ရခိုင်ပြည်နယ် မောင်တောမြို့က ကျေးရွာတစ်ရွာမှာ ပျောက်ဆုံးခဲ့တဲ့
ရဲတပ်ကြပ်ကို ရှာဖွေစစ်ဆေးရာမှာ လူသေဆုံးမှု ရှိတယ် ဆိုတဲ့ ပြောဆိုမှုတွေကို
အစိုးရဘက်က ငြင်းဆိုပါတယ်။
အာဏာပိုင်တွေက လောလောဆယ် ရွာသား ၈၀ ကျော်ကို ဖမ်းဆီး ထားတယ်လို့ ရခိုင်ပြည်နယ် အစိုးရ ပြောခွင့်ရသူက ပြောပါတယ်။
ဇန်နဝါရီလ ၁၃ ရက်နေ့က ဒူချီရာတန်း အလယ်တန်း ကျေးရွာမှာ ရွာသား ၄ ယောက်ကို
ရဲက ရှာဖွေစစ်ဆေးဖို့ ကြိုးစားရာကနေ ရဲနဲ့ ရွာသားတွေ ပဋိပက္ခ ဖြစ်ပွားပြီး
ရဲတပ်ကြပ် ပျောက်ဆုံးခဲ့တာလို့ ရဲဘက်က ပြောပါတယ်။
ရွာသားတွေကတော့ ရဲတစ်ယောက် ကျန်ရစ် ပျောက်ဆုံးနေတာ မရှိဘူးလို့ ငြင်းပါတယ်။
ရွာသား ၄ ယောက်ကို ရှာဖွေရတဲ့ အကြောင်းကတော့ ပြီးခဲ့တဲ့ အပတ်က
ပျောက်ဆုံးသွားတဲ့ ရိုဟင်ဂျာ ၈ ယောက်ရဲ့ အလောင်းကို တွေ့ရှိပြီး ဓာတ်ပုံ
ရိုက်ယူခဲ့တဲ့အတွက် အဲဒီလူတွေကို ရဲက လိုက်လံ ရှာဖွေ ဖမ်းဆီးဖို့
ကြိုးစားတာလို့ ရွာသားတွေက ပြောပါတယ်။
ဇန်နဝါရီလ ၁၃ ညနေပိုင်း
ရောက်တော့ ရဲတပ်ဖွဲ့က အင်အားဖြည့်တင်းပြီး ပြန်ရောက်လာခဲ့ကြပြီး
ရွာသားတွေနဲ့ နောက်ထပ် ပဋိပက္ခ ဖြစ်ပွားခဲ့ပြန်တဲ့အတွက် ရွာသား ၈ ယောက်
ထပ်မံ သေဆုံး သွားတယ်လို့ ရိုဟင်ဂျာ ရွာသားတယောက်က ပြောပါတယ်။
ရွာသားတွေဘက်က ဒီလို စွပ်စွဲချက်တွေနဲ့ ပတ်သက်လို့ ရခိုင်ပြည်နယ် အစိုးရကို
မေးမြန်းကြည့်ရာမှာ ပြည်နယ်အစိုးရ သတင်းထုတ်ပြန်ရေး အဖွဲ့က ဦးဝင်းမြိုင်က
သေဆုံးသူ တစ်ယောက်မှ မရှိဘူးလို့ ပြောပါတယ်။
ဒါပေမဲ့ ရွာသား ၈၄ ယောက်ကို ဖမ်းဆီးထားတယ်လို့ ဘီဘီစီကို ပြောပါတယ်။
လောလောဆယ်မှာတော့ ဒူချီရာတန်း ရွာသားတွေ အားလုံး အနီးတဝိုက် ရွာတွေဆီကို ထွက်ပြေး တိမ်းရှောင်နေတယ်လို့ သိရတယ်။
No comments:
Post a Comment