျား တစ်ယောက်ကို စပြီးပေးကြည့် ကျန်တဲ့လူတွေက သူတို့ကျတော့မရဘူးဆိုပြီး ၀ိုင်းတောင်းနေတာတွေ့ရမယ်။ ဒီမှာဒီလိုပဲတဲ့။ ဒါပေမယ့် အထဲအထိ တစ်ကောက်ကောက်လိုက်ပြီး နှောက်ယှက်လို့မရအောင် သံဇကာတွေ ကာပေးထားတာပဲ ကြေးဇူးတင်ရ သေးတယ်။

အာရှပညာရေးနဲ့ပတ်သက်တဲ့ အစည်းအဝေးတစ်ခုကို အဖွဲ့ကိုယ်စားပြုပြီး သွားတက်ဖြစ်တယ်။ ဆောင်ပုဒ်က “အားလုံးအတွက်ပညာရေး” တဲ့။ ဘင်္ဂလားဒေ့ရ်ှနိုင်ငံက ကျောင်းသားလူငယ်တွေသာမက တခြားအာရှနိုင်ငံက ကျောင်းသားတွေနဲ့လည်း ဆုံဖြစ်တယ်။ ဘန်ကောက်မှာ အာရှကျောင်းသားအစည်း အရုံး Asian Student Association (ASA) ညီလာခံမှာ တွေ့ခဲ့တဲ့ သီရိလင်္ကာနိုင်ငံက မားကာ့စ်တို့လို အာရှ ကျောင်းသားမိတ်ဆွေဟောင်းတွေနဲ့လည်း ပြန်တွေ့ရတယ်။ နီပေါနိုင်ငံကိုယ်စားပြုလာတဲ့ အဖွဲ့က ကျနော့ ထက် လေးငါးနှစ်လောက်ကြီးတဲ့ အမျိုးသမီးက မြန်မာပြည်မှာ ၁၀ နှစ်ကျော်နေဖူးတယ်တဲ့။ မြန်မာလိုလည်း မွတ်နေအောင်ပြောတတ်တယ်။ သူနဲ့ပါတဲ့ တစ်ယောက်နှစ်ယောက်လည်း မြန်မာလိုတတ်ကြတယ်။

တစ်ရက် လမ်းပေါ်မှာ သူတောင်းစားကလေးလေးတစ်ယောက်ကို သနားပြီး ငါးတာကာလောက် ပေး လိုက်မိတာ နောက်က ဘယ်က သူတောင်းစားတွေလဲမသိဘူး အများကြီးထွက်လာပြီး လိုက်တောင်းနေလို့ ထွက်ပြေးခဲ့ရသေးတဲ့အတွေ့အကြုံလည်းရခဲ့သေးတယ်။

လမ်းပေါ်ကိုထွက်ရင်လည်း လူတွေပြည့်ကျပ်နေတာပဲ။ လူတွေကြားထဲမှာ တိုးကြိတ်သွားရသလို သွားရလာရတယ်။ လမ်းပေါ်တွေမှာလည်း အမှိုက်သရိုက်တွေနဲ့ ညစ်ပတ်နေတယ်။ လူနံ့တွေကလည်း မူးတောင်မူးတယ်။ လူတွေများလွန်းလို့ပဲလားမသိဘူး ရာသီဥတုကလည်း အရမ်းကိုပူတယ်။ ထိုင်းနိုင်ငံမှာ အနေကြာခဲ့လို့လားမသိဘူး ကျနော်ရောက်ခါစက အတော်လေးနေသားကျအောင်ကျိုးစားရတယ်။ ဘင်္ဂလားဒေ့ရ်ှနိုင်ငံက မြန်မာနိုင်ငံထက် ငါးဆလောက်သေးတယ်။ ဒါပေမယ့် လူဦးရည်က သန်း ၁၃၀ ကျော်လောက်တောင်ရှိနေတယ်။ ပန်းခြံတွေဟာ နေ့လည်ဖက်မှာ သန့်ရှင်းနေသလောက် ညဖက်ကျတော့ အိမ်မဲ့ရာမဲ့လူတွေတစ်ပြုံကြီး ကိုယ့်ဖျာလေးတွေ၊ ခေါင်းအုံးလေးတွေ၊ စောင်လေးတွေနဲ့ သွားပြီးအိပ်နေကြ တာရှိတယ်။ ကျနော်တို့နိုင်ငံလို တွင်းထွက်ပစ္စည်းတွေဘာတွေရှိတယ်လဲ မကြားဖူးဘူး။ သူတို့နိုင်ငံက နှစ်တိုင်းသဘာဝဘေးအန္တရာယ်ဖြစ်တဲ့ မုန်တိုင်းတိုက်ခံရတာ၊ ရေကြီးတာတွေနဲ့ကြုံရတော့ ကမ္ဘာ့ကုလ သမဂ္ဂရဲ့အကူအညီနဲ့ပဲ ရပ်တည်ရတာ။

ဈေးတွေဆိုင်တွေမှာ မိန်းမတွေထက် ယောင်္ကျားတွေချည့်လိုလို ဈေးရောင်းနေကြတယ်။ မူဆလင်နိုင်ငံ ဆိုတော့ ဘာသာရေးတင်းကြပ်ထားတဲ့အနေအထားရှိပြီး မိန်းမတွေက ခေါင်းမြီးခြုံနေကြတာများတယ်။ ကျနော်နေတဲ့အိမ်ရဲ့ ဘေးအခန်းတွေမှာ အိမ်ထောင်ရှင်မိသားစုတွေရှိကြတယ်။ အိမ်ဘေးကလူ တစ်ယောက်ဆိုရင် သူအပြင်မှာအလုပ်သွားလုပ်ရင် အခန်းထဲမှာ မိန်းမကို သော့ပိတ်ထားခဲ့တယ်။ ပြီးတော့ သူပြန်လာတော့မှ သူတံခါးဖွင့်ဝင်တယ်။ ကျနော်က ဒါမျိုးတွေ ဒီမှာ ဘယ်နှစ်ယောက်ရှိမလဲလို့စဉ်းစားပြီး အရေးဟဲ့အကြောင်းဟဲ့ မီးလောင်ရင် ဒုက္ခပဲလို့တွေးမိတယ်။ မြန်မာနိုင်ငံမှာ မိန်းမတွေအနှိမ်ခံရတာ ဘာဟုတ်မလဲ ဒီမှာကပိုဆိုးသေးပါလားပေါ့။

သူတို့နိုင်ငံရဲ့ အနိုင်ရပါတီဖြစ်တဲ့ အ၀ါမီလိပါတီခေါင်းဆောင် ၀န်ကြီးချုပ် ရှိတ်ဟာဆီနာ ဆိုတာ အမျိုးသမီး။ သူ့ ဖခင်က တစ်ချိန်က မိသားစုဝင်တွေနဲ့အတူ လုပ်ကြံသတ်ဖြတ်ခံခဲ့ရတာ။ အဲ အတိုက်အခံပါတီ ခေါင်းဆောင် ဘင်္ဂလားဒေ့ရ်ှနေရှင်နယ်လစ်ပါတီ BNP က ခေါင်းဆောင် ခါဒီဒါဇီယာဆို တာလည်း အမျိုးသမီးပဲဆိုတော့ အဲဒါက အမျိုးသမီးတွေခွဲခြားခံရတယ်ဆိုတဲ့အသိုင်းအ၀ိုင်းမှာ အထူးခြားဆုံးဖြစ်နေ ပြန်ရော။ သူတို့နှစ်ယောက်စလုံး ရွေးကောက်ပွဲနိုင်တဲ့သူ အစိုးရလုပ်ကြတာပေါ့။ ကျနော်ရောက်တဲ့အချိန် တုန်းက ရှိတ်ဟာဆီနာက ၀န်ကြီးချုပ်ပေါ့။ သူ့ရဲ့ ပါတီကိုထောက်ခံတဲ့ ကျောင်းသားအဖွဲ့ရဲ့ခေါင်းဆောင် ကနေတစ်ဆင့် ဒေါ်အောင်ဆန်းစုကြည်ကိုသူထောက်ခံကြောင်းနဲ့ ဒေါ်စုလူတွေဖြစ်တဲ့ ဒီမိုကရေစီရေး လှုပ်ရှားနေကြတဲ့ ကျနော်တို့ကို ကြိုဆိုတယ်၊ လိုအပ်တာရှိရင်လည်း ပြောပါလို့ သတင်းပါးလာတယ်။

ကျနော်က ရခိုင်အဖွဲ့တွေနဲ့ ဒက္ကားမှာ အများဆုံးတွဲဖြစ်ခဲ့ပြီး တစ်ခါတစ်လေ စစ်တကောင်းဖက်မှာလည်း ချင်းအမျိုးသားတပ်ဦး CNF ကရဲဘော်ခေါင်းဆောင်တွေနဲ့ မကြာမကြာဆုံဖြစ်ကြတယ်။ ကျနော်ဘာအခက် အခဲရှိရှိ ALP နဲ့ CNF က အကူအညီတွေကိုရခဲ့တာပါပဲ။ ဒက္ကားကိုလည်း CNF ခေါင်းဆောင်တစ်ချို့ လာတတ်ပါတယ်။ သူတို့ခေါင်းဆောင်တွေကလည်း ၈၈ မျိုးဆက်တွေများပါတယ်။

ဘင်္ဂလားဒေ့ရ်ှကျောင်းသားအုပ်စုတွေကိုတော့ အမြဲလိုလိုဆုံဖြစ်တယ်။ ကျနော် ဒက္ကားတက္ကသိုလ်ကိုလည်း မကြာခဏရောက်ဖြစ်တယ်။ ခပ်ဆန်းဆန်းဖြစ်နေတာက နှစ်ပါတီစံနစ်နဲ့သွားနေတဲ့နိုင်ငံမှာ အစိုးရကို ထောက်ခံတဲ့ ကျောင်းသားသမဂ္ဂရယ် အတိုက်အခံကိုထောက်ခံတဲ့ကျောင်းသားသမဂ္ဂရယ်က အဓိက အင်အားဖြစ်တော့။ အတိုက်အခံက အစိုးရဆန့်ကျင်ရေးဆန္ဒပြပွဲလုပ်မယ်ဆိုရင် ဘယ်နေရာတွေမှာလုပ်မယ် လို့ကြိုပြီးအကြောင်းကြားထားတယ်။ အဲဒီနေရာဒေသတွေက ဆိုင်တွေပိတ်ရတယ်။ သုံးဘီးကားလိုကား တွေ မသွားရဘူး။ သွားတဲ့ကားတို့ ဖွင့်တဲ့ဆိုင်တို့ကို ဖျက်ဆီးမီးရှို့ကြတာမျုိးရှိတယ်။ အစကတည်းက ဆင်းရဲ ရတဲ့အထဲ ဆန္ဒတွေခဏခဏပြနေတော့ ပိုမွဲတဲ့အခြေအနေမျိုးကိုရောက်ရောပေါ့လို့ တစ်ချို့ညည်းကြတာ ကြားခဲ့ရတယ်။ အဲ… ဆန္ဒပြပွဲတွေကလည်း ဒီလို.. အတိုက်အခံက အစိုးရကိုဆန္ဒပြမယ်လို့ကျေညာတော့ အစိုးရကလည်း အစိုးရဖက်ကကျောင်းသားတွေကို ဦးဆောင်ပြီး အစိုးရဆန့်ကျင်ရေးသမားတွေကို ဆန္ဒပြ ပြန်တယ်။ ဥပမာ- အတိုက်အခံဖက်က ဆန္ဒပြတဲ့လူ လေးငါးခြောက်ထောင်လောက် လမ်းပေါ်ရောက်ပြီး ကြွေးကြော်ဆန္ဒပြနေတုန်း တခြားဘက်ကနေပြီး အစိုးရကျောင်းသားတွေဦးဆောင်တဲ့ အဲဒီအင်အား လောက် လူအုပ်ကြီးထွက်လာပြီး ဆန္ဒပြတာနဲ့ ထိပ်တိုက်တိုးတော့ အဓိကရုန်းတွေဖြစ်ကုန်ရော။ သေနတ်ပါ ယူလာတဲ့လူတွေကလည်း သေနတ်တွေထုတ်ပြီး ဟိုဖက်ဒီဖက် အပြန်အလှန်ပစ်ကုန်တော့ လူတွေ သေတဲ့ လူသေ၊ ဒဏ်ရာရတဲ့လူရ ဖြစ်ကုန်ကြတော့တာပေါ့။ ငါတို့နိုင်ငံရဲ့ အနာဂတ်နိုင်ငံရေးမှာ ကျောင်းသားတွေ အဲဒီလို အသုံးချခံမဖြစ်စေရဘူးလို့ ခေါင်းထဲမှာထည့်ထားလိုက်တယ်။


ဒက္ကားနေ့တစ်ချို့

ဘင်္ဂလားမှာ မြန်မာ့ဒီမိုကရေစီရေးအတွက် အထောက်အပံ့ဖြစ်မယ့် နိုင်ငံခြားရေးနဲ့ မဟာမိတ်ဆက်ဆံရေး ကိစ္စတွေလုပ်ခဲ့ရတယ်။ ကျနော်နဲ့အတွဲကတော့ ABSDF အနောက်ဖက်ဒေသက ပို့ပေးခဲ့တဲ့ ရဲဘော်မိုးဇော် ပေါ့။ သူက နှုတ်ခမ်းမွှေးထားတယ်။ အဲဒီဘင်္ဂလားကလူတွေက နှုတ်ခမ်းမွှေးတွေနဲ့လူတွေများတော့ ဖက်ရှင် လိုပါဘဲ။ ကျနော်နောက်ပိုင်း နှုတ်ခမ်းမွှေးထားဖြစ်တယ်။ အမှန်က ကိုယ်ကလည်း ရိတ်ရမှာပျင်းတာ တစ်ကြောင်း၊ နှုတ်ခမ်းမွှေးဗလဗြစ်နဲ့ဆိုရင်လည်း ပတ်ဝန်းကျင်က ဘာမှထူးထူးခြားခြား ဂရုစိုက်တာမှ မဟုတ်ပဲဆိုပြီး နေချင်သလိုနေတာကတကြောင်းပေါ့။ သိပ်အရှည်ကြီးအထိတော့မရောက်ပါဘူး။ မနေတတ် လို့ နောက်တော့ ပြန်ရိတ်လိုက်ရတာပါဘဲ။ စားတဲ့သောက်တဲ့အခါ ကိုယ့်နှုတ်ခမ်းမွှေးတွေ ကိုယ်ပြန်စားနေ ရသလိုဖြစ်နေလို့။ ကိုယ့်ဟာကိုယ် စနစ်တကျ ဂရုစိုက်နှိုင်တဲ့အချိန်တော့ ပြန်ထားဖြစ်မလားဘဲ။  

ထမင်းဆိုင်ကဟင်းတွေကလည်း ဘာအရသာမှမရှိဘူး။ ကျနော်တို့ မြန်မာနိုင်ငံကမူဆလင်လက်ရာတွေနဲ့ တခြားစီ။ အဲ… ရှောက်သီးစိတ်ပန်းကန်ရယ်၊ ဆားပန်းကန်ရယ်၊ ငြုတ်သီးစိမ်းတောင့်ကြီးကြီးတွေရယ် ကိုတော့ စားပွဲပေါ်မှာ ကြိုက်သလိုယူစားလို့ရတယ်။ ကိုယ့်ဟင်းကိုယ် ဆားထည့်စားရတာ အဲဒီရောက်တော့ မှလေ။ အဖွဲ့အစည်းက သူများတွေ နိုင်ငံခြားလွှတ်ရင် အမေရိကားတို့၊ ဥရောပတို့ကိုလွှတ်ပြီး နိုင်ငံခြားရေး ရဲဘော်. ငါ့ကျမှ နိုင်ငံခြားဆိုပြီး ဘယ်နေရာကြီးလွှတ်လိုက်တာပါလိမ့်လို့လည်း စိတ်တိုတိုနဲ့ တွေးနေမိသေး တယ်။

လ္ဘက်ရည်ဆိုင်ရှိပေမယ့် သူတို့လ္ဘက်ရည်ဆိုင်ဆိုတာက ကွမ်းယာဆိုင်လောက်ဆိုင်လေးမှာ လ္ဘက်ရည် ရောင်းတာ။ ခွေးခြေတစ်လုံးနှစ်လုံးချထားတတ်တဲ့ဆိုင်တွေတော့ ရှိတယ်။ များသောအားဖြင့် မတ်တတ်ရပ် သောက်၊ ပိုက်ဆံရှင်းပြီး သွားဘဲ။ လ္ဘက်ရည်ဆိုင်ကြီးတစ်ဆိုင်နှစ်ဆိုင်တော့ တွေ့ပါတယ်။

ဘင်္ဂလားနိုင်ငံရဲ့ အဓိကသူပုန်အုပ်စုက ချကမာလူမျိုးသူပုန်အုပ်စုပေါ့။ သူတို့ခေါင်းဆောင်က အစိုးရကို လက်နက်ချထားတော့ ကျနော်ရောက်တဲ့အချိန်က ဘင်္ဂလားဒေ့ရ်ှမှာ ဘာပုန်ကန်မှုမှမရှိတော့ပါဘူး။ ချကမာ ကျောင်းသားတွေကတစ်ဆင့် သူတို့ခေါင်းဆောင်တစ်ချို့နဲ့လည်း ဆုံဖြစ်ခဲ့တယ်။ ချကမာ ဆိုတာက မြန်မာပြည်မှာဆိုရင် ‘သက်’လူမျိုးတွေပေါ့။ ဘင်္ဂလားဒေ့ရ်ှမှာ ချင်း၊ မရမာ (မြန်မာ)၊ မရမာဂရီး (မြန်မာကြီး)၊ ရခိုင်နဲ့ သက်လူမျိုးတွေဆိုရင် လူနည်းစုတွေဖြစ်လို့ သနားကြင်နာရမယ်လို့ လူတွေကနားလည်ကြတယ်တဲ့။ တခြားကျနော်မသိတဲ့၊ မမှတ်မိတဲ့လူမျိုးတွေလည်း ရှိနှိုင်ပါတယ်။

ရခိုင်မိတ်ဆွေတွေရဲ့အဆိုအရ ဘင်္ဂလားနိုင်ငံ အ၀ကျွန်းမှာ အပိုင်စားရတဲ့ ဗိုလ်မင်းကြီးဆိုတာရှိတယ်။ သူတို့ ဟာမြန်မာနိုင်ငံကအနွယ်တွေဖြစ်ကြပြီး ပွဲတွေလမ်းတွေလုပ်ရင်လည်း နန်းဝတ်နန်းစားတွေနဲ့ လုပ်လေ့ရှိတဲ့ အကြောင်းတွေပါသိရတယ်။ ဘင်္ဂလားဒေ့ရ်ှသတင်းစာတစ်ခုမှာလည်း သူတို့ဘာသာရေးအခမ်းအနားတစ်ချို့ နဲ့ မင်းခမ်းမင်းနားတစ်ချို့ကိုတွေ့တော့ အမျိုးသမီးတွေဟာ ထိုင်မသိမ်းတွေနဲ့ဖြစ်ပြီး အမျိုးသားတွေကတော့ ရှေးမြန်မာတွေရဲ့ အ၀တ်အစားတွေနဲ့ ပွဲထွက်ကြတာတွေ့ရဖူးတယ်။ ရှေးဟန်ပန်တွေကို ထိမ်းသိမ်းထားတဲ့ နေရာမို့ ကျနော်မရောက်ခဲ့ပေမယ့် နောင်အခွင့်ရရင် ယဉ်ကျေးမှုတွေကို သွားလေ့လာသင့်တဲ့ နေရာပါ။

ခေါင်းမြီးခြုံ သမီးလေးတွေလေးငါးယောက်ရှိတဲ့ ကျနော့အိမ်ရှင်၀၀ မုတ်ဆိတ်အဖိုးကြီးက တစ်ခါတစ်လေ သူနဲ့ စကားစမည်ပြောဖို့ခေါ်တယ်။ အင်္ဂလိပ်စကား နဲနဲပါးပါးတတ်ပြီး သူကမြို့တော်ရေပေးဝေရေး မြူနီ စပါယ်က လူကြီး။ သူရယ် သူ့အမျိုးသမီးအဖွားကြီးရယ်နဲ့ စကားပြောနေကြတော့ ကျနော့ကို တစ်ယောက်ယောက်ကြည့်နေသလို ခံစားရတော့ ဆတ်ကနဲ့ နောက်ဖက်ကိုလှည့်ကြည့်တော့ ကုလားကာ တွေရဲ့နောက်က ခေါင်းမြီးခြုံလေးတွေကိုတွေ့ရတယ်။ လ္ဘက်ရည်လာချပေးတာတောင် လက်တစ်ဖက်က လုံခြုံအောင် ခေါင်းမြီးခြုံစကို ကိုင်ထားလိုက်သေးတယ်။ နောက်ပိုင်းကျနော်နဲ့ရင်းနှီးလာတော့လည်း သူတို့ ကျနော့ကို သူတို့ဆွေမျိုးလိုဖြစ်လာပြီး အရင်လိုခပ်စိမ်းစိမ်း ခေါင်းမြီးခြုံမထားပဲ ဆက်ဆံကြပါတယ်။ အဖိုးကြီးက ကျနော့ကို သူတို့ဥပုဒ်ကာလ (ရမ်မဒမ်) မှာ ကျနော့ကိုပါ သူတို့နဲ့ ညစာမုန့်ပဲသွားရေစာခေါ်ပြီး ကြွေးလေ့ရှိတယ်။

လမ်းကွေ့မှာ ကွမ်းဆိုင်လေးဖွင့်ထားတဲ့အဖွားကြီးတစ်ယောက်ကို အမား (အမေ) လို့ခေါ်ပြီး စကားပြော တော့ သူကျနော့ကို သားတစ်ယောက်ကောက်ရသလိုခင်တွယ်ပြီး သူ့သမီးအငယ်ဆုံးကိုလွှတ်ပြီး မနက်စာ စားဖို့ ခေါ်လေ့ရှိတယ်။ သူ့မှာလည်း သားသမီး ၁၀ ယောက်လောက်ရှိတယ်။ အိမ်ထောင်ကျတဲ့ သားသမီး တွေကတော့ အိမ်ခွဲနေကြတယ်တဲ့။ အဲဒီလိုစားအိမ်သောက်အိမ်တွေနဲ့ဖြစ်လာတော့ ကျနော့ကို ရခိုင်မိတ် ဆွေတစ်ယောက်က “ဟေ့လူ။ ခင်ဗျားက ဒီမှာလာနေတာ လပိုင်းပဲရှိသေးတယ်။ ဒီတစ်ကျပ်ကို နှစ်ကျပ် ဖြစ်အောင်ပွတ်ပြီး ကပ်စေးနဲတဲ့ ကုလားတွေဆီမှာ စားအိမ်သောက်အိမ်တွေရလို့ပါလား။ ကျနော်တို့ ၁၀ နှစ် နဲ့ချီပြီးနေတာတောင် စားအိမ်သောက်အိမ်မရှိဘူး” လို့ပြောလာတော့ ကျနော်က ပြန်နောက်ပြီး “ကျနော်က ကုလားကိုမှမမုန်းပဲဗျ။ ခင်ဗျားတို့က ကုလားကိုမုန်းတာကိုး” လို့ ပြောဖြစ်သေးတယ်။ တကယ်တော့ ဒက္ကားမြို့တော်က ရခိုင်အိမ်တွေတစ်ချို့က ကျနော့ရဲ့ စားအိမ်သောက်အိမ်တွေပါဘဲ။တကယ့်ကို စောင့်ရှောက်ကြပါတယ်။

ရခိုင်ဒုက္ခသည်ကိစ္စတွေ UNHCR ရုံးမှာ မကြာမကြာလိုက်ပြီး အကူအညီပေးဖြစ်သလို။ ရုံးမှာလည်း မိတ်ဆွေတစ်ချို့ကို ကွန်ပြူတာလေ့လာရေးလုပ်နှိုင်အောင် ရံဖန်ရံခါ သင်ပေးဖြစ်တယ်။ ၁၉၉၈ ကတည်းက ဘင်္ဂလားဒေ့ရ်ှနိုင်ငံမှာ ကွန်ပြူတာနဲ့ပတ်သက်တဲ့ ပစ္စည်းတွေကို ပြည်ပကသွင်းလာရင် အမြတ်တော်ခွန်မယူ ဘူးလို့ ကြေငြာထားခဲ့တယ်။ တကယ်တော့ အိမ်နီးချင်းအန္ဒိယနိုင်ငံသားတွေ ကမ္ဘာမှာ ကွန်ပြူတာပညာရှင် တွေအဖြစ်နဲ့ အလုပ်အကိုင်ကောင်းတွေရနေတဲ့အပေါ် အစိုးရက သူ့နိုင်ငံသားတွေကို ကြိုးစားစေချင်လို့ ဖွင့်ပေးတဲ့သဘောပေါ့။ ဘင်္ဂလားဒေ့ရ်ှနိုင်ငံမှာသုံးတဲ့ငွေ “တာကာ” က ထိုင်းနိုင်ငံမှာသုံးတဲ့ ဘတ်ငွေနဲ့ တန်ဖိုးချင်းသိပ်မကွာပါဘူး။ တာကာကတော့ နဲနဲလောက်နိမ့်မယ်။

ဘင်္ဂလားနိုင်ငံမှာ ကျနော်စိတ်အပျက်ဆုံးက ဗြူရိုကရက်သိပ်ဆံလွန်းတာပဲ။ ကျနော်တို့ ထိုင်းနိုင်ငံမှာတုန်း က ရေဖိုးမီးဖိုးသွားဆောင်ရင် ကိုယ့်ရှေ့မှာတန်းစီနေတဲ့လူတွေများဦး၊ စောင့်ရရင် နာရီဝက်ထက်မကျော်ဘူး။ ဒက္ကားမှာ ဟိုအခန်းက ဟိုအခန်းကိုသွား၊ ဒီပြန်လာနဲ့ ရှုပ်ရှက်ခတ်ပြီး တစ်နေကုန်တယ်။

ကောင်းတာက ပလေကပ်ပုဆိုးဝတ်ပြီးနေလို့ရတယ်။ သူတို့လည်းပုဆိုးပဲဝတ်ကြတာလေ။ သူတို့ပုဆိုးဝတ်ပုံ က ဘုန်းကြီးတွေသင်္ကန်းလိပ်ထားသလိုရှေ့မှာလိပ်ပြီးဝတ်ကြတာ။ ခါးပုံစချပြီးဝတ်တဲ့ပုံမဟုတ်ဘူး။ တစ်ခါ ဆန္ဒပြပွဲရှိလို့ အဲဒီနောက်ကို ကျနော်နဲ့ ကိုမိုးဇော်တို့လိုက်ကြရင်း မတွေ့တော့ လမ်းဘေးက ရဲကို အင်္ဂလိပ် လို သွားမေးတယ်။ ဆန္ဒပြတဲ့လူတွေ ဘယ်ရောက်သွားလဲဆိုတော့ အဲဒီရဲက ပန်းခြံဘက်ကို အော်ဟစ်ပြီး ချီတက်သွားကြတယ်တဲ့။ အဲဒီအပြင်သူက သုံးဘီးကားတစ်စီးကိုတား။ လမ်းညွှန်ပေးပြီး “ဒီလူကြီးလူ ကောင်းတွေကို ပန်းခြံပို့ပေးလိုက်။ ၄၀ ထက်ပိုမယူနဲ့။ ယူလို့ရှိရင် ကျနော့ကို ဒီဖုန်းနံပါတ်ကို တိုင်ပါ” လို့ ကားသမားနဲ့ ကျနော်တို့ကို ဟိုဖက်ဒီဖက်လှည့်ပြောပြီး စာရွက်ပေါ်မှာဖုန်းနံပါတ်ပါ ချရေး ပေးလိုက်သေး တယ်။ အဲ.. ဆိုက်ကားတို့၊ ကားတို့ စီးရင် မသွားခင်ဈေးကတစ်မျိုး၊ ဆင်းရင်ဈေးကတစ်မျိုး ဖြစ်တတ်တယ်။ နဲနဲပိုပို့ပေးရလို့၊ လမ်းက မကောင်းလို့ စသည်ဖြင့် အကြောင်းပြပြီး ညစ်တတ်တာရှိတယ်။ ကိုမိုးဇော်နဲ့ အဲဒီလိုကိစ္စတွေနဲ့ ခဏခဏစကားများ ရန်ဖြစ်လေ့ရှိတယ်။ ကိုမိုးဇော်က ဘင်္ဂါလီလို နဲနဲပါးပါး တတ်တယ် လေ။

ကျနော်ကျတော့ တစ်ရက် အရေးကြီးလို့ သုံးဘီးတက္ကစီစီးပြီးသွားလိုက်တာ လမ်းမှာ သုံးဘီးဆရာက ဂျိန်းစ်ဘွန်းလို ပွတ်ကာသီကာနဲ့မောင်းလိုက်တာ ဘတ်စ်ကားကြီးတစ်စီးနဲ့ ၀င်ပြီးပွတ်မိတာ ကျနော့ တံတောင်လည်း ပွန်းပဲ့ကုန်ရော။ ကျနော်လည်း စိတ်တိုတာနဲ့ အင်္ဂလိပ်လိုထပြီး ဆဲဖြစ်ပါလေရော။ ငနဲက တော့ ဘာမှမဖြစ်သလို ဟဲဟဲဟဲဟဲနဲ့ပေါ့။ ကျနော်သတိကြီးလို့ နို့မို့ လက်ပါပြတ်မှာ။

၁၉၉၉ ခုနှစ် နှစ်စပိုင်းလောက်မှာ တပ်ရင်းကိုယ်စားလှယ်အနေနဲ့ ထိုင်းနယ်စပ်မှာလုပ်မယ့် ABSDF ညီလာခံ ပြန်ပြီးတက်ရဖို့ရှိလာတယ်။ ကျနော်လည်း ထိုင်းဘက်ကို တစ်ခေါက်ပြန်ဖို့ပြင်ဆင်ရတော့တယ်။


ညီလာခံ

၁၉၉၉ ခုနှစ် ဖေဖော်ဝါရီအကုန်လောက်မှာ ပဉ္စမအကြိမ်ညီလာခံကို နယ်စပ်မှာကျင်းပခဲ့တယ်။ ၁၉၉၅ မာနယ်ပလောနဲ့ ဒါးဂွင်အခြေစိုက် ABSDF ဗဟိုဌာနချုပ် ကျအပြီး လုံခြုံရေး၊ လမ်းပန်းဆက်သွယ်ရေးအခြေ အနေတွေအရ ထိုင်းနယ်စပ်ဖက်မှာပဲ ညီလာခံလုပ်ကြရတာ။ မြန်မာနိုင်ငံ အထက်အောက်နယ်စပ် တစ်လျှောက်လုံးက တပ်ရင်းတွေရဲ့ ကိုယ်စားလှယ်စုံညီပြန်ပြီး ကျင်းပဖြစ်တာဖြစ်တဲ့အတွက်လည်း စည်ကားနေတာပေါ့။ နှစ်ဖွဲ့ပြန်ပေါင်းစည်းရေးလုပ်ပြီးတဲ့နောက် ပထမအကြိမ်ပြန်လုပ်ရတဲ့ညီလာခံဖြစ်တော့ ဆွေးနွေးစရာ၊ ငြင်းခုံစရာတွေလည်းများသား။ တစ်ချို့ကိုယ်စားလှယ်တွေက တစ်ယောက်နဲ့တစ်ယောက် “အစ်ရှူး Issue တွေများလာရှင် ဆောင်ထားဖို့ တစ်ရှူး Tissue (တစ်ရှူးစက္ကူ) လေးတွေယူသွား” လို့ နောက်နေကြတာလဲတွေ့ရတယ်။ အကြိတ်အနယ်ဆွေးနွေးပြီး ခံစားချက်တွေဖြစ်လာလို့ မျက်ရည်ကျရင် သုတ်ဖို့ပေါ့လေ။

ကိုယ်စားလှယ်တစ်ဦးဖြစ်တဲ့ ကိုမောင်မောင်ကြီးက အဲဒီအချိန်က မော်ဒန်ကဗျာသမားတွေကိုနောက်ပြီး စပ်ထားတဲ့ ကဗျာကိုလိုက်ရွတ်ပြတယ်။ ဘာတဲ့… “မြ၀တီမင်းကြီးရဲ့ ဒါးသွားပေါ်ကပျားရည်တစ်စက်ဟာ၊ ဒေါ်လတန်ရဲ့ အက်တမ်သီအိုရီပေါ်ပြုတ်ကျတဲ့အခါ…” ဆိုလား။ အဲဒီကဗျာကို အစအဆုံးပြန်ရရင် ကောင်းမယ်။ သူပဲ သင်္ကြန်စာဆိုပြီးရေးခဲ့တာရှိသေးတယ်။ အကြိတ်အနယ် အဖွဲ့အစည်းအတွက် ခေါင်းကိုက်အောင် မနက်ညဆက်တိုက် နေ့တိုင်းဆွေးနွေးနေရပေမယ့် ဒီလိုပေါ့ပါးမှုလေးတွေလည်းရှိ နေသေးတယ်။

တစ်ရက် ကိုဆန်နီက သဘာပတိအလှည့်ကျတယ်။ အတွေ့အကြုံများတဲ့ ရဲဘော်ကြီးတစ်ယောက်က ရှေ့က ရဲဘော်တင်ထားတဲ့အဆိုကို ထောက်ခံဆွေးနွေးနေတယ်။ သူက ကျနော့အနေနဲ့ ရှေ့က ရဲဘော်xxx တင်ပြထားတဲ့အဆိုကို ထောက်ခံဆွေးနွေးရမယ်ဆိုရင်……….. အဲဒါကြောင့်ဖြစ်ပါတယ်လို့အစချီတာပေါ့။ နောက်တော့ ဒါပေမယ့်ဆိုပြီး …. ပြောရင်းပြောရင်း အဲဒီအဆိုကို တဖြည်းဖြည်းကန့်ကွက်လာတယ်။ သူက အဲဒီလိုပဲ အားပါလာရင် ဖြစ်လာပြီဆိုပြီး ကျန်တဲ့ညီလာခံကိုယ်စားလှယ်တွေလည်း ကြိတ်ပြုံးနေတယ်။ ကိုဆန်နီလဲ ဒုက္ခပါဘဲဆိုပြီး… ဟေ့လူ… ခင်ဗျားက ထောက်ခံနေတာလား၊ ကန့်ကွက်နေတာလား လို့ထမေး တော့ သူက ‘ထောက်ခံနေတာပါ’ တဲ့။ ကိုဆန်နီကြီးလဲ မြန်မြန်ပွဲဖြတ်မှရမယ်ဆိုပြီး ‘အိုကေ… ဒါဆိုရင်ရပြီ။ ခင်ဗျားထောက်ခံတာမှတ်တမ်းတင်ထားမယ်… ထိုင်တော့’တဲ့။ ကျန်တဲ့လူတွေလည်း ကျသွားသင့်တဲ့အဆိုမို့ ဟူးကနဲ  သက်ပြင်းဝိုင်းချလိုက်ကြရတယ်။ ဟဲဟဲဟဲဟဲနဲ့ရီတဲ့လူလည်းရီပေါ့။

သူ့အလှည့်ကျရင် သူတင်တဲ့အဆိုကို အရမ်းကို တက်တက်ကြွကြွဆွေးနွေးပြီး သူများဆွေးနွေးနေတဲ့ အလှည့်ရောက်ရင် မောသွားပြီး အိပ်ငိုက်နေတဲ့ တပ်မှူးတစ်ယောက်နှစ်ယောက်လည်းပါတယ်။ မနက်စာ ဗူးသီးနဲ့ အသားနွှင်ထုတ်ထားပြီးအရိုးချည့်ရောင်းတဲ့ ဈေးသက်သာတဲ့ကြက်ရိုးနဲ့ ငပိရည်အဆိပ်တက်နေတာ လည်း ဖြစ်မယ်။ မဲခွဲပြီးဆုံးဖြတ်မှရမယ့်ကိစ္စကို မဲခွဲဆုံးဖြတ်ကြပေမယ့်။ မဲမခွဲသင့်တဲ့ကိစ္စတွေကိုလည်း နောင်ပြန်ပြီး ဆွေးနွေးညှိနှိုင်းအဖြေရှာဖို့ မှတ်တမ်းတင်ထားခဲ့တာတွေလည်း ရှိတယ်။ ဒါတွေက နှစ်ဖက် ‘ရန်’သဘောဆောင်နှိုင်တဲ့ ကိစ္စတွေလိုမျိုးတွေပေါ့။ မိုးသီးလူ၊ နိုင်အောင်လူဆိုတဲ့ အစွဲနဲ့ အလုပ်တွေက ညီလာခံနဲ့ ညီလာခံနောက်ပိုင်းအထိ နေရာအတော်များများမှာ သတိပြုမိစရာတွေတွေ့နေရတုန်း။

ညီလာခံပြီးတော့ ကျနော်က ဗဟိုကော်မတီ (စည်းရုံးရေးဌာနတာဝန်ခံ) ဖြစ်လာပေမယ့် ဘင်္ဂလားဒေ့ရ်ှရုံးက ကိစ္စတွေကို ဖြတ်သင့်တာဖြတ် လွှဲသင့်တာလွှဲတွေလုပ်ရမှာမို့။ ဘန်ကောက်ကိုပဲ ပြန်တက်ခဲ့တယ်။

xxxxxxxxx
                                                                                                                                ဆက်ပါမည်.....