ဒေါ်စုကို မြောင်းထဲရောက်အောင် ထိုးချလူသူတို့၏ ပြောင်မြောက်သော တိုက်ကွက်များ

Moe Zay Nyein

ပြောစရာစကားမရှိတော့ပါ။ ပြောလည်းမပြောချင်တော့ပါ။ ဒီယုန်ကိုမြင်လို့ ဒီချုံဆီရောက်အောင် ဒေါ်စုကို မျှားခေါ်လာခဲ့သူများကတော့ တြိတ်ပြီး ရယ်နေလောက်ပါပြီ။

လက်ပတောင်းတောင်မှာ ဆန္ဒပြပွဲတွေဖြစ်စတုန်းကတော့ ဒေါ်စုကို တာဝန်မပေးပဲနဲ့ လုံထိန်းတွေက အကြမ်းဖက်နှိမ်နှင်းလို့ ဒဏ်ရာရသူတွေရ၊ ဘန်ကောက်ဆေးရုံရောက်သူတွေ ရောက်တဲ့အထိ ဖြစ်ပြီးကာမှ၊ ဆန္ဒပြသူတွေနဲ့ ပြည်သူတွေရဲ့ ဒေါသကို အမြင့်ဆုံးရောက်အောင်ဆွဲတင်ပြီးကာမှ ဒေါ်စု၊ ဒီကိစ္စကို ခင်ဗျားရှင်းတော့ လို့ ဘာလို့ ခေါင်းပြောင်းပေးလိုက်ရသလဲဆိုတာ စဉ်းစားဖို့လိုပါမည်။ နိုင်ငံတော်၏ သမ္မတကြီး ဆိုသူကတော့ ဒီကိစ္စတွေဖြစ်သွားတာကိုပဲ သူပဲ မသိလိုက်ရသလိုလိုဖြင့် အရူးကွက်နင်းနေသည်။ ဘာပဲပြောပြော ဒေါ်စုကို မြောင်းထဲရောက်အောင် ထိုးချလူသူတို့၏ ပြောင်မြောက်သော တိုက်ကွက်များကိုတော့ ချီးကျူးမိပါသည်။ နိုင်ငံတကာရဲ့ အမြင်တွေကို ပြောင်းလဲစေဖို့ ဒေါ်စုကို လွှတ်တော်ထဲထည့်ပြီး ခုတုံးလုပ်သည်။ NLD နဲ့ ပြည်သူတွေကြားမှာ အမြင်တွေလွဲလာအောင် ဘာသာရေးကို ခုတုံးလုပ်ပြီး မွတ်ဒေါင်း တိုက်ကွက်ကို ထုတ်သည်။ ဟော .... ခုလည်း သူတို့ရှင်းလို့မရတဲ့ ပြဿနာကြီးမှာ ဒေါ်စုကို ဓားခုတ်ရာ လက်ဝင်လျှိုခိုင်းသည်။ သူတို့ဖန်တီးသမျှ အရာရာ၏ ရည်မှန်းချက်သည် (၁) ဒေါ်စုဦးဆောင်တဲ့ NLD ပါတီနဲ့ ပြည်သူတွေ တစ်ဦးနဲ့တစ်ဦး အမြင်တွေလွဲပြီး ဝေးကွာမုန်းတီးရေး (၂) သမ္မတဦးသိန်းစိန်ကို ပွဲထုတ်၊ ဂုဏ်ပုဒ်တွေ မြှင့်တင်ရေး တို့သာဖြစ်ပါသည်။ သူတို့ဆိုသည်မှာ ကြံ့ဖွံ့များ၊ စစ်အာဏာရှင် စနစ်၏ နောက်ချန် အဖွဲ့များ၊ အခွင့်သာတုန်းမှာ နေရာလိုချင်လို့ ဘက်ပြောင်းသွားသော ယခင် အတိုက်အခံဟောင်းများကို ဆိုလိုသည်။

တစ်ကြိမ်အလိမ်ခံရသော် လိမ်သူ၏ အပြစ်ဖြစ်သည်။ နှစ်ကြိမ်အလိမ်ခံရသော် လိမ်သူ၏ အပြစ်ဖြစ်သည်။ အကြိမ်ကြိမ် အလိမ်ခံရသော် လိမ်သူ၏ အပြစ်မဟုတ်တော့ပါ။ အလိမ်ခံရသူ၏ အပြစ်သာဖြစ်ပါတော့မည်။ ၁၉၉၀ ပြည့်နှစ်ရွေးကောက်ပွဲကတည်းက စပြီးလိမ်သည်။ အကြိမ်ကြိမ် လိမ်သည်။ ယခုထိလည်း လိမ်နေသောသူများဖြစ်သည်။ အရပ်သားအစိုးရဖြစ်ပြီဟု နိုင်ငံတကာကို လိမ်သည်။ ဒီမိုကရေစီကြီးရပြီဟု ပြည်သူတွေကို လိမ်သည်။ လူလိမ်ကို လိမ္မာလာအောင် အနီးကပ်ပေါင်းပြီး ဆုံးမချင်သပဆိုလည်း ကြိုးစားကြည့်နိုင်ပါသည်။ ကိုယ်ကိုတိုင်လည်း အလိမ်မခံရဖို့လည်း သတိပြုသင့်ပါသည်။ လိမ်လို့ရသမျှလိမ်လည်နေသည့် အစိုးရနှင့် ရင်ကြားစေ့ဖို့ကြိုးစားတာထက် နှစ်ပေါင်းနှစ်ဆယ်ကျော် အမှောင်တိုက်တွင်းမှာ ကြီးပြင်းလာရသည့် အသိညဏ်နုံနဲ့သော ကျွန်တော်တို့လိ်ု ပြည်သူတွေနဲ့ ရင်ကြားစေ့တာက ပိုပြီးကောင်းလေမလားဟု မျှော်လင့်မိပါသည်။