Monday, February 10, 2014

ရင်လေးဖွယ်ရာ အနာဂတ်သာသနာ

ဗဟုသုတ ရစေသောငှါ၊ ဆောင်ရန် ရှောင်ရန် အကျိုးငှါ တင်ပြပေးလိုက်ခြင်းဖြစ်ပါတယ်။ 
ဗုဒ္ဓသာသနာ ရောင်ဝါနေသို့ လင်းစေသော်...!
မေတ္တာဖြင့်
ဘလောဂါ

Written by  မိုးသု (မန္တလေး) Wednesday, 05 February 2014 09:18
 
တစ်နေ့က ‘ဘဂဝါ ယူနိုက်တက်စ်အက်ဖ်စီ’ လို့ နာမည်တပ်ထားတဲ့ အီးလ်မေးလ် တစ်စောင် ဦးပဉ္စင်းဆီ ရောက်လာပါတယ်။ ဖွင့်ကြည့်လိုက်တော့  မြန်မာနိုင်ငံ အနှံ့အပြားက ရဟန်းငယ်လေးတွေ ကြိုးစားပမ်းစား ဘောလုံးကန်နေကြတာကို ရိုက်ထားတဲ့ ပုံတွေပါ။ ရေးထားတဲ့ စာကတော့ ‘ဒီပုံတွေကို တပည့်တော် ရိုက်ကူးထားတာ မဟုတ်ပါဘူး။ မြန်မာနိုင်ငံကို အလည်အပတ် လာရောက်ကြတဲ့ နိုင်ငံခြားသားများက ရိုက်ကူးပြီး အင်တာနက်မှာ တင်ပေးထားကြတာတွေ့လို့ ကူးယူပြီးတော့ အရှင်ဘုရားဆီကို ပို့လိုက်တာပါ။ ဓာတ်ပုံတွေနဲ့အတူ ရေးတင်ထားတဲ့ စာသားများကို ဖတ်ရှု လိုက်ရတဲ့ ဗုဒ္ဓဘာသာဝင် တစ်ယောက်အနေနဲ့ ဝမ်းနည်း ကြေကွဲရပါတယ်။ တာဝန်ရှိ ဘုန်းကြီးတွေက ကိုယ့်တပည့်တွေကို မဆုံးမကြတာလား၊ ဆုံးမပါရက်နဲ့ မလိုက်နာကြတာလားဆိုတာ သိချင်ပါတယ်။ ဘောလုံးကန်တာဟာ ဝိနည်းတော်နဲ့ ညီ မညီ ဆိုတာလည်း သိချင်ပါတယ်’ ဆိုပြီး ရေးသားထားပါတယ်။
တစ်လောတုန်းကလည်း မန္တလေး ဆေးရုံကြီးမှာ တာဝန် ထမ်းဆောင်နေတဲ့ တပည့် ဆရာဝန်လေးတစ်ဦးက “မန္တလေးဆေးရုံကြီး သံဃာတော်ဆောင်ကို အရက်မူးပြီးတော့ လူနာသတင်း လာမေးကြတဲ့ ဦးပဉ္စင်းတွေ၊ အရက်မူးပြီး ဆရာဝန်တွေ သူနာပြုတွေကို မိုက်မိုက်ရိုင်းရိုင်း ပြောဆိုကြတဲ့ လူနာစောင့် ဦးပဉ္စင်းတွေ တစ်လတစ်လ မနည်းဘူး။ သံဃာတော် ဆောင်ဘက်ကို တာဝန်ကျမှာကို သေမလောက် ကြောက်နေရတယ်” ဆိုပြီး ဖုန်းဆက်ပြောပါတယ်။
မြောက်ဒဂုံမြို့နယ်မှာနေတဲ့ ဒကာမတစ်ဦးကလည်း မိမိကို ဆေးပစ္စည်းများ လာရောက် လှူဒါန်းရင်း “တပည့်တော် မြောက်ဒဂုံ မနေခင် အရင်နေခဲ့တဲ့ မြို့နယ်မှာတုန်းက တစ်နေ့တစ်နေ့ နေကုန်အားနေတာနဲ့ ယောက်မလေးတွေနဲ့ အပျင်းပြေ အသုပ်စုံဆိုင် ဖွင့်ရောင်းတယ်။ တပည့်တော်တို့ အိမ်နားမှာက ဘုန်းကြီးကျောင်းတွေ အများကြီးရှိတယ်။ တချို့ ဦးပဉ္စင်းတွေက အရက်ပုလင်းတွေ၊ ဘီယာပုလင်းတွေ ဝယ်လာပြီး တပည့်တော်တို့ဆိုင်က အသုပ်မှာပြီးတော့ ဆိုင်ထဲမှာ သောက်ကြတယ်။ ပြောလည်း မပြောရဲ၊ ကိုယ်ပါ အကုသိုလ်ဖြစ်မှာ ကြောက်တာနဲ့ ဆိုင်ကို ပိတ်ပစ်လိုက်ရတယ်။ တပည့်တော် အမျိုးသားကဆိုရင် ဆွမ်းလောင်းချင်ရင် အမေ့အိမ်ဘက် သွားလောင်း။ အိမ်မှာ မလောင်းနဲ့။ ဘုန်းကြီးတွေကလည်း ယုံရတော့တာ မဟုတ်ဘူး။ အနုကြမ်းစီး ခံနေဦးမယ်ဆိုပြီး ပြောထားတော့ ဆွမ်းလောင်း ချင်ရင်တောင် ယောက္ခမအိမ်ဘက် သွားလောင်းရတယ်” လို့ ပြောပြသွားပါတယ်။

မန္တလေးက အင်ဂျင်နီယာလေး တစ်ဦးကတော့ “တပည့်တော်ကတော့ ဘုန်းကြီးတွေ ညစာစားတာ နားလည် ခွင့်လွှတ်ပေးလို့ ရပါတယ်။ တပည့်တော်လည်း မဟာဂန္ဓာရုံ ဆရာတော်ကြီးရဲ့ ဘုရားဥပဒေတော်ကြီး ကျမ်းဖတ်ထားတော့ အပြစ်အတိမ်အနက်ကို သိနားလည်ပါတယ်။ ဒါပေမဲ့ဘုရား ကိုယ့်ကျောင်းမှာပဲ သိုသိုသိပ်သိပ်လေး စားသင့်ပါတယ်။ အခုဟာ လွန်ကိုလွန်တယ်ဘုရား။ ညနေ ခုနစ်နာရီလောက်ဆိုရင် လက်ဖက်ရည်ဆိုင်တွေမှာ ဘုန်းကြီးတွေချည်းပဲ။ လူမြင်ကွင်းကြီးမှာ နန်းကြီးသုပ်၊ ထမင်းကြော်၊  ထမင်းဆီဆမ်းတွေကို ပလုတ်ပလောင်း အားပါးတရ စားနေကြတာ။ ဆိုင်ထဲ လူတွေ ဝင်လာလုိ့လည်း ရှက်သွားတဲ့ အမူအရာလေးတောင် မရှိဘူး။ တပည့်တော် သူငယ်ချင်းတွေထဲမှာက ဘာသာခြားတွေလည်း ပါနေတော့ အရမ်းအရှက်ရတယ်။ သူတို့က ဘာမှမပြောပေမယ့် သူတို့ မျက်လုံးကြည့်လိုက်ရင် ကိုယ့်ဘုန်းကြီးတွေကို ဘယ်လို မြင်နေတယ်ဆိုတာ သိနေရတယ်။ သူများဘာသာက ဘုန်းကြီးတွေက လူမြင်ကွင်းမှာ ဘာမှကိုးရိုးကားရား လုပ်တာ မတွေ့ရဘူး” ဆိုပြီး ညည်းညည်းညူညူနဲ့ ပြောပြပါတယ်။
မိမိအပေါ်မှာ လွန်စွာ ကျေးဇူးကြီးမားတော်မူတဲ့ ဝါတော် ခြောက်ဆယ်ကျော် မထေရ်ကြီးတစ်ပါးကို ပြီးခဲ့တဲ့ အပတ်ထဲက သွားရောက် ကန်တော့ပါတယ်။ ဆရာတော်ကြီးကခန်းနေ ဦးပဉ္စင်းနှစ်ပါး၊ ကပ္ပိယတစ်ဦးနဲ့ အတူနေတာပါ။ မိမိနဲ့ ပဋိသန္ဓာရ စကားပြောရင်း “အရင်လက ငါ့ကျောင်းကို တောင်ကိုရီးယား နိုင်ငံက မဟာယာန ဘုန်းကြီးတစ်ပါး ဒုလ္လဘရဟန်း လာဝတ်တယ်။  သူက အခါတိုင်းတော့ ချမ်းမြေ့ရိပ်သာမှာ ဝတ်တယ်လို့ ပြောတယ်။ အခုကတော့ မြန်မာနိုင်ငံက ဘုန်းကြီးတွေ ဘယ်လို နေသလဲထိုင်သလဲဆိုတာ သိချင်လို့ အပြင်ကျောင်းမှာ ဝတ်ချင်တယ် ပြောလို့ စကားပြန်က ငါ့ကျောင်း ခေါ်လာတာ။ ခုနစ်ရက် ဝတ်သွားတယ်။ ခုနစ်ရက်လုံးလည်း ဆွမ်းခံထွက်တယ်။ ဘေးကျောင်းတွေ မှာလည်းသူက ဝင်ထွက်ပြီး လေ့လာတယ်။ သိက္ခာချပြီး ပြန်မယ့်နေ့ကတော့ ငါ့ကိုကန်တော့ပြီး ဘုန်းကြီးတွေ အများစုက အတော်ဆိုးတာပဲ။ ဘုရားတောင် တစ်နေ့တစ်ခါ ရှိမခိုးကြဘူး။ စားလိုက်အိပ်လိုက် တီဗီကြည့်လိုက် ဘောပွဲလောင်းလိုက်နဲ့ အချိန်ကုန်နေတာကို တွေ့ရတယ်။ မဟာယာန ဘုန်းကြီးတွေထက်တောင် ထေရဝါဒဘုန်းကြီးတွေက ဆိုးနေတာ တွေ့ရတယ်။ အရှင်ဘုရားနဲ့ ကပ္ပိယကြီးကတော့ ဘုရားရှိခိုးလိုက်၊ တရားထိုင်လိုက်၊ တိရစ္ဆာန်လေးတွေကို တစ်နေ့နှစ်ခါ အစားကျွေးလိုက်နဲ့ တစ်နေ့တာကို ကုန်ဆုံးကြတာမို့ ကြည်ညိုမိပါတယ်။ ဘာပဲလိုလို အလှူခံပါဆိုပြီး သူ့ဖုန်းနံပါတ်တွေ၊ အီးလ်မေးလ် လိပ်စာတွေ ပေးသွားတယ်။ သူကတစ်နှစ်ကို မြန်မာပြည် နှစ်ခေါက်လောက် ပုံမှန်ရောက်နေတာမို့ ရောက်တိုင်း ဝင်ကန်တော့မယ်လို့လည်း ပြောသွားတယ်။ တို့ဘုန်းကြီးတွေက အကြည်ညို ခံနိုင်လောက်တဲ့ အနေအထား မရှိကြတာက များနေပြီ။ ငါကလည်း အသက်ကြီးနေပြီဆိုတော့ ကြောင်အို ကြွက်မလေး ဖြစ်နေပြီ။ ပြောလည်း နားမထောင်ကြတော့ဘူး” ဆိုပြီး မိန့်တော်မူပါတယ်။
မိမိအနေနဲ့ ဒီအကြောင်းတွေကို လုံးဝ မရေးချင်ပါဘူး။ ဒါပေမဲ့ အခုနောက်ပိုင်း မိမိဆီ လာရောက်ကြတဲ့ ဒကာ ဒကာမ အများစုက ရဟန်းတွေရဲ့ အပြုအမူတွေနဲ့ ပတ်သက်ပြီး လျှောက်ထား မေးမြန်းကြလွန်းလို့ ရေးသားရခြင်း ဖြစ်ပါတယ်။ တချို့ကတော့ “ဒီကောင်ကွာ လူသိရှင်ကြား အရှက်ခွဲနေတယ်” လို့ တွေးမိကြပါလိမ့်မယ်။ အဲလို မတွေးစေချင်ပါဘူး။ ဘာလို့လဲဆိုတော့ လူမသိသူမသိ ကိစ္စတွေကို မိမိကရေးနေတာ မဟုတ်ဘူး။ လူသိသူသိ ဖြစ်ပြီး လူတွေက လာလျှောက်ထားကြလို့ ဆင်ခြင် စဉ်းစားကြဖို့အတွက် သတိပေးတဲ့အနေနဲ့ ရေးသားလိုက် ရတာပါ။

လူတွေဟာ ထုတ်မပြောကြပေမယ့် သာသနာတော် အပေါ်ကို တစ်စတစ်စ အကြည်ညို ကင်းမဲ့နေပြီ၊ သာသနာတော်ကို အယုံအကြည် ကင်းမဲ့လာတဲ့ လူငယ်လေးတွေ များနေပြီဆိုတာ သိစေချင်တာပါ။ အတိတ်က လူငယ်လေးတွေက အနေအထိုင် ကောင်းတဲ့ ရဟန်းတော်တွေကို တွေ့မြင်ခဲ့ကြရပြီး သာသနာတော်ကို ကြည်ညို လေးစားရင်း ရှိတာကြောင့် သူတို့တွေ လူကြီး ဖြစ်တဲ့အခါမှာလည်း ဆက်လက် လှူဒါန်းနေကြလို့ ယနေ့ရဟန်းတွေ စားဝတ်နေရေးအတွက် မပူပင်မကြောင့်ကြရဘဲ သာသနာ အလုပ်တွေကို လုပ်နေနိုင် ကြတာပါ။ ယနေ့လူငယ်တွေ အနေအထိုင် မကောင်းတဲ့ ရဟန်းတွေကို မြင်တွေ့နေကြရတာကြောင့် သာသနာတော်ကို မကြည်ညို မလေးစားကြတော့ရင် အနာဂတ် သာသနာအတွက် အလွန်ရင်လေးဖွယ်ရာ အခြေအနေပါ။ ရဟန်းတော်တွေ အနေနဲ့ ဒါကို ကောင်းကောင်းကြီး သဘောပေါက်ဖို့ လိုပါတယ်။
အာပတ်သင့်တယ်ဆိုတဲ့ စကားကို လူအတော်များများ ကြားဖူးကြပါတယ်။ အာပတ်ဆိုတဲ့ စကားက ‘အာပတ္တိ’ ဆိုတဲ့ ပါဠိစကားကနေ ဆင်းသက်လာတဲ့ ပါဠိပျက်စကား ဖြစ်ပါတယ်။ ‘အာပတ္တိ=အာပတ်=ရဟန်းတော်များ ရောက်ထိုက်သောအပြစ်’ လို့ အဓိပ္ပာယ် ရှိပါတယ်။ ထိုအာပတ်ဟာ ၁။ ပါရာ ဇိကအာပတ် ၂။ သံဃာဒိသေသ်အာပတ် ၃။ ထုလ္လစ္စဉ်းအာပတ် ၄။ ပါစိတ် အာပတ် ၅။ ပါဋိဒေသနီယအာပတ် ၆။ ဒုက္ကဋ်အာပတ် ၇။ ဒုဗ္တာသိတ အာပတ်ဆိုပြီး အာပတ်ခုနစ်မျိုး ရှိပါတယ်။ ရဟန်းတစ်ပါးဟာ ပါရာဇိကအာပတ် မသင့်မချင်း ကျန်ဘယ်အာပတ်ပဲ သင့်ရောက်နေပါစေ ရဟန်းပါပဲ။ သို့သော် သီလမစင်ကြယ်တဲ့ ခပ်ဆိုးဆိုး ရဟန်းတစ်ပါးပေါ့။
ပါရာဇိကအာပတ် သင့်ရောက်တဲ့ အကြောင်းအခြင်းအရာက လေးမျိုး ရှိပါတယ်။ ၁။ ခြေလေးချောင်းထဲက အောက်ထစ်ဆုံးအားဖြင့် ကြောင်၊ ခြေနှစ်ချောင်းထဲက အောက်ထစ်ဆုံးအားဖြင့် ကြက်၊ အခြေမရှိသော သတ္တဝါထဲက အောက်ထစ်ဆုံးအားဖြင့် ငါးတို့ရဲ့ ကျင်ကြီးပေါက် ကျင်ငယ်ပေါက် ပါးစပ်ပေါက်ဆိုတဲ့ အပေါက်သုံးခုမှာ ဘယ်အပေါက်နဲ့မှ လိင်မဆက်ဆံရပါဘူး။ လိင်ဆက်ဆံရင် ပါရာဇိကအာပတ် သင့်ပါတယ်။ ၂။ တစ်မတ်နဲ့ တစ်မတ်အထက် ငွေကြေးကိုဖြစ်စေ၊ ပစ္စည်းကိုဖြစ်စေ ခိုးယူရင် ပါရာဇိက အာပတ်သင့်ပါတယ်။ ၃။ လူသတ်ရင် ပါရာဇိကအာပတ် သင့်ပါတယ်။ အောက်ထစ်ဆုံးအားဖြင့် ကိုယ်ဝန် ပျက်ဆေး ပေးရင်တောင်မှ ပါရာဇိက အာပတ် သင့်ပါတယ်။ တိရစ္ဆာန်တွေကို သတ်ရင်တော့ ပါဏာတိပါတကံတော့ ထိုက်ပေမယ့် ပါရာဇိက အာပတ်တော့ မသင့်ပါဘူး။ ပါစိတ်အာပတ်ပဲ သင့်ပါတယ်။ ၄။ ဈာန်မဂ်ဖိုလ် မရရှိပါဘဲ ဈာန်မဂ်ဖိုလ် ရရှိပါတယ်လို့ မဟုတ်မမှန် ပြောရင် ပါရာဇိကအာပတ် သင့်ပါတယ်။

ပါရာဇိကအာပတ်=သာသနာတော်မှ ဆုံးရှုံး သွားစေတတ်သော အပြစ်လို့ အဓိပ္ပာယ် ရှိပါတယ်။ ပြောခဲ့တဲ့ စည်းမျဉ်းလေးခုထဲက တစ်ခုခုကို  ကျူးလွန်မိတဲ့ ရဟန်းဟာ သီလတည်းဟူသော ဦးခေါင်း ပြတ်ကျသွားပြီ ဖြစ်တဲ့  အတွက်ကြောင့် သူ့မှာ လုံးဝ သီလမရှိတော့ဘဲ ရဟန်း မဟုတ်တော့ပါဘူး။ လူဖြစ်သွားပါပြီ။ လူမှ ရိုးရိုးလူ မဟုတ်တော့ပါဘူး။ လူဖြစ်ရှုံးတဲ့လူပါ။ ဘာကြောင့်လဲဆိုတော့ ပါရာဇိကကျတဲ့ ရဟန်းဟာ ဒီဘဝမှာ ဘုရားအမှူးရှိသော ရဟန္တာအပါး တစ်သောင်းနဲ့ သိမ်ထဲမှာ ကမ္မဝါ ဖတ်ရင်တောင်မှ သူဟာရဟန်း မဖြစ်နိုင်တော့ပါဘူး။ ပါရာဇိကအာပတ် သင့်တာကို ရဟန်းတွေက ပါရာဇိက ကျတယ်လို့ ခေါ်ဝေါ် သုံးစွဲကြပါတယ်။ အချို့ ခေတ်ရဟန်းငယ်တွေကတော့ ‘ဇိသွားပြီ’ လို့ ပြောကြပါတယ်။
(ရဟန်းတော်များ လိုက်နာကျင့်သုံးရသော ဝိနည်းခေါ် ကျင့်ဝတ် စည်းမျဉ်းစည်းကမ်းများကို တိတိကျကျ သိရှိနားလည် လိုကြသောသူများ မြန်မာစကားပြေများဖြင့် ရေးသားထားသော ဘုရား ဥပဒေတော်ကြီးကျမ်း သို့မဟုတ် ရဟန်းကျင့်ဖွယ် နှစ်ရာနှစ်ဆယ့် ခုနစ်သွယ် စာအုပ်များတွင် လေ့လာ ကြည့်ရှုကြပါရန်)

ဘောလုံးကန်ခြင်း၊ ညစာစားခြင်း၊ အရက်သောက်ခြင်း၊ ဗေဒင်ဟောခြင်း၊ ဆေးကုပေးခြင်း ဆိုတာတွေက ကျန်အာပတ်ခြောက်မျိုးထဲ အကျုံးဝင်တာမို့ အဲဒီအမှုတွေကို ကျူးလွန် နေပေမယ့်လည်း ပါရာဇိက မကျတာကြောင့် ရဟန်းပါပဲ။ ဒါကြောင့်လည်း ရဟန်းတွေ အတော်များများက ကျန်အာပတ် ခြောက်မျိုးကို ရဲရဲဝံ့ဝံ့ ချိုးဖောက်နေကြခြင်း ဖြစ်ပါတယ်။ ပါရာဇိက မကျဘူး ဆိုပေမယ့် ကျန်အာပတ် ခြောက်မျိုးထဲက ဘယ်အာပတ်ပဲ သင့်နေပါစေ အာပတ်ပြေအောင် တရားအားလျော်စွာ မကုစားဘဲနေရင် ဘယ်လောက်ပဲ ဝီရိယတွေ ထက်သန်စွာနဲ့ တရားအားထုတ်ပါစေ အဲဒီရဟန်းဟာ မဂ်ဖိုလ် နိဗ္ဗာန်ကို မရရှိနိုင်ပါဘူး။ ဘာကြောင့်လဲဆိုတော့ သူဟာ သီလမစင်ကြယ်သော ရဟန်းမို့လို့ပါ။ မဂ်ဖိုလ်နိဗ္ဗာန်ဆိုတာ သီလမစင်ကြယ်ရင် မရှိနိုင်တဲ့ အရာတွေပါ။ နောက်ပြီးတော့ ဒီအာပတ်တွေဟာ ကျူးလွန်တဲ့ ရဟန်းကို ရဟန်းဘဝ မဆုံးရှုံးစေနိုင်ပေမယ့် ဒီအာပတ်တွေကို မကုစားဘဲ အာပတ်တန်းလန်းနဲ့ သေရင်တော့ အပါယ်ဘုံ သက်ရောက်စေနိုင်ပါတယ်။

၁။ ကောင်းပါပြီဘုရားဟု စကားတော်ကို လက်ခံနိုင်ခြင်းအကျိုး။
၂။ သံဃာတော်အများ၏ ချမ်းသာစွာ နေထိုင်ရခြင်းအကျိုး။
၃။ အလဇ္ဇီဒုဿီလ (ရဟန်းယုတ်) များကို နှိမ်နင်းနိုင်ခြင်းအကျိုး။
၎။ သီလချစ်ခင် သူတော်စင်ရဟန်းတို့ ချမ်းသာစွာ နေထိုင်နိုင်ခြင်း အကျိုး။
၅။ ယခုဘဝ၌ ဘေးရန်အန္တရာယ်တို့ကို စောင့်ရှောက်ပြီးဖြစ်ခြင်း အကျိုး။
၆။ နောင်တမလွန်ဘဝ၌ ဘေးရန်အန္တရာယ်ကို ပယ်နိုင်ခြင်းအကျိုး။
၇။ သာသနာတော်ကို မကြည်ညိုကြသေးသူများ ကြည်ညိုလာစေခြင်း အကျိုး။
၈။ ကြည်ညိုပြီးသူများ ယုံကြည်မှု သဒ္ဓါတရားတိုးပွားစေခြင်းအကျိုး။
၉။ သူတော်ကောင်းတရား ရေရှည်တည်တံ့နိုင်စေခြင်းအကျိုး
၁၀။ ဝိနည်း ကိုယ်ကျင့်တရားများကို ချီးမြှောက်ခြင်းအကျိုးဆိုတဲ့ အကျိုးဆယ်မျိုး ရရှိစေဖို့အတွက် ရှင်တော်မြတ်ဘုရားက ဝိနည်း ဥပဒေတော်ကို ပညတ်ထားတော်မူခြင်း ဖြစ်ပါတယ်။
ဘောလုံးကန်ခြင်း၊ ညစာစားခြင်း၊ အရက်သောက်ခြင်း၊ ဗေဒင်ဟောခြင်း၊ ဆေးကုပေးခြင်း ဆိုတာတွေက ပါရာဇိက မကျပေမယ့် သာသနာတော်ကို  ကြည်ညိုပြီး သူများအကြည်ညို ပျက်စေနိုင်သလို မကြည်ညိုသေးသူများရဲ့ ကဲ့ရဲ့အတင်းစကားဆိုမှုကို ခံရစေပါတယ်။ ရဟန်းမှန်ရင် ဒီလိုတွေချည်း နေမှာပဲဆိုပြီး ရဟန်းကောင်းတွေကိုပါ ထိခိုက် နစ်နာစေပါတယ်။ သာသနာတော်ကို အကြည်ညို ပျက်ပြီဆိုတာနဲ့ သာသနာတော်ကို ထောက်ပံ့ပေးကမ်း လှူဒါန်းကြတော့မှာ မဟုတ်ပါဘူး။ သစ်တစ်ပင်ဟာ ရေမြေဆီသြဇာ မရရှိရင် ကောင်းစွာ မစည်ပင်နိုင်ခြင်း၊ ခြောက်ကပ်ညှိုးနွမ်းပြီး သေဆုံးရခြင်းဆိုတဲ့  အကျိုးတရားများကို ဖြစ်စေသလို ဒကာဒကာမများရဲ့ ထောက်ပံ့ပေးကမ်း လှူဒါန်းမှုကို မရရှိတော့တဲ့ သာသနာတော်ကြီးအနေနဲ့ စင်စင်ကြယ်ကြယ် ရေရှည် တည်တံ့နိုင်မှာ မဟုတ်ပါဘူး။ ဒါကြောင့် သာသနာတော်ကြီးကို အမှန်တကယ် ချစ်မြတ်နိုးကြတယ်ဆိုရင် ဒီအမှုတွေကို ပြုထိုက်မပြုထိုက် လိုက်နာထိုက် မလိုက်ထိုက် ဆိုတာကို ရဟန်းတော်တွေ အနေနဲ့ လေးလေးနက်နက် ဆင်ခြင်စဉ်းစား သင့်ပါတယ်။

No comments: