အလှူငွေကောက်သည့် ကျောင်းအုပ်ကို အရေးယူ

........................................................
မြဝတီ၊ ဇွန် ၃

ကရင်ပြည်နယ် မြဝတီခရိုင် မြဝတီမြို့နယ် အမှတ်(၁) ရပ်ကွက်အတွင်းရှိ အခြေခံပညာ အလယ်တန်းကျောင်းတွင် မူလတန်း ကျောင်းသားသုံးဦးထံမှ ငွေ ၃၀၀၀ ကျပ်စီ ကောက်ခံသော ကျောင်းအုပ် ဆရာမကြီးကို ဝန်ထမ်းရေးရာ စည်းကမ်း ထိန်းသိမ်းရေး ကော်မတီက ဝန်ခံကတိ လက်မှတ်ရေးထိုးကာ အရေးယူ ခဲ့ကြောင်း မြို့နယ်ပညာရေးမှူး ဒေါ်လှလှမြင့်က The Voice သို့ ယမန်နေ့က ထုတ်ဖော်ပြော ကြားသည်။

ယင်းသို့ ဝန်ခံကတိ လက်မှတ်ရေးထိုးရာတွင် မြို့နယ်ပညာရေးမှူး အပါအဝင် ဒုတိယမြို့နယ် ပညာရေးမှူး ဦးစောမင်းခင်၊ အထက(၂)ကျောင်းအုပ် ဆရာကြီး ဦးမင်းအုန်းဝေ၊ အထက ကွေ့ရှမ်း ကျေးရွာ ကျောင်းအုပ် ဆရာမကြီး ဒေါ်မာလာစိုး တို့ပါဝင်သော ဝန်ထမ်းရေးရာ စည်းကမ်း ထိန်းသိမ်းရေး ကော်မတီက ပြီးခဲ့သော ၃၀ ရက်နေ့တွင် ဝန်ခံကတိ လက်မှတ်ရေးထိုး ခိုင်းကာ ကျောင်းသား မိဘများထံမှ ကောက်ယူထားသော ငွေကြေးများကိုလည်း ပြန်လည် ပေးအပ်ခဲ့ကြောင်း ယင်းက ထပ်လောင်း ပြောကြားသည်။

“ကျောင်း အလံတိုင်ကွင်း ပြုပြင်ဖို့ အတွက် ကောက်ခံမိပါတယ်။ ဝန်ခံကတိ လက်မှတ်လည်း ရေးထိုး ခဲ့ပြီးပါပြီ။ ကျွန်မရဲ့ ပညာရေးဝန်ထမ်း ကာလတစ်လျှောက်မှာ ဒီလိုဖြစ်ရတာ ပထမဆုံးအကြိမ်ပါ” ဟု အရေးယူခံရသူ ကျောင်းအုပ်ဆရာမကြီးက The Voice သို့ ပြောကြားသည်။

ဝန်ထမ်းရေးရာ စည်းကမ်းထိန်းသိမ်းရေး ကော်မတီ အနေနှင့်လည်း နောင်တွင် မည်သည့် အကြောင်းကိစ္စနှင့်မဆို ငွေကြေးကောက်ခံမှု ပြုလုပ်ပါက ပြင်းထန်စွာ အရေးယူ သွားမည်ဟု ထပ်မံသတိပေးလိုက်ကြောင်း ကော်မတီအဖွဲ့ဝင် တစ်ဦးက ပြောကြားသည်။
Ref. voice