မြင်အောင်ကြည့်

ဖေ့စ်ဘုတ်မှာ ခုတလောနာမည်ကြီးနေတဲ့သတင်းတွေ ဖတ်ပြီး တွေးမိတာလေးပါ
မိုးဇေညိမ်း

၂၀၁၂ ခုနှစ်၊ ကြားဖြတ်ရွေးကောက်ပွဲတုန်းက ၀န်ထမ်းတွေနဲ့ တပ်မတော်သား မိသားစုဝင်တွေအများစုနေထိုင်ရာ နေပြည်တော်က မဲဆန္ဒနယ်တွေမှာ NLD နိုင်ခဲ့တာမို့ ကျွန်တော် အံ့အားသင့်သွားပြီး ဇေယျာသီရိတပ်နယ်က သူငယ်ချင်း အရာရှိကြီး တစ်ယောက်ကို “မင်းတို့တပ်နယ်တွေများတဲ့ နေရာတွေမှာပါ NLD ကနိုင်သွားပါလားကွ”လို့ မေးမိပါတယ်။ ဒီတော့ သူက “ဟုတ်တယ်၊ လူထုရဲ့ ပကတိဆန္ဒကို သိရအောင်လို့ ကြားဖြတ်ရွေးကောက်ပွဲမှာ ဘာမှဝင်မစွက်ပဲဒီအတိုင်းပဲ ဆောင်ရွက်ခဲ့တာလေ။ ဒါမှ ၂၀၁၅ ရွေးကောက်ပွဲအတွက် ကြံ့ဖွံ့ပါတီရဲ့အခြေအနေကို သိချင်လို့ စမ်းသပ်ကြည့်တဲ့ သဘောပဲ” လို့ ပြောပါတယ်။ တကယ်တော့ ကြံ့ဖွံ့ပါတီက နိုင်စေချင်ရင် နိုင်အောင် လုပ်လို့ရတဲ့ အောက်လမ်းနည်းတွေ ရှိပါတယ်။ ၂၀၁၅ ရွေးကောက်ပွဲမှာ အောက်လမ်းနည်းတွေ မသုံးပဲ ယှဉ်ပြိုင်ရမယ်ဆိုရင် ကြံ့ဖွံ့ပါတီအနေနဲ့ ခွက်ခွက်လန်အောင် ရှုံးနိုင်တယ်ဆိုတာကို ကြားဖြတ် ရွေးကောက်ပွဲ အခြေအနေကို ကြည့်ပြီး ကြံ့ဖွံ့က လူကြီးမင်းတွေ သုံးသပ်လို့ ရသွားခဲ့ပါတယ်။

ကြားဖြတ်ရွေးကောက်ပွဲမှာ ပြီးတဲ့နောက်မှာ ကျွန်တော် စဉ်းစားနေမိတာတစ်ခုရှိတယ်။ အဲတာက လာမဲ့ ၂၀၁၅ ရွေးကောက်ပွဲအတွက် ကြံ့ဖွံ့ဘက်က ဘာတွေစီစဉ်မလဲဆိုတာပါ။ ကိုယ့်ထမင်းကိုယ်စားပြီး ခေါင်းရှုပ်ခံစပ်စုမိတာပါ။ အဲ့သမှာ သူငယ်ချင်းတွေနဲ့ ဘီယာသောက်ကြရင်း ဦးကျော်ဆန်းနောက် တကောက်ကောက်လိုက်နေရတဲ့ သူငယ်ချင်း တစ်ယောက်ဆီက မူးပြီး စကားထွက်လာတယ်။ “ဆင်းရဲမွဲတေမှု ပပျောက်ရေးဆိုပြီး လက်လုပ် လက်စားတွေ၊ ဈေးသည်တွေကို ပိုက်ဆံတွေ လိုက်ချေးနေတာက ၂၀၁၅ မှာ ကြံ့ဖွံ့အတွက် မဲတွေရအောင်လို့” တဲ့။ ဒါပေမဲ့ အဲဒီ အစီအစဉ်က ထင်သလောက် မအောင်မြင်နိုင်ဘူးလို့ ကြံ့ဖွံ့က လူကြီးမင်းတွေက သုံးသပ်ကြပြန်ပါတယ်။ ဘာလို့လဲဆိုတော့ ငွေချေးယူသူတွေက ငွေယူစဉ်တုန်းကတော့ ကြံ့ဖွံ့ပါတီကြီးရဲ့ ကျေးဇူးကို မမေ့ပါဘူးလို့ ပြောကြပေမဲ့ တကယ်တမ်း မဲပေးရင်တော့ NLD ကိုပဲ ပေးချင်ပေးကြမှာလို့ တွေးမိကြလို့ပါ။

ရခိုင်မှာ ပဋိပက္ခတွေဖြစ်တော့လည်း ဦးသိန်းစိန်ကို ပွဲထုတ်ပြီး စင်ပေါ်တင်ကြပါတယ်။ အလံရှုးတွေက ဒို့ သမ္မတကြီး လို့ ဘေးက ၀ိုင်းအော်ပေးကြတော့ နောက်ကနေ ရောယောင်အော်ကြတဲ့သူတွေလည်း မနည်းပါဘူး။ ဦးသိန်းစိန် ဆိုတာ ကြံ့ဖွံ့ပါတီရဲ့ ပြယုဂ်ပဲလေ။ ဒါပေမဲ့ သူတို့ ဘယ်လိုမှ ကြိုမတွေးထားတဲ့ OIC ကိစ္စ၀င်လာတော့ ခြေမကိုင် လက်မကိုင်မိဖြစ်ပြီး အကျပ်ရိုက်ကုန်ကြပါတယ်။ ဒီကြားထဲ ကြံ့ဖွံ့က လွှတ်တော်အမတ်တွေထဲမှာ ဘင်္ဂလီတွေပါနေတဲ့ ကိစ္စက သတင်းတွေထွက်လာပါတယ်။ အဲဒီ့မှာပဲ အလံရှုးတွေမြှောက်ပေးထားတဲ့ ဦးသိန်းစိန်ရဲ့ သိက္ခာလည်း နည်းနည်းကျသွားရှာပါတယ်။

ဒီတော့ ၂၀၁၅ ခုနှစ်မှာ ကြံ့ဖွံ့ပါတီအနိုင်ရရေးအတွက် ပြင်ဆင်စရာရှိတာ ပြင်ဆင်ရအောင်၊ လုပ်စရာရှိတာ လုပ်ရအောင် ကြံ့ဖွံ့ပါတီရဲ့ မာစတာဘရိန်းတွေဖြစ်တဲ့ ဦးကျော်ဆန်း၊ ဦးဇော်မင်း၊ ဦးအောင်သောင်း … စသဖြင့် အဲဒီလူတွေကို ၀န်ကြီးတာဝန်တွေက နှုတ်ထွက်ခိုင်း၊ တာဝန်မများတဲ့ နေရာတွေကို ရွှေ့ခိုင်းပြီး ကြံ့ဖွံ့ပါတီအတွက် အချိန်ပေးလုပ်စေခဲ့ပါတယ်။ အဲတာကိုပဲ ပြည်သူတွေ အော်လို့၊ ဘာလို့၊ ညာလို့ ၀န်ကြီးတွေနားသွားရတာဆိုပြီး ၀မ်းသာနေကြတဲ့သူတွေ ရှိပါသေးတယ်။ အမှန်တော့ ကြံ့ဖွံ့ပါတီအတွက် အချိန်ပေးနိုင်ဖို့ သူတို့ဘာသာ စီစဉ်ကြတာပါ။ ပြည်သူတွေက မလိုလားတိုင်း အုပ်ချုပ်သူတွေက အသိစိတ်ဓာတ်ရှိရှိနဲ့ တာဝန်ကနုတ်ထွက်မယ်ဆိုရင် ဦးသန်းရွှေ ဂျောင်းသွားတာ ကြာပေါ့။

ခုလတ်တလောမြင်နေရတဲ့ အခြေအနေတွေ သုံးသပ်ကြည့်တော့မှ NLD အပေါ်ထိုးစစ်ဆင်နေတဲ့ ကြံ့ဖွံ့ပါတီရဲ့ တိုက်ကွက်တွေကို သတိပြုလိုက်မိပါတယ်။ ၂၀၁၅ မှာ NLD ကိုထောက်ခံတဲ့လူတွေ တဖြည်းဖြည်း လျော့နည်းလာအောင်၊ အတိုက်အခံအုပ်စုတွေအချင်းချင်းကြားထဲမှာ သဘောထားကွဲလွဲမှုတွေ ဖြစ်လာအောင်၊ အတိုက်အခံ နိုင်ငံရေးသမားတွေအပေါ် ပြည်သူတွေ စိတ်ပျက်လာအောင် စနစ်တကျအကွက်ချစီစဉ်ပြီး ဘက်ပေါင်းစုံက တိုက်နေပြီလို့ ယူဆရပါတယ်။ အတိုက်အခံနိုင်ငံရေးသမားတွေရဲ့ အပြစ်လေးကို မီဒီယာတွေ၊ လူမျိုးရေးတွေ၊ ဘာသာရေးတွေနဲ့ ခုတုံးလုပ်၊ ပုံကြီးချဲ့ပြီး ထောက်ခံသူတွေကို ဖြည်းဖြည်းချင်း ဖဲ့ထုတ်ဖို့ စီစဉ်ထားပုံရပါတယ်။ စစ်ဆင်ရေးသဘောတရားအရဆိုရင် နေရာပေါင်းစုံကနေ တိုက်ကွက်ဖော်၊ ရန်သူရဲ့ ထောက်ပံ့ရေးလမ်းကြောင်းတွေကို ဖြတ်တောက်၊ ရန်သူကို အင်အားနည်းအောင် အမှည့်ချွေချွေပြီး မလှုပ်ရှားနိုင်အောင် ထိန်းချုပ်တဲ့နည်းဗျူဟာပါပဲ။

၂၀၁၅ ရွေးကောက်ပွဲမှာ NLD ပါတီကို ထောက်ခံသူတွေ ချည့်နဲ့လျော့ပါးသွားရေး မျှော်မှန်းပြီး လုပ်ဆောင်လာတဲ့ ကြံ့ဖွံ့ပါတီရဲ့ နောက်ထပ် တိုက်ကွက်တွေက ဘာတွေများဖြစ်မလဲလို့ စောင့်ကြည့်ရင်း NLD ကံကောင်းပါစေလို့ ဆုတောင်းပေးလိုက်ပါတယ်။