သမ္မတကြီးကို ယုံပါတယ်ဆိုသူများဖတ်သင့်သော ပေးစာပါ ။
သမ္မတ ဦးသိန်းစိန်ထံ အိတ်ဖွင့်ပေးစာ (၁)
သန်းဝင်းလှိုင်
ဖေဖော်ဝါရီ ၂၂၊ ၂၀၁၄
သမ္မတဦးသိန်းစိန်၏ အစိုးရအဖွဲ့သည် ၂ဝ၁၄ ဖေဖော်ဝါရီလဆိုလျှင် အစိုးရသက်တမ်း သုံးနှစ်ကျော်လာ ခဲ့ပြီ ဖြစ်သည်။ သမ္မတ ဦးသိန်းစိန်သည် အစိုးရသက်တမ်းတလျှောက်တွင် တဒင်္ဂ အားတက် ၀မ်းမြောက်ဖွယ် ပျားရည်နှင့် ဝမ်းချသည့် ကတိစကားများစွာ ပြောကြားခဲ့သော်လည်း ယနေ့တိုင် ဘာတစ်ခုမှ မတည်ခဲ့ပေ။
ပြီးခဲ့သော ၂ဝ၁၃ သြဂုတ်လ ၁၃ ရက်နေ့က နေပြည်တော်ရှိ နိုင်ငံတော် သမ္မတရုံး၌ ပြုလုပ်ခဲ့သည့် ပြည်ထောင်စုအဆင့် ဒုဝန်ကြီးများ ကတိသစ္စာ ခံယူခြင်းနှင့် နိုင်ငံတော်သမ္မတ၏ မိန့်ခွန်းနာခံခြင်း အခမ်းအနားတွင် သမ္မတဦးသိန်းစိန်က အစိုးရတစ်ဖွဲ့လုံး၏ ပုဂ္ဂိုလ်ရေး၊ ကိုယ်ကျင့်တရား၊ အကျင့်စာရိတ္တနှင့် အဂတိတရားများ ကင်းရှင်းအောင် စောင့်ထိန်းသွားရန်နှင့် ပြည်သူများ တိုက်ရိုက်ခံစားလိုသော ရေကောင်းရေသန့် ရရှိရေး၊ လျှပ်စစ်မီးရရှိရေး၊ သွားလာမှု အဆင်ပြေစေရေး၊ အလုပ်အကိုင်ရရှိရေး၊ ပြည်သူတို့၏လူမှုစီးပွားဘဝဖွံ့ဖြိုးတိုးတက်ရေးနှင့်ပြည်သူ့ဘဝလုံခြုံရေး၊ရပ်ရွာအေးချမ်းသာယာရေး လုပ်ငန်းများ ကို အားသွန်ခွန်စိုက် တက်တက်ကြွကြွ မြန်မြန်ဆန်ဆန် ဝိုင်းဝန်းပြီး လုပ်ကိုင်ကြရန် ပြောသွားခဲ့ပါသေးသည်။
သမ္မတဦးသိန်းစိန် ပြောကြားခဲ့သော မိန့်ခွန်းပေါင်း ၇ဝ ကျော်၌ သန့်ရှင်းသောအစိုးရနှင့် ကောင်းမွန်သော အုပ်ချုပ်မှုဆိုသည့်စကားနှင့် အစိုးရ၏ အဂတိတရား လိုက်စားမှုအပေါ် အရေးယူကိုင်တွယ်မည်ဟု ပြောကြားနေသော်လည်း တကယ်တမ်းတွင် အစိုးရအဖွဲ့အတွင်း၌ အကျင့်စာရိတ္တ ဖောက်ပြန်သူများ ၊ အာဏာအလွဲသုံးစားသူများ၊ အဂတိလိုက်စားသူများ၊ အုပ်ချုပ်ရေး စီမံခန့်ခွဲမှု ညံ့ဖျင်းသူများ၊မိုက်ရိုင်းထွားကြိုင်သူများကို ယနေ့တိုင် ထိရောက်စွာ အရေးယူမှု မရှိသည့်အပြင် အချင်းချင်း ဖေးမကာ လျစ်လျူရှုနေသည်ကိုသာ တွေ့မြင်နေပေသည်။
သမ္မတဦးသိန်းစိန် လက်ထက်၌ ဖြစ်ပွားမှု အများဆုံး ပြဿနာကို ပြပါဆိုလျှင် ဘာသာရေး ပဋိပက္ခ ပြဿနာများ၊ လယ်ယာမြေနှင့် ကျူးကျော်ပြဿနာများပင် ဖြစ်သည်။ နှစ်ပေါင်း ၅ဝ ကျော် စစ်အာဏာရှင် လူတစ်စု၏ အာဏာရှင်စနစ်ဆိုးတွေကြောင့် လူမသိသူမသိ ကြိတ်မှိတ်ခံစားခဲ့ရသော ဒဏ်ရာ ဒဏ်ချက်များသည် လက်ရှိအသွင်ပြောင်းကာလတွင် ဖြေရှင်းရခက်သော ပြဿနာများအဖြစ် အပြင်းအထန် ရိုက်ခတ်လာခဲ့ပေသည်။ အဆိုပါ ပြဿနာများကိုလည်း ပညာရှိပီပီ လူသားဆန်စွာ သိမ်သိမ်မွေ့မွေ့ ဖြေရှင်းနိုင်စွမ်းမရှိသောအစိုးရ၏ ခေါင်းဆောင်မှုအရည်အချင်းနှင့် အုပ်ချုပ်ရေးစွမ်းဆောင်ရည် ညံ့ဖျင်းမှုတို့ ကြောင့် နိုင်ငံတွင်း၌ရော နိုင်ငံတကာ၌ပါ ဂုဏ်သိက္ခာ ကျဆင်းစရာများ ဖြစ်ပေါ်လျက် ရှိသည်။
ဥပမာအားဖြင့် တပ်မတော်ကျောင်းကြီးသုံးကျောင်း၏ တပ်ပိုင်မြေပေါ်၌ကျူးကျော်နေထိုင်သည်ဟု ဆိုကာ ရန်ကုန်တိုင်း၊ လှည်းကူးမြို့နယ်ရှိ သမီးလေးကျေးရွာရှိ နှစ်ပေါင်း ၃၇နှစ် နီးပါး ဘိုးစဉ်ဘောင်ဆက် နေထိုင်လာခဲ့သော အိမ်ထောင်စုများကို ဦးသိန်းစိန်အစိုးရ၏ အာဏာပိုင်ပါးကွက်သားများက မင်းမဲ့စရိုက်ဆန် ဆန် ၂ဝ၁၄ ခုနှစ် ဖေဖော်ဝါရီလ ၄ ရက်နေ့တွင် အင်အားသုံး ဖျက်သိမ်းခဲ့မှုကြောင့် အပ်နှင့်ထွင်းရမည့် ကိစ္စကို ပေါက်စိန်နှင့် ပေါက်ရသလို ပြဿနာများမဖြစ်သင့်ဘဲ ဖြစ်ပေါ်လာခဲ့ရပေသည်။
ထို့ကြောင့် မိမိနေအိမ်များ ဥပဒေမဲ့ ဘူဒိုဇာစက်ယန္တရားများဖြင့် အတင်းဖျက်သိမ်း ခံရမှုကြောင့် ဘုန်းကြီးကျောင်းတွင် ခိုလှုံနေကြရသည့် ကျေးရွာသားများကို ပဲခူးတိုင်းမှ အာဏာပိုင်များ၏ ခုနှစ်ရက်အတွင်း ထွက်ခွာရန် အမိန့်ပေးထားမှုကို လိုက်နာမှု မရှိဟု ဆိုကာ ယာယီခိုလှုံနေထိုင်သော တဲများကို ဖေဖော်ဝါရီလ ၁၇ ရက်နေ့တွင် ဒုတိယအကြိမ် ထပ်မံဖျက်ဆီးခဲ့ပြန်သည်။
နိုင်ငံအနှံ့အပြား ပြည်သူများ၏ ဝေဖန်မှုနှင့် ကရုဏာသက်နေမှုတို့ကို လျစ်လျူရူကာ အာဏာပိုင်များ၏ ဖျက်ဆီးမှုကြောင့် သမီးကလေးကျေးရွာမှ နေအိမ်ဖျက်သိမ်းခံ ရွာသူရွာသားများမှာ အလိုင်နီဆည်ဘေးရှိ အောင်သိဒ္ခိဘုန်းတော်ကြီးကျောင်းဝင်းအတွင်းရှိ ဓမ္မရုံ၌ ခေတ္တခိုလှုံ နေထိုင်ခဲ့ရပေသည်။ ယခုအခါ အဖျက်သိမ်းခံ ရွာသူရွာသားများတွင် ကိုယ်ဝန်ဆောင်များ၊ သက်ကြီးရွယ်အိုများနှင့် ကလေးများမှာ မြေကြီးပေါ်တွင် ဖြစ်သလို နေထိုင်အိပ်ရသဖြင့် ကျန်းမာရေး ၊ စိတ်ပိုင်းဆိုင်ရာများ ချွတ်ယွင်းမှုများလည်း ဖြစ်ပွားနေကြောင်း သိရပေသည်။
မြန်မာနိုင်ငံသည် သဘာဝကပေးသော လက်ဆောင်များဖြစ်သည့် မြေပေါ်မြေအောက် ရေအောက်သယံဇာတပစ္စည်းများပေါကြွယ်ဝပြီး ရာသီဥတုသမမျှတကာ မြေဆီမြေသြဇာ ကောင်းမွန်သော နိုင်ငံတစ်နိုင်ငံ ဖြစ်သော်လည်း၊ ၁၉၆၂ ခုနှစ်မှ ယနေ့တိုင် အုပ်ချုပ်မင်းမူလျက်ရှီသော သမ္မတဦးသိန်းစိန် အစိုးရအထိ အစိုးရနှင့်လက်ဝေခံခရိုနီ လူတစ်စု၏ အာဏာအလွဲသုံးစားမှုများ၊ကိုယ်ကျိုးစီးပွားအတွက် အတ္တရှေ့တန်းတင် လောဘရမ္မက်ဇော တိုက်မှုကြောင့် သဘာဝသယံဇာတများလည်း ပြုတ်ပြုတ်ပြုန်းကာ တစ်နိုင်ငံလုံး ဖွတ်ဖွတ်ကြေလျက် ရှိနေလေသည်။
မြန်မာနိုင်ငံသည် အကျယ်အဝန်း စတုရန်းမိုင်ပေါင်း ငါးသိန်း ၆ သောင်း ရှိ၍ လူဦးရေ သန်း ၆ဝ ရှိသောကြောင့် လူဦးရေ ထူထပ်မှုနှုန်းသည် တစ်စတုရန်းမိုင်လျှင် ၁၈၇ ဦးသာ ရှိသည်။ မြန်မာနိုင်ငံ ထက် လူဦးရေ ထူထပ်မှုနှုန်း မြင့်မားသည့် အိမ်နှီးချင်းနိုင်ငံများတွင် နေထိုင်စရာ မြေနေရာအတွက် ပြဿနာမတက်ဘဲ၊ မြေနေရာလွတ် ပေါင်းများစွာ ကျန်ရှိနေသော မြန်မာနိုင်ငံတွင် မြေရာမဲ့ ပြဿနာများ မတရားအနိုင်ကျင့်ခံရမှုများပေါ်ပေါက်နေသည်မှာ ရင်နင့်စရာ ကောင်းလှပေသည်။
မြန်မာနိုင်ငံသည် လွတ်လပ်ရေး ရရှိသည်မှာ နှစ်ပေါင်း ၆၆ နှစ် ကြာညောင်းခဲ့ပြီ ဖြစ်သော်လည်း သူ့ကျွန်ဘဝထက်ပင် စီးပွားရေး ၊ လူမှုရေး ၊ ပညာရေး ၊ယဉ်ကျေးမှု အစစအရာရာ နိမ့်ကျနေသည်မှာ အစိုးရ အဆက်ဆက်၌ လုံးဝ တာဝန်ရှိလေသည်။ ကျူးကျော်နေရာများတွင် နေထိုင်သူများဟု ဆိုစေကာမူ အမိမြန်မာပြည်တွင် မွေးဖွားလာသော နိုင်ငံသားစစ်စစ် ဖြစ်သူများ ဖြစ်သည့်အတွက် ဒီမြေ ဒီရေ ပေါ်တွင် ၄င်းတို့အတွက် ကျောချစရာ ပိုင်ဆိုင်ခွင့် တစ်နေရာသည် ရှိသင့်ပေသည် ။ ယခုအခါ သန်း ၆ဝ ကျော်သော ပြည်သူလူထုသည် နေစရာ မြေမရှိသလို မိမိတို့ ဘိုးဘွားပိုင် လယ်ယာမြေများကို အကြောင်းအမျိုးမျိုး ပြ၍ လျှော်ကြေးမပေးဘဲ တရားဥပဒေမဲ့ အတင်းအဓမ္မ အသိမ်းခံမှုကြောင့် စားရမဲ့ သောက်ရမဲ့ ဘဝသို့ ကျရောက်ခဲ့ရလေသည်။သမ္မတဦးသိန်းစိန်အစိုးရ၏ဆင်းရဲသားပပျောက်ရေးစီမံကိန်းကိုလည်း မေးခွန်းထုတ်စရာ ဖြစ်ခဲ့ရပါသည်။
ယခုကဲ့သို့ ကျူးကျော်မှုဆိုသည့် အကြောင်းပြချက် တစ်ခုတည်းဖြင့် လူသားမဆန်စွာဖြိုဖျက် ပစ်ရုံမျှဖြင့် ပြဿနာများအလိုအလျောက် ပြေလည်သွားမည် မဟုတ်ပေ။
အမှန်စစ်စစ် သမီးကလေးကျေးရွာသည် ပဲခူးတိုင်း၊ လှည်းကူးမြို့နယ်မှ NLD လွှတ်တော် ကိုယ်စားလှယ် ဖြိုးမင်းသိမ်း ခပ်တိမ်တိမ် ပြောသလို ၊ ၂ဝ၁၃ ခုနှစ်မှ ဖြစ်ပေါ်လာခြင်း မဟုတ်သလိုသမ္မတအကြံပေးကိုရဲထွဋ်ပြောသလိုမြေဦး၊နေရာဦးနေထိုင်လိုသူများလည်းမဟုတ်ဘဲ လွန်ခဲ့သော နှစ်ပေါင်း ၃ဝ ခန့်အတွင်းက ရှိနေခြင်း ဖြစ်ကြောင်း နအဖ လက်ထက်ကရေးထိုးခဲ့သော လဂွင်းပြင် ရေလှောင်တမံ စီမံကိန်း ၏ ကမ္ဗည်း ကျောက်စာအရ အတိအကျ သိရှိရပေသည် ။
ထို့ကြောင့် နှစ်ပေါင်း ၃ဝ ကျော်ကတည်းက တည်ရှိခဲ့သော ရွာတစ်ရွာအား ယခုကဲ့သို့ အင်အားသုံး ဆင်ခြင်တုံတရား ကင်းမဲ့စွာ ဖယ်ရှားမှု့ကြောင့် သမ္မတ ဦးသိန်းစိန်၏ အစိုးရအပေါ် အမည်းစက် ထင်သကဲ့သို့ တပ်မတော်၏ ဂုဏ်သိက္ခာပိုင်းကိုပါ ထိခိုက်ခဲ့ရလေသည် ။ ထို့ပြင် ပြည်သူနှင့် တပ်မတော်ကြား အထင်အမြင် လွဲမှားကာ အမျိုးသားပြန်လည်တည်ဆောက်ရေး လုပ်ငန်းစဉ်များလည်း ပျက်ယွင်းသွားနိုင်လေသည်။
နိုင်ငံသားတိုင်းသည် ပြည်ထောင်စုသမ္မတ မြန်မာနိုင်ငံတော်အတွင်း၌ မည်သည့်အရပ်ဒေသ၌ မဆို ဥပဒေနှင့်အညီ အခြေစိုက် နေထိုင်ခွင့် ရှိကြောင်း ၂ဝဝ၈ ဖွဲ့စည်းပုံ အခြေခံ ဥပဒေ ပုဒ်မ ၃၅၅ တွင် အတိအလင်း ပြဋ္ဌာန်းထားပါသည်။ ထို့ပြင် နိုင်ငံတော်အစိုးရသည် နိုင်ငံသားများ၏ တရားဝင် ရရှိပိုင်ဆိုင်သော ရွေ့ပြောင်းနိုင်သောပစ္စည်း ၊ မရွေ့ပြောင်းနိုင်သောပစ္စည်းများနှင့် စပ်လျဉ်း၍ ဥပဒေ အရကာကွယ်ပေးရမည် ဟူ၍ ပုဒ်မ ၃၅၆ တွင် ပြဋ္ဌာန်းထားပါသည်။ အလားတူပင် ဖွဲ့စည်းပုံ၌ အခြေခံဖွဲ့စည်းပုံပါ ပြဋ္ဌာန်းချက်များနှင့် မဆန့်ကျင်လျှင် နိုင်ငံတော်အစိုးရသည် နိုင်ငံသားများ၏ နေအိမ် ဥပစာ လုံခြုံမှု ၊ ပစ္စည်းလုံခြုံမှု ၊ အပေးအယူနှင့် အခြားဆက်သွယ်ရေး ဆိုင်ရာ လုံခြုံမှုများ အတွက် ဥပဒေအရ ကာကွယ်ပေးရမည် ဖြစ်ကြောင်း ပုဒ်မ ၃၅၇ တွင် ပြဋ္ဌာန်းထားလေသည်။
ယခုကဲ့သို့ ကျူးကျော်ပြဿာနာများကို သက်ဆိုင်ရာ တိုင်းဒေသကြီး ၊ ပြည်နယ်အစိုးရများက ကိုင်တွယ်ဖြေရှင်း နေသည့်အတွက် သမ္မတနှင့် လုံးဝ မဆိုင်ပါဟု ပြော၍လည်း မရပေ။ သမ္မတ ဆိုသည်မှာ ဖွဲ့စည်းပုံအခြေခံ ဥပဒေအရ ရွေးကောက်တင်မြှောက်ထားသော နိုင်ငံတော် အကြီးအကဲဖြစ်ပြီး နိုင်ငံတော် အတွင်း တရားမျှတခြင်း ၊ လွတ်လပ်ခြင်းနှင့် ညီမျှခြင်း တည်းဟူသော လောကပါလ တရားများ ပိုမို ထွန်းကားရေး အတွက် ဆောင်ရွက်ပါမည်ဟု ကတိသစ္စာ ပြုထားသူ ဖြစ်သောကြောင့် လုံးဝ(လုံးဝ) တာဝန်ရှိလေသည်။
သို့သော် လက်ရှိသမီးကလေးကျေးရွာ ပြဿနာကို သမ္မတဦးသိန်းစိန်သည် တုတ်တုတ်မျှ မလှုပ်ဘဲ လျစ်လျူရှု လက်ပိုက်ကြည့်ကာ ဒီမိုကရေစီ အကျိုးပြု ကရင့်တပ်မတော် (DKBA ) မှ စစ်ဗျူဟာမှူး ဗိုလ်မှူးကြီး စောဆန်းအောင် လောက်ပင် သဘောထားမကြီး ၊ ညဏ်အမြော်အမြင်မရှိရာ ဝမ်းနည်းစရာ ကောင်းလှပေသည်။ ၄င်းက-
“ အစိုးရ အနေနဲ့ သူတို့တွေကို နေရာ ပြန်ပေးမယ် ဆိုရင်တော့ ဝမ်းသာရမှာပါ ။ မပေးဘူးဆိုရင်တော့ လူသားချင်းစာနာပြီး ၊ ကျနော်တို့ အရပ်ဒေသကို ခေါ်သွားပေးမယ် ၊ အလုပ်အကိုင်နေရာ ထိုင်ခင်း စီစဉ်ပေးမယ် ၊ ကျနော်တို့ တိုင်းရင်းသားတွေက အပြောသမားမဟုတ်ဘူး ဆိုတာ သက်သေပြဖို့ အသင့်ပါပဲ” ဟူ၍ ပြောကြား ခဲ့ရာ ကြားရသူတိုင်း လူနတ် သာဓု ခေါ်ခဲ့မိပါသည်။
သမီးကလေးကျေးရွာ အဖြစ်အပျက်သည် ကျူးကျော်ပြဿာနာ ဖြေရှင်းရာတွင် စီမံခန့်ခွဲမှု အားနည်းသည့် သမ္မတဦးသိန်းစိန်၏ တစ်ခုတည်းသော သာဓက မဟုတ်ပေ။ လှိုင်သာယာ ရွှေလင်ပန်း ကျူးကျော် ပြဿာနာ ၊ ဒလ မြို့နယ် ကျန်စစ်သား ကျူးကျော် ပြဿာနာ ၊ သင်္ကန်းကျွန်းမြို့နယ် မီးကျောင်းကန် ဥပဒေမဲ့ မြေသိမ်း ခံရမှုပြဿနာ ၊ အစရှိသည့် ကျူးကျော်ပြဿနာ အဖုံဖုံကို သက်ဆိုင်ရာ အာဏာပိုင်တို့၏ ဖြေရှင်းပုံသည် အများတကာ၏ လက်ညိူးထိုး ဝေဖန်စရာများ ဖြစ်လာခဲ့ရာ လက်ရှိ အစိုးရအပေါ် သိက္ခာကျ စရာများ ဖြစ်ခဲ့ရသလိုလူထုကြည်ညိုလေးစာမှုလည်းအမှတ်လျော့စရာဖြစ်ခဲ့ရလေသည် ။
မည်သို့ဆိုစေကာမူ ..ရန်ကင်းကိုကိုနိုင်၏ ‘အတ္တအကျဉ်းသား’ တေးစာသားထဲကအတိုင်း သမ္မတ ဦးသိန်းစိန်အစိုးရသည် ငါနဲ့ ငါသာနှိုင်းရာတုကင်း ကြင်နာခြင်းတွေ ၊ စာနာခြင်းတွေ ညှာတာခြင်းတွေ ၊ လူ့နှလုံးသားနဲ့ ကင်းဝေးကာ ၊ငါ့သမီးငါ့သားပါမကျန်၊ ငါ့ဆွေ ငါ့မျိုး ငါသာကောင်းစားရေးအတွက် ၊ ငါ့အိမ် ငါ့ယာ ၊ ငါ့ကမ္ဘာ ငါဆောက် ငါအကျိုးကြည့်ကာ ငါမမှန်တဲ့ ငါ့မာန်များ ဖုံးပိတ်မှောင် နေကာ ဘဝ တဏှာ လွန်ကဲနေပါက မကြာမီ နွံထဲနစ်၍ အတ္တအကျဉ်းသား ဘဝ ရောက်မှာ မလွဲပါကြောင်း စေတနာကောင်းဖြင့် သတိပေးလိုက်ပါသည် ခင်ဗျား။
No comments:
Post a Comment